Relihyon tan Anito​—Sankaaro o Manbusolan?

SABADO, Hunyo 11, 1983, saray ombaryo ed isla na Java ed Indonesia so nanengneng a kibatiktik ed saray kaabungan da, ya amin na saray butaw ed bubong na abung, bintana tan puerta so pinepuletan da. Akin ya ontan lan inkatalagnaw? Ginmapo so kalipse na agew, tan saray ombaryo so tinmakot a say anino na kalipse so makaloob ed saray kaabungan da tan pansengegan na desyang.

Saray manaayam ed tatawagen na onaaligwas a mundo so mabetbet a manumbok ed ontan iran sisisiaen a tekep na relihyoson gunaet. Sirin, diad arum iran pasen na Africa, paliisan na totoo so panakar a pataktak ed agew diad kaaguan lapud sikara so “ompan naambagel.” Saray ugugaw so sinebelan a mangan na iknol ta ompan “sikara so magmaliw a matatakew.” Saray atateng so agmangibaga ed eksakton bilang na saray anak da, ta “ompan saray mankukulam so makadngel a sika so manlalastog tan alaen da so sakey ed sikara.”​—African Primal Religions.

Saray taga sagur so onelek ed ontan iran ugali a singa panangipatnag na inaaniton takot, say produkto na ‘inkaignorante na pagano.’ Ingen, saray ontan a sisisiaen so agnigeter ed saray aliwan-Kristianos. Sikara “so naromog ed limog na saray totoo ed sankamundoan,” so kuan nen Dr. Wayland Hand, propesor na bungay-isip-a-tongtong tan diad saray Hermanikon lenguahe. Sikato tan si kaiba ton Dr. Tally so akatipon la na ngalngalin sakey milyon iran ehemplo na ananito ed Estados Unidos lambengat.

Kaililiw dan naamtaan so kapalaran da, dakel iran natatawag a Kristianos so ontepleg ed astrolohya​—sakey ed saray sankadaanan a porma na anito. Tan mausisa, saray inaaniton pananisia so mangawat no maminsan na lukas a suporta tan panamabiskeg na saray relihyoson papangulo. Alimbawa, diad sakey ya ambetel ya agew ed Nueva York, Enero 10, 1982, si patriarkan Vasilios na Eastern Greek Orthodox so angimaton ed sakey ya inkalapagan a Misa diad panselebra ed Piesta na Epipania. Kayari na saman, imbalita na New York Post, a sikato so angitupak na binmalitok a krus diad East River tan imbaga to ed saray wadman a manbabantay a say ununan toon makalmo ed krus so nawalaan na maabig a suerte legan na bilay to.

Balet kasin saray Kristianon sisisiaen tan anito so makapanulop? Aminsan ya inkuan na sakey a managsulat: “Diad lubok na pananisia et onsalindak so rosas na anito.” Sirin, agta ilaloan yon say Kristianon relihyon so manumbra tan mangipukay ed inaaniton takot?

Relihyon​—Kasin Ipukay To So Inaaniton Takot?

Nepeg a gawaen na tuan relihyon so ontan, tan nen inmunan siglo, ontan so agawa. Anggaman saray inmunan Kristianos so manaayam ed utel na maaniton mundo na Romano, saray ananito so impulisay da. Balet kayari impatey na saray apostoles nen Kristo, saray palson relihyoson bangabangat, a pati saray anito, so ginmapon sinmurob ed kongregasyon. (1 Timoteo 4:1, 7; Gawa 20:30) Sakey a kleron klase so ginmapon tinmalindeg ya, unong ed libron A History of the Christian Church, et nantultuloy diad panangagamil na panangusar ed saray horoskopya tan diad pananumbok ed arum iran ananito. Sinmabi panaon et saray ontan iran popular ya agagamil so atiketaan na “Kristiano.”

Tan natan? Siansian say relihyon so mangiyaabuloy ed saray inaaniton kustombre. Konsideraen so Suriname, a saray natatawag a Kristianos a nanlapud poli na Africa so mabetbet a nanengneng a mangisulong na saray anting-anting diad pangipasen a salimbeng a sumpad saray mauges ya espiritu. Inkuan na sakey a manag-imaton: “Inagew-agew a sarayan totoo so manbibilay, mamangan, mantatrabaho tan nanaugip ed takot.” Saray minilyon ed sankamundoan so walaan na miulibay a takot ed saray “espiritu” na inaatey. Makapasakit, say relihyon so mabetbet ya angiyalibansa ed ontan iran inaaniton sisisiaen.

Alaen ya alimbawa so agawa ed isla na Madagascar ed Africa. Sanen saray misionero na Kakristianoan so ginmapon angikayat na sisisiaen da, saray taga Madagascar so kinmiwas balet ta agmalabay a mangilukpos ed saray tradisyonal a sisisiaen da. Say reaksion na saray iglesia? Inkuan na Daily Nation, sakey a peryodiko ed Kenya: “Say inmunan misionero so angiyabuloy tan manatnat tan angawat ed sayan kipapasen.” Nansumpalan? Natan, kapaldua ed saray totoo ed Madagascar so nilista a bilang Kristiano. Ingen, tatakotan da met “iray espiritu” na inaatey ya atateng! Sirin, kaslakan ya imbitaan da so pari odino pastor a mamendisyon ed saray pukel na sakey ya inatey lan ateng sakbay a sikara so ipawil ed pantyon na pamilya. On, saray relihyoson papangulo so angipatpatuloy ed katilaan a say Dios, say Diablo, tan saray inaatey ya atateng so nayarin palikdoen, ar-aryokan, tan pasuksukan diad panggawa ed saray inaaniton ugali.

Ontan so tua ed Abalaten ya Africa, a 77 porsiento ed populasyon so mangibabagan Kristiano tan atagey a tuloy so onaatendi ed saray simbaan. Ingen, say tradisyonal a relihyon ed Africa, a pati saray inaaniton takot ed inaatey la ran atateng, so sinmamok ed limog na saray minilyon a mimimisa. Sirin, diad dakel iran natatawag a Kristianon bansa, say relihyon so sakey lambengat ya apis. Kuskusen so tapew, tan say daan iran panag-anito so nanengneng a nantultuloy tan dinmaak.

Say tuan relihyon, anggaman kuan, so mangipukay ed inaaniton takot. Panon? Say tombok et say pikakabat. Pikakabat ed anto? Tan panon so pakagamor yo ed satan?