Maabig Iran Walna​—Ugali na Maridios a Totoo

¹ Matalag la natan iray maabig a walna. Akin kasi? Saray totoo so naynay a manaapura a nayarin matalag da lan iisipen so manuna iran panamagalang, a singa say pangibaga na “Ipangasi yo pa,” “Salamat,” odino “Itepel yoak pa.” Diad inkalapagan, say palpalaran tan andiay konsiderasyon so ontatalona ed sosyedad na too. Impasakbay na Salita na Dios so iyuges na saray walna ed saray kaunoran ya agew sanen inkuan to a saray totoo so ‘maaro ed saray lamalaman da, managpasirayew, atagey a linawa, anggapo so aro ra a nianakan, aliwa ra’n maadia, maingongot ed saray maabig, tan mayu-uges.’ (2 Tim. 3:1-4) Amin na saratan ya awawey so mamapawala na mabanday iran walna. Bilang maridios a totoo, saray Kristiano so nepeg a manalwar ta pian agda naalig iyan mundo ya andian na panagrespeto ed arum.

² Anto Iray Walna? Saray maabig a walna so nadeskribe bilang inkamapaga ed liknaan na arum, say pambilay a makapikareenan ed arum. Saray aspekto na maabig a walna et say inkamakonsidera, kaabigan, inkamagalang, makatebek, tan inkamanonot. Sarayan walna so papakiwasen na panangaro na sakey ed Dios tan ed kaparan too. (Luc. 10:27) Nikana iratan ya agpangastosan, balet ta saratan so mabalor ed pamaaligwas tayoy siglaotan tayo ed arum.

³ Angipanengneng si Jesu-Kristo na nagnap ya ehemplo. Inunor to iray maridios ya estandarte. Agbalot alingo ed saray walna to. Lawas ton inagamil so Binmalitok a Ganggan: “Singa say laba’yo a gawaen komon ed sikayo na saray totoo, ontan met so gawaen yo ed sikara.” (Luc. 6:31) Agtayo kasi pankelawan so inkamanonot tan maaron walna nen Jesus diad pidedeneng to ed saray babangatan to? (Mat. 11:28:30) Say maong iran walna to so agnibase’d saray libron nipaakar ed maabig ya ugali. Saratan so nanlapud masimoon tan mabunlok a puso. Binayuboan nen Jesus so maong iran walna manlapud inkatobonbalo to tan diad impangiyaplika to ed saray maridios a prinsipyo. Nepeg a panggunaetan tayon aligen so maabig ya ehemplo to.

⁴ Kapigan so pangipatnag na saray Kristiano na maong iran walna? Kasin sano wala labat iray espisyal ya okasyon, sano mapaga nipaakar ed panggawa na maong ya impresyon? Kasin kaukolan labat iratan sano panggugunaetan tayon impluensyaan so arum? Andi! Nepeg tayon ipatnag so maabig iran walna diad amin a panaon. Diad antoran dalan a nagkalautlan nepeg itayon mapaga nipaakar ed saya diad pilimog tayo ed balang sakey ed loob na kongregasyon?

⁵ Diad Kingdom Hall: Say Kingdom Hall so pasen na panagdayewan tayo. Onaatendi itayo ditan lapud iimbitaan itayo nen Jehova a Dios. Diad ontan a pantalos, sikatayoy sankaili. (Sal. 15:1) Kasin napanuliranan itayon sankaili sano onaatendi itayo ed Kingdom Hall? Kasin iimanoen tayon maong so panangawes tan panag-ayos tayo? Seguradon agtayo labay so akulastay odino alablabas a panagkawes. Balanglan onatendi itayo diad saray kombension odino diad sinimba iran miting ed kongregasyon, saray totoo nen Jehova so kabkabat lapud maabig ya itsura ra a matukoy ed saraman so mangibabagan ontatakot ed Dios. (1 Tim. 2:9, 10) Ipanengneng tayo sirin so manepeg a konsiderasyon tan respeto ed mangatatawen a Managsankaili ed sikatayo tan ed arum met a sankailin naimbitaan.

⁶ Say sakey nin paraan a nipapanengneng tayo so maabig iran walna ed saray miting et diad isabi tayo ed dugan oras. Tua, saya so aliwan naynay a mainomay. Arum so nayarin manaayam ed arawrawi odino nayarin walaan na baleg a pamilya ya iparaan. Say sagpot da ed iyaatendin maparanay ed saray Kristianon miting so talagan nakomendaan. Balet, naiimano ed arum a kongregasyon ya anggad 25 a porsiento na saray manangipalapag et niyugali da lay onsabi sano asumpal la so panlukas a kanta tan pikakasi. Saya so seryoson bengatla. Nepeg tayon tandaan a saray walna so walaan na pisiglaotan ed inkapaga tayo ed liknaan na arum. Si Jehova, say mabunlok a Managsankaili ed sikatayo, so angiyuksoy ed sarayan daakan ya espiritual a tagano parad pakagunggonaan tayo. Nipanengneng tayo so panamabli tan inkapaga ed liknaan to diad isabi ed dugan oras. Niarum ni, makadisturbo tan agpanagrespeto ed saramay akayurong la no onsabi itayon atrasado ed saray miting.

⁷ Sano mantitipon itayo, kasin iimanoen tayoray balo nin inmatendi? Say pangabrasa ed sikara so kabiangan na maong a walna. (Mat. 5:47; Roma 15:7) Say maliket a panangibano, pasamano, tan maligsan imis​—ankelag labat iratan a bengatla, balet saratan met so pakabidbiran ed sikatayo bilang tuan Kristianos. (Juan 13:35) Onia so inkuan na sakey a laki sanen primero toy akaatendi ed Kingdom Hall: “Dakel so akabat kon peteg a maaron totoo, sigpot ya estranghero, ed sakey agew labat ya agko nin balot asali ed relihyon a binalegan ko. Maseguron aromog ko lay katuaan.” Bilang resulta, inuman toy kurang na bilay to, tan kalabas na pitoy bulan et sikatoy abautismoan. On, saray maabig a walna so walaan na malaknab iran epekto!

⁸ Aglilingwanan iray maedad la tan saray agla makayari a walad limog tayo. No maabig so walna tayo ed saray sankaili a nakabat tayo, agta ‘nagkalalo ed saray kaamong tayo ed pananisia.’ (Gal. 6:10) Onaplika so prinsipyon: “Onalagey ka naani ed arapan na ubanan ya ulo, et pagalangan mo naani lupa na masiken [odino akulaw].” (Lev. 19:32) Nepeg ya agtayon balot iratan ibaliwala diad saray pantitipon tayo.

⁹ Manimanon Maong: Kakaukolanen na maabig iran walna so italineng tayon maong sano nipapaliwawa iray espiritual ya instruksion. Legan na saray miting ed kongregasyon, saray Kristianon ministro na Dios so mansasalita ta pian inabang da so espiritual a langkap a mamabiskeg ed sikatayo. (Roma 1:11) Makapuy a walna ed biang tayo no peles na aral et mantemeg itayo, manggagatgat itayo na babelgam, naynay tayon esaesan so kaabay tayo, naynay ya onla ed kasilyas, manbasa na agmisiglaotan a materyal, odino asikasoen iray arum a bengatla. Nepeg a napanuliranan iray mamatatken ed sayan pamaakaran. Saray maabig a walna na Kristiano so mamakiwas ed sikatayon mangipanengneng na manepeg a respeto ed manpapaliwawa tan ed nibase’d Biblian mensahen ipapaliwawa to diad panimano tayon maong.

¹⁰ Niarum ni, bilang konsiderasyon ed manpapaliwawa tan ed saray onderengel, kaukolan ya agmakadisturbo iray pager tan cellular a telepono tayo ed saray miting.

¹¹ Saray Walna tan Ananak: Saray atateng so nepeg a lawas alerto ed kondukta na ananak da diad Kingdom Hall. No say ankelag nin anak so onakis odino agmakareen legan na aral tan pakadisturboan na arum, maabig no ipaway nin tampol so ugaw pian patundaen. Saya so nayarin mairap no maminsan, balet tandaan, pakapatnagan iya na inka-alerto yo ed saray liknaan na arum. Mabetbet a lablabayen na atateng a walaan na ankelag ya ananak ya agmakareen so onyurong ed bandad beneg pian daiset so nadisturbo no kapilitan ya ompaway ira legan na aral. Siempre, arum ed saray inmatendi so makapangipanengneng na manepeg a konsiderasyon ed saray pamilya diad pangipalugar da ed saray yurongan ed bandad beneg, no kaliktan da.

¹² Saray atateng so nepeg met a mapaga ed kondukta na ananak da sakbay tan kayari na aral. Nepeg ya agmanbatik-batik iray ugugaw ed loob na hall, unong a saya so nayarin pansengegan na saray aksidente. Say panbatik-batik ed liber na Kingdom Hall so mapeligro met, lalo no labi la. Saray maingal a pantotongtong ed paway so makadisturbo met ed saray kaabay tan mangipatnag na makapuy nipaakar ed panagdayew tayo. Nakomendaan iray atateng a manggugunaet a mangasikaso ed ananak da ed loob tan paway na Kingdom Hall lapud saya so mangarum na inkaliket na pankakasakey tayo.​—Sal. 133:1.

¹³ Diad Panagaral na Libro: Papablien tayo so inkamaparawes na agagi tayo a mangipapausar ed saray abung da parad saray panagaral na kongregasyon ed libro. Nayarin saglawien na saya so baleg a panagparaan tan ag-inkakombeniente ed biang da. Sano onatendi, kaukolan tayon ipanengneng so maabig iran walna tan ipanengneng so respeto tan konsiderasyon ed saray kagawaan da. Sakbay ya onloob, nepeg tayon ipunas a maong iray sapatos tayo ta pian agnarutakan so datal odino karpet. Kaukolan ya asikasoen na atateng iray ananak da, a seguroen a sikaray mandeen ed lugar na abung a nidesigna parad panagaral na libro. Anggaman say grupo so nayarin melag tan say atmospera et singa aliwan pormal, nepeg a makonsidera tayo ed abung na arum. Nepeg ya ibaan na ateng so anak to sano onla ed kasilyas. Sakey ni, lapud say panagaral na libro et sakey a miting na kongregasyon, nepeg a say panangawes tayo et singa met sano onatendi itayo ed Kingdom Hall.

¹⁴ Importante so Maabig Iran Walna: Say pangagamil na Makristiano iran walna so aglabat mangipatnag a maong ed ministeryo tayo noagta mangiyalibansa met na maabig a relasyon ed arum. (2 Cor. 6:3, 4, 6) Bilang managdayew ed maliket a Dios, kaukolan a mainomay itayon onimis, mainomay a mitunosan, tan ed panggawa ni ingen na ankelag a maabig a bengatla a mangitarok na liket ed arum. Sarayan walna so mamarakep ed kabibilay tayo bilang maridios a totoo.