“Manugalin Makana ed Maong a Balita”
“Labat ta manugalin makana ed maong a balita nipaakar ed Kristo.”—FILIPOS 1:27.
1. Say agano nin agawa ed Syudad na Nueva York so amawala na antoran maapabor a komento na alkalde? (Roma 13:3)
“MASULOK a 1,000 Tastasi” so linma ed City Hall ed abebbeban Manhattan nen Setyembre 29, 1988, so inreport na The New York Times. Sikara so linma diad panuporta ed proponi na panagpaalagey a bistaen ed arap na Board of Estimate na syudad. Anggamano say proponi ed permiso na balon residensyan paalagey ed sankamundoan ya hedkuarters na saray Tastasi nen Jehova so agniiter, say alkalde so “angidayew ed saray Tastasi a bilang ‘sankalinisan’ tan inkuanton sikara so ‘peteg a daydayewen.’”
2. Diad anton dalan a saray ugali na Tastasi so duma, tan akin?
2 Gendagendat, sano masulok a sanlibon totoo so mandaragup diad pangipanengneng na suporta ed aliwan popular a sengegan, anto so nailaloan? Pantutulakan, paneeyagan, anggan say panangipatnag na puersa tan karawalan so kaslakan. Akin a saray Tastasi so duma? Lapud namoria da a diad panaon et say ugali ra so mangisindag ed pananisia ra. Nanonotan dan maong so Makasulatan iran simbawa a: “Pansiansiaen yon maabig so ugali yo ed limog na nasyones, pian, diad bengatlan pansasalitaan da a sumpa ed sikayo bilang managgaway-mauges, nayarin sikara bilang pansumpalan na maabig iran gawa yo ya atasian da et igloria ra so Dios diad agew na idalaw to.”—1 Pedro 2:12.
Saray Maabig Ya Ugali So Mangigloria ed Si Jehova
3. Anton betang so kiwasan na saray ugali tayo diad panangigalang ed si Jehova?
3 Say pangigloria ed si Jehova a Dios ed maabig a kondukta so malinlinew a kabiangan na Kristianon responsabilidad tayo. (Mateo 5:16) Say maabig a kondukta, siempre, so mangisakup ed dakel iran bengatla—alimbawa, say inkanapanpiyaan, inkamagunaet, tan maabig iran moral. Anggaman kuan, sarayan kalidad so gendagendat ya inapresya na aliwa lambengat na saraman so mikabat ed sikatayon maong odino saraman so maparanay a pidedenengan tayo, a singa saray kakaaro, kakanayon, manangimpleyo, katrabahowan, tan mamaestro. Anto so nipaakar ed baleg a karaklan na totoon matalag tayo lambengat a napiaarapan? Saya so nagkalautlan pangipanengnengan na saray maabig iran ugali tayo. A singa say makasagyat ya impamunggos ed sakey a mabmablin regalo, saray maabig ya ugali so manggawa ed iyopresi tayo a lalon makapasagyat. Antokaman nin maabig a Kristianon kalidad a nayarin wala ed sikatayo odino anggan panon lan galgalangen iray getma tayo, samet so nagawaan da no saray ugali tayo so mauges. Sirin panon a saray ugali tayo so mangitarok na gloria ed si Jehova?
4. Diad antoran kurang na bilay so nepeg a pangiteran tayo na imano ed saray ugali tayo?
4 “Labat ta manugali a makana ed maong a balita,” so kuan nen Pablo. (Filipos 1:27) Saya, siempre, so manasaglawi ed mapublikon ministeryo tayo. Balet say kiwas tan saray ugali tayo ed pasen na panagdayewan tayo, diad saray kakaabay, diad trabaho, diad eskuelaan, on, ed amin a nengneng na bilay tayo, so walaan met na direktan pisiglaotan ed inkaepektibo na ministeryo tayo. “Agmangiiter na antokaman a sengegan na pakagapolan, pian say ministeryo tayo so agkomon nabalaw,” so insulat nen Pablo. (2 Corinto 6:3) Panon so pakaseguro tayo ya iyaaplika tayo itan a simbawa? Anto so nagawaan tayo diad panulong ed balang sinansakey, nagkalautla ed saray walad kalangweran ed limog tayo, pian nipatnag iray Kristianon ugali ed amin a panaon?
Diad Kingdom Hall
5. Anto so nepeg a bidbiren tayo sano sikatayo so wala ed Kingdom Hall?
5 Say Kingdom Hall so pasen na panagdayewan tayo. Sikatayo so wadtan diad imbitasyon nen Jehova tan say Anak to, si Jesu-Kristo. Diad satan a pantalos, sikatayo so sankaili ed abung nen Jehova. (Salmo 15:1; Mateo 18:20) Kasin sika so maabig a sankaili sano onla ka ed Kingdom Hall? Pian magmaliw ya ontan, nepeg ya ipanengneng tayo so matukoy a konsiderasyon tan respeto ya aliwa lambengat ed saman so manasankaili noagta ontan met ed arum iran sankaili. Anto so lalanoren na satan?
6. (a) Say pantultuloy ya atrasado ed saray miting so panangipanengneng na kakulangan na anto? (b) Anto so nagawaan pian natalonaan so problema?
6 Diad pangigapo, wadtan so pamaakaran na isabin masakbay. Inako ya aliwan naynay a mainomay so panggawa na ontan. Arum so manaayam ed arawi; arum so walaan na pamilya tan anak a tulongan ed pamparaan. Say sagpot ya ibabanikel dan ondago ed saray Kristianon pantitipon a maparanay so tuan nakomendaan. Naimano, anggaman kuan, ya arum so naplag ed ugali na isasabin atrasado ed saray miting. Anto so nagawaan da pian saya so napetek? Nepeg a bidbiren ya ununa na sakey a say nakaugalian ya onsabin atrasado ed saray Kristianon pantitipon so aglambengatla mangisindag ed kakulangan na apresasyon diad kablian na saray miting. Arum a mabetbet ya onsasabin atrasado so ompatnag a panggagayagaan daray miting a singa met anggan siopa nin arum—bektaman a sikara so wadtan. Imbes, say problema so nayarin mansumpal diad makapuy a panagplano tan kakulangan na konsiderasyon ed saray kaparan Kristianos. Sakey ed saray rason ya akasimbawaan tayo et ‘say agpamaulian na pantitipon tayo’ ta pian komon et “maniimanowan so balang sinansakey diad aro tan maabig iran kimey.” (Hebreos 10:24, 25) Mairap tayon nagawaan so ontan no, maparanay, et onsabi itayon atrasado tan sirin mamalesa na pakadisturboan. Ta pian agnaatrasado, isusuhiri na saray eksperto, nepeg a getmaen tayo so onsabin masakbay a tuloy imbes ya onsabin eksakto ed oras. Kasin saya so nakaukolan yon iyugali?
7. Ipaliwawa no anto so pisiglaotan na pangimano ed saray miting diad saray maabig ya ugali.
7 Nakakaukolan na maabig iran ugali so pangiter tayo na imano ed totoo sano sikara so mitotongtong ed sikatayo. (Uliran 4:1, 20) Saya met so onaplika ed saray Kristianon pantitipon, sano saray ministro na Dios so mansasalita ta pian ipanabang so espiritual a langkap a mamabiskeg ed sikatayo. Peteg a panangipanengneng na sankabandayan ya ugali ed biang tayo no sikatayo so manteglep, esaes-ya-esaes ed kaabay, gatgat-a-gatgat na chewing gum odino molmol-a-molmol na kendi, mamabasa na arum a babasaen, odino mangaasikaso na arum a bengatla legan na miting. Si walad kalangweran ya Elihu so aglambengatla nanyurong a siaanos kaleganan na andukey a paliwawa nen Job tan saray taloran kakaiba noagta sikato met “so tinmalineng” ed imbaga ra tan “impaarap [to] so imano to” ed sikara. (Job 32:11, 12) Say maabig iran Kristianon ugali so mamakiwas ed sikatayon mangipanengneng na manepeg a respeto ed manpapaliwawa tan say nibase-ed-Biblian mensahe to diad pangiter ed sikato na agnaapag ya imano tan suporta tayo.
8. Panon so pangipanengneng tayo a sikatayoray kaparan babangatan nen Jesu-Kristo?
8 Sakbay tan kayari na saray miting, saray Kristianon ugali so mangisakup ed aktibon interes tayo ed arum a presente ed Kingdom Hall. Naimano nen Pablo a saray alanaan a membro na Kristianon kongregasyon “so aliwaran sankaili tan dayon manaayam, noagta . . . membro na sankaabungan na Dios.” (Efeso 2:19) Kasin tatratoen yoray kapara yon Tasi a bilang sankaili tan dayo odino bilang membro na parehon sankaabungan? Say makaaron panangibano, ampetang a pasamano, maabig ya imis—amin so ankelag a bengatla, anganko, balet ta sikara so kabiangan na ebidensya a sikatayo so kaparan babangatan nen Jesu-Kristo. No gawaen tayo so ontan sano naabet tayoray sankaili, agta satan so nepeg tayon gawaen “nagkalautla ed saraman so misiglaotan ed sikatayo diad pananisia”?—Galacia 6:10.
9. Panoy kabangatan na saray ananak a mangipanengneng na interes ed totoon agda kaedaran?
9 Kasin saray anak so nibangat a mangipanengneng ed sayan nengneng na interes diad totoon agda kaedaran? Nayarin nalikna na arum a matatatken a saray ugugaw so nakaukolan lan onla tan migalaw ed saray ankelag iran kakaaro ra kayari na piyurong da ed sakey odino duaran oras diad italineng ed saray miting. Balet say Kingdom Hall so aliwan pasen na panaggalawan. (Eclesiastes 3:1, 17) Sanen tinepetan na maestro to so sakey ya ugaw a lakin manedad na apatira-tan-kapalduan-taon ed no pigara so agagi ton lalaki tan bibii, sikato so inmebat: “Dakerakel ira ya agko ra nabilang ya amin.” Saginonor, sanen sikato so tinepetan na atateng to nipaakar ed saya, impaliwawa na ugaw: “Agko amta no kaunongan karakel so agagik a lalaki tan bibii. Sano siak so onla ed Kingdom Hall, sikara so dakerakel a tuloy.” Diad sikato, amin ya onaatendi so agagi ton lalaki tan bibii.
Diad Mapublikon Ministeryo Tayo
10. Anton bilin nen Jesus so ontulong ed sikatayon “manugalin makana ed maong a balita” legan a wala itayo ed ministeryo?
10 Pian “manugalin makana ed maong a balita” et siempre lalanoren to so mapublikon ministeryo tayo. Nepeg tayon nodnonoten a say wala ed sikatayo so sakey a mareen a mensahe, tan saray ugali tayo so nepeg a mangisindag ed satan. (Efeso 6:15) Say bilin a nanlapud si Jesus so: “Sano onloob kayo ed abung, ibano yo so onabung; tan no say unabung so makana, komon ta say kareenan a kaliktan yo so onsabi ed sikato.” Diad pagmaliw a masayaksak, makaaro, tan magalang, ipaamta tayo ed unabung a sikatayo so walaan na puron interes ed puso ed sikato. No maminsan, anggaman kuan, say toon naabet tayo ed puerta so nayarin aliwan makaaro, mapasang ni ingen. Kasin sikatayo so nagonigon tan onkiwas na ontan met? Imanoen so intuloy nen Jesus ya imbaga: “Balet no [say unabung] so aliwan makana, komon ta say kareenan a manlapud sikayo so ompawil ed sikayo.” (Mateo 10:12, 13) Saray ugali tayo ed puerta so nepeg a matukoy “ed ministeryo na pipupulangan.”—2 Corinto 5:18.
11. Panon a say nengneng na panagkawes tan personal ya indengan tayo so mangapekta na kiwas tayo bilang miministro na Dios?
11 Saray ugali tayo so mansalita nipaakar ed sikatayo diad arum met iran dalan. Alimbawa, kasin say personal ya indengan tayo so onnepeg ed talindeg tayo bilang sakey a ministro na Salita na Dios? Kumusta so kagawaan ya usaren tayo—bag, Biblia, tan literatura na Biblia? Sayan simbawa so inter na kolumnista na peryodiko ed saray negosyante: “Mangawes a para ed negosyo, aliwan para ed sakey a ponsia, gendagendat a panduroypo odino diad galaw.” Akin? Lapud say kawes yo tan say personal ya indengan yo “so sulat na sosyal a mangiter ed kaliberliber a populasyon na impormasyon nipaakar ed no siopa tan no anto ka tan no iner so kinepegan mo ed oksuyan na bengatla.” Sirin sano sikatayo so manggawa ed “kimey” na ministeryo, say kawes tan indengan tayo so nepeg ya aliwa komon ya akeskeskes nisay marutak, aliwa met a mankirkirlap nisay ekstrabagante, noagta naynay a “makana ed maong a balita.”—Ipareng so 1 Timoteo 2:9, 10.
12. Panon so nayarin pangipanengneng na maabig iran ugali no nipaakar ed saray kanepegan tan kayarian na unabung?
12 Anggamano sikatayo so nepeg ya “akaparaan a naynay a mangipaliwawa” ed maong a balita, saray maabig a Kristianon ugali so mankaukolan a gawaen tayo so ontan “a tekep na kauyamoan tan aralem a galang.” (1 Pedro 3:15) Isasakup na satan so respeto ed saray kanepegan tan kayarian na unabung. Kasin ipaplano tayoray kimey tayo ta pian sikatayo so makadalaw ed makatunongan ya oras? Kasin sikatayo so alerton makaimano no kasin sikatayo so mangaamper ed arum iran nakakaukolan a negosyo odino kimey? Kasin sikatayo so mabunlok diad pangusar na saray balikas a singa say “Komon ta siak so?” “Ipangasi yo,” tan “Salamat ed sikayo”? Kasin pambanikelan tayo a sagyaten so unabung ed pantotongtong, odino satan so dodominaen tayo ta ompan agtayo nasumpal so imparaan tayon ibaga?
13. Iyilustra no panon a saray maabig ya ugali ed ministeryo so mabetbet a mamawala na maabig iran resulta.
13 Saray maabig iran ugali, a tekep na masimoon a personal a panangimano, mabetbet a lukasan to so dalan a para ed maabig a pantasi. Saya no akin a say maabig-impanugalin ugugaw so mabetbet a makagegemtan na imano tan interes na saray unabung a ditan so nayarin saewan na saray matatken a gawaen. Sakey a Tasin manedad na 13-taon ed Mexico so akapitongtong ed sakey ya ugaw a bii a malabay a manaral. Anggaman kuan, imbaga na ugaw a bii a satan so gawaen to ya agkabat na ama to. Balet alikna na walad kalangweran a manangipalapag a, diad sayan kipapasen, nisengeg ed respeto ed ama, nepeg a kerewen to a mismo so permiso to. Kanian inyopresi na ugaw a bii so pitongtong ed ama tan imbaga to ed sikato a say aaralen so importantin tuloy. Diad impakanengneng ed inkaseryoso na agin bii a walad kalangweran tan inapresya ton sikato so direktan onla ed sikato, inkuanto: “No say aralen yo et importantin tuloy, sirin amin ed pamilyak so nepeg a manaral.” Say nansumpalan et sayan manedad na 13-taon so angigapo na panagaral na Biblia ed interon pamilya, a pati say anak a lakin walaan na asawa tan say asawa to tan arum niran ankabaleg niran anak.
Saray Maabig Iran Ugali So Onggapo ed Abung
14. Iner so gapoan na maabig iran ugali, tan anton katuaan so onkiwas ed importantin betang?
14 Saray maabig ya ugali na Tastasin walad kalangweran so mabetbet a maabig a pantasi diad panagsanay a nanaawat dan mapatnag ed abung. Peteg, saray ugali tayo so mangisindag na dalan na bilay. Nisengeg ed saya, sumlang ed nayarin isipen na arum, saray maabig ya ugali so nepeg a walaan na importantin pasen ed abung. Diad saya, a singa diad arum a nengneng ed bilay na pamilya, say ehemplo na ateng so manunan importante. (2 Timoteo 1:5) Say pangibaga ed ananak, “Gawam so ibagak, aliwan say gawaen ko” so peteg ya aliwan dalan diad pangibangat ed sikara na ugugali. Say agnabilang iran detalye na maabig ya ugali so aralen, aliwan dia lambengat ed insangin panagbilin, noagta diad obserbasyon tan panangalig. “Saray atateng so aliwa lambengatlan manunan managbangat; sikara met so ehemplo, lapud saray anak tayo so makaaral diad pangalig ed saray dalan tayo,” so kuan nen Beverly Feldman, autor na Kids Who Succeed. Antoran nengneng na ugali so nanenengneng na saray anak yo ed sikayo?
15. Panon so pakatulong na saray atateng ed saray anak da a mamayubo na legay-bilay iran kaugalian ed maabig iran ugali?
15 “Kaamaan, agyo pasasanoken iray anak yo” so simbawa na Biblia. (Efeso 6:4) Makapasanok tan makapadismaya ed saray anak so pangibaga a sikara so nepeg a mapangasi tan makonsidera, tan ingen nanengneng da ed saray atateng da so pansusuppiatan, pantatalabutoban, onkiwas a maramsak, odino magmainomay ya onunganget. Kasin sikara so natetel no sikara so onkiwas ed parehon nengneng? Diad biek a dapag, ituloy ya ibaga na kasulatan: “Noagta sikara so itultuloy yon pabalegen ed disiplina tan manametek-kanonotan nen Jehova.” Tan isasakup na satan iray pundamento na maabig iran ugali, a singa say pangibaga na, “Hello,” “Ipangasi yo,” “Salamat ed sikayo,” tan “Maermenak,” so panangipanengneng na respeto ed saray matatatken, tan panangipanabang na bengatla ed saray arum. (Levitico 19:32; Roma 16:3-7) Sarayan kalidad a naaral ed abung kaleganan na inkaugaw so walaan na legay-bilay a kablian.—Uliran 22:6.
16. Antoran sagpot so nakaukolan, tan antoran resulta?
16 Sirin namparan saray atateng tan ananak so nepeg a mangipasal na maabig iran ugali bilang kabiangan na inagew-agew a kurang da imbes ya alagaren da ya anggad arum iran nikaduman okasyon. Diad panggawa ed ontan, saray atateng so nepeg a maanos tan mapalugar ed saray lingon nagawaan na saray anak. Ipaamta ed sikara no panon inkamakabaliksan so maabig ya ugali ed sikayo tan aliston mangumenda ed aligwas a nagawaan da. Siempre, nakakaukolan na saya so malaem a sagpot diad biang yo. Balet ag-imbaga na Kasulatan a say pangipurek na maridios iran prinsipyo ed ugugaw so nepeg a gawaen “sano manyudyurong kayo ed abung yo sano manaakar kayo ed dalan tan sano ondukol kayo tan sano ombangon kayo”? (Deuteronomio 6:7) Diad panggawa na ontan, et mamalesa na magayaga tan mabunigas ya atmospera ed abung, a sikato so mantultuloy a mabayag diad panagano ed saray anak yo legan a sikara so ombaleg a matulong, maasikaso, tan maong-ugali iran matatken. Sirin sikara so magmaliw a sengegan na dayew tan galang ed sikayo tan diad Manamalsa ra, si Jehova a Dios.
Maong-Impanugalin Totoo
17. Anto so naimano ed saray Kingdom Hall na Tastasi nen Jehova?
17 Say “masulok a 1,000 Tastasi” a nantitipon ed paway na City Hall ed Syudad ed Nueva York ed saman a ngarem na Setyembre so angipanengneng lambengat ed melag a kalaknab a maparanay ya ugali na saray Tasi nen Jehova. Diad arum a pasen, sakey a laki so linma ed sakey a Kingdom Hall ed ununan pankanawnawa tan inkuanto ed kayari to: “Nabet koray lalon peteg a maaron totoo, sigpot ya estranghero, diad sakey ya agew nen say apiabetan ko ed iglesia a binalegan ko.” Say nansumpalan? “Mapatnag ya aromog ko so katuaan,” inkuanto. Sayan laki so anguman ed kurang na bilay to tan pitoran bulan ed saginonor et intalaga to so bilay to ed si Jehova tan abautismoan.—Ipareng so 1 Corinto 14:25.
18. Panon a say estandarte na maabig iran ugali na saray Tastasi so angapekta ed saray taga paway?
18 Say estandarte na saray Tastasi ed panag-ugali tan kakikiwas ed saray nasyonal tan internasyonal a kumbension da so nagmaliw a sakey a tema na malaknab iran maapabor a komento. Diad sakey ed ontan ya okasyon ed agano ni ed Hapon, inkuan na sakey a giya ed sakey a managpasyar a bus: “Legan a sikayon totoo so onakseb ed bus, kada sakey ed sikayo, pati saray walad kalangweran, so andi-saew ya angikuan ed siak, ‘Salamat ed sikayon tuloy.’ Satan so amaliket ed siak a tuloy!” Diad sananey a kumbension, saray mantatrabaho ed kaabay ya estasyon na tren so angikuan ed sakey a Tasi: “Kaguloan a desyang sanen agawa so akaunan impantitipon na 12,000 totoo ed Osaka Castle Hall.” Balet inkuanto: “Sikayon totoo so peteg a mauksoy, tan sikami so nainawaan. Ipangasi yon ipasabi so pakumusta mi ed siopaman a mangaasikaso.”
19. Anto so nepeg a desisyon na balang sakey ed sikatayon gawaen nipaakar ed saray ugali?
19 Anto so ipanengneng na saray ontan a komento? A saray Tasi nen Jehova bilang intero so “manuugalin makana ed maong a balita.” Kumusta kayo a balang sinansakey? A singa saray anak ya onnengneng ed sakey a maaron ama, komon ta amin tayo, walad kalangweran tan matatken, so onnengneng ed mangatatawen ya Ama tayo, si Jehova, ta pian sikatayo komon so nabangatan a magmaliw a maabig-impanugali, anggan dia ed mundon mabanday-ugali.—Deuteronomio 8:5; Uliran 3:11, 12.
Kasin Nanonotan Yo?
◻ Akin a saray maabig ya ugali so nakaukolan bilang kabiangan na maabig a kondukta?
◻ Antoran maabig ya ugali so matukoy ed pasen na panagdayewan tayo?
◻ Panon a saray maabig ya ugali so nipatnag diad lawak na ministeryo?
◻ Panon so pakatulong na saray atateng ed saray anak da a mamayubo na maabig iran ugali?
◻ Antoran atagey ya estandarte na ugali so nepeg a pambanikelan tayon agamilen?