“Siopaman a Makadngel Kuanto: ‘Gala!’”

Diad isabi na ontumbok a taon, saray Tasi nen Jehova ed masulok nen 200 iran dalin ed sankamundoan so mamalaknab ed inkasikara a mitunusan ed 1991 a tinaon-a-teksto da: “SIOPAMAN A MAKADNGEL KUANTO: ‘GALA!’”

“Say espiritu tan say nobya so nantultuloy a mangikuan: ‘Gala!’ Tan siopaman a makadngel kuanto: ‘Gala!’ Tan siopaman a napgaan ondago; siopaman a malabay a mangala na danum na bilay ya andi bayar.”​—APOCALIPSIS 22:17.

1. Diad anton “danum” a sikatayoy naimbitaan a “gala!”

SIKAYO so naimbitaan a “gala!” Ondago parad anto? Akin, pian ekalen so inkanapgaan yo ed danum. Saya so aliwan ordinaryon danum balet mipadparan danum a sinalita nen Jesu-Kristo sanen sikatoy akitongtong ed Samaritanan bii ed bobon: “Siopaman ya uninum a manlapud danum ya iter ko ed sikato aglan balot naapgaan, balet say danum ya iter ko ed sikato so magmaliw ed sikaton sakey a lapuan na danum a manlipwa ed andi-anggaan a bilay.” (Juan 4:14) Iner so angalaan nen Jesus ed sayan “danum”?

2. Iner so lapuan na “danum,” tan kayari na anto lambengat ya ebento a satan so onagus?

² Say apostol a si Juan so apribilehyoan a makanengneng ed pasingawey a nanlapuan na sayan “danum”, unong ya insalaysay to ed Apocalipsis 22:​1: “Impanengneng to ed siak so sakey ya ilog na danum na bilay, malinew a singa kristal, ya onaagus a manlapud trono na Dios tan ed Kordero.” On, say lapuan na sayan malinew-kristal a danum a walaan na mangiter-bilay ya elementos et anggapoy arum a say Manangiter-Bilay, si Jehova a mismo, a mangitarya ed panamegley na Kordero, si Jesu-Kristo. (Ipareng so Apocalipsis 21:6.) Lapud “say trono na Dios tan ed Kordero” so abitla, satan so kayari na inkiletneg na Mesianikon Panarian nen 1914, salanti, kayarin ginmapo so agew na Katawan, a say danum na bilay so ginmapon onagus.​—Apocalipsis 1:10.

3, 4. Anto so irepresenta na “danum,” tan parad siopa a satan et wala?

³ Anto so isisimbolo na sayan danum na bilay? Iretrato to so probisyon na Dios ed pangipawil ed ayadyarin atooan a bilay, andi-anggaan a bilay ed inkayadyari ed sakey a dalin ya apagmaliw a paraiso. Say danum na bilay so mangirepresenta ed amin iray probisyon parad bilay ed panamegley nen Jesu-Kristo. Kasin amin na saya so wala la natan? Andi, aliwan amin, ta kaukolan ya ununan ekalen na Dios irayan kaplesan a mauges a sistema na bengabengatla a pati agnanengneng a manuley to, si Satanas a Diablo. Balet makala tayo ed antokaman a wala ed sayan “danum” natan diad italineng tan itulok ed maong a balita na Panarian tan itukoy iray bilay tayo ed satan.​—Juan 3:​16; Roma 12:2.

⁴ Sirin, kayariy impangipanengneng nen Juan ed ‘ilog na bilay,’ akitongtong si Jesus ed si Juan nipaakar ed gagala To ed impangibaki ed anghel To dingan na pasingawey. Insan nadngel nen Juan so pangiyabawag: “Say espiritu tan nobya so mantultuloy a mangikuan: ‘Gala!’ Tan siopaman a makadngel kuanto: ‘Gala!’ Tan siopaman a napgaan ondago; siopaman a malabay a mangala na danum na bilay ya andi bayar.” (Apocalipsis 22:17) Sirin, saray aripen na Dios so mangilaknab na imbitasyon ed saray napgaan ya onggapon uninum na saray probisyon na Dios ed pakagamor na andi-geter a bilay ed dalin ed panamegley na Kordero na Dios.​—Juan 1:29.

Linmesa So Pankaukolan ed Danudanum na Bilay

5. Panon a say katooan et asabin mankaukolan ed sayan madibinon probisyon?

⁵ Makapasinagem, saray inmunan atateng na atooan a pamilya so agtinmulok ed kurso na bilay a walan mangiter ed ilalak da na pankanawnawan mangayaga ed ayadyarin atooan a bilay ed ando lan ando ed sakey a paraison ayaman. Say andi-angaan a bilay parad katooan so mankaukolan a si Adan so manggaway intilehentin panpili ed panlinkor ed Manamalsa ton situtulok. Diad silong na impluensya na sakey a rebelyoson espiritun palsa, si Eva so angigapo na panag-alsa a nanresulta ed ipapatey ed katooan, tan si Adan, say ayadyarin asawa to, so amilin miulop ed sikato ed makapatey a kurso. Sirin, bilang say mangiter na natural a bilay ed ontumbok iran kailalakan ed katooan, si Adan so peteg a sakey ya angiparungtal na andar na ipapatey ed interon atooan a pamilya. Kanian ontan so impangibaga na Biblia: “Diad sakey a too linmoob so kasalanan ed mundo tan patey ed kasalanan, tan sirin say patey so nitayak ed amin a totoo lapud sikaran amin so nankasalanan.” (Roma 5:12) Kayari naplag ed kasalanan a si Adan tan si Eva so ginmapon angarum na balo iran membro ed atooan a pamilya.​—Salmo 51:5.

6. Akin ya angiyarunsa si Jehova ed sayan “danum”?

⁶ Kasin ando lan ando a naamper so Dios ed pangisumpal ed gagala to na sakey a paraison dalin a napnoan na ayadyarin katooan? Say Biblikon ebat so, siempre, andi! Anggaman kuan, diad kasampotan na pananumpal na gagala to, si Jehova so angitarya na maaron probisyon ya onsumpa ed makaderal ya insaew nen Adan tan ingen magmaliw a nagnap a mitunusan ed hustisya tan inkatunong, a Sikato so kompleto tan mogmong balikas. Ginawa to itan ed panamegley na “ilog na danum na bilay.” Diad panamegley na satan, sikatoy mangipawil ed ayadyarin atooan a bilay ed matulok a katooan, siopan panangidalanan ed Subol na bilay so abalang. Sayan ilog so onaagus ed sankanagnapan a sentido kaleganan na Sanlibon Taon ya Uley nen Jesu-Kristo. Sirin, diad loob na Milenyon Uley nen Kristo, saray totoo, a pati saramay napaoli a manlapud patey, so nepeg ya uninum na “ilog na danum na bilay.”​—Ipareng so Ezekiel 47:1-10; Gawa 24:15.

7. Diad anton letnegan a say probisyon ed “danum” ya agawa?

⁷ Mangagayaga si Jehova ed dilin bilay to, tan mangagayaga met ed pangiter to na pribilehyo ed intelehentin bilay ed arum a palsa to. Say basean na mangiter-bilay iran probisyon nen Jehova so dondon a bagat nen Jesus. (Marcos 10:​45; 1 Juan 4:9, 10) Alanor met so Salita na Dios, a no maminsan say Biblia so manterminon “danum.” (Efeso 5:26) Si Jehova a Dios so bulos a mangikuan, “Gala!” ed atooan iran palsa, a nanirap ed impakabalang ed orihinal iran probisyon a ginawa na Dios parad ayadyarin atooan a paris, si Adan tan si Eva.

Ipalaknab na Nobyan Klase so Imbitasyon a, “Gala!”

8. Parad siopa tan kapigan a sayan “danum” so inmunan nitarok?

⁸ Say ununan mangilaknab na imbitasyon a “gala!” et saramay manugyop na piguratibon nobya na Kordero, say ununan anak ya espiritual ya Anak nen Jehova. (Apocalipsis 14:1, 3, 4; 21:9) Say espiritual a nobya nen Kristo so agmangikuan, “Gala!” ed inkasikato, salanti, ed saramay tugyopen ni nen Jehova a Dios a bilang kabiangan na nobyan klase pian pagmaliwen itan a mabiskeg a 144,000. Saraman a salita na imbitasyon so nipalaknab ed katooan a walaan na ilalon makagamor na ayadyarin atooan a bilay ed dalin kayariy Armagedon. (Apocalipsis 16:14, 16) Kaleganan na konklusyon na sayan sistema na bengabengatlan nanlapulad 1914, nadngelan tayo so imbitasyon a nilaknab ed “say nobya,” a mitulongan ed masanton espiritu na Dios.

9. Panon so pakaamta tayo a satan so aliwa lambengat a parad sakey a melag a grupo?

⁹ Makapagayaga, say unor a libro na Biblia so mangipanengneng a satan ‘a baleg ya ulop, ya agnabilang na too,’ so onkiwas ed pangiproklama na maong a balita na Panarian na Dios tan mabisbiskeg a midapag ed maarin gobierno. (Apocalipsis 7:9, 10, 16, 17) Kasin sakey kayo ed satan a baleg ya ulop? Sirin, “siopaman a makadngel kuanto: ‘Gala!’”

“Gala!,” Kuan na Espiritu tan Nobya

10. Iner so nepeg a nanlapuan na sayan simbolikon danum, tan akin?

¹⁰ Balet akin a say Dios tan piguratibon Nobyo et ag-abitla ed Apocalipsis 22:17? Ununa, imanoen a satan a bersikulo so agmangibaga ed siopan panangiwanwan a kinmiwas so espiritu. Ingen, saray pangisalambit ed espritu so mangidirekta ed imano tayo ed si Jehova a Dios a mismo. Say Ama so agnipuera ed retrato, ta sikato so mogmong Subol na masanton espiritu. Komadua, say Anak so mikooperan nanagnap dingan na Ama to, unong ya ibaga ton mismo: “Say Anak so agmakapanggawa na antokaman ed dili to, balet ed saray bengatla lambengat a gawaen na Ama.” (Juan 5:19) Niarum ni, anggaman sayan imbitasyon so sakey ya apuyanan a balikas ya ultimon manlalapud Jehova a Dios, saray totoo so makawat na madibinon pangiwanwan, odino “apuyanan iran balikas,” diad panamegley nen Jesu-Kristo, “say Salita.” (Apocalipsis 22:6; ontan met 22:17, Reference Bible, paimanod-leksab; Juan 1:1) Matukotukoy, sirin, ya iyulibay tayo si Kristo, say Nobyo, ed sayan imbitasyon. On, maseguro tayo a namparan si Jehova a Dios, say Ama na Nobyo, tan si Jesu-Kristo, say Nobyo, so miulop ed “say nobya” ed panamegley na masanton espiritu a mangikuan, “Gala!”

11, 12. (a) Antoy asasakbay a panangipatnag so wala a satan ya imbitasyon ya uninum so nipalaknab? (b) Panon a say pamaakaran so nagmaliw a lalon malinew ed ilabas na taon?

¹¹ Diad saray dekada sayan imbitasyon a “gala!” so nagagawa ed totoon nanapgaan parad “danum na bilay.” Angganno nen 1918, say nobyan klase so ginmapon nampulong na sakey a mensahe a nagkalautlan manlalanor ed saray nayarin manbilay ed dalin. Satan so mapublikon paliwawa ya atituloan a “Nilaksalaksan Manbibilay La Natan So Ag-ompatey a Balot.” Saya so angiyopresi na sakey ya ilalo a dakel so makaliktar ed Armagedon tan kayari na satan et makagamor na andi-geter a bilay ed Paraison dalin ed silong na Mesianikon Panarian na Dios. Balet satan a mensahe so ag-eksakton mangipanengneng ed dalan ed sayan makaliktar a pribilehyo, nilikud lambengat ed kaslakan ya inkatunong.

¹² Pian nasabi so dakel a totoo ed imbitasyon a, “Gala!” nen 1922 say mensahe so nipasabi ed amin na saramay interesado a manlikor ed Dios: “Iyabawag so Ari tan Panarian.” Nen 1923 say nobyan klase so akatalos a satan “a karnero” tan “saray kanding” ed parabola nen Jesus ed Mateo 25:31-46 so nipatnag sakbay na Armagedon. Insan, nen 1929, Say The Watch Tower na Marso 15 so angipalapag na artikulon “Gracious Invitation.” Say tema to so Apocalipsis 22:17, tan impabitar to so responsabilidad na nobyan klase a mangilaknab na imbitasyon, “Gala!”​—Pahina 87-9.a

Say Arum a Karnero so Akiulop a Mangikuan, “Gala!”

13, 14. Diad 1930’s, anton kaaruman a manamalinew so nitarok a saray arum so makainum ed simbolikon danum?

¹³ Niarum ni, diad asasakbay na 1932, The Watchtower so angipabitar ed responsabilidad na “arum a karnero,” ed biang da, a mangikuan, “Gala!” (Juan 10:16) Diad paway to ya Agosto 1, pahina 232, parapo 29 ibabagan: “Saray Tasi nen Jehova natan so walaan na seet a singa ed si Jehu tan sikaray nepeg a manpaseseg ed Jehonadab a klase [arum a karnero] a miulop ed sikato tan mangala na pigaran betang ed pangiyabawag ed saray arum na panarian na Dios.” Insan, kayarin inaon so Apocalipsis 22:​17, ikuan na parapo: “Komon saray alanaan so manpaseseg ed amin a mangala na betang ed pangibaga na maong a balita na panarian. Agnakaukolan a sikaray alanaan na Katawan pian mangibawag a mensahe na Katawan. Baleg a ligliwa ed saray tasi nen Jehova natan a nakabatan a sikaray naabuloyan a mangawit na saray danum na bilay ed sakey a klase na totoon nayarin ombasil ed Armagedon tan naitdan na andi-anggaan a bilay ed dalin diad katunongan na mabulaslas a kaabigan nen Jehova.”b

¹⁴ Manlapud 1934 tan manpatuloy, say alanaan a nakdaan so angiparungtal ed sarayan arum a karnero a nepeg natan a manggawa na dedikasyon ed inkasira ed Dios tan mangisimbolo ed sayan pangitalaga ed bautismo ed danum tan miulop ed nobyan klase ed pangikuan, “Gala!” ed saray napgaan ya arum. Sirin, wala natan so sakey ya eksakton imbitasyon ya ilalaknab na nobyan klase parad katugyop na sarayan napgaan ya arum a karneron akikasakey ed “sakey a pulok” ed silong na “sakey a kordero,” si Jesu-Kristo. (Juan 10:16) Nen 1935 say alanaan a nakdaan so asagyat a manaral ed kaslakan a kumbension da ed saman a taon a say singa-karnero a klase na too ya angibagaan da na, “Gala!” so peteg a say “baleg ya ulop” na Apocalipsis 7:9-17. Saya so angitarok na balbaleg a kimey na imbitasyon.

15. Panon a “say espiritu” so alanor ed say imbitasyon, “Gala”?

¹⁵ Diad pangikuan, “Gala!” say nobyan klase so mitunusan ed espiritu na Dios. Diad panamegley na espiritu to ed pangilukas na kabaliksan na saray propesiyan insulat to ed Salita, impalaknab to ed nakdaan a nobyan klase a mangilaknab ed imbitasyon. Sarayan propesiya ed imbitasyon da so nibased impuyan na espiritu na Dios. Kanian onman, ed epekto, say espiritu na Dios so mangiaagus ed panamegley nen Kristo tan say nobya to a mangibabaga ed baleg ya ulop na malakarneron totoon, “Gala!”​—Apocalipsis 19:10.

16. Panon a say espiritu tan nobya so mantukoyan ed imbitasyon natan?

¹⁶ Diad sayan panaon say espiritu tan nobya, a nipresenta na alanaan, “manpatuloy a mangikuan: ‘Gala!’” Ibabaga na nakdaan ed sarayan arum a karnero a mangimbita ni ed saray arum a “gala!” Agda abuloyan so “danum na bilay,” unong a nitarok natan, ed inkasikara. Nepeg dan tuloken so ganggan a manlapud “say espiritu tan nobya,” salanti: “Siopaman a makadngel kuanto: ‘Gala!’” Amin na saramay ontunda ed kapgaan so nepeg a mangitayak ed imbitasyon. Nepeg dan ipalaknab ed balang sakey ya ag-ikuenta so rasa, pibabaley, pansasalita, odino kaplesan a relihyon​—balangsakey ed inerman! Agaylan wala so “danum na bilay” ed kaplesan a panaon a pangimbitaan na saray Tasi nen Jehova tan itulong ed amin a totoon mibiang, ed libre!

17. Anton nengneng na “danum” so wala la natan?

¹⁷ Sankadalinan, say Kordero, si Jesu-Kristo, so peteg a mangiwawanwan ed baleg ya ulop ed “subosubol na danudanum na bilay.” (Apocalipsis 7:17) Anggapoy marutak a danum to iya, noagta malinew, ambetel, malinis a danum a direktan nanlapud Subol to. Sayan simbolikon danudanum mankabaliksan na nagkalalo nen saray danum ed sentido na pakatalos ed katuaan na Biblia; kabaliksan da so amin iray probisyon na Dios ed panamegley nen Jesu-Kristo a ginmapo la ingen natan pian ilira so baleg ya ulop ed dalan a pakagamor na andi-anggaan ya ayadyarin bilay ed liket.

Miulop Natan ed Panangiyabawag

18. Panon kalaknab so imbitasyon ed panaon tayo?

¹⁸ Say bilang la natan na sayan baleg ya ulop so inmabot ed nilaksalaksa. Sikaray siseseseg a manpatuloy a mangiyabawag na maong a balita na Panarian ed amin ya atooan a dalin. Maparanay dan ireport iray kimey da ed lawak ed pangipulong na maong a balita na Panarian, a sinmabi la natan ed 212 daldalin. Unong ya abuloyan na sayan kaplesan a konklusyon na sistema na bengabengatla, say imbitasyon so manpatuloy unong ed anus tan dangka nen Jehova a Dios, say Baleg a Manamenben na Panaon. Kabat to no kapigan a nasumpal la so panaon tan no kapigan so momenton panaon parad sikato ya ipakabat so inkasikato ed amin bilang Jehova, unong ya insipan to a mitukoyan ed naolit-olit iran balikas ed propesiya na Biblia.​—Ezekiel 36:23; 38:21-23; 39:7.

19. Akin a nibaga tayo a say “danum” so niopresin libre?

¹⁹ Legan a wala ni so panaon, sirin, saray membro na baleg ya ulop so magaygayagan mibiang dingan na nakdaan na nobyan kaulop a mangikuan: ‘Gala tan mibiang ed danudanun na bilay ya andi-bayar!’ Saray manangiyabawag na sayan manangiliktar bilay a maong a balita so sibubulos a mangiyaabawag, ya agsisingilen iray serbisyon agawaan da unong ya itayak da so mensahe na Panarian ed interon mundo.

20. Antoy pansumpalan lapud wala iran “danum”?

²⁰ Saray danudanum na bilay so wala la natan ed amin a liber na globo, pian saray totoon manlabay a mibiang et nayaryan da a gawaen ed sigpot a pakapenek dingan na manangiliktar-bilay iran pansumpalan. Say arondon a katooan so mangayaga ed andi-geter a bilay dia mismo ed sayan dalin, a magmaliw a sakey a paraiso, a mangalangon ed mablin gagala nen Jehova. Say Manamalsa tayo so nanggawa ed dalin a walaan na aliwan andi-kakanaan noagta dia magmaliw a sakey ya englobon-mundon hardin na Eden, odino Paraiso na gayaga, a panayaman na ayadyarin atooan a palsa ed indengan tan kapadpara na Dios.

21. Panon a nasumpal so gagala na Dios ed dalin?

²¹ Petepeteg, satan so magmaliw a sakey ya agniretraton engraden pribilehyo tan gayaga ed ontan a sakey a balon mundo! Insan say ganggan ya inter na Dios ed inmunan atooan a sanasawa ed Genesis 1:27, 28 so daakan a nasumpal. Misalamat ed onsianon tuloy ya inpanasikaso nen Jehova ed desyang a naplag ed atooan a pamilya, say dalin so magmaliw ed laknab na sakey a paraiso tan napano dingan na ayadyarin atooan a rasa. On, asikasoen na Dios so amin a bengatlan ginawa to, tan, nia, satan so magmaliw a maong a tuloy. Kasin wadtan kayo? No ontan, sirin nepeg yon siaapresyan igapo so pibiang ed danum na bilay a sibubulos. “Gala!” tan inumen yo tan patundaen so inkapgaan yo dingan na danum na bilay a ginmapon onagus natan tan onaagus ed inkanagnap legan na Milenyon onsabi. Tan siopaman a makadngel ed sayan matamoy ya imbitasyon kuanto: “Gala!”

[Saray paimano ed leksab]

Anto so Eba-ebat Yo?

◻ Anto so “danum” ya atukoy ed Apocalipsis 22:17?

◻ Iner so lapuan na “danum”?

◻ Akin a kaukolan iyan “danum”, tan kapigan ya onggapon onagos lambengat?

◻ Diad teksto tayo, anto so tutukoyen na reperensya ed “espiritu”, tan panon ya alanor so “nobya”?

◻ Siopa so makapibiang ed “danum”, tan ed anton pansumpalan?