Payadyarien So Kasantosan diad Takot ed Dios

“Linisan tayo so inkasikatayo ed amin a karutakan na laman tan espiritu, a payadyarien so kasantosan diad takot ed Dios.”​—2 CORINTO 7:1.

1. Panoy pikabat tayo a saray ataragey-rankon angheles so amidbir ed kasantosan nen Jehova?

SI Jehova so masanto a Dios. Saray ataragey-rankon angheles ed tawen so mangiyabawag ed kasantosan to diad agpanduaruwaan iran termino. “Santo, santo, santo si Jehova na saray ehersito. Say inkagnap ed amin na dalin et say gloria to.” Ontan so makapaliing a kelyaw na saray serapin ya anengneng ed sakey a pasingawey nen propeta Isaias nen komawalon siglo K.K.P. Diad impanampot na inmunan siglo K.P., anengneng nen apostol Juan iray pasingawey ed no anto so nagawa ed “agew na Katawan,” a kawalaan tayo natan. Anengneng to so apatiran mabilay a pinalsa ed liber na trono nen Jehova tan sikara so nadngel ton mangiyaabawag ya andi-tunda: “Santo, santo, santo si Jehova a Dios, say Makapanyarin-amin, a sikato nensaman tan sikato natan tan sikato so onsabi.” Sarayan nankatlon panangiyabawag na saray mangatatawen ya espiritun pinalsa nen Jehova so mangidadanet ed superlatibon kasantosan na Manamalsa.​—Isaias 6:2, 3; Apocalipsis 1:10; 4:6-8.

Kasantosan tan Inkisian

2. (a) Anton duaran nengneng so wala ed kasantosan, tan panon a si Jehova so masanto ed sarayan pamaakaran? (b) Panoy impangidanet nen Moises ed kasantosan nen Jehova?

² Say kasantosan et agto lambengat kabaliksan so relihyoson kalinisan tan inkadalisay noagta ontan met ed inkisian, odino kapasantos. Si Jehova so supremon malinis, odino dalisay; sikato so sigpot a nisian a manlapud saray marutak a dirios na nasyones. Sayan nengneng na kasantosan to, odino kapasantos, so indanet nen Moises sanen inkanta to: “Siopa ed limog na saray dirios so singa sika, O Jehova? Siopa so singa sika, a paneknekan mo so inkasikan makapanyari ed kasantosan?”​—Exodo 15:11.

3. Diad antoran dalan a saray Israelitas so kinaukolan a magmaliw a masanto, tan panon so impanulong nen Jehova ed sikara ed sayan pamaakaran?

³ Say masanton Dios a Jehova so nankaukolan a saray kadaanan ya Israelitas, saray totoo to ed dalin, so nepeg met a masanto. Saya so kinaukolan ya aliwa lambengat ed saray saserdote tan saray Levita noagta ontan met ed interon nasyon. Imbaga nen Jehova ed si Moises: “Mansalita ed interon pandaragup na saray anak na Israel, nepeg mon ibaga ed sikara, ‘Nepeg yon paneknekan so inkasikayo a masanto, lapud siak a Jehova a Dios yo so masanto.’” (Levitico 19:2) Diad satan, inter nen Jehova ed sikara iray ganggan ya ontulong ed sikaran mansiansian malinis ed espiritual, moral, mental, pisikal, tan seremonyal, say saginonor et nisiglaot diad panagdayew da ed tabernakulo tan, saginonor, diad templo.

Sakey a Totoon Nibiig

4, 5. (a) Panon a say silalaman ya Israel so apasantos a nasyon? (b) Anto so kinaukolan ed saray espiritual ya Israelitas, tan panon so impamekder nen apostol Pedro ed saya?

⁴ Diad kalaknab a saray Israelitas so anumbok ed ganggan na Dios, sikara so nikaduma a manlapud marurutak a nasyones ed kaliberliber da. Sikara so abidbir a bilang sakey a totoon nibiig, odino apasantos, a para ed serbisyo ed masanton Dios a Jehova. Imbaga nen Moises ed sikara: “Sikayo so sakey a masanton totoo ed si Jehova a Dios yo. Sikayo so pinili nen Jehova a Dios yo a magmaliw a totoo to, sakey a nikabiig a kayarian, a nanlapu ed amin a totoo a wala ed tapew na dalin.”​—Deuteronomio 7:6.

⁵ Say ontan a kalinisan tan inkisian so nakaukolan met ed espiritual ya Israel. Nansulat si apostol Pedro ed saraman so pinilin magmaliw ya espiritual ya Israelitas: “Bilang matulok ya ananak, tundaan yo la so minunong unong ed saray pilalek a datin wala ed sikayo diad agpikakabat, balet, mitukoyan ed Masanton Sakey ya anawag ed sikayo, sikayo met so magmaliw a masanto ed amin ya ugali yo, lapud nisulat: ‘Sikayo so nepeg a masanto, lapud siak so masanto.’”​—1 Pedro 1:1, 14-16.

6, 7. (a) Panoy inkadeskribe na saray membro na “baleg ya ulop” ed Apocalipsis 7, tan anto so lohikal a kinaukolan ed sikara? (b) Anto so nasalaysay ed onggendan iran parapo?

⁶ Diad Apocalipsis kapitulo 7, saray membro na “baleg ya ulop” so adeskribe a “manalalagey ed arap na trono [nen Jehova] tan diad arap na Kordero, ya akakawes na saray amputin kawes,” a “naurasan iray kawes da tan apaputi ed dala na Kordero.” (Apocalipsis 7:9, 14) Saray amputin kawes da so mangisisimbolo na malinis, matunong a talindeg da ed arap nen Jehova, ya inter to ed sikara lapud pananisia ra ed mananondon a dala nen Kristo. Malinlinew, sirin, aliwa lambengat a saratan a Kristianos noagta ontan met ed “arum a karnero” so nakaukolan a mansiansian malinis ed espiritual tan moral ta pian mandayew ed si Jehova a makapaliket.​—Juan 10:16.

⁷ Salaysayen tayo natan no panon a saray totoo nen Jehova ed apalabas so kinaukolan a mamaneknek na inkasikaran dili a malinis tan masanto tan no akin a saray parehon prinsipyo so onaplika ed saray totoo na Dios natan.

Espiritual a Kalinisan

8. Nisengeg ed antoran rason a saray Israelitas so nakaukolan a mansiansian biig a manlapud saray relihyon na Canaan?

⁸ Saray silalaman ya Israelitas so nakaukolan a mansiansian nisian manlapud agmalinis iran relihyoson agagamil na arum a nasyones. Mansasalita ed panamegley nen Moises, imbaga nen Jehova ed Israel: “Bantayan yo so inkasikayo ya agkayo migagawaan na sakey a sipan ed saray manaayam ed dalin a laen yo, ta ompan mansumpal a sakey a patit ed pegley yo. Balet saray altar da so igeba yo a totoo, tan saray sagradon lusek da [inusar ed makapadimlan panagdayew ed sekso] so deralen yo, tan saray sagradon palitek da so batangen yo. Agkayo ondadakmomo ed sananey a dios, lapud si Jehova, a say ngaran to so Maimon, so sakey a maimon a Dios [odino, “sakey a Dios a mankakaukolan na sigpot a debosyon,” New World Translation Reference Bible, paimanod-leksab]; ta ompan sikayo so migawaan na sakey a sipanan ed saray manaayam ed dalin, unong a sikara so peteg a manggawa na imoral a pilalawan ed saray dirios da tan mangibagat ed saray dirios da.”​—Exodo 34:12-15.

9. Anton dugarugan bilin so niiter ed saray matoor a nakdaan a tinmaynan ed Babilonia nen 537 K.K.P.?

⁹ Siniglos ed saginonor, pinuyanan nen Jehova si Isaias a mangipaliwawa ed sarayan mapropetikon salita ed saray matoor a nakdaan ya ompawil ed Juda a manlapud Babilonia: “Ontaynan, ontaynan, ompaway a manlapud ’tan, agdiriwiten so agmalinis; ompaway a manlapud pegley to, pansiansiaen yo so inkasikayon malinis, sikayo a manaawit ed saray kagawaan nen Jehova [ya usaren diad pangipawil na puron panagdayew diad templo ed Jerusalem].”​—Isaias 52:11.

10, 11. (a) Antoran miulibay a bilin so niiter ed saray espiritual ya Israelitas nen inmunan siglo K.P.? (b) Panoy inkatumbok na sarayan bilibilin nagkalautla nanlapulad 1919 tan 1935, tan diad anton sananey a dalan a saray alanaan tan saray kakaiba ra so mansiansian malinis ed espiritual?

¹⁰ Miulibay, saray espiritual ya Israelitas tan saray kaiba ra so nepeg a mamasiansia na inkasikaran andi-tilol diad saray managtalintaon relihyon na sayan mundo. Nansulat ed saray alanaan a Kristianos ed kongregasyon na Corinto, imbaga nen apostol Pablo: “Anto so pipaknaan na templo na Dios ed saray talintao? Ta sikatayo so templo na mabilay a Dios; a singa imbaga na Dios: ‘Siak so manayam ed limog da tan manakar ed limog da, tan siak so Dios da, tan sikara so baley ko.’ ‘“Kanian ompaway a manlapud limog da, tan isian yo so inkasikayo,” kuan nen Jehova, “tan agyo diriwiten so agmalinis a bengatla”’; ‘“tan sikayo so akuen ko.”’”​—2 Corinto 6:16, 17.

¹¹ Nanlapulad 1919 say alinisan tan agugulan a membro na alanaan a nakdaan so nibulos a manlapud agmalinis, managtalintaon relihyon na Babilonia a Baleg. (Malaquias 3:1-3) Sikara so tinmalineng ed mangatatawen a tawag: “Ompaway ed sikato, baley ko, no agyo labay so minabang ed saray kasalanan to, tan no agyo labay so mangawat ed saray kabiangan na saray bakbak to.” (Apocalipsis 18:4) Nanlapulad 1935 et say ondarakel a baleg ya ulop na “arum a karnero” so tinmalineng met ed sayan tawag tan imbeneg da so agmalinis a Binababilonian relihyon. Saray alanaan tan saray kaiba ra met so mansiasiansian malinis ed espiritual diad ipapaliis ed amin a pipiarap ed saray sankarelmengan ya ideya na apostata.​—Juan 10:16; 2 Juan 9-11.

Kalinisan ed Moral

12. (a) Diad panamegley na antoran ganggan a pinatalindeg nen Jehova so moral a kipapasen na saray Israelitas a nipaatagey nen saray kabangibang a nasyones? (b) Antoran totontonen so nagkalautlan nipeget ed inkasaserdote?

¹² Diad panamegley na Ganggan a sipanan, pinatalindeg nen Jehova so moral a kipapasen na saray Israelitas a dumaruma ed marutak a kipapasen na saray kabangibang a nasyon. Say panangasawa tan bilay na pamilya so asalimbengan ya institusyon ed Israel. Say komapito ed saray Samploran Ganggan so mangisesebel ed pikakalugoran. Namparan say pikakalugoran tan pilalawanan so mabiskeg a nadusa. (Deuteronomio 22:22-24) Saray mamarikit so asalimbengan ed leksab na Ganggan. (Deuteronomio 22:28, 29) Saray totontonen ed panangasawa so nagkalautlan mapeget ed inkasaserdote. No nipaakar ed atagey a saserdote, sikato so nakaukolan a mamili na sakey a malinis a marikit a para ed sakey ya asawa.​—Levitico 21:6, 7, 10, 13.

13. Diad siopa so niparengan na saray membro na “nobya” nen Kristo, tan akin?

¹³ Miulibay, say baleg ya Atagey a Saserdote, si Jesu-Kristo, so walaan na “nobya” a tinibukel na 144,000 iran alanaan a Kristianos, a sikara so nipareng ed saray “mamarikit.” (Apocalipsis 14:1-5; 21:9) Pansiasiansiaen da so inkasikaran dili ya andi-tilol ed mundo nen Satanas tan mansiasiansian dalisay ed doktrina tan moral. Insulat nen apostol Pablo ed saray alanaan a Kristianos ed Corinto: “Siak so maimon ed sikayo diad maridios ya imon, ta sikayo so insipan ko diad pipiasawa ed sakey ya asawan laki pian iparungtal ta kayo komon a bilang sakey a malinis a marikit ed si Kristo Jesus.” (2 Corinto 11:2) Insulat met nen Pablo: “Inaro nen Kristo so kongregasyon tan insaklang to so inkasikato ed satan, pian komon pasantosen, a nilinisan to diad ames na danum diad panamegley na salita, pian iyarap to komon so kongregasyon ed inkasikato diad karlangan to, ya andian na matik odino kumanet odino anggan dinan ed ontan iran bengatla, noagta sikato so nepeg a masanto tan andian na tilol.”​—Efeso 5:25-27.

14, 15. (a) Anto so nepeg a mangulop ed espiritual ya inkadalisay na nobyan klase, tan anton kasulatan so mangipapanengneng ed saya? (b) Akin a mapatnag a saray miulibayan a kaukolan na inkadalisay ed moral so onaplika met ed arum a karnero?

¹⁴ Sayan espiritual ya inkadalisay na nobya nen Kristo so nepeg ya ulopen na kalinisan ed moral diad biang na saray membro to. Imbaga nen apostol Pablo: “Agnapalikdo. Ni saray milalawanan, ni saray managtalintao, ni saray mikakalugoran . . . so makatawir ed panarian na Dios. Tan ingen ontan so arum ed sikayo nensaman. Balet sikayo la so naurasan a malinis, balet sikayo so apasantos.”​—1 Corinto 6:9-11.

¹⁵ A saratan a kakaukolan na inkadalisay ed moral so onaplika met ed arum a karnero so nagmaliw a mapatnag sanen kinonsidera iraman so impuera nen Jehova a manlapud insipan ton balon tawen tan balon dalin. Nabasa tayo: “Balet no nipaakar ed . . . saraman so makapadimla ed karutakan da tan managpatey tan milalawanan . . . , say apag da so diad dayat a mandarlang ed apuy tan asupre. Saya et kabaliksan to so komaduan ipapatey.”​—Apocalipsis 21:1, 8.

Magalang a Panangasawa

16, 17. (a) Antoran kasulatan so mangipanengneng a say inkawalad kasulowan so aliwan sakey a nakakaukolan ed kalinisan ed moral? (b) Panon a say sakey a Kristiano so makapangipanengneng na manepeg a takot ed Dios diad pampili ed sakey a kaparehan asawa, tan akin ya aliwan makabat so pangipulisay ed apostolikon panameget?

¹⁶ Pian mansiansian malinis ed moral, saray alanaan a membro na nobyan klase tan saray arum a karnero so agkinaukolan a mansiansian walad kasulowan. Say impapilit a selibasya so aliwan-makasulatan. (1 Timoteo 4:1-3) Say seksual a relasyon ed loob na bedber na panamaley so aliwan agmalinis. Ibabaga na Salita na Dios: “Komon ta narayew so panangasawa ed limog na amin, tan say dukolan na panangasawa so andian komon na tilol, lapud ukomen na Dios iray milalawanan tan mikakalugoran.”​—Hebreos 13:4.

¹⁷ Anggaman kuan, say sakey a Kristianon manpilalek a ‘payadyarien so kasantosan diad takot ed Dios’ so aliwan bulos a mangasawa ed siopaman a panliketan to. Sakbay a tuloy na impanimbawa to ed saray kapara ton Kristiano a ‘linisan da so inkasikara ed amin a tilol na laman tan espiritu, a payadyarien so kasantosan diad takot ed Dios,’ insulat nen apostol Pablo: “Agmipapako ed saray agmananisia. Ta anto ta so panulop na inkatunong tan kaugsan? . . . Odino anto ta so apag na sakey a toon matoor ed sakey ya agmananisia?” (2 Corinto 6:14, 15; 7:1) Bilang sakey a membro na nibiig tan malinis a totoo nen Jehova, say sakey a Kristianon laki odino bii a manpilalek a mangasawa so mangawat ed apostolikon panameget a gawaen so ontan “lambengat ed Katawan,” salanti, diad pamili ed sakey a dedikado, bautismado, tan matoor ya aripen nen Jehova. (1 Corinto 7:39) A singa ed apalabas, ontan met natan, seguradon aliwan makabat ed saray dedikado ed limog na totoo na Dios so agpangimano ed sayan Makasulatan a simbawa. (Ipareng so Deuteronomio 7:3, 4; Nehemias 13:23-27.) Aliwan panangipanengneng na mabunigas a takot ed Engranden Katawan tayo, si Jehova.​—Malaquias 1:6.

18. Diad anton sananey a dalan so pakapansiansia na saray Kristianos ed panamaley da a narayew?

¹⁸ Nagkalalo ni, diad Israel, saray impaakseb a ganggan so angigeter ed seksual iran aktibidades anggan diad loob na bebdber na panamaley. Ag-aakdolan na sakey ya asawan laki so asawa to legan na panaon na panagregla. (Levitico 15:24; 18:19; 20:18) Nakakaukolan na saya so maaron konsiderasyon tan dangka diad biang na saray lalakin Israelita. Kasin saray Kristianos so magmaliw ya aliwan makonsidera ed saray kaasawaan da? Imbaga nen apostol Pedro a saray Kristianon asawan lalaki so nepeg a miamong ed saray kaasawaan da “unong ed pikakabat,” salanti, pikakabat ed inkatibukel da bilang “sakey a mayumis a baso, say inkabii.”​—1 Pedro 3:7.

Manakar ed “Dalan na Kasantosan”

19, 20. (a) Deskribien so maawang a dalan a tutumboken na kaslakan ed katooan. (b) Panon a saray totoo nen Jehova so duma a manlapud mundo nen Satanas? (c) Anton dalan so tutumboken na saray totoo na Dios, kapigan so inkilukas to, tan siopa lambengat so naabuloyan ditan?

¹⁹ Say walad unaan so mangidadanet ed lawas onlalaknab a baetan a mangisisian ed saray totoo nen Jehova a manlapud mundo nen Satanas. Say peles a minumundon sistema na bengabengatla so ompapalalon malukak tan mapaglet-ed-laman. Inkuan nen Jesus: “Onloob ed mainget a puerta; lapud maawang tan malapar so dalan a mamaarap ed kaderalan, tan dakel iraman so onloob ditan.” (Mateo 7:13) Satan a maawang a dalan so tutumboken na karaklan a katooan. Diad pangaon ed si apostol Pedro, sikato so dalan na “malukak a kondukta, kagletan, inkalablabas ed alak, panagliliket, panag-iinom, tan mauges iran panagtalintao,” sakey a dalan a mangitonton ed “alablabas a karutakan.” (1 Pedro 4:3, 4) Say anggaan to so kadederal.

²⁰ Saray totoo na Dios, ed biek a dapag, so manaakar ed duman dalan, malinis a dalan a tutumboken na saray malinis a totoo. Say inkilukas na sayan dalan ed panaon na anggaan so impasakbay nen propeta Isaias, a nansulat: “Tan wala a peteg so sakey a dalan diman, anggan sakey a dalan; tan say Dalan na Kasantosan so katawagan to. Say agmalinis so ag-ondalan ditan.” (Isaias 35:8) Nankomento ed sayan propesiya, say libron Worldwide Security Under the “Prince of Peace” so angikuan: “Nen 1919 et nilukas so sakey a piguratibon dalan diad saray magayagan ariripen na Dios. Saraman so nanlabay a magmaliw a masanto ed pakanengneng nen Jehova et saraman so nanakar ed satan a ‘dalan,’ ‘satan a Dalan na Kasantosan.’ . . . Natan, Diad kapirmian ‘ed konklusyon na sistema na bengabengatla,’ satan a madibinon nitaryan ‘dalan’ so mansiasiansian lukas. Saray ulop na manangapresyan totoo so . . . onloloob ed espiritual a paraison dalan, ‘say Dalan na Kasantosan.’”a

21. Panon tan akin a saray ariripen nen Jehova so angipabidbir na inkasikara a manlapud ulop na Diablo, tan anto so nasalaysay ed ontumbok ya artikulo?

²¹ On, say alanaan a nakdaan na espiritual iran Israelitas tan saray kakaiba ra, say arum a karnero, so mangipapabidbir na inkasikara natan, a bilang sakey a totoon nisian a manlapud mundo nen Satanas, a say kaisipan na kasantosan so akabalang ed amin kabaliksan. Anggapo so sagrado ed ulop na Diablo a manaakar ed “maawang tan malapar . . . dalan a mangipaarap ed kaderalan.” Aliwa lambengat a sikara so agmalinis ed espiritual tan moral noagta diad dakel iran kipapasen et sikara so aliwan malinis ed pisikal tan say indengan da so arinrintoy, diad pangibaga. Ingen, inkuan nen apostol Pablo: “Linisan tayo so inkasikatayo ed amin a dutak na laman tan espiritu, a payadyarien so kasantosan diad takot ed Dios.” (2 Corinto 7:1) Ed no antoran dalan a saray totoo na Dios so nepeg a manalwar a malinis ed kanonotan tan laman so nasalaysay ed ontumbok ya artikulo.

[Paimano ed leksab]

Saray Punto ed Repaso

◻ Anton duaran nengneng so wala ed kasantosan, tan akin a nibagan si Jehova so superlatibon masanto?

◻ Diad antoran duaran dalan a saray Isarelitas so amaneknek ed inkasikaran sakey a masanton nasyon?

◻ Anto so kinaukolan ed saray espiritual ya Israelitas tan ed saray kakaiba ra, say arum a karnero?

◻ Panon a say takot tayo ed Dios so mangapekta na pampili tayo ed sakey a kaparehan asawa?

◻ Anton duaran dalan so nayarin tumboken natan, tan akin a nepeg a gawaen so malinew a pampili?

[Litrato ed pahina 17]

Ibabaga na Salita na Dios: “Narayew komon so panangasawa”