Panangimano ed Pankaabigan na Matatatken
“Imanoen, aliwan diad kabukoran a pankaabigan ed saray dilin pamaakaran yo, noagta ontan met ed kabukoran a pankaabigan na saraman so arum.”—FILIPOS 2:4.
1, 2. (a) Panon so impangidemostra na inmunan siglon mananguley ya ulop na interes ed nakakaukolan na saray matatatken? (b) Anto so ebidensya a say kimey na panagpulong so agpinaulianan?
AGNAMBAYAG kayari na Pentecostes 33 K.P. et “linmesa so talabutob” [ed Kristianon kongregasyon] diad biang na saray Judion mansasalita na Griego a sumpad saray Judios a mansasalita na Hebreo, lapud saray babalo ra so napapaulianan diad inagew-agew a panangibunog [na tagano ed saray mankaukolan].” Andi-duaruwan pigara ed sarayan babalo so matatatken tan agla makayarin manuporta ed inkasikara. Diad anggan anton pamaakaran, saray apostoles a mismo so sinmalet, inkuan da: “Mananap kayo na pitoran apamintuaan a lalaki a manlapud limog yo, napno na espiritu tan kakabatan, pian sikara so turoen tayon mangasikaso ed sayan nakakaukolan a kimey.”—Gawa 6:1-3.
2 Sirin saray inmunan Kristianos so nanmoria a say panangasikaso ed saray mankaukolan et bilang “nakakaukolan a kimey.” Taotaon ed saginonor et insulat nen babangatan a Santiago: “Say nengneng na panagdayew a malinis tan andi-tilol ed imaton na Dios tayo tan Ama et saya: say pangasikaso ed saray ulila tan babalo ed kairapan da.” (Santiago 1:27) Kasin kabaliksan na saya, sirin, a say lawas importantin kimey na panagpulong so pinaulianan? Andi, lapud say salaysay na Saray Gawa so mangipapanengneng a kayarin manepeg a naorganisa so kimey na panagpulong, “say salita na Dios so nantultuloy a binmulaslas, tan say bilang na babangatan so nantultuloy a dinmakel a tuloy ed Jerusalem.”—Gawa 6:7.
3. Anton panamaseseg so niiter ed Filipos 2:4, tan akin a nagkalautlan matukotukoy natan?
3 Natan et aarapen tayo so “maatap iran panaon a mairap a pilimogan.” (2 Timoteo 3:1) Say pangasikaso ed pankaukolan na bilay na pamilya tan diad sekular a kimey so nayarin mangupot lawari na biskeg tayo—odino pilalek—diad pangimano ed pankaukolan na saray matatatken. Matukotukoy, sirin, a sikatayo so papasesegen na Filipos 2:4 a “mangimano, aliwan diad kabukoran a pankaabigan ed saraman so dilin pamaakaran [tayo], noagta ontan met ed kabukoran a pankaabigan na saraman so arum.” Panon so pakagawa ed saya ed asimbang, praktikal a dalan?
Panangigeter na Galang ed Saray Babalo
4. (a) Akin tan panon so “impamagalang” na inmunan-siglon kongregasyon ed saray babalo? (b) Kasin saray ontan a probisyon so naynay a nakaukolan?
4 Diad 1 Timoteo kapitulo 5, ipapanengneng nen Pablo no panon so impangasikaso na saray inmunan Kristianos ed saray matatatken a babalo ed kongregasyon. Binilin to si Timoteo: “Igalang moray babalo a sikara so peteg a babalo.” (Bersikulo 3) Saray matatatken a babalo so inimano a bilang partikular a mankanepegan na panangawat ed galang diad porma na maparanay a pananuporta ed pinansyal. Saray ontan so apegpeg a manlapud amin a nanengneng a paraan na suporta tan nayarian da lambengat ya ‘iteen so ilalo ra ed Dios tan mantultuloy ed saray pikekerew tan pikakasi ed labi tan agew.’ (Bersikulo 5) Panon so inkaebatan na saray pikakasi ed sustento? Diad panamegley na kongregasyon. Diad organisadon paraan, saray manepeg a babalo so naikdan na kabkaabigan a panagbilay. Siempre, no say sakey a balo so walaan na pinansyal, odino kakanayon a makayarin manuporta ed sikato, saray ontan a probisyon so agnakaukolan.—Bersikulo 4, 16.
5. (a) Panon a nayarin arum a babalo so ‘naplag ed kagletan na laman’? (b) Kasin say kongregasyon so naobligan manuporta ed saray ontan?
5 “Balet say [balo] a manbilay ed saray likeliket,” impasakbay nen Pablo, “so inatey [ed espiritual] anggamano sikato so manbibilay.” (Bersikulo 6) Ag-impaliwawa nen Pablo no panon ya arum so, a singa literal ya impangipatalos ed satan na Kingdom Interlinear, “manuugali ed likeliket.” Arum so nayarin mibabakal diad saray “seksual a kagletan.” (Bersikulo 11) Anggaman kuan, unong ed Liddell & Scott’s Greek-English Lexicon, say “manuugali ed likeliket” so nayarin anaglawi ed ‘pambibilay a mainawa odino diad alablabas ya inawa o kagletan.’ Anganko, sirin, arum so nankaliktan ed kongregasyon a mamayaman ed sikara, a sikara so gastosan da na alablabas, dilin-kagletan a bilay na agla inkasimbang. Antokaman so kipapasen, impanengneng nen Pablo a saray ontan so agmanepeg a mangawat ed pananuporta na kongregasyon.
6, 7, tan paimanod-leksab. (a) Anto “so listaan”? (b) Akin a saramay andian ni na 60 edad so agmakanepegan a mangawat na suporta? (c) Panon so impanulong nen Pablo ed saray malalangwer a babalo diad pangawat ed ambelat a “kaukom”?
6 Insan imbaga nen Pablo: “Komon ta say sakey a balo so nilista [ed saraman so mangawat na suporta ed pinansyal] ya ag-onkulang ed anemaplon taon so edad to.” Diad agew nen Pablo et say sakey a biin manedad na onlampas ed 60 so mapatnag ya impasen ya agla makayarin manuporta ed inkasikato tan nayarin agla miasawa lamet.a “Diad biek a dapag,” inkuan nen Pablo, “ya ag-awaten iray walad kalangweran a babalo [ya ilista], tano say seksual a kagletan so onsabi ed baetan da tan say Kristo, labayen da so miasawa, a nawalaan na panangukom lapud impulisay da so inmunan balikas na pananisia ra.”—Bersikulo 9, 11, 12.
7 No “say listaan” so lukas ed saray malalangwer a babalo, arum so nayarin mangganat a mangibaga ed getman mansiansian walad kasuloan. Legan ya onlabas so panaon, anggaman kuan, sikara so nayarin nairapan a mangontrol ed “seksual a kagletan” tan labayen da so miasawa lamet, a ‘nawalaan na panangukom diad impangipulisay da ed inmunan balikas na pananisia ra’ a mansiansian walad kasuloan. (Ipareng so Eclesiastes 5:2-6.) Inamper nen Pablo so ontan iran problema, ya intuloy to, “Pilalek kon saray malalangwer a babalo so miasawa, a nawalaan na saray anak.”—Bersikulo 14.
8. (a) Panon a saray totontonen nen Pablo so analimbeng ed kongregasyon? (b) Kasin saray mankaukolan a malalangwer a babalon bibii odino matatatken a lalaki so naasikaso met?
8 Nilimitaan met na apostol so pangipalista ed saraman so walaan na andukey a rekord na maabig iran Kristianon kimey. (Bersikulo 10) Say kongregasyon sirin so aliwan sakey a “welfare state” a para ed saray mangingiras odino maagum. (2 Tesalonica 3:10, 11) Balet kumusta iraman so matatatken a lalaki odino malalangwer a babalo? No saray ontan so napelag ed pankaukolan, say kongregasyon so andi-duaruwan mangasikaso ed sikara diad indibidual a paraan.—Ipareng so 1 Juan 3:17, 18.
9. (a) Akin a saray oksuyan diad pangasikaso ed saray matatatken natan so miduma ed samay agawa nen inmunan siglo? (b) Anto so panulong na impaningbat nen Pablo ed saray babalo ed 1 Timoteo kapitulo 5 ed sikatayo ya apresyaen natan?
9 Saray ontan ya oksuyan so nayarin magenap ed pankaukolan na saray inmunan-siglon kongregasyon. Balet singa ibabaga na Expositor’s Bible Commentary: “Natan, tekep na saray naawat a paseguro, seguridad ed sosyal, tan saray pankanawnawa ed trabaho, say kipapasen so miduman tuloy.” Bilang nansumpalan na nauman a retrato ed sosyal tan ekonomya, mataltalag a nakaukolan ed saray kongregasyon natan so pamasiansia ed saray listaan na manangawat na suporta ed mamatatken. Anggaman kuan, saray salita nen Pablo ed si Timoteo so ontulong ed sikatayon mangapresya: (1) Saray problema na matatatken so pampagaan na interon kongregasyon—nagkalautla ed saray mamatatken. (2) Say panangumponi ed matatatken so nepeg a naorganisan manepeg. (3) Say ontan a kakumponi so nigeter ed saraman so tuan walad pankaukolan.
Bilang Mamatatken, Imanoen Iray Pankaabigan Da
10. Panon so pakapangipangulo na mamatatken natan diad pangipanengneng na interes ed saray matatatken?
10 Panon so pangipangulo na saray manangasikaso natan diad pangipanengneng na interes ed saray matatatken? Panapanaon ya isakup da so pankaukolan na matatatken diad pantongtongan iran punto ed saray miting da. Sano nakaukolan so espesipikon tulong, nayarian dan iyareglo so kiiter na satan. Nayarin agda niiter a personal so panangasikaso, unong ta walaray mabetbet a dakel a mabulos—a pati saray tobonbalo—ed kongregasyon a makatulong. Anggaman kuan, sikara so maapit a panangasikaso ed ontan a panangumponi, angangko diad panuro ra ed sakey ya agin lakin mangipaakar na panangasikason iter ed sinansakey.
11. Panon so nayarin pangikabat na mamatatken ed inkasikara diad saray nakakaukolan na matatatken?
11 Insimbawa nen Solomon: “Nepeg mon amtaen so indengan na pulok mo.” (Uliran 27:23) Saray manangasikaso sirin so personal ya ondalaw ed saray matatatken ta pian nengnengen da no panon kaabig so “pangipanabang . . . unong ed nakakaukolan da.” (Roma 12:13) Onia so impangibaga na sakey a managbiahen manangasikaso: “Arum a matatatken so independentin tuloy, tan say basta panepet ed sikara no anto so nakaukolan a gawaen so aliwan maabig. Sankaabigan a tebeken no antoray nakaukolan a gawaen tan sumpalen!” Diad Hapon et aromog na arum iran manangasikaso a say sakey ya agin biin manedad na 80 so mankaukolan na ontan a panangimano. Inreport da: “Inimano mi natan a wala so sakey a mitongtong ed sikato a mamiddua ed sanagew, kabuasan tan labi, diad ibisita odino itawag ed telepono.”—Ipareng so Mateo 25:36.
12. (a) Panoy pakaimano na mamatatken a saray matatatken so nagunggunaan diad saray miting ed kongregasyon? (b) Anton maabig ya usar so nayarin nagawaan na saray tapes a pinawala na Sosyedad?
12 Saray manangasikaso met so manpaga a saray matatatken so nagunggunaan ed saray miting ed kongregasyon. (Hebreos 10:24, 25) Kasin nakaukolan na arum so transportasyon? Kasin saray arum so basta agmakayarin “ontalineng tan mantebek” ed saray miting lapud kakapuyan na layag? (Mateo 15:10) Angangko ta praktikal so pangiter ed sikara na headphone. Mipadpara, pigara ed saray kongregasyon natan so mangikokonekta ed telepono ta pian saray agmakayari so makapandengel ed abung. Arum so mangirerekord ed saray miting diad saray tapes a para ed saraman so mansasakit ya agmakaantendi—diad arum iran kipapasen et manaliw ira na tape recorders a para ed sikara. Tan totongtongen so nipaakar ed tapes, sakey a matatken ed Alemanya so angikuan: “Siak so binmisita ed pigaran matatatken a basta akayurong ed arap na telebisyon tan manbabantay ed saray programan mairap a deskribien a sikara so makapabiskeg ed espiritual.” Akin a sikara so agpasesegen ya ontalineng ed saray tapes a pinawala na Sosyedad, a singa saramay nankarga ed saray Kingdom melodies tan panagbasa ed Biblia?
13. Panon so katulongan na saray matatatken a mansiansian aktibo diad pananangiyabawag ed Panarian?
13 Arum iran matatatken a membro na kongregasyon so nagmaliw ya iregular odino inaktibo a bilang managpulong. Say edad, anggaman kuan, so agnakaukolan a mangamper ed sakey diad panangiyabawag ed “maong a balita na Panarian.” (Mateo 24:14) Arum so nayarin onkiwas ed basta pangimbitan mikimey ed sikayo diad lawak na kimeyan. Angangko ta nayarian yon parngaten so aro ra ed panagpulong diad pangipanabang ed sikara na saray eksperiensia ed lawak na kimeyan. No problema so isegep ed takayan, iyuksoy ed sikara so pankimey ed saray apartment a walaan na elevator odino diad saray ayaman ya andian na takayan. Saray arum a manangipalapag so nayarin mangimbita met ed saray matatatken a miulop ed sikara diad saray panangiyaral ed Biblia—odino gawaen so panangiyaral ed abung na sakey a matatken.
14 tan kahon. (a) Anto so nayarin gawaen na saray mamatatken no sakey ya agin matatken a laki odino bii so mansumpal ed graben kairapan ed pinansyal? (b) Panon so impangabet na arum ed kongregasyon diad pankaukolan na saray matatatken lan manangipalapag?
14 ‘Say kuarta so sakey a salimbeng.’ (Eclesiastes 7:12) Ingen dakel a matatken ya agin laki odino agin bii so wala ed inkaid-irap diad pinansyal tan andian na kakanayon a mabulos ya ontulong. Saray sinansakey ed kongregasyon, anggaman kuan, so gendagendat a maliket ya ontulong sano naamtaan da so pankaukolan. (Santiago 2:15-17) Saray mamatatken met so nayarin mangusisa ed saray serbisyo na gobierno odino sosyal, saray paseguro, pension, tan arum nira, a wala. Diad arum iran dalin, anggaman kuan, saray ontan a serbisyo so mairap ya onsabi, tan nayarin anggapo so kasandi noagta say panumbok ed padron ed 1 Timoteo kapitulo 5 tan iyuksoy ed interon kongregasyon so pangitarya na tulong. (Nengnengen so Organized to Accomplish Our Ministry, pahina 122-3.)
Saray manangipalapag ed Nigeria so maparanay a tinmulong ed sakey a manedad na 82 taon a regular payunir tan say asawa to diad saray materyal a regalo. Nen inyeskedyul na gobierno a gebaen so paalagey a panaayaman da, say kongregasyon so angimbita ed sikaran onalis ed sakey a kuarton nikabit ed Kingdom Hall.
Diad Brazil et sakey a kongregasyon so angupa na sakey a ners a mangasikaso ed sanasawan matatken. Ontan met, sakey ya agin bii so apabtangan a manlinis ed abung, mangiparaan na tagano ra, tan mangasikaso ed arum iran pisikal a nakakaukolan da. Kada bulan et say kongregasyon so mangigagana na pundo ya usaren da.
15. (a) Kasin walaray limitasyon diad tulong a nayarin iter na kongregasyon? (b) Panon a say simbawa ed Lucas 11:34 so nayarin matukoy ed saray pigara a nayarin alablabas a mankerew?
15 A singa nen inmunan siglo, saray ontan a probisyon so para ed saray manepeg a tuan mankaukolan. Saray manangasikaso so agnaobligan mangitarya na subsubran kerew diad agmakatunongan iran pankaukolan na panangimano. Saray matatatken, met, so nepeg a mamasiansia na ‘simplen mata.’—Lucas 11:34.
Bilang Sinansakey, Imanoen Iray Pankaabigan Da
16, 17. (a) Akin ya importante ed arum nilikud ed saray mamatatken so pangipanengneng na interes ed matatatken? (b) Panon so nayarin ‘pakaanamot na panaon’ na saray okupadon manangipalapag a para ed saray matatatken?
16 Agni abayag et sakey ya agin biin matatken so inloob ed ospital. Say nalmoan a sakit to et malnutrisyon. “No dakel komon ed kongregasyon so angipanengneng na personal ya interes ed sikato,” so insulat na sakey a matatken, “anganko ta saya so ag-agawa.” On, aliwan saray mamatatken lambengat so nepeg a mangipanengneng na interes ed saray matatatken. Imbaga nen Pablo: “Sikatayo so kabiangan a kayarian na balang sakey.”—Efeso 4:25.
17 Andi-duaruwan arum ed sikayo so nayarin nabebelatan la ed saray personal a responsabilidad. Balet ‘imanoen, aliwan diad saray kabukoran a pankaabigan ed saray dilin pamaakaran yo.’ (Filipos 2:4) Tekep na manepeg a personal ya organisasyon, nayarian yon mabetbet ya ‘anamoten so panaon.’ (Efeso 5:16) Alimbawa, sarag yo kasin dalawen so sakey a matatken diad kayari na kimey ed lawak? Saray simplen agew so nagkalautlan makapaermen a panaon ed arum. Saray tin-edyer, met, so mibiang diad idalaw ed saray matatatken tan mankimey a para ed sikara. Impikasi na sakey ya agin bii a tinulongan na sakey a tobonbalo: “Salamat ed sikayo Jehova nipaakar ed si tobonbalon Agin John. Agaylan sikato so maabig a too.”
18. (a) Akin a say pitotongtong ed sakey a matatken so nayarin mairap no maminsan? (b) Panon a say idalaw na sakey odino pitongtong ed sakey a toon matatken so nagawan makapaalagey?
18 Diad saray miting, kasin basta iter yo lambengat ed saray matatatken so pasaray a panangibano? Ipasen, nayarin aliwan mainomay so pitongtong ed sakey a makapuy so layag to odino nairapan a mansalita. Tan lapud onkakapuy a bunigas, aliwan amin a matatatken so walaan na liknaan a malikeliket. Anggaman kuan, “magmaong so sakey a maanos.” (Eclesiastes 7:8) Tekep na daiset a sagpot, say peteg a “pampapasesegan” so nayarin nagawa. (Roma 1:12) Salien ya ibinsabinsa so sakey ya eksperiensia ed lawak na kimeyan. Ipanabang so sakey a punton abasa yo ed Say Panag-Bantayan odino Awake! Odino lalon magmaong ni, ontalineng. (Ipareng so Job 32:7.) Saray matatatken so walaan na daakan ya ipanabang no sikara so abuloyan yo. Inako na sakey a matatken: “Say idalaw ed satan ya agin matatken so angiter na baleg a kaabigan ed siak.”
19. (a) Say panangimano tayo ed matatken so ninatnat ed siopa? (b) Anto so arum ed saray dalan a nayarin sikatayo so mansumpal a makatulong ed saray pamilya a mangaasikaso ed matatken laran atateng?
19 Agta say panangimano yo ed saray matatatken so ninatnat met ed saray pamilyan mangaasikaso ed sikara? Sakey a sanasawan mangukumponi ed ontatatken laran atateng so angibalita: “Imbes a sikami so pasesegen, arum ed kongregasyon so nagmaliw a kritiko. Imbaga na sakey ya agin bii: ‘No itultuloy yon saewen iray miting, sikayo so mansakit ed espiritual!’ Balet ta sikato so aliwan mabulos a manggawa na antokaman ya ontulong ed sikamin lalon makaatendi ed saray miting.” Say mipadparan makapadismaya et saray kunwarin sipan a singa, ‘No nakaukolan mo so tulong, ibagam labat ed siak.’ Saraya so mabetbet a mansumpal ed basta pangibaga, “Naimengan ka tan napesel.” (Santiago 2:16) Agaylan mas maabig so pangipatalos yo ed panangimano yo diad aksion! Inreport na sakey a sanasawa: “Saray kakaaro so makapakelkelaw tan matulong! Arum so mangasikaso ed si Mom ed duaran agew ed sakey a panaon ta pian sikami so makapainawa. Arum so mangitagar ed sikato diad saray panangiyaral ed Biblia. Tan peteg a mamapaseseg ed sikami sano arum so mangusisa ed kipapasen to.”
20, 21. Anto so nayarin gawaen na saray matatatken ya itulong ed saraman so mangukumponi ed sikara?
20 Diad malaknab et saray matatatken tayo so nanaasikason maong. Anggaman kuan, anto so nagawaan na saray matatatken a Tastasi a mismo ta pian say ontan a kimey so nagawa a tekep na gayaga tan aliwan diad panermen? (Ipareng so Hebreos 13:17.) Mikoopera ed saray oksuyan a gawaen na saray mamatatken diad kaasikaso yo. Ibalikas so pisasalamat tan apresasyon ed antokaman a gawa na panangasi, tan paliisan so pagmaliw ya alablabas a makerew odino alablabas a kritiko. Tan anggamano saray sulit tan ot-ot na inkatatken so petepeteg, salien ya ipatnag so masayaksak, positibon awawey.—Uliran 15:13.
21 ‘Saray agagin lalaki so makapakelaw. Agko amta so gawaen ko no anggapo ra,’ so nadngel ya imbaga na dakel iran matatatken. Anggaman kuan, say manunan responsabilidad diad pangumponi ed saray matatatken so onsaral ed saray anak da. Anto so lalanoren na saya, tan panon so sankaabigan a pakatalona ed sayan angat?
[Paimano ed Leksab]
a Tutukoyen na Levitico 27:1-7 so karondon na saray sinansakey a ‘niyapay’ (diad panamegley na sakey a sipan) ed templo a bilang komikimey. Say presyo na dondon so manduruma unong ed edad. Diad edad a 60 et sayan presyo so onabeba, mapatnag lapud say too ed ontan ya inkatatken so aliknan agla makayarin mankimey na impasya a singa gawaen na malalangwer. Malaknab ya ibabaga na The Encyclopædia Judaica: “Unong ed Talmud, say inkatatken . . . so onggapo ed 60.”
Kasin Nanonotan Yo?
◻ Antoran probisyon so ginawa nen inmunan siglo a para ed matatatken a babalo?
◻ Panon so pangorganisa na saray manangasikaso diad panangumponi ed saray matatatken ed kongregasyon?
◻ Panon so pakapangipanengneng na sinansakey ed kongregasyon na interes ed saray matatatken ya agagin lalaki tan bibii?
◻ Anto so nagawaan na saray matatatken ya itulong ed saraman so mangisasaklang ed sikara na panangasikaso?
[Kahon ed pahina 16]
Pananulong ed Matatatken—No Anto So Gagawaen na Arum
Sakey a kongregasyon ed Brazil so akaromog na kumbenientin dalan diad pangasikaso ed pisikal a nakakaukolan na sakey ya agin laki a manaayam diad asingger ed Kingdom hall da: Say grupo na panagaral na libro ya apabtangan a manlinis ed hall so manlinis met ed abung to.
Sananey a kongregasyon diman so akaromog na simplen paraan diad pamasiansia ed sakey ya agin lakin agmakayari ya aktibo ed Teokratikon Eskuelaan na Ministeryo. Sano nasabi so betang ton mangiter na sakey a paliwawa, napabtangan so sakey ya agin laki a mangitagar na duara odino taloran manangipalapag ya ondalaw ed agin laki. Lukasan na pikakasi so antikey a miting, tan say agin laki so mangisalaysay ed asainmin to. Niiter so nakakaukolan a konseho. Agaylan makapaseseg so nansumpalan na sayan imbisita!
Saray managbiahen manangasikaso so angiletneg na maabig ya ehemplo diad panangipangulo. Diad sakey a kongregasyon sakey ya agin lakin matatken a pirmi ed wheelchair so nagmaliw a maisasanok tan bilang nansumpalan et mataltalag a nabisita. Sakey a managbiahen manangasikaso, anggaman kuan, so angiyuksoy na pangiter ed agin laki na pribadan pambantay ed paliwawan slide. Say agin lakin matatken so apakiwas ed saray lua diad anengneng to. Inkuan na manangasikaso: “Aliknak a siak so atumangan na baleg diad impakanengneng no panon a say melag ya imano tan aro so mangitarok na ontan iran resulta.”
Arum a mamatatken ed Nigeria so nanggawa na panagpastol ya idadalaw ed sakey a matatken lan agin laki tan nalmoan da a sikato so mansasakit na grabe. Tampol a sikato so imbatik ed ospital. Say matatken ya agin laki so aromogan a mankaukolan na malaknab a pampatambal, balet ta agto nayarian a bayaran. Sanen apakabatan so kongregasyon ed pankaukolan to, saray manangipalapag so sinmabi a walaan na magenap a kuartan pangasikaso ed gastosen to. Duaran mamatatken so nansublayan a mangilugan ed sikato ya onla tan ompawil ed ospital, anggaman saya so mankaukolan na agda iloob ed trabaho. Sikara so walaan na gayaga, anggaman kuan, diad pakanengneng ed agin onaabig ed sakit to tan sikato so nan-auxiliary payunir ya anggad impatey to ed apatiran taon diad saginonor.
Diad Pilipinas sakey ya agin biin matatken so andian na pamilya. Say kongregasyon so nanggawa na oksuyan diad kaasikaso to legan na taloran taon na impansakit to. Sikato so inikdan da na melag a pasen a panayaman, inyakaran da na kanen to ya inagew-agew, tan inasikaso ra so pisikal a kalinisan to.
[Litrato ed pahina 15]
Amin so nawalaan na pibiang diad panamagalang ed saray matatatken tayo ed kongregasyon