Andian na Asawa balet Nagnap diad Serbisyo ed Dios

“Sikato met a mangiter na inkamarikit to ed panangasawa so manggawan maabig, balet say agmangiter ed satan ed panangasawa so manggawan magmaong.”​—1 CORINTO 7:38.

1. Panon a say panangasawa so nansumpal a sakey a bendisyon?

AGBALOT inilaloan nen Jehova so inmunan laki a mansiansian walad kasulowan. Imbes, pinalsa na Dios so sakey ya asawan kapareha a para ed si Adan, say panlapuan na rasa na too. (Genesis 2:20-24; Gawa 17:26) Tan agaylan bendisyon so pagmaliwan na panangasawa! Iter so paniba, gawaen to so maapit a pantutulongan, magalang ya oksuyan diad panamawala na saray ilalak, tan ontulong na baleg ed liket na too. Akin, anggan saray pobre tan pakaskasi so makapanggayaga ed agnayarian a saliwen na anggan anton karakel na kuarta​—arowan na sanasawa!​—Kanta nen Solomon 8:6, 7.

2, 3. (a) Anto so panmoria na sakey a relihyoson palapagan ed selibasya tan panangasawa? (b) Makasulatan, panon so nepeg a panmoria ed panangasawa?

² Arum, anggaman kuan, so manmoria ed panangasawa diad duman dalan. Inkuan na sakey a relihyoson palapagan: “Say selibasya so eklesiastikon ganggan diad Iglesia ed Sagur ya impaakseb ed saray klero a mangisesebel ed saramay wala ed estado na panangasawa a manlapud kaordinaan tan ed saraman so wala ed masanton totontonen a manlapud pangasawa. Isasakup to so obligasyon na pananumpal ed ayadyarin inkamasimpit ed silong na samba. Saray rason ed saya so: a saramay naordinaan so nayarin manlingkor ed Dios a tekep na babaleg a kasulowan na gagala (1 Cor. 7:32), tan say pambilay na panameget et sumpalen da so estado na inkabirhen, a sikato so mas masanto tan atagtagey nen say panangasawa. Diad BS [Balon Sipan] et say selibasya odino kipapasen a birhen so nitandoro ed atagtagey a tawag nen say diad saman so walaan na asawa.​—The Catholic Encyclopedia, tinipon nen Robert C. Broderick.

³ Peteg kasin posibli a say impaskar a selibasya so ‘mas masanto tan atagtagey nen say panangasawa’? Aliwan ontan unong ed “Balon Sipan,” a kuanto ed Katolikon Jerusalem Bible: “Say Espiritu so mabitar ya angibaga a kaleganan na unor iran panaon et wala raman so mangibeneg ed pananisia tan pilien dan talinengen iray makapalikdon espiritu tan doktrina a manlalapud saray diablo; tan say sengegan na saya et saray katilaan ya imbaga na saray mansimpisimpitan a saray konsiensia ra so amarkaan a singano ampetang a balatyang: ikuan da a say panangasawa so insebel tan mangigeter na totontonen nipaakar ed iyarawi a manlapud saray taganon pinalsa na Dios a naawat a tekep na pisasalamat na saray arum a manisia tan mikabat ed katuaan.” (1 Timoteo 4:1-3) Diad tua, say panangasawa so sakey a nanlapud Dios, tan sikato so maabig.​—Ruth 1:9.

4. Nisesengeg ed 1 Corinto 7:38, antoran tepet so onlesa?

⁴ Anggaman say panangasawa so sakey a langkap a nanlapud Dios, insulat nen apostol Pablo: “Sikato met a mangiter na inkabirhen to ed panangasawa so manggawa na maabig, balet say agmangiter ed satan ed panangasawa so manggawa na magmaong.” (1 Corinto 7:38) Akin ya impanengneng nen Pablo a magmaong so pansiansian andian na asawa? Nepeg kasin liknaen na sakey ya andian na asawa ya aliwan kumpleto?

Say Sentro na Kristianon Bilay

5. Anto so nepeg a sentro ed Kristianon bilay?

⁵ Say panlingkor ed si Jehova so nepeg a sentro na Kristianon bilay tayo, balanglan sikatayo so wala ed kasulowan odino walaan na asawa. Say sagradon serbisyon magaygayagan nisasaklang ed Dios so mangiter na ebidensya na impisiglaotan tayo ed sikato a bilang Soberano na Talba. Say sigpot-puson katutulok tan gunaet a pibibiang ed Kristianon ministeryo so dalan a pangipatnag ed satan a siglaotan. (1 Juan 5:2, 3; 1 Corinto 9:16) Namparan say ministeryo tan arum iran matulok a kiwas a mitukoyan ed madibinon linawa so nagawaan no say sakey so andian na asawa.

6. Balanglan sikatayo so walaan na asawa odino walad kasulowan, say magunaet a ministeryo so makayari ed sikatayon manggawa na anto?

⁶ Saray ebanghelisador so mangitatarok natan ed kimey na panangipulong ed Panarian diad kirayewan nen Jehova. Tan balanglan sikatayo so walaan na asawa odino walad kasulowan, say magunaet a ministeryo so mangiter ed sikatayo na pankanawnawan mangisentro na nayarin arum ed saray personal a kayarian tan abilidad tayo diad serbisyo ed Dios. Balet nepeg tayon bayuboan tan kontrolen iray sirkumstansya tayo ta pian say ministeryo so agbalot nipaarap ed sakey a pasen ya aliwan sentro na bilay tayo. Nepeg ya ‘anapen tayon ununa so Panarian.’ (Mateo 6:33) Wala so gayaga diad panangiyapasakey ed saray madibinon intereses imbes a diad saray personal ya intereses.

Nagnap a para ed Ministeryo

7. Anton ehemplo so mangipanengneng a say Kristianon andian na asawa so magmaliw a nagnap a para ed ministeryo?

⁷ Saray Kristianos so makapagmaliw a nagnap a para ed ministeryo balanglan sikara so walad kasulowan odino walaan na asawa. Sirin say estado ya andian na asawa so sakey a pundasyon ya agmankakaukolan na pananguman. (Ipareng so 1 Corinto 7:24, 27.) Say Salita na Dios so agmangaala na panmoria na arum iran tribu a say sakey a laki so agmakarapat ed nagnap ya estado to no sikato so andian na asawa. Si Jesu-Kristo so inatey ya andian na asawa, tan say espiritual a nobya ed tawen so alenleneg ya asawan inter nen Jehova ed si Jesus. (Apocalipsis 21:2, 9) Ingen, say Anak na Dios, anggaman andian na asawa bilang sakey a too, so sankamanunaan ya ehemplo na sakey a toon nagnap a para ed ministeryo.

8. A singa impanengneng nen Pablo, say pagmaliw ya andian na asawa so mangipalugar ed anto?

⁸ Diad tua, say kipapasen ya andian na asawa so mangipalugar na babaleg a personal a kawayangan tan panaon a para ed ministeryo. Irerekomenda so kasulowan, imbaga nen Pablo: “Labay kon sikayo so bulos a manlapud kapagaan. Say lakin andian na asawa so mapaga nipaakar ed saray bengatlan kayarian na Katawan, no panon so nayarin pakagamor to ed panangabobon na Katawan. . . . Nagkalalo ni, say biin andian na asawa, tan say marikit, so mapaga nipaakar ed saray bengatlan kayarian na Katawan.” (1 Corinto 7:32-34) Saya so onaplika ed saray walad kasulowan a Kristianos tan diad saraman so walaan na asawan aminsan balet saray sirkumstansya ra so anguman, a sikara so nipawil ed kipapasen ya andian na asawa.​—Mateo 19:9; Roma 7:2, 3.

9. Panon so pangipanengneng na ehemplo nen Jesus a say kipapasen ya andian na asawa so agmanggawa ed sakey a toon aliwan nagnap a para ed Kristianon ministeryo?

⁹ Say pakarapat ed pisikal, kanonotan, tan espiritual ya inkatatken so mangitarok na inkagnap a para ed serbisyo ed Dios. Agkinaukolan nen Jesu-Kristo so kaparehan asawa pian magmaliw a nagnap a para ed betang ton Manunan Ministro na Dios tan say sakey a diad panamegley to et nitarya so dondon. (Mateo 20:28) Diad kipapasen ton andian na asawa, si Jesu-Kristo so bulos a mangiyapasakey na sigpot iran pakayari to ed ministeryo to. Say kipapasen ton andian na asawa so miduman tuloy a manlapud saray Judios, a say panangasawa tan saray anak so nidanet. Anggaman kuan, si Jesus so nagnap a makayarin manumpal ed inter-na-Dios a kimey to. (Lucas 3:23; Juan 17:3, 4) Sirin, say kipapasen ya andian na asawa so agmanggawa ed sakey a toon aliwan-nagnap a para ed Kristianon ministeryo.

Saray Totoon Walaan na Asawa So “Naapag”

10. Lapud “sakey a laman” a bedber, anto so imbaga nen Pablo nipaakar ed saraman so walaan na asawa no ipareng ed saraman so andian na asawa?

¹⁰ Miduma ed saray walad kasulowan, saray Kristianon walaan na asawa so nepeg a manumpal ed ministeryo diad panamidbir da ed “sakey a laman” a bedber. (Mateo 19:5, 6) Lapud satan a bedber tan saray nanduruman responsabilidad to, imbaga nen Pablo a saray walaan na asawa so “naapag.” Insulat to: “Labay kon sikayo so magmaliw a bulos a manlapud kapagaan. Say lakin andian na asawa so mapaga nipaakar ed saray bengatlan kayarian na Katawan, no panon so nayarin pakagamor to ed panangabobon na Katawan. Balet say lakin walaan na asawa so mapaga nipaakar ed saray bengatla ed mundo, no panon so nayarin pakagamor to ed panangabobon na asawa to, tan sikato so naapag. Nagkalalo ni, say biin andian na asawa, tan say marikit, so mapaga nipaakar ed saray bengatla a kayarian na Katawan, pian sikato so nayarin magmaliw a masanto ed laman to tan diad espiritu to. Anggaman kuan, say biin walaan na asawa so mapaga nipaakar ed saray bengatla ed mundo, no panon so nayarin pakagamor to ed panangabobon na asawa to. Balet saya so ibabagak ya onkana ed dilin pankaabigan yo, aliwan pian pangalot ko ed sikayo, noagta pian napakiwas kayo ed saman so maabig tan ed saman so pirmin panaglingkor ed Katawan ya anggapo so kaapag na imano.”​—1 Corinto 7:32-35.

11. Anto so ipapanengneng nen Pablo ed 1 Corinto 7:32-35?

¹¹ Malinlinew, para ed nagkalalon agnaapag-imano a bilay, inrekomenda nen Pablo so kasulowan. Sikato a mismo so nayarin balo ya agtola pinili so pangasawa-lamet. (1 Corinto 9:5) Diad anggan anton kipapasen, kabat ton walaray kapagaan a nisiglaot ed bilay na walay asawa ed sayan mundo. Ipapanengneng to so miparan kawayangan a napanggayagaan na saray andian na asawan Kristianos tan no panon a saray intereses na saray walaan na asawan mananisia so nakaukolan a naapag ed baetan na saray silalaman tan espiritual a pamaakaran. Say toon walaan na asawa so agmangagamil na nagnap ya autoridad ed dilin laman to, lapud say asawa to so sakey a laman ed sikato tan sirin walaan na kanepegan ed laman to. (1 Corinto 7:3-5) Nisesengeg ed saya, dugan imbaga nen Pablo a say Kristianon andian na asawa so makayarin magmaliw a masanto, salanti, nagnap a nibiig tan nigana a para ed direktan pangusar nen Jehova a Dios, namparan diad laman tan diad espiritu.

12. Lapud andian na kapisagan, anto so nayarin gawaen na sakey a toon andian na asawa?

¹² Say espiritu na walad kasulowan a Kristiano, odino getma na kanonotan, so mamakiwas ed sikaton magmaliw ya aktibo, agnaapag ya imanon serbisyo ed Panarian na Dios. Diad kipapasen ton andian na asawa a mankanepegan ed kabiangan a panangontrol ed laman to, nayarian ton tumboken so espiritu, odino inklinasyon, na nonot tan puso to. Nayarian to so mamasya ed serbisyo nen Jehova a tekep na panangiyapasakey na laman tan kanonotan. Sirin say laki odino biin andian na asawa so makaimanon tuloy diad pamaliket lambengat ed Katawan diad sankabalgan a dilin kawayangan. Agtayo nayarian a manepeg ya ilikud so imbaga nen Pablo, lapud anengneng nen Jehova a manepeg so kikurit na satan ya onkana ed kibangatan tayo.

Say Toon Walaan na Asawa So Aliwan Nagnap?

13, 14. Anton lingon kurang so manleglemew ed “sakey-laman” a bedber tan manggawa ed sakey a toon walaan na asawa ya aliwan-nagnap a para ed Kristianon ministeryo?

¹³ Diad lingon ideya a sikara so makagawa na malaem diad serbisyo ed Dios, arum a walaan na asawan Kristianos so nayarin mangipasen ed impangasawa ed aliwan tanton makanan pasen ed bilay. Alimbawa, say asawan bii so nayarin onggapon onkiwas ya independente ed asawa to ed saray pamaakaran. Say asawan laki so nayarin magmaliw ya okupadon tuloy ed saray aktibidades ed kongregasyon. Diad leksab na saratan a sirkumstansya, nayarin ibaga ra a sikara so manggagawa na maabig diad serbisyo ed si Jehova. Diad tua, anggaman kuan, sikara so nayarin manutumbok na sakey a kurang a manleglemew ed “sakey a laman” a bedber. No ontan, satan so aliwan makapaliket ed si Jehova.

¹⁴ Diad tua, say panleglemew ed “sakey a laman” a bedber so manggawa ed walaan na asawa ya aliwan nagnap a para ed Kristianon ministeryo. Say panangasawa so agniarum diad inkagnap ed ministeryo noagta paraisetan to so personal ya imanon nayarin iter ed ministeryo. (Ipareng so Lucas 14:16, 17, 20.) Ingen, no saray totoon walaan na asawa so mamaliket ed Dios tan magmaliw a nagnap a bilang ministros to, sikara so nepeg a manbilay a tukoy ed saray obligasyon da ed panamaley.

Andian na Asawa a Nisesengeg ed Panarian

15. (a) Saray andian na asawan Kristianos so nepeg a mamayubo na anton kalidad? (b) Anton manunan punto nipaakar ed panangasawa tan inkawalad-kasulowan so inter nen Pablo ed 1 Corinto 7:36, 37?

¹⁵ Manwarin saray walaan na asawan ariripen nen Jehova so nepeg a manbilay a tukoy ed saray obligasyon da ed panamaley, saray walad kasulowan a Kristianos so nepeg a mamayubo na inkakontento ed andian na asawan inkagnap da. A singa imbaga nen Pablo: “Natan et ibagak ed saray andian na asawan totoo tan saray babalo, a maabig ed sikara no sikara so mansiansia a singa siak [andian na asawa]. Kasin sika so nisinger ed sakey ya asawan bii? Tundaan mon anapen so kalukpos. Kasin sika la so alukpos a manlapud sakey ya asawan bii? Tundaan mon anapen so sakey ya asawan bii.” (1 Corinto 7:8, 27) Diad tulong nen Jehova, bilang sakey a toon walad kasulowan, bayuboan so maligen a kipapasen a gawaen na Dios a posibli. Anggan anton pananguman ed estado so nepeg ya asumpal lan konklusyon, a singa pamaakaran na kustombre odino sakey a reaksion na kaseldet. Imbes, nepeg a sikato so ontalindeg a manlapud Makasulatan a nakakaukolan, lapud imbaga nen Pablo: “No siopaman et manisip a manugalin agmanepeg ed inkamarikit to, no satan so linmabas ed salindak na inkatobonbalo to, tan saya so nengneng a nepeg ton kagawa, paulian a gawaen to so labay to; sikato so agmankasalanan. Paulian iran mangasawa. Balet no siopaman so ontalindeg a maligen ed puso to, ya andian na pankaukolan, balet walaan na pakauley ed dilin linawa to tan sayan kanonotan so ginawa to ed dilin puso to, a pansiansiaen to so dilin inkamarikit to, maong so gawaen to.”​—1 Corinto 7:36, 37.

16. (a) Anto so kabaliksan na “linmabas ed salindak na inkatobonbalo”? (b) Ed anto so nepeg a kakumbinsian na Kristianon mansiansian andian na asawa?

¹⁶ Sirin impanengneng nen Pablo ya aliwan makapuy so pangasawa no say sakey a too so manugali ed singa aliwan manepeg ed inkamarikit to, anggamano say apostol so andi-duaruwan agto ipapasen a graben kasalanan. A singa inkuanto lan akadkauna, “Magmaong so mangasawa nen say napoolan ed ibeg.” (1 Corinto 7:9) Siempre, tutukoyen to so panangasawa ed leksab na saratan a sirkumstansya no say sakey a too so “linmabas ed salindak na inkatobonbalo to,” ed lampas na panaon sano say interes ed sekso so inmunan nagmaliw a mabiskeg. No say sakey a matatken so walaan na “pakauley ed dilin linawa to” tan mapekder a denisidi to ed puso to ya ilugar so kasulowan, maong so gawaen to. Say maaligwas a kasulowan so agmankabaliksan na ipaliis ed gonigon tan mananalonan pilalek ed panangasawa tan bilay na pamilya. Imbes, say Kristianon mamili ed pansiansian andian na asawa so nepeg a kumbinsidon nagnap ed puso a say pansiansian walad kasulowan so duga ed dili ton kipapasen tan nepeg a mabulos a mangisekar ed antokaman a sagpot a nakaukolan diad pamasiansia ed satan a kipapasen ed kasimpitan. Say Kristianon manggawa na ontan so walaan na daiset a kaapag na imano tan babaleg a kawayangan diad panlingkor ed Katawan.

17. Unong ed si Jesus, akin ya arum so mansiansian andian na asawa?

¹⁷ Saray andian na asawan Kristianos so natulongan a mamasiansia ed kipapasen a walad kasulowan no bayuboan da so kanonotan nen Jesu-Kristo. Anggaman sikato so andian na asawa ed sakey a kulturan angidanet na panangasawa, inyapasakey to so panaon to tan saray langkap to diad agnaulit a ministeryo to. Singa si Jesus, say sakey a Kristianon andian na asawa so makapanggayaga diad langkap na inkawalad-kasulowan ya impabtang na Dios ed saraman so mangilugar ed satan. Nipaakar ed saya, imbaga nen Jesus: “Aliwan amin a totoo so mangilugar ed salita, noagta diad saraman lambengat so walaan na langkap. Ta walaray eunoko a nianak ya ontan a manlapud panag-anakan na ina ra, tan walaray eunoko a ginawan eunoko na totoo, tan walaray eunoko a ginawa ra so inkasikaran eunoko a nisesengeg ed panarian na katawenan. Paulian iman so makapangilugar ed satan a mangilugar ed satan.”​—Mateo 19:11, 12.

18. Anto so mangamper ed “saray eunoko” a nisesengeg ed Panarian diad pangasawa?

¹⁸ Ag-ibabaga nen Jesus a say sakey a toon walad kasulowan so matalona nen say toon walaan na asawa. Agto ipapaseseg so inkawalad-kasulowan lapu lambengat ed pakawalaan na bulobulos a bilay, tan sikato so seguradon agmangirerekomenda ed satan ta pian say toon andian na asawa so mangilaknab ed imano diad pigaran kasuniyan ed sekso. Andi, balet saraman so manggawa ed sikaran “eunoko” a nisesengeg ed Panarian so totoon maptek ed moral a mangilugar ed saya diad puso ra. Anto so mangaamper ed sikara a mangasawa? Aliwan diad pisikal ya agpakayari noagta diad mananalonan pilalek a mangiyaplika ed inkasikara a nagnap no nayari diad serbisyo ed Dios. Sayan serbisyo so nagkalautlan importante natan lapud say Panarian so niletneg ed tawen nen 1914 tan “sayan maong a balita na Panarian” so nepeg a nipulong ed sankadalinan ya onkanan pantasi sakbay na maples ya onsasabin anggaan na sayan nigana-ed-kadederal a sistema na bengabengatla.​—Mateo 24:14.

Komendaan Iray Andian na Asawan Kristianos

19. No nipaakar ed saraman so mansiansian walad kasulowan a nisesengeg ed Panarian, anto so nepeg a gawaen na amin a Kristiano?

¹⁹ Amin a Kristianos so nepeg a mangomenda tan mamaseseg ed amin na saraman so mansiansian andian na asawa a nisesengeg ed Panarian. Tutal, diad kipapasen a walad kasulowan et “kabaliksan to so pirmin panaglingkor ed Katawan ya anggapo so kaapag na imano.” (1 Corinto 7:35) Maabig so nagawaan na saray atateng diad pangibangat ed ananak da diad ibabaga na Biblia nipaakar ed kipapasen ya andian na asawa tan saray bentaha to a para ed serbisyo ed si Jehova. Amin tayo so makayarin mamaseseg ed saray andian na asawa a kapananisiaan tan agbalot pakapuyen so desisyon dan mansiansian andian na asawa a nisesengeg ed Panarian.

20. No sika so sakey a Kristianon andian na asawa, anto so nepeg mon gawaen?

²⁰ Saray andian na asawan Kristiano so makapanliket a bilang nagnap a ministros na Dios. Diad sarayan kapantokan a panaon, sikara so aliketan a mibiang dia ed maganat a kimey na panangipulong ed Panarian. Sirin, no sika so walad kasulowan, manliket diad panguusar nen Jehova ed sika a bilang nagnap ya andian na asawan Kristianon ministro. ‘Kimeyan yo so kilalaban yo a tekep na takot tan panggiwgiw, legan a sikayo so onsindag a bilang silew ed mundo, a bembenan yon malet so salita na bilay.’ (Filipos 2:12-16) Iyapasakey so kanonotan ed saray intereses na Panarian legan a sikayo so mansiansian nikasakey ed internasyonal ya impanaagi na saray Tasi nen Jehova tan sumpalen so Kristianon ministeryo.

Antoray Ebat Yo?

◻ Anto so nepeg a sentro ed Kristianon bilay?

◻ Akin a saray andian na asawan ariripen nen Jehova so nagnap a para ed Kristianon ministeryo?

◻ Diad anton dalan a say walaan na asawa so magmaliw ya aliwan nagnap?

◻ Anto so kabaliksan na pagmaliw a “eunoko” a nisesengeg ed Panarian?

◻ Akin a nepeg tayon pasesegen iray andian na asawan Kristianos?

[Litrato ed pahina 19]

Anggaman andian na asawa, si apostol Pablo so nagnap

[Litrato ed pahina 21]

Si Jesus so matalonan ehemplo na sakey a toon nagnap a para ed ministeryo

[Litrato ed pahina 24]

Kasin komendaan yo iraman so mansiansian andian na asawa a nisesengeg ed Panarian?