Panamagalang ed Dios na Ilalo

“Say balikas nen Jehova so: . . . ‘Saraman so mamapagalang ed siak so pagalangan ko, tan saramay manmodmora ed siak so modmoraen ko.’”​—1 SAMUEL 2:30.

1. Anton rason so wala ed sikatayo diad panlabay a pamagalang ed si Jehova? (1 Timoteo 1:17; Apocalipsis 4:11)

NISESENGEG ed saray ilalo a nayarin onwala ed sikatayo, a niletneg ed Biblia, sigpot a matukoy tan makatunongan ed sikatayo so pamagalang “ed Dios na ilalo,” “say Dios a mangiter na ilalo.” (Roma 15:13, King James Version; New World Translation) Akin ya ontan? Panon tayo, a melmelanting, ag-ayadyarin totoo, a pagalangan so Engranden Manamalsa na interon talba? Tan kasin sikatayo met so pagalangan to?

2. Panon so liknaan nen Jesus nipaakar ed galang a niiter ed Dios?

² Makaaral itayo a manlapud samay agawa ed si Jesus. Anggapo ed sikatayo so mangiburi a si Jesus so naynay a nanlabay ed Ama to a napagalangan, nigloria. (Juan 5:23; 12:28; 15:8) Diad tua, binalaw nen Jesus iray Pariseos tan eskribas ya ‘angigalang ed Dios diad saray bibil da balet saray kapusoan da so arawi ed sikato.’ Ipangasin imanoen, say agda panamagalang ed Dios so anaglawi ed saray agmanepeg a motibo tan kiwas. (Mateo 15:7-9) Kasin sikatayo, anggaman kuan, so makapangibaga a diad panamagalang nen Kristo ed Dios, et say ilalo to so nalalanor? Tan panon so inkiwas nen Jehova ed kapagalangan to?

3. Panoy pikabat tayo a si Jesus so nanilalo ed si Jehova?

³ Impapuso nen Jesus iray salita nen David ed Salmo 16:10: “Agmo kaindanan so kamarerwak ed Sheol. Agmo abuloyan so matoor mo a makanengneng ed abut.” Lapud sikato so walaan na sayan ilalo na kapaoli, si Jesu-Kristo so makayarin makapangibaga na makatenyeg iran salita ed sakey a managgaway-mauges a nipasak ed dikingan to: “Tua kuan ko ed sika natan, wala ka ed siak diad Paraiso.” (Lucas 23:39-43) Agnambayag et saman a managgaway-mauges so inatey, kanian agto ayarian ed taloran agew ed saginonor ya atasian so panamekder na ilalo nen Jesus ed kapaoli. Balet imbalita na sakey ya akatasi: “Sayan Jesus a pinaoli na Dios, a diad tua et sikatayon amin so tastasi.” (Gawa 2:31, 32) Saman so sakey a katuaan.

4. Anton galang so kanepegan nen Jesus tan awaten? (Apocalipsis 5:12)

⁴ Dakel ed saray kabanyakan a totoon nanlingkoran nen Jesus so mikabat a sikato so mankanepegan na kapagalangan, odino dayew. (Lucas 4:15; 19:36-38; 2 Pedro 1:17, 18) Insan sikato so inatey a singa sakey a kriminal. Kasin satan so anguman ed saray bengatla? Andi, lapud si Jesus so akagamor ed panangabobon na Dios a nanilaloan to. Sirin, si Jehova so angipawil ed sikato diad bilay. Say katuaan a “say Dios na ilalo” so amaoli ed Anak to diad bilay tan kinawesan to na imortalidad ed espiritun ayaman so mamaneknek a say Ama so mantutultuloy a mamapagalang ed Anak to. Ibabaga nen Pablo: “Anengneng mi si Jesus . . . ya abalangetan na gloria tan galang diad impanagmak to na patey, a sikato ed panamegley na agkanepegan a panangasi na Dios so nayarin makataway na patey ed amin a too.”​—Hebreos 2:7, 9; Filipos 2:9-11.

5. Diad anton nikadkaduman dalan a si Jesus so apagalangan, a nansumpal ed anton niarum a galang ed Dios?

⁵ Si Jesus, ya amagalang ed si Jehova, so asalambit ed sakey a nikadkaduman dalan ya amagalangan na Ama ed sikato. Diad impatnag to ed saray matoor ya apostoles to, inkuanto: “Amin a pakauley so niiter ed siak diad tawen tan ed dalin. Onla kayo sirin tan manggawa na babangatan ed amin a nasyones, a bautismoan yora ed ngaran na Ama tan ed Anak tan ed masanton espiritu . . . Nia! siak a naynay so wala ed sikayo ed amin na saray agew ya anggad kasampotan na sistema na bengabengatla.” (Mateo 28:18-20) Sirin say Ama so kaaruman nin amagalang ed Anak diad impangiter ed sikato na nikadkaduman autoridad. Saya so nausar a nisesengeg ed katooan a manggawa na sakey a kimey a mangitarok na dayew ed samay Sakey a nambanikelan nen Jesus a dayewen. Kasin kabaliksan na saya, sirin, a sikatayon totoon ag-ayadyari ed arum a dalan so makapangigalang ed Ama tan pagalangan to met?

Saray Totoo So Mamagalang ed Dios

6. Kasin matukoy so pampilalek a napagalangan, balet anton kaatapan so onwala ed saya? (Lucas 14:10)

⁶ Maslak a totoo so ngalngalin agmakaisip na pamagalang ed Dios ya ununa, lapud sikara so lalon interesado diad panangamor na galang ed inkasikaran dili. Nayarin ibaga ni na arum a normal ed sikatayo so panlabay a napagalangan. Wala so sakey a sukat na katuaan ed saya, a singa met normal so pamilalek na maabig a reputasyon, diad sakey a sukat na galang a manlapud saya. (1 Timoteo 3:2, 13; 5:17; Gawa 28:10) Ingen, say pilalek a para ed galang a manlapud totoo so nayarin mainomay a lablabasen. Saya so mapatnag diad saray dakel a manguusil na kabantogan ed anggan anton pansumpalan odino saraman so manggawa na antokaman a mangisalba na galang.

7. Akin a say panamagalang na totoo so ontan lan limitadon kablian?

⁷ Sano satan so nonoten, anggan say sankabalgan a galang a manlapud totoo so onkupas, lapud amin so ompatey ed agmanbayag. O, say pakanodnonotan ed saray pigaran bayani so nayarin napagalangan ed magano, balet maslak ed saray inaatey so alingwanan la. Panon karakel na totoo so mikabat ed saray kangaranan na laki-nen-laki ra odino makaamta ed saray papangulo na nasyon da ed linmabas lan sanlasus taon? Diad tua, balanglan say sakey so nambilay odino agnambilay so agmanguman ed saray pamaakaran. Sikato lambengat so sakey a melmelanting a sapuk ed simbangan na panaon, sankamelantingan a tedter ed agus na bilay. Tan anggano sikato so napagalangan a magano ed kayari na ipatey, sikato so agmikabat ed satan. (Job 14:21; 2 Awaran 32:33; Eclesiastes 9:5; Salmo 49:12, 20) Say mogmon bengatlan mangiduma et say pakawalaan na ilalo ya itarya na Dios, a pagalangan to, tan napagalangan met. Saya so nanengneng tayo diad saray bilay na duaran bansag a totoon nambilay ed kadaanan ya Israel.

8. Si Eli so naplag ed anton patit a manasaglawi ed panangiter na galang?

⁸ Si Eli so sakey. Nilingkoran to so Dios ed nikadkaduman posisyon na atagey a saserdote diad 40 taon tan sikato so apribilehyoan a mangukom ed Israel. (1 Samuel 1:3, 9; 4:18) Anggaman kuan, asabi panaon et impanengneng to so kakapuyan nipaakar ed saray ilalak ton si Hopni tan Pinehas. Anggaman sikara so saserdote, inabuso ra so inkabetang da diad impantatakew ed kabiangan na saray bagat tan diad impanggawa ed imoral a sekso. Sanen samet lambengat so ginawa nen ama ra diad siuulimek ya amalaw ed sikara, inyabawag na Dios a si Eli so ‘nantultuloy a mamapagalang ed saray ilalak to a lalo nen say siak.’ Insipan nen Jehova ya itultuloy so Aaronicon inkasaserdote, balet ta pegpegen to so abung nen Eli a manlapud inkabetang na atagey ya inkasaserdote. Akin? Impaliwawa na Dios: “Saramay mamapagalang ed siak so pagalangan ko, tan saraman so mamabalaw ed siak so namodmora.”​—1 Samuel 2:12-17, 29-36; 3:12-14.

9. Panon so inkaikdan nen Samuel na pankanawnawan mamagalang ed si Jehova?

⁹ Miduma et wadtan si Samuel. Nayarin kabat yo a saray atateng to so amabaleg ed sikato ed kalangweran ya edad a manserbi ed tabernakulo ed Silo. Sakey a labi et si Jehova so akisalita ed ugaw. Nayarin panggayagaan yon basaen iyan awaran ed 1 Samuel 3:1-14, ya umamengen so inkaliing na sayan ugaw, aliwan diad panamegley na ageeg na karol, noagta dia ed panamegley na abeban boses ya abaloan ton boses nen masiken ya Eli. Insan isipen no panon a nayarin makapakebbiew ed walad kalangweran a Samuel so pangibaga ed masiken lan atagey a saserdote diad getma na Dios a manusa ed abung nen Eli. Ingen saman so ginawa nen Samuel; pinagalangan to so Dios ed panamegley na katutulok.​—1 Samuel 3:18, 19.

10. Diad ebat ed kapagalangan, panon so impamagalang na Dios ed si Samuel?

¹⁰ Pinagalangan nen Samuel si Jehova ed dakel a taon bilang sakey a propeta, tan say Dios so amagalang ed sikato. Saya so imanoen ed 1 Samuel 7:7-13. Tampol a kinmiwas si Jehova ed pikakasi nen Samuel diad inkerew na tulong a manalo ed saray Pilisteos. Agta liknaen yo so napagalangan diad pakawalaan na ontan a madibinon kabidbir? Sanen saray ilalak nen Samuel so ag-anumbok ed panangipangulo to, sikato so ag-impulisay na Dios a singa impangipulisay to ed si Eli. Saya so mapatnag lapud si Samuel so nanggawan nagnap ed anggaan na nayarian ton mamagalang ed Dios. Malaknab nin saya so impanengneng to, si Samuel so ag-angabobon ed kerew na totoo a para ed sakey a toon ari. (1 Samuel 8:6, 7) Inusar na Dios si Samuel a manlana ed si Saul tan si David. Diad impatey nen Samuel, sikato so pinagalangan na Israel diad impanermen. Lalon importante, anggaman kuan, sikato so pinagalangan na Dios diad impanalambit ed sikato ed Biblia diad limog na saray totoo na pananisian nabendisyonan na kioli tan saray maabig a bengatlan intarya na Dios. (Salmo 99:6; Jeremias 15:1; Hebreos 11:6, 16, 32, 39, 40) Agta ipanengneng na saya a say pamagalang “ed Dios na ilalo” so sankablian?

Kasin Pagalangan Yo “So Dios na Ilalo”?

11, 12. Anto so nakaukolan tayon konsideraen nipaakar ed panamagalang ed si Jehova, tan anto so sakey a dalan na panggawa tayo ed satan?

¹¹ Saray kipapasen nen Jesus tan si Samuel, ed pangiter lambengat na duaran ehemplo ed Biblia, so mamekder a saray totoo so makapangipasen na panamagalang ed “Dios na ilalo” da a manunan tuloy ed bilay. Tan saratan a duaran kipapasen so mangipanengneng a diad panggawa tayo na ontan et manepenepeg a nagungguna tan naawat tayo so galang a manlapud Dios. Balet panon so pakapanggawa yo ed saya a tekep na makatunongan a paseguron napaliket yo so Dios, a sikayo so pagalangan to, tan nagegemtan so niletneg-ed-Biblian ilalo yo?

¹² Say pakawalaan na puro, sigagalang a takot na pakapasanok ed Dios so sakey a dalan. (Malaquias 1:6) Nayarin sikatayo so akaparaan a mipakna ed satan a balikas. Ingen, nonoten iray ilalak nen Eli. No sikara so tinepetan yo no kasin labay dan pagalangan so Dios ed panamegley na sirerespeton itakot ed sikato, nayarin sikara so mangikuan na on. Say problema so onsabi diad pangipatalos ed kapetegan na saray kiwas ed inagew-agew a bilay na pilalek tayon mamagalang ed Dios diad itakot ed sikato.

13. Iyilustra no panon a say pilalek a pamagalang ed Dios ed panamegley na itakot ed sikato so ontulong ed sikatayo.

¹³ No sikatayo so nidunget ed sakey a makatukson kipapasen a nayarin sikatayo so mantakew odino mibiang ed arum iran seksual a karutakan ya agmansumpal ed pikakabat na lapag, kasin say pilalek tayon mamagalang ed Dios so mangapekta ed saray kiwas tayo? Nepeg tayon bayuboan so liknaan, ‘Anggan no say gawan-mauges so nayarin mansiansian maamot, say mismon isukok ed ontan a kasalanan so sakey ya agpanamagalang “ed Dios na ilalo” a say ngaran to so itatarok ko.’ Tan say katuaan et say mauges so aliwan permanentin mansiansian niyamot, a singa saray bengatlan ginawa na ilalak nen Eli. Saya so impatnag na saray salita nen Pablo nipaakar ed “matunong a panangukom na Dios”: “Isaklang to ed balang sakey so unong ed saray gawa to: andi-anggaan a bilay ed saraman so manaanap na gloria tan galang tan agkabubulok diad panamegley na impansungdo ed kimey a maabig; anggaman kuan, para ed saraman so makulkol tan matunganga ed katuaan balet ta tuloken da so ag-inkatunong et wala so sanok tan pasnok.”​—Roma 2:5-8.

14. Anto so sananey a dalan a nayarin pamagalang tayo ed Dios, tan anto so nayarin itepet tayo ed inkasikatayo?

¹⁴ Diad biek a dapag, sinalambit nen Pablo so pibibiang “ed kimey a maabig,” a mamagalang ed Dios tan mansumpal ed “gloria tan galang” a manlapud sikato. Say manunan kimey ed sayan nengneng natan so sinalambit nen Jesus ed Mateo 28:19, 20: ‘Manggawa na babangatan ed amin a nasyones, a bautismoan yora tan bangatan yoran manumpal ed amin a bengatlan ingganggan ko ed sikayo.’ Sankadalinan, nilaksalaksa ed saray Tasi nen Jehova so aktibo ed sayan manamagalang-ed-Dios a kimey na panagpulong tan panagbangat. Dakel ni ingen so mangibabanikel na inkasikaran magmaliw a sigpot-panaon iran ministro bilang payunir, balangla ed permanentin letnegan odino legan na saray bakasyon a manlapud sekular a trabaho odino eskuelaan. Saya so nonoten, balang sakey ed sikatayo so nagunggunaan diad pangimano no panon so talindeg to no nipaakar ed sayan kimey. Nayarin itepet yo, alimbawa, ‘Kasin papagalangan ko “so Dios na ilalo” diad pibiang a nagnap ed kimey na panagpulong?’

15. Anto so agawa ed arum a Kristianos nipapaakar ed panamagalang ed si Jehova ed panamegley na mapublikon ministeryo?

¹⁵ Arum iran Kristianos ya aktibo ed dakel iran taon so nankalkalnan tinmayer. Sikara so linmigen ed sakey a padron diad pakawalaan lambengat na melag odino matalag a pibibiang ed importantin kimey na panaggaway-babangatan. Agmi labay ya ibagan saray sinansakey a walaan na pisikal iran kaleteyan tan tinmayer lapud saray epekto na inkatatken. Nilikud ed satan, say intayer so anengneng ed limog na saray pigaran Tastasi ed nanduruman edad. Makapasagyat, agtutukoyen nen Pablo so sakey a grupo na edad sanen pinasakbayan toray Kristianos a sumpad ‘ikesaw.’ Imbes, anggaman anto so edad na sakey a too, say problema na pamaakaran a say maparanay a pibibiang ed ministeryo so mankaukolan na sagpot. A singa mapatnag ya agawa ed agew nen Pablo, arum natan so mangikakatunongan, ‘Agawaan ko so pibibiang ed saray taon, sirin natan et saray balobalon Kristianos so makapanbanikel.’​—Galacia 6:9; Hebreos 12:3.

16. Akin a nayarin nagunggunaan itayo a manlapud dilin-panangusisa ed sayan pamaakaran?

¹⁶ Saramay naapektaan ed sayan nengneng so peteg a daiset, balet nayarin itepet yo, ‘Kasin pranka a bidbiren ko so ontan a tendensya ed kipapasen ko? Panon so kipareng na pibibiang ko ed ministeryo ed saman so apalabas?’ Balanglan agawa so intayer odino andi, nepeg tayon amin a nonoten a say “Dios na ilalo” tayo so mangisisipan a mangiter na “gloria tan galang tan kareenan ed siopaman a mankimey na maabig.” (Roma 2:10) Inusar nen Pablo so sakey a Griegon salita a kabaliksan to so “panggawa na antokaman, pamawala, pankimey.” Agaylan makana a paliisan tayo so nansumpalan na saray Pariseos tan eskribas, a basta angigalang ed Dios ed panamegley na sakey a porma na panaglingkor ed bibil! (Marcos 7:6; Apocalipsis 2:10) Diad pitotongtong, sano manlapud puso et sikatayo so aktibon mibiang ed mapublikon ministeryo, pepekderan tayo ed inkasikatayo tan ed arum a sikatayo so walaan na peteg ya ilalo. Papagalangan tayo so Amalsa tayo tan Manangiter-na-bilay. Tan sikatayo so nidasig a pagalangan to, natan tan diad andi-anggaan.​—Lucas 10:1, 2, 17-20.

Tekep na Saray Mablin Bengatla Tayo

17, 18. Anto so sananey a dalan a nayarin pamagalang tayo ed Dios, tan akin a say inkamasuyat a manggawa ed satan so aliwan makana?

¹⁷ No nipaakar ed sakey ya arum a dalan a pamagalangan tayo ed “Dios na ilalo” tayo, ibabaga na Uliran 3:9: “Igalang si Jehova diad saray mablin bengatla yo tan diad saray ununan-bunga na amin a munat yo.” Si Spurrell so angipatalos ed sayan bersikulo: “Igloria si Jehova ed kayamanan yo, tan diad sankaabigan na amin ya indaak yo.”​—A Translation of the Old Testament Scriptures from the Original Hebrew.

¹⁸ Lapud saray nanduruman klero so nagmaliw a bantog diad alablabas ya inkaagum tan mayamyaman ya estilo-na-bilay, dakel iran totoo so masugnar a mangiter ed saray iglesia ra tan relihyoson organisasyon da a say getma ra et malinlinew a say igamor lambengat na kayamanan. (Apocalipsis 18:4-8) Saray ontan a panangabuso, anggaman kuan, so agmanguman ed inkabalido na Uliran 3:9. Mitukoyan ed satan ya apuyanan a simbawa, panon so pakapangusar tayo ed “saray mablin bengatla” tayo a “pamagalang ed si Jehova,” a “Dios na ilalo” tayo?

19. Iyilustra no panon so impangiyaplika na arum ed Uliran 3:9.

¹⁹ Aromog na saray Tasi nen Jehova a say ombabaleg a bilang na totoon onkikiwas ed mensahe na Panarian so mankaukolan na panamalaknab ed saray Kingdom Hall odino say pamaalagey na saray balo. Dia, sirin, so sakey a dalan na “pangigloria ed si Jehova diad kayamanan yo.” Saray ugugaw tan matatken so akibiang diad panggagawa ed saya, a singa diad personal a pannonot ya ontulong diad saray pundo ed panagpaalagey. Pian nabembenan so ontan a sekreton kanonotan et nayarin nakaukolan so personal a disiplina odino anggan arum a sakripisyo, nagkalautla no say panagplano tan pananumpal ed sakey a proyekto na panagpaalagey so onnatnat ed andukey a panaon. (2 Corinto 9:6, 7) Siansia, say panangusar ed saray pundo ed onian dalan so tuan mamapagalang ed si Jehova, lapud saray Kingdom Hall so pasen a pandayewan na saray Kristiano ed sikato tan ditan so pakagamoran da tan saray kakaiba ra na pikakabat ed Dios. Saray salita nen Jesus ed Mateo 6:3, 4 so mangiter ed sikatayo na maabig a rason na panmatalek a say Dios so mamagalang ed saraman so mamapagalang ed sikato.

20. (a) Akin a say dilin-panangusisa so nakaukolan diad panangiyaplika ed Uliran 3:9? (b) Antoran tepet so nayarin itepet tayo ed inkasikatayo?

²⁰ Manalwar, anggaman kuan: Saray Pariseos tan eskribas, ya imbaga nen Jesus ya agmangipapatalona na panamagalang ed Dios, so aneguro a sikara so inmunan makagungguna a manlapud kayamanan da. Sirin say simbawa ed Mateo 15:4-8 so mangirerekomenda a sikatayo so onsuko ed dilin-panangusisa no nipaakar ed ‘panamagalang ed si Jehova ed amin na saray mablin bengatla tayo.’ (Jeremias 17:9, 10) Alimbawa, sakey a Kristianon nagmaliw a mayaman ed panamegley na negosyo to so nayarin mangamper ed sikato diad pantultuloy ton mankimey a sigpot-panaon no nipaakar ed pananap ni na mas dakel. Nayarin ikatunongan to, ‘Arum so onloob ed payunir a ministeryo odino onalis a manlingkor ed pasen a nagkalautlan nakaukolan so managpulong, balet say nikadkaduman dalan na panlingkor ko ed Dios so diad pananap na nagkalalo tan insan nawalaan na dakel ya iter a donasyon.’ Saray kontribusyon to so nayarin manggawa na ontan lan maabig. Balet nayarin maabig ya itepet to, ‘Kasin say personal ya estilo-na-bilay ko so mangidalangirang a say pangusar ed kuarta diad panamagalang ed Dios so manunan motibo diad pananap na mas dakel?’ (Lucas 12:16-19; ipareng so Marcos 12:41-44.) Tan, ‘Kasin nayarian kon iyuksoy so kurang na bilay ko pian nawalaan na babaleg a personal a pibibiang ed sankaimportantian a kimey ed agew tayo​—panangiyabawag ed maong a balita?’ Diad tua, anggaman antoray kipapasen tayo ed bilay, nayarian tayon usisaen iray motibo tayo tan kiwas tayo tan itepet, ‘Panon so nagkalalon sigpot a pamagalang ko ed Manangiter-na-bilay tan “Dios na ilalo”?’

21. Anton ilalo so wala ed sikatayo no pagalangan tayo si Jehova natan?

²¹ Sikatayo so agsaewen nen Jehova. Agaylan makapaliket ya ilalon nayarin, natan tan diad arapen, ibaga nipaakar ed sikatayo ed saman so imbaga to ed matoor ya Israel: “Nisengeg ed katuaan a sikayo so mabmabli ed matak, sikayo so impasen a magalgalang, tan siak a dili so angaro ed sikayo”! (Isaias 43:4) Satan lamlamang a sakey so mangisisipan na “andi-anggaan a bilay ed saraman so manaanap na gloria tan galang.” Sayan sipan so ipapaarap to ed saraman so mansungdo “ed kimey a maabig.” Agaylan sakey a “Dios na ilalo”!

Panon So Pangebat Yo?

◻ No nipaakar ed saray totoon mamapagalang ed si Jehova, anto so naaralan tayo ed ehemplo nen Jesus?

◻ Panon a si Eli tan si Samuel so nandumaan nipaakar ed panamagalang ed Dios?

◻ Anto so arum ed saray dalan a nayarian yon pamadaak na panangigalang ya itarok yo ed Dios, tan anton ebat so nayarin naawat yo?

◻ Anton arapen so manaalagar ed saraman so mangiyuuna na panamagalang ed “Dios na ilalo” tayo?

[Kahon ed pahina 18]

Sulsulat Nipaakar ed Saray Kontribusyon

Niraya so arum a segek ed saray sulat a naawat ed opisina na Watch Tower Society ed Brooklyn, Nueva York:

“Say ngaran ko so Abijah. Siak so manedad na siamiran taon. Labay kon iter ed sikayo so $4 a para ed saray agagin mantatrabaho ed Kingdom Hall. Nayarian dan usaren ed panaliw na kiew odino kendi, akauley kayo la.”​—Oregon.

‘Naromog yon akalaktip so personal a tsekek. Siak la so manedad na masulok a 96 taon tan ngalngalin agak la makadngel, balet panggagayagaan kon peteg so pantitipon na kuarta a para ed saya. On, kabat ko, siak so manmamaneho na segundamanon kotse, tan agko uusaren iray panaon na betel ed Florida odino California. Makagawa ak na samet diad kipulong na maong a balita na Panarian diad ituktok ed saray puerta. Balet diad panamegley na pantipon na kuarta tan pangipawit na arum ed sikayo, liknaen kon siak ni so nawalaan na pibibiang ed satan.’​—Ohio.

‘Salamat ed amin a bengatlan ginawa yo a para ed Kingdom Hall. Sayan kuarta [$5] so itulong ed sikayo diad saray libro tan The Watchtowers a basaen mi. Say kuarta so nanlapu ed alkansiaan ko. Salamat ed brosyur ya School a mangibaga ed sikami nipaakar ed saray druga.’

“Naromog yon akalaktip so sakey a tseke. Duan lasus dolyar ed satan so para ed Kingdom Hall Building Fund. Say nakekeraan so usaren ed anggan anton paraan a nanengneng yon manepeg diad kiyalibansa na kimey na panagpulong.”​—Missouri.