Kasin Sikayo So Mansiasiansian Malinis ed Amin a Pamaakaran?
“Taynan kayo, taynan kayo, ompaway kayod’tan, agdidiwiten so marutak; ompaway kayo ed pegley to, pansiansiaen yo so inkasikayon malinis, sikayo a manaawit ed saray kagawaan nen Jehova.”—ISAIAS 52:11.
1. (a) Panon a say maarin geter so angabuloy ed saray kagawaan nen Jehova a nipawil ed Jerusalem? (b) Panon ya arum ed saraman a baseha so arutakan?
BIGLA et sikara so bulos—kayari na 70 taon na inkaaripen! Say maarin geter nen ngalngalin 53 K.K.P. so angabuloy ed Judion nasyon ya ompawil “tan ipaalagey lamet so abung nen Jehova a Dios ed Israel.” (Esdras 1:2, 3) Ontumbok, sananey a makapakelaw ya inkagawa: “Si Arin Ciro [na Persia] a mismo so angitarok ed saray kagawaan ed abung nen Jehova, ya inala nen Nabucodonosor ed Jerusalem.” (Esdras 1:7, 8) Arum ed saraya et saray sagradon baseha a dinutakan nen Belshasar tan saray opisyales to diad samay labi na inkagba na Babilonia diad sipapangtan impangusar to ed sikara a mangidayew ed saray palson dirios! (Daniel 5:3, 4) Natan et saray datin destiero so makapangipawil la ed sarayan kagawaan ed Jerusalem tan sikara so usaren diad panangidayew ed si Jehova!
2. (a) Anton propesiya nen Isaias so nanonotan na saray pinmawil? Diad siopa so aplikaan to? (b) Akin a sikara so abilin ya agmaniwit na antokaman ya agmalinis?
2 Legan a sikara so malikeliket lan akaparaan ya ontaynan, saray ompapawil a Judios so andi-duaruwan akanonot ed saray salita nen propeta Isaias: “Taynan kayo, taynan kayo, ompaway kayod’tan, agdidiwiten so bengatlan marutak; ompaway kayo ed pegley to, pansiansiaen yo so inkasikayon malinis, sikayo a manaawit ed saray kagawaan nen Jehova.” (Isaias 52:11) Saray Levita, siempre, so nanggawa ed aktual ya impangiyalis ed saray kagawaan. (Numeros 1:50, 51; 4:15) Anggaman kuan, impasakbay nen Isaias ya amin na saray pinmawil so magmaliw a sigagalang a mangitarok ed saray baseha. Amin sirin so naobligan magmaliw a malinis. Agda lalakseban iray taga Babilonia ed saray mablin kagawaan a singa ginawa na saray Israelitas sanen tinaynanan da so Ehipto. (Ipareng so Exodo 12:34-38.) Sikara so nakaukolan a bulos ed antokaman a materyalistiko odino sinisiblet a motibo diad ipawil. No nipaakar ed “saray marutak a talintao” na Babilonia, say basta paniwit ed sakey so makadutak.a (Jeremias 50:1, 2) Dia lambengat ed pagmaliw a malinis ed amin a pamaakaran a saray Judios so makapanakar “ed Dalan na Kasantosan” ya ompawil ed Jerusalem.—Isaias 35:8, 9.
3. Siopa natan so manaawit ed “saray kagawaan” nen Jehova? Akin ya ontan lan angat ed sikara so pansiansian malinis?
3 Saray Tasi nen Jehova so nepeg a mipadparan malinis a bilang manangitarok ed “saray kagawaaan” nen Jehova. Inaon nen apostol Pablo iray salita nen Isaias tan inyaplika tora ed saray Kristianos diad agew to, a kuanto: “Linisan tayo so inkasikatayo ed amin a dutak na laman tan espiritu, a payadyarien so kasantosan diad takot ed Dios.” (2 Corinto 6:17–7:1) Nilikud ed pambibilay diad sakey a mundon marutak, sikatayo so mipuligesgesan ed saray atawir tayon naplag a tendensya. (Genesis 8:21) Ipapanonot ed sikatayo na Jeremias 17:9: “Say puso so lalon manamalikdo nen say antokaman ni tan sikato so mauges. Siopa so mikabat ed sikato?” Arum so mamapalikdo ed inkasikara tan diad arum ed panisia a saray bilay da so malinis tan makapaliket ed Dios, anta diad kapetegan et aliwan ontan so kipapasen. Sirin, aagamilen da so sakey a porma na pansimpisimpitan. Balang sakey ed sikatayo sirin so mangitepet na, ‘Kasin ibabanikel ko so amin a sagpot diad pagmaliw a malinis ed arap nen Jehova diad amin a pamaakaran?’ Pian natulongan itayon manggawa ed saya, isentro tayo natan so kanonotan diad apatiran nengneng na kalinisan.
Pisikal a Kalinisan: Manuna
4. (a) Akin a say pisikal a kalinisan so manuna ed limog na saray totoo nen Jehova? (b) Akin a nayarin mairap no maminsan so pamasiansia na atagey ya estandarte na kalinisan?
4 Say kalinisan ed pisikal so manuna ed limog na saray totoo nen Jehova natan a singa nen inmuna ran panaon. (Exodo 30:17-21; 40:30-32) Tutal, kasin tatratoen tayoray “kagawaan nen Jehova” a tekep na panamagalang no saray buek tayo, kalimaan, lupa, ngipen, odino kuko tayo so marutak, odino no sikatayo so mamapasingaw na maamling ya angob? Mainomay, anggaman kuan, so pangabuloy ed saray abeban estandarte na mundo a mangimpluensya ed sikatayo.—Roma 12:2.
5. (a) Akin ya importante a bembenan tayo so estandarte tayo ed kalinisan? Mangiter na lokal iran ehemplo no panon a sayan simbawa so onaplika. (b) Panon so pakatulong na saray mamatatken?
5 Panon so pagmaliw tayon miduma ed mundo no sikatayo so manggawa ed saray abeban estandarte na mundo? Agta say marutak ya abung odino magulogulon pasen na panagdayewan so manggawa ‘ed salita na Dios a napauges’? (Tito 2:5) Balet sano agamilen so maabig a personal a kalinisan na laman, a dukduken tayoray dutak ed saray pasen na kumbension, ontulong ed pamasiansian marakep ed Kingdom Hall, tan pansiansiaen tayon masinop so ayaman tayo—anggan diad sankaabebaan ya ayaman—a mauksoy tan malinis, itatarok tayo so gloria ed Dios! (Ipareng so 1 Pedro 2:12.) Saray mamatatken, so mangiletneg na maabig ya ehemplon personal ed kalinisan. “Ag-ikikibot” so pangiter na matukoy a simbawa no nakaukolan.—Gawa 20:20.
6. Anto so nepeg ya estandarte tayo ed panagkawes diad saray miting tan diad lawak na kimeyan?
6 Kumusta so nipaakar ed kawes ya isusulong tayo sano mandayew ed saray miting tan sano wala ed lawak na kimeyan? Agta nepeg a sikato so ‘masimpit tan mauksoy’? (1 Timoteo 2:9; Hebreos 10:23-25) Ag-ikakatunongan a sikatayo so naobligan mankawes no walaan itayo na parte ed miting. Say alablabas a panangawes ed inagew-agew so aliwan masimpit tan aliwan matukoy ed panagdayew. Saray naririntoy a bag tan atupitupi odino akeskeskes a Biblia so makaderal met na imano a manlapud mensahe na Panarian.
Paliisan So Karutakan na Nonot
7. Anto so tombok na kalinisan ed nonot, unong ed Filipos 4:8?
7 Diad Filipos 4:8 et insimbawa nen Pablo: “Kaunoran, agagi, antokaman a bengatlan matua, antokaman a bengatlan mabinta, antokaman a bengatlan matunong, antokaman a bengatlan masimpit, antokaman a bengatlan kalikaliktan, antokaman a bengatlan maong a natongtong, antokaman a birtud tan antokaman a daydayewen a bengatla, sarayan bengatla so mantultuloy ya imanoen.” Anggaman kuan, anggan iner a pasen et sikatayo so nanaataki ed saray tukson mangonineng “ed saray ‘aralem a bengatla nen Satanas.’”—Apocalipsis 2:24.
8. Panon a nayarin saray kaatapan ya ipaarap na nanduruman porma na panagligliwaan so niiyilustra? Mangiter na lokal iran ehemplo?
8 Alimbawa, say mainomay a pakagawat ed saray pornograpiko tan alablabas iran maramsak a babasaen so nansumpal ed saray seryoson problema ed arum iran manguusar ed saray videocassette recorders. Diad Europa, sakey ya agin lakin walaan na asawa so manbantay ed marutak a tapes sanen say asawa to so linma lan naugip. Say bukel na gawan-mauges so mabiskeg a nipupor, a nansumpal ed pikakalugoran. (Ipareng so Santiago 1:14, 15.) Diad sakey a dalin ed Africa, sakey a grupo na saray tobonbalon Tasi so binmayes na saray marutak a tapes ed saray kakaaro ed eskuelaan tan saratan so binantayan da legan ya anggaporay kaatengan da. Sakey a matatken ed Nigeria, anggaman kuan, so angibaga: ‘Say babaleg a kaatapan so mabetbet ya onsaral ed maparanay iran programa ed TV a miulibay a mangireretrato ed karawalan, krimen, bakal, panag-akdol iran eksena, tan makapadimla ed katooran na sanasawa.’ Saray manmuran peryodiko, pornograpikon magasin, makasagyat ed seksual iran nobela, sine, tan marutak iran musika so laganap met a maatap natan.
9. (a) Akin a sikatayo so nepeg a mapili no nipaakar ed talinengen tayo, bantayan tan basaen? (b) Panon so nepeg tayon ikiwas no nipaarap ed saray susuppiaten a materyal?
9 Agtayo nitepel a dutakan iray kanonotan tayo ed saray bengatlan “makapabaing ya anggan isalaysay.” (Efeso 5:12) Sirin magmaliw a mapili nipaakar ed talinengen yo, bantayan, tan basaen. Manbantay tan onkiwas a tampol a mangipulisay ed saray susuppiaten a babasaen. (Salmo 119:37) Saya so mankaukolan na peteg a dangka, anganko et piguratibon ‘leweten yo so laman yo tan itonton yo a bilang sakey ya aripen.’ (1 Corinto 9:27) Nonoten a naynay, anggaman kuan, a samay bantayan tayo ed maamot so nanenengneng na “samay Sakey ya agnanengneng.” (Hebreos 11:27) Sirin paliisan so susuppiaten. “Itultuloy a seguroen no anto so makapaliket ed Katawan.”—Efeso 5:10.
“Mantultuloy ya Akabantay” pian Mansiansian Malinis ed Moral
10. (a) Anto so sakey a rason ya akabaatan na dakel odino akadispelosipan ed kada taon? (b) Anton prinsipyo na Biblia so nepeg a mangiwanwan ed saray kondukta tayo ed saray bakasyon tan diad saray trabaho?
10 Diad Efeso 5:5 et impasakbay nen Pablo: “Ta saya so kabat yo, a bidbiren yo ed inkasikayo, ya anggapo so milalawanan odino marutak a too odino maagum a too—a kabaliksan to so pagmaliw a managtalintao—so walaan na anggan anton tawir ed panarian nen Kristo tan ed Dios.” Ingen, nilibulibo ed kada taon so nababaat odino nadidispelosip lapud seksual ya imoralidad—‘a mankakasalanan a sumpad laman.’ (1 Corinto 6:18) Mabetbet, sikato lambengat so sakey a resulta na “agpansiasiansian akabantay unong ed salita na [Dios].” (Salmo 119:9) Dakel iran agagin lalaki, alimbawa, so naandian na panagbantay ed moral legan na saray panaon na bakasyon. Diad impamaulian ed saray teokratikon panlilimog, sikara so akikaaro ed saray minumundon bakasyonistas. Ikatunongan dan saraya so ‘peteg a maabig a totoo,’ arum a Kristianos so akiulop ed sikara diad saray susuppiaten ya aktibidades. Mipadpara, arum so nagmaliw ya alablabas a makaaro ed saray katrabahowan da. Sakey a Kristianon matatken so nagmaliw a nilanlanor a tuloy ed sakey ya impleadan bii a tinaynanan to la so pamilya to tan saman a bii so inamong to! Nansumpal ed inkadispelosip. Agaylan tua iray salita na Biblia, “Saray mauges a pililimog so maneral na maabig iran ugali”!—1 Corinto 15:33.
11. Akin a saray Kristianon pantitipon so nepeg a bantayan?
11 Manlapud Abalaten ya Africa et sayan report so sinmabi: “Sananey a kaatapan a mangikigtot ed moral a kaptekan na dakel et saray angkakabaleg a panduruypo . . . arum so agawa ed kayari na saray sesyon ed distriton kumbension.” Anggaman kuan, saray angkegkelag a Kristianon pandaragup a naasikason maong so matalag a mansumpal ed “mauges a panliliket.” (Galacia 5:21) No saray mabayanin iinumen so iparungo, satan so gawaen diad leksab na kaasikaso tan diad kabkaabigan. “Say alak so managludlurey,” tan diad silong na impluensya to, arum ya agagi so naandian na panagbantay ed moral odino amaliing ed saray kaleteyan ed ituglep. (Uliran 20:1) Sirin, duaran ministro so akibiang ed saray gawan homoseksual kayari na alablabas ya impaninum na alak.
12, 13. (a) Panon a saray arum so amatunong ed imoral a kondukta? Akin a say ontan a panagkatunongan so makapalikdo? (b) Panon so pakapansiansia tayon akabantay a sumpad saray manderal ed maabig a moral?
12 Sano natukson mankasalanan, nonoten ya, anggaman panon inkalinis so nayarin kipatnag tayo ed paway, say wala ed dalem tayo so nikuenta. (Uliran 21:2) Arum so mapatnag a manliknan say Dios so mamerdona ed saray naulit-ulit a panagpasyar ed saray imoral a kondukta lapud sikara so maletey. Balet agta saya so “panggagawa ed agkanepegan a panangasi na Dios diad sakey a baraan ed malukak a kondukta”? (Judas 4) Isipen ni na arum a “si Jehova so agmakakanengneng ed sikatayo.” (Ezequiel 8:12) Nodnonoten, anggaman kuan, ya “anggapo so sakey a pinalsa ya agnipatnag ed imaton to, balet amin a bengatla so lakseb tan silulukas ed saray mata to a sikatayo so walaan na pipapalinewan.”—Hebreos 4:13.
13 Sirin manbantay a sumpad saray pagyaw ed maabig a moral! “Komon ta say pilalawanan tan karutakan ed amin a nengneng odino kaagapan so ag-anggan nasalambit ed limog yo, a singa manepeg ed saray masanton totoo; nisay makapabaing ya ugali nisay makulangkulang a tongtong nisay marutak a panaglurey, bengabengatlan aliwan marakep.” (Efeso 5:3, 4) “Dimlaen so marelmeng,” anggaman panon a satan so nayarin makapaliket ed laman.—Roma 12:9.
Pansiansian Malinis ed Espiritual
14, 15. (a) Panon a saray arum so angiparungtal na inkasikara ed espiritual a karutakan? (b) Panon so panguusar na saray apostata ed ‘saray sangi ra a mangitarok ed kapara ran too ed kadederal’? (c) Diad antoran dalan a saray apostata so peteg ya aliwan malinis, tan anto so alingwanan da?
14 Arum so angiparungtal na inkasikara ed posiblen espiritual a karutakan diad pandengel ed saray brodkast ed relihyoson radio tan telebisyon. Diad sakey a bansa ed Africa, arum so nanbantay ed saray drama ed TV a mangipapanengneng ed saray ananito na tradisyonal iran espiritistan relihyon diad maapabor a liwawa. Si apostol Pablo, anggaman kuan, so angipasakbay ed lalon makapatey a kaatapan—saray apostatan lalaki a “yesyesen da so pananisia na arum.” (2 Timoteo 2:16-18) Saray totoon singa ontan so siansia nin wala! (2 Pedro 2:1-3) Tan no maminsan et sikara so tinmalona diad pamuliwes ed panagnonot na arum. A singa ibabaga na Uliran 11:9: “Diad panamegley na sangi to et say sakey ya apostata so mangitarok na kadederal ed kapara ton too.”
15 Saray apostata so mabetbet ya onapelo ed kakinonan, ya ibabaga ran sikatayo so nasibletan ed saray kawayangan tayo, a pati say kawayangan ed pangipatalos na Biblia ed inkasikatayon dili. (Ipareng so Genesis 3:1-5.) Diad katuaan, sarayan magmaliw a managdutak so agmakapangiyopresi na antokaman nen say pangipawil ed saray makapadulok iran bangat na “Babilonia a Baleg.” (Apocalipsis 17:5; 2 Pedro 2:19-22) Arum so onapelo ed laman, ya dagdagen daray datin kalimog a “mantayamtayam” lambengat lapud say abeban kimey na panagtasi so “agnakaukolan” odino “aliwan makasulatan.” (Ipareng so Mateo 16:22, 23.) Tua, saray ontan a marlas a managtongtong so nayarin nengneng day malinis ed paway diad pisikal tan moral. Balet diad loob et sikara so marutak ed espiritual, a sikara so walaan na makinon, independentin panagnonot. Alingwanan da lan amin so naaralan da nipaakar ed si Jehova, diad masanton ngaran to tan saray atributos to. Sikara lan so agmamidbir ya amin a naaralan da nipaakar ed katuaan na Biblia—say maglorian ilalo ed Panarian tan say paraison dalin tan say impangipukay ed saray palson doktrina, a singa say Trinidad, say ag-ipapatey na atooan a kamarerwa, maandon kapairap, tan purgatoryo—on, amin na saya so sinmabi ed sikara ed panamegley “na matoor tan makabat ya aripen.”—Mateo 24:45-47.
16. Panon a say matunong so niliktar “diad pikakabat”?
16 Makapasagyat, inkuan na sakey a manangasikaso na sirkito ed Pransya: “Arum ya agagi so apalikdo lapud sikara so kinmulang na suston pikakabat.” Sikato no akin ya ibabaga na Uliran 11:9: “Diad panamegley na pikakabat et say matunong so niliktar.” Agkabaliksan na saya so pangiter ed saray apostata na pandengel odino pangusisa ed saray sulsulat da. Imbes, kabaliksan to so isabi ed “suston pikakabat ed sagradon sekreto na Dios” ed panamegley na magunaet a personal a panagaral ed Biblia tan diad saray niletneg-ed-Biblian palapagan na Sosyedad. Diad pakawalaan na sayan suston pikakabat, siopa so magmaliw a mausisan tuloy a mangiter na anggan anton imano ed saray apostatan tongtong? Komon ta anggapo so toon “mangisuawi ed sikayo ed saray makasagyat iran salsalita”! (Colosas 2:2-4) Saray palson relihyoson propaganda a manlapud anggan anton sengegan so nepeg a paliisan a singa samal! Peteg, lapud say Katawan tayo so angusar ed “matoor tan makabat ya aripen” a mangipasabi ed sikatayo ed “saray balikas na andi-anggaan a bilay,” akin a labay tayo ni so ontepleg ed arum?—Juan 6:68.
Kasin Sikayo So Mansiansian Malinis?
17, 18. Akin a makana so pamayubo ed (a) kalinisan ed pisikal, (b) kalinisan ed nonot, (c) kalinisan ed moral, tan (d) kalinisan ed espiritual?
17 Malaem sirin so nalalanor diad pansiansian malinis ed imaton nen Jehova a Dios. Say pamasiansia tayon malinis ed saray laman tayo, ayaman tayo, kawes tayo, tan saray Kingdom Hall tayo a malinis ed pisikal so mamarakep ed mensahe na Panarian. Say pansiansian malinis ed nonot so ontulong ed sikatayon mansiansian malinis ed moral tan espiritual. Saya so mankakaukolan na italineng ed simbawa nen Pablo ed Filipos 4:8, diad pamasiansia tayo ed saray kanonotan tayo ed saray bengatlan matua, masimpit, tan daydayewen.
18 Naapresya tayo met a nagkalalo a nepeg tayo so mansiansian malinis ed moral diad salita tan gawa. Mabitar ya impasakbay nen Jehova ed sikatayo a saraman so mibibiang ed anggan anton nengneng na imoralidad so agbalot makatawir ed Panarian na Dios. (1 Corinto 6:9-11) Anggaman panon la so singa karakep na ontan iran agmalinis a bengatla, no sikatayo so mantanem ed laman, manani itayo na kabubulok a manlapud laman. (Galacia 6:8) Kaunoran, wadtan so pamaakaran na pansiansian malinis ed espiritual, malinis ed doktrina. Say ontan a kalinisan so ontulong ed sikatayon mamemben na inkadalisay na saray puso tan kanonotan tayo. Sikatayo sirin so napakiwas a naynay a mananap ed saray kanonotan na Dios ed saray pamaakaran—aliwan diad inkasikatayo.
19. Anto so ontulong ed alanaan tan “baleg ya ulop” diad pansiansian malinis ed amin a pamaakaran?
19 Agmanbayag et say manunan manangiyalibansa na ag-inkalinis—si Satanas a Diablo—so, kaiba na saray dedemonyos to, nibantak ed kalinsurong na kaaralman. Anggad satan, komon ta amin ya ariripen nen Jehova—alanaan tan ed “baleg ya ulop”—so mansiansian malinis bilang manangitarok ed saray baseha nen Jehova. (Apocalipsis 7:9, 13-15; 19:7, 8; 20:1-3) Say pilalaban so tuloytuloy tan mairap. Nodnonoten, anggaman kuan, a si Jehova so mangiter a sibubulos ed “espiritu na kasantosan” to. (Roma 1:4) Say malinis a muyongan to, a dingan na saray mamatatken to, so akatalindeg met ya akaparaan ya ontulong ed sikatayo diad pangiter na maabig, Makasulatan a simbawa. Diad ontan a tulong tan diad dilin determinasyon tayo, sikatayo so makapansiansian malinis ed amin a pamaakaran!
[Paimano ed Leksab]
a Say Hebreon salita para ed marutak a taltalintao, gil·lu·limʹ, so sakey a termino na pandimla a datin kabaliksan to so “dutak ya atiptipkel”—bengatlan makapadimla ed saray Judios.—Deuteronomio 23:12-14; 1 Arari 14:10; Ezequiel 4:12-17.
Tepetepet ed Repaso
◻ Akin a saray Judios a pinmawil a nanlapud Babilonia so nakaukolan a malinis?
◻ Panon so pakapangiter tayo na imano ed pisikal a kalinisan?
◻ Panon so pakasalimbeng tayo ed saray kanonotan tayo a manlapud kadutakan?
◻ Panon so pakapansiansia tayon akabantay a sumpad moral iran kaatapan?
◻ Panon so pakapansiansia tayon malinis ed espiritual?
[Litrato ed pahina 14]
Saray ayaman tayo so nepeg a modelo na kalinisan
[Litrato ed pahina 15]
Nepeg ya usaren na saray Kristianos so maabig a desisyon diad ipaliis ed saray video tapes tan programa ed TV a manutak ed kanonotan
[Litrato ed pahina 16]
Saray angkelag a pantitipon so nayarin makapaalagey ed moral
[Litrato ed pahina 17]
Saray magunaet a Tastasi so mansiansian malinis ed espiritual tan makaromog na pananalimbeng tan gayaga ed panamegley na maseseg a panagaral na Biblia