Kapitulo 8

Pibibiang ed “Gayaga” na “Prinsipe na Kareenan”

1. (a) Nisengeg ed anton rason a say sakey a laki so nambaroy ed biek-taew? (b) Anto so atukoy ed parabolo nen Jesus, anggaman aliwan direktan nibaga?

¹ Diad parabolo nen Jesus ed saray talento, say lakin akankayarian ed waloran talenton pilak so agnambaroy ed biek-taew nisesengeg lambengat ed liket na pampasyar. Sikato so walaan na seryoson rason na pambaroy ed biek-taew; pilalek to so pangiligen na bengatlan mabli. Sikato so nambaroy ed biek-taew, a singa ipapanengneng na parabolo, pian gamoran so “gayaga,” a dingan na “dakel iran bengatla.” (Mateo 25:21) Sirin nakaukolan ed sikato so pambaroy na andukey a distansya, a mankaukolan na andukey a panat na panaon, ta pian niyaplika to ed samay sakey a makayarin mangipanabang ed sikato na satan a niduman gayaga.

2. (a) Diad kipapasen nen Jesus, anto so iretrato na samay mayaman a lakin nambaroy ed biek-taew, tan diad siopa so nila to? (b) Ed anto so pinawilan na Katawan?

² Lapud say mayaman a laki ed parabolo so mangireretrato ed si Jesu-Kristo, say impanbaroy na laki ed biek-taew so mangiretrato ed inyakar nen Jesus ed samay sakey a Sengegan na nikaduman gayaga a sankanengneng to. Diad siopa, sirin, so nila to? Ibabaga na Hebreos 12:2 ed sikatayo: “Onnengneng itayon mapetepet ed Manunan Ahente tan Manamayadyari na pananisia tayo, si Jesus. Nisengeg ed gayagan niiyan ed arap to et sinungdoan to so panamairapan a kiew, a minudmora to so baing, tan yinmurong ed nikawanan na trono na Dios.” On, peteg, si Jehova a Dios so Sengegan na satan a gayaga. Diad sikato so nila nen Jesus, a tinaynanan toray matoor a babangatan to diad dalin ya angimatalkan to ed saray “talento.” Say Katawan so pinmawil a tekep na “dakerakel a bengatla” ya anggapo ed sikato sanen impudir to so waloran talenton pilak ed saray taloran ariripen to. Sakey ya akadkaunan parabolon inter nen Jesus, say parabolo na “samploran mina,” so angipiho a say pinawilan to et say “maarin pakayari.”​—Lucas 19:12-15.

3. Anton nengneng na panaon ed saman sanen ginmapo ed kasumpalan so Zacarias 9:9 nen inmunan siglo K.P.?

³ Diad kipapasen ton balobalon nitandoro, say sakey ya ari so walaan na rason na panggayaga, tan ontan met ed saray matoor ya uuleyan to. Nanonotan tayo so inkagawa sanen say Anak na Dios so nankabayon linma ed Jerusalem a manumpal ed propesiya ed Zacarias 9:9. Nipaakar ed kasumpalan na satan a propesiya, nisulat: “Maslak ed ulop so angibilkag ed saray akinpaway a kawes da diad dalan, bang saray arum so ginmapon amegpeg na saray sanga na kakiewan tan intayak da ed dalan. No nipaakar ed ulop, saraman so wala ed unaan to tan saramay manumtumbok so mangikekelyaw: ‘Ilaban mo, pikasi mi, so Anak nen David! Bendito so onsabi ed ngaran nen Jehova! Ilaban mo, pikasi mi, diad katagyan ed tagey!’ Natan sanen sikato so linmoob ed Jerusalem, say interon syudad so kingalangal, a kuan da: ‘Siopa ’ya?’”​—Mateo 21:4-10; nengnengen met so Lucas 19:36-38.

4. Kayari na inkitrono to a bilang Ari, akin a si Jesu-Kristo so walaan na nikaduman letnegan diad pangimbita ed matoor ya “ariripen” to ed magayagan kipapasen?

⁴ No, sirin, saman so sakey a magayagan okasyon sanen impresenta to lambengat so inkasikato ed saray manaayam ed Jerusalem a bilang say sakey ya alanaan ed espiritu nen Jehova a para ed inkaari, agta nagkalalo so kipapasen sanen sikato so aktual a nitronon Ari diad samay impanampot na Panaon Hentil nen 1914? Saman so sakey a magayagan okasyon ed sikato. Sirin, peteg, sikato so linmoob ed sakey a gayagan agto nin balot alikna nensaman. Diad pipalinewan, nayarian to sirin ya ibaga ed saray babangatan to ya inukom ton “maong tan matoor”: “Sika so matoor ed saray daiset a bengatla. Turoen ta kan mangasikaso ed saray dakel a bengatla. Onloob ed gayaga na katawan mo.” (Mateo 25:21) Wala natan so sakey a balon gayaga a nayarin pibiangan na naabobonan ya “ariripen.” Agaylan sakey a tumang!

5. (a) Si apostol Pablo so sakey ya ‘embahador’ nen Kristo diad anton balitang na nagagawa? (b) Balet natan et say alanaan a nakdaan so “embahadores” nen Kristo diad kayari na anton nagagawa?

⁵ Nen 1919 et saray alanaan a babangatan na manuuley ya Ari, si Jesu-Kristo, so peteg a linmoob ed naabobonan a kipapasen, tan saman so abalbaleg a gayaga ed biang da. Labinsiam siglos ya asasakbay et insulat nen apostol Pablo ed saray kapananisiaan to a mangibaga ed sikara na nitandoron kipapasen da: “Sikatayo sirin so embahadores a kasandi nen Kristo.” (2 Corinto 5:20) Saman so nisulat sanen si Jesus so mapatnag lambengat a mananawir a tekep na ilalon makaawat “na panarian na katawenan.” (Mateo 25:1) Kanian, sirin, nakaukolan to so onyurong ed nikawanan na Dios tan manalagar diman a para ed agew na inagurasyon. Balet natan, nanlapulad 1919, say naabobonan a nakdaan so nagmaliw iran “embahadores” ya imbaki na samay Sakey a peteg a manuuley bilang Ari. (Hebreos 10:12, 13) Sayan katuaan so nagkalautlan nitawag ed imano na International Bible Students ed Cedar Point, Ohio, a kumbension nen 1922.

6. Saray kayari-bakal a sagpot na saramay angawat na “talento” so nipaarap ya ununa ed anton nengneng na kimey?

⁶ Nen 1919 et sikara la so angipudiran ed kasimbang na saray “talento” na manuuley ya Ari, si Jesu-Kristo. Saya so linmaknab diad pipapalinewan da ed manuuley ya Ari ra. Nanlapulad gapo, saray kayari-bakal a sagpot da so nipaarap ed “panaganin” kimey, say panagtipon ed “trigo” a klase. (Mateo 13:24-30) Lapud, a singa imbaga nen Jesus, say panagani so “kasampotan na sakey a sistema na bengabengatla,” say kayari-bakal a taon nen 1919 so inggeter a panaon ed igapo na panagani ed malatrigon “ananak na panarian,” say matoor ya alanaan a nakdaan.​—Mateo 13:37-39.

7. (a) Diad anton nengneng na panaon so nilooban na saray managani ed Katawan da? (b) Diad anton kipapasen so angitarokan nen Jehova ed saray managani, tan anton mapropetikon balikas so alaen da?

⁷ Say panaon na panagani so magayagan panaon a para ed saray managani, a singa say Katawan na panagani so manggagayaga ed okasyon a kaiba tora. (Salmo 126:6) Sayan panaon-na-panagani so apayaman na abalbaleg diad alusbon ebidensyan say Panarian na Dios ed panamegley nen Jesu-Kristo so niletneg ed katawenan nen 1914 tan si Jehova so angipawil na matunong a talindeg ed dedikadon totoo to ed dalin. Bilang sakey a klase, inala ra so salita ed Isaias 61:10: “Anggapoy saew a siak so manliket ed si Jehova. Say kamarerwak so manggayaga ed Dios ko. Lapud kinawesan toak ed saray kawes na kilalaban; diad kolibemben na inkatunong et siak so binalkot to.”

Panagtipon ed “Baleg ya Ulop” na Saray Mibibiang ed “Gayaga”

8. Anton gayaga so ag-inilaloan na alanaan a nakdaan a betang da diad anggaan na panagtipon ed saray mananawir na Panarian?

⁸ Agtanto amoria na alanaan a nakdaan a linmoob ed “gayaga” na Katawan a diad panampot na panagtipon ed unor iran membro na mananawir na mangatatawen a Panarian et wala so sananey a gayaga, bengatlan ag-inilaloan. Saman so panagtipon ed sananey a mangaraldalin a klase a manbilay ed Paraison dalin diad leksab na Milenyon Uley nen Jesu-Kristo. Siopa ni noagta saray totoon manlapud sayan mangaraldalin a klase so manepeg a naimbitaan a magmaliw ya ununan pangiparungtalan na impormasyon nipaakar ed sikara?

9. Sioparay nagkalalon naimbitaan ya onatendi ed samay kumbension nen 1935 ed Washington, D.C., tan anton nipanpanaon ya impormasyon so niparungtal diman ed sikara?

⁹ Sirin, diad ebat ed imbitasyon a nipalapag ed The Watch Tower,a nilasuslasus a manaanap na pisiglaotan ed si Jehova, dingan na angaranan a totoo to so inmatendi ed inkalapagan a kumbension na saray Tasi nen Jehova ed Washington, D.C., Mayo 30 ya anggad Hunyo 2, 1935. Diad saman a kumbension et nisagyat ed kaaralman na puso ra so impakaaral a say “baleg ya ulop” a nipasingawey ed Apocalipsis 7:9-17 et sakey a mangaraldalin a klase.

10, 11. Para ed siopa ed tawen so pansumpalan na saya a sakey a panaon na nikadkaduman gayaga?

¹⁰ Agaylan baleg a gayaga so impanggawa ed saman a kumbension ed Washington, D. C., a para ed Sankatageyan a Dios, si Jehova! Agaylan gayaga met ed Anak to a bilang say Maabig a Pastol a natan et onggapon manipon ed saray “arum a karnero” ed “sakey a pulok”!​—Juan 10:16.

¹¹ Legan a niwawanwan tan nipapastol, piguratibon panagsalita, saray membro na nakdaan tan ondadaak ya “ulop” na “arum a karnero” so manlilimog a mareereen tan maarowan. Say puso na “sakey a pastol” da so manlippua ed gayaga natan diad impakawalaan na ontan a baleg a “pulok” diad asingger a pansara na sayan “kasampotan a sistema na bengabengatla.”

Igaganggan na “Prinsipe na Kareenan”

12, 13. (a) Siopa so naimbitaan a mibiang a kaiba na alanaan a nakdaan diad gayaga na pinmawil a Katawan, tan anton rason ed saya? (b) Say “baleg ya ulop” na “arum a karnero” so manserbi ed saray intereses na “Prinsipe na Kareenan” ed anton kapasidad?

¹² Saratan a malakarneron totoo a manibukel na “baleg ya ulop” natan so walaan na baleg a pibibiang ed gayaga na Katawan, si Jesu-Kristo. Saya so nagkalalon nisesengeg diad impakawalaan da na aktibon pibibiang ed panangitarok ed saray totoon mangumpleto ed “baleg ya ulop,” ya anggapo so bilang a niiter ed Apocalipsis 7:9.

¹³ Say panagtipon a kimey a pibibiangan na “arum a karnero” so sinmabi ed sankamundoan a kalaknab, ya agnagawaan ed abilidad na mandaiset a bilang na alanaan a nakdaan. Matukoy, ombabaleg so pankaukolan ed ondarakel a bilang na “arum a karnero” so pakawalaan na lawas babaleg a pibibiang diad panangiloob ed dakel ni ed “arum a karnero” a tekep na mangaraldalin ya ilalo. Sirin say “arum a karnero” so manseserbi a bilang matoor ya igaganggan na “Prinsipe na Kareenan.” Inyarum na Uliran 25:13: “A singa say betel na yelo ed agew na panagani so matoor ya igaganggan na saraman so mangibabaki ed sikato, lapud ipawil to so mismon kamarerwa na kakatawan to.”

14. (a) Anto so tawiren na simbolikon karnero ed parabolo nen Jesus ed Mateo 25:31-46? (b) Panon a say Panarian so niparaan ed sikara “nanlapulad inkiletneg na mundo”?

¹⁴ Diad parabolo na karnero tan kanding, say simbolikon karnero so pangibabagaan na Arin Jesu-Kristo: “Dago kayo, sikayo a benindito nen Amak, tawiren yo so panarian ya imparaan ed sikayo a nanlapulad inkiletneg na mundo.” (Mateo 25:31-46) Tawiren da so mangaraldalin ya ayaman ya uley na Panarian na katawenan legan na Milenyon uley nen Kristo. Nanlapulad panaon nen matoor ya Abel, si Jehova so mangipaparaan ed sayan ayaman a para ed mundo na arondon a katooan.​—Lucas 11:50, 51.

15, 16. (a) Anton “karakpan” na sakey ya ari, a singa sinalambit nen Solomon, so wala ed Katawan natan anggaman ed uley to diad pegley na kakabusol to? (b) Diad anton nengneng a say manuuley ya Ari so walaan na sayan “karakpan” natan? (c) Anto so agawaan na saramay manitibukel na sayan “karakpan”?

¹⁵ Insulat nen makabat ya Arin Solomon ed kadaanan ya Israel: “Diad karaklan na katooan et wala so karakpan na sakey ya ari.” (Uliran 14:28) Say maarin Katawan natan, si Kristo Jesus, a sikato so sakey ya opisyal ya atagtagey a tuloy nen say mangaraldalin ya Arin Solomon, so walaan na ontan a “karakpan” no nipaakar ed “karaklan na totoo.” Saya so tua ya anggan natan sakbay na igapo na pananguley to ed sanlibon taon, on, sano sikato so manuuley ed pegley na mangaraldalin a kakabusol to, a si Satanas a Diablo so mabiskeg-nen-too ya agnanengneng ya ari to.​—Mateo 4:8, 9; Lucas 4:5, 6.

¹⁶ Say “karakpan” natan ya onnepeg ed sakey ya atagey ya opisyal a walaan na ranko na ari so aromog natan ed ombabaleg a bilang na “arum a karnero” a manibukel na “baleg ya ulop.” Masayaksak ya ikekelyaw dan mankakasakey: “Utang mi so kilalaban ed Dios, a sikato so manyurong ed trono, tan ed Kordero.” (Apocalipsis 7:9, 10) Sikara la so makakasagmak na kilalaban a manlapud nigana-ed-kadederal a sistema na bengabengatla, a si Satanas a Diablo so “dios.” (2 Corinto 4:4) Sikara la so, piguratibon panagsalita, “anguras ed saray kawes da . . . ed dala na Kordero” tan pinaputi da ra ta pian ompatnag ya andi-matik ed arap nen Jehova a Dios, say Ukom.​—Apocalipsis 7:14.

17. (a) Diad anton kilalaban so tatalaran ni ed arapen na “baleg ya ulop”? (b) Anton pribilehyo so panggayagaan da legan na Milenyon Uley na “Prinsipe na Kareenan”?

¹⁷ Ingen sikara so onnengneng ed arapen diad madibinon nitaryan kilalaban a sagmaken da ed sankapantokan a pambiktorya nen Jehova ed “bakal na baleg ya agew na Dios a Makapanyarin-amin” diad Har–Magedon. Say abalbaleg a pananalo to so mansumpal diad kaalangon na sankatalbaan ya inkasoberano to, tan walaray mangaraldalin a makatasi lapud kipreserba ran mabilay ed makapataktakot ya anggaan na sayan marelmeng a mundo. (Apocalipsis 16:14; 2 Pedro 3:12) Agaylan mabmablin pribilehyo! Agaylan baleg a gayaga so ipanabang na “Prinsipe na Kareenan” ed niliktar a “baleg ya ulop” na matoor ya “arum a karnero” to!

[Paimano ed Leksab]