“Manmatalek ed Si Jehova” a Kumbension Distrito​—Agsasaewen!

Taloran nagnap, makatumang iran agew na panangibangat ed Biblia tan mabunigas a Kristianon panlilimog so manaalagar ed sikayo diad “Manmatalek ed Si Jehova” a Kumbension Distrito na saray Tasi nen Jehova. Legan na Disyembre tan Enero et 32 a kumbension so niyeskedyul ed interon Pilipinas lambengat, sirin wala so sakey ya ag-arawi ed pasen yo. Iplano so iyatendi a manlapud manangilukas a sesyon ya onggapo ed alas 9:10 n.k. Biernes, tan mantultuloy ya anggad panangisaran sesyon ed Simba na ngarem.

Say manangilukas a sesyon so mangipabitar ed pakaaralan a paliwawan “Sakey a Totoon Nibiig a Manlapud Mundo.” Diad ngarem, nipaarap so pranka tan mabitar a konseho ed saray atateng tan insan diad saray tobonbalo. Saray tobonbalo so natulongan a manbantay a sumpad panagbilay a nayarin tawagen na doblen bilay. Insan sayan pamaakaran so nipabitar diad makatenyeg-puson modernon-agew a drama.

Say Sabado na kabuasan so mangipabitar ed paliwawa diad dedikasyon tan bautismo, tan ontan met ed instruksion ed saray pamaakaran a nayarin pangipatnagan tayo na panagmatalek ed si Jehova, a mitukoyan ed tema na kumbension. “Responsablen Panag-ilalak ed Sayan Panaon na Anggaan” so manunan paliwawa diad programa ed ngarem, a sikato so manampot ed sakey a mansusuldongan a paliwawa ed teman “Say Salita na Dios So Mabilay.”

Say programa ed Simba so mangipabitar ed paliwawan “Sigpot a Dimlaen So Makapabaing a Kurang na Mundo,” tan ontan met ed sakey a drama ed Biblia a mangiyiilustra ed pankaganatan na panaon tayo. Diad ngarem, say paliwawa ed publikon “Diad Makapataktakot Iran Panaon Tayo, Siopa So Peteg a Panmatalekan Tayo?” so sananey a manunan punto na kumbension.

Mitongtong ed saray Tasi nen Jehova ed lokal a para ed oras tan pasen na kumbension a sankaasinggeran ed sikayo.