Igalang so Anak—Say Manunan Ahente nen Jehova
“Siopaman ya agmamagalang ed Anak so agmamagalang ed Ama ya angibaki ed sikato.”—JUAN 5:23.
1. Panon a say sisiaen na Kakristianoan a Trinidad et ag-mamagalang ed si Jesus?
IBABAGA na dakel ed Kakristianoan a mangigagalang ed si Jesu-Kristo, ingen gagawaen da so kasunian to. Panon? Bueno, dakel so mankuan a si Jesus so Makapanyarin-amin a Dios, tan satan a Dios et Amalsa ed amin a bengabengatla, a linma ed dalin tan nambilay tan inatey bilang sakey a too. Sayan ibabaga so nilaktip ed doktrinan Trinidad, a satan so manunan bangat na Kakristianoan. Balet no say Trinidad so palso, no tua, a si Jesus et memelag tan abeba nen say Dios, agta sayan aliwan pangipasen na relasyon to ed Ama et mamaermen ed si Jesus? Peteg, ipasen to so ontan ya aliwan representasyon ya agpamagalang ed inkasikato tan amin a bengatlan imbangat to.
2. Panon a malinlinew ya ipanengneng na Kasulatan a si Jesus so memelag a sakey nen Dios tan abeba ed sikato?
2 Say katuaan so, agbalot akoen nen Jesus a Dios, noag ingen paolit-olit ton sinalitay inkasikato a bilang “Anak na Dios.” Anggan saray kakabusol bidbiren da iya. (Juan 10:36; 19:7) Lawas sinononot si Jesus ed pangitandoro ed Ama tan iyaabebay inkasikato ed Sikato, unong ya inako to: “Say Anak so agmakapanggawa na bengatla ed dilin bunek to, balet no antoy ipabtang na Ama a gawaen to. Ta antokaman iran bengatla a gawaen na Sakey, saray bengatla so gawaen met na Anak ed parehon pamaakaran. Agko nagawaan so sakey a bengatla ed dilin bunek ko . . . lapud agko anapen, so dilin linawak, balet say linawa na saman so angibaki ed siak.” Ikuanto, lamet, “Siak so manangilaman a nanlapud sikato, tan saman a Sakey so angibaki ed siak.” Inkuanto met: “Nanlapud Dios ak tan wadia ak.” (Juan 5:19, 30; 7:28, 29; 8:42) Agbalot isuheri nen Jesus a sikato so Dios odino mipara ed sikato. Kanian say panbangat na ontan a bengatla so agmamagalang ed si Jesus.
Arum Iran Dalan ya Agpamagalang ed si Jesus
3. (a) Diad pangiburi na anto ed si Jesus so gagawaen na arum ed Kakristianoan? (b) Anton impantasi so ginawa nen Jesus unong ed sakbay toon kiwawala to?
3 Walara met so, makapakelaw a tuloy, a pigara ed Kakristianoan natan so agmamagalang ed si Jesus diad pangiburi a sikatoy walaan na sakbay toon inkiwala. Anggaman ontan, no pablien tayo lambengat a si Jesus so petepeteg a linma dia ed dalin a nanlapud tawen et dugarugan onggapon mamagalang tayo ed sikato. Paolit-olit ya inkuan a mismo nen Jesus a sikatoy walaan na sakbay toon kiwawala. “Anggapo so tinmokotok ed tawen,” inkuanto, “balet saman so linmeksab a nanlapud tawen, say Anak na too.” Saginonor sinalita to: “Siak so mabilay a tinapay a nanlapud tawen . . . Anto, sirin, no nanengneng mo so Anak na too a tinmokotok ed kawalaan to nen saman?” Tan lamet: “Sikayoray nanlapu ed ayaman diad leksab; siak so nanlapud ayaman ed tagey. . . . Ta kuan ko ed sikayo, Sakbay na inkianak nen Abraham wala ak la.” (Juan 3:13; 6:51, 62; 8:23, 58) Tinukoy met nen Jesus so sakbay toon kiwawala to ed pikakasi to ed mangatatawen ya Ama to ed labi na inkitapat to.—Juan 17:5.
4. (a) Diad anto iran kaaruman a dalan ya ag-igalang na dakel si Jesus? (b) Anton ebedinsya so nepeg a supisiente a mangiletneg a si Jesus so peteg a nambilay, tan akin?
4 Pigara ed Kakristianoan so alablabas ya angiburi a si Jesus so sakey a maawaran a persona, a sikatoy nanbilay a bilang sakey a too. No sikaton peteg so agniwala, anggapo so usar na pangibangat no akin tan no panon a sikatoy nepeg ya igalang tayo. Ingen say daakan a pantasin nipreserba ed Kasulatan so nepeg a magenap ya ebidensya a mangiletneg na agpanduwaruwaan a peteg a nambilay si Jesus ed dalin. (Juan 21:25) Nagkalautlan tua iya ta lawas imbangat na inmunan Kristiano so nipaakar ed si Jesus ed resga na saray mogmong bilay tan kawayangan da. (Gawa 12:1-4; Apocalipsis 1:9) Anggaman ontan, nilikud ed no antoy insulat na saray patumbok to nipaakar ed sikato, kasin nidemostra so kiwawala nen Jesus?
5, 6. Anton maawaran ya ebidensya, a nilikud a manlapud saray Kasulatan, so mangipanengneng ed aktual a kiwawala nen Jesu-Kristo?
5 Ibabaga na The New Encyclopædia Britannica (1987): “Paneknekan na kabokbokoran iran salaysay a diad kadaanan a panaon et anggan saray sumusumpa ed Inkakristiano so agbalot nanduwaruwa ed inkamaawaran nen Jesus.” Anto iray arum ed sarayan kabokbokoran iran salaysay? Unong ed Judion eskolar a si Joseph Klausner, wala so pantasi nipaakar ed asakbay a Talmudicon sulsulat. (Jesus of Nazareth, pahina 20) Wala met so testimonya na inmunan-siglon Judion manag-awaran a si Josephus. Alimbawa, deneskribe to so inkabato nen Santiago, a sikatoy ipapanengneng a bilang “say agi nen Jesus ya atawag met a Kristo.”—Jewish Antiquities, XX, [ix, 1].
6 Niarum ni, wala so testimonya nipaakar ed asakbay iran manag-awaran a Romano, nagkalautla nipaakar ed rerespetoen a Tacitus. Insulat to ed akaunan komaduan siglo nipaakar ed “sakey a grupo a bubusulen lapud panamusol da, tatawagen iran Kristiano na karaklan. Christus [Kristo], a walan nanlapuan na ngaran a [Kristiano], alablabas a nanirap ed dusa kaleganan na uley nen Tiberius ed saray lima na sakey ed manag-erel tayo.” (The Annals, XV, XLIV) Momoriaen a napnapno so ebidensya a si Jesus so sakey a maawaran a persona, say pilosopikon moralistan Pranses ed koma-18 siglo, a si Jean-Jacques Rousseau, binidbir to: “Say awaran nen Socrates, ya anggapo so manduwaruwa ed satan, so ag-atasian a maong a singa saman ed si Jesu-Kristo.”
Saray Katunongan ed Pamagalang ed Anak
7. (a) Anton Makasulatan a paneknek so mangobliga ed sikatayon mamagalang ed si Jesu-Kristo? (b) Panon a walan pinalaknab nen Jehova so pamagalang ed Anak to?
7 Natan akasabi tayo ed pamaakaran ed pamagalang ed si Jesu-Kristo. A saray patumbok to so obligadon mamagalang ed sikato et nanengneng a manlapud saray salita to ed Juan 5:22, 23: “Ta say Ama agmangukom na siopaman a too, inter to ingen so amin a panangukom ed Anak, ta piano amin igalang da so Anak, a singa say pangigalang da ed Ama. Say agmangigalang ed Anak agto igalang so Ama ya angibaki ed sikato.” Nanlapulad kioli nen Jesus, walan pinagalangan nen Jehova so Anak to ed lalon babaleg a sukat, ‘babalangetan to na gloria tan galang ta walan nanirap ed patey.’ (Hebreos 2:9; 1 Pedro 3:22) Manuna ed amin, walaan tayo na saray katunongan a mamagalang ed si Jesus lapud no sikatoy siopa tan lapud walan agawaan to.
8. Lapud anton nikadkaduma iran katuaan nipaakar ed si Jesu-Kristo a sikatoy makanepegan na galang?
8 Kanepegan nen Jesu-Kristo so galang lapud sikato, a bilang Logo, odino Verbo, so sankaabigan a manangipakabat nen Jehova. Manlapud Kasulatan mapatnag a say panawag a “say Verbo” so onaplika ed si Jesus sakbay a sikatoy linma ed dalin tan ontan met ed kayariy intokotok to ed tawen. (Juan 1:1; Apocalipsis 19:13) Diad Apocalipsis 3:14 sinalita to so nipaakar ed inkasikato a bilang say “gapoan na palsa na Dios.” Aliwan sikato lambengat so “panguloan ed amin a palsa” balet sikato so “bogbogtong ya Anak” sikato lambengat so direktan palsa nen Jehova a Dios. (Colosas 1:15; Juan 3:16) Niarum ni, “amin a bengabengatla so agawa ed panamegley to, tan nilikud ed sikato anggapoy anggan sakey a bengatlan agawa.” (Juan 1:3) Sirin, sano basaen tayo so Genesis 1:26 ya inkuan na Dios, “Manggawa ta na too ed indengan ta, unong ed inkaparpara ta,’” saman a “sikata” so mangilaktip ed Logo, odino Verbo. Peteg, a say katuaan a si Jesus so walaan na sakbay toon kiwawala so walaan na makapakelaw a pribelihyon akibiang ed si Jehova a Dios ed pamalsa et sikatoy makanepegan na baleg a galang.
9. Akin a manampot tayo a si Jesus so Miguel arkanghel, tan panon a ginalang nen Miguel si Jehova a mitunosan ed laman nen Moises?
9 Nagkalalon makanepegan si Jesu-Kristo na galang lapud sikato so manunan anghel, odino arkanghel. Diad anton basean a nasabi tayo itan a konklusyon? Bueno, say prefix ya “arka,” kabaliksay “manuna” odino “manunaan,” so mangipanengneng a wala so saksakey lambengat ya arkanghel. Sikatoy sinalita na Salita na Dios a mitukoyan ed inkioli na Katawan a Jesu-Kristo. Nabasa tayo: “Ta say Katawan a dili onlasor a manlapu ed tawen, pati sakey ya eyag, pati boses na arkanghel, tan say trumpeta na Dios, tan saray inaatey ed Kristo onbilay ira ya ununa.” (1 Tesalonica 4:16) Sayan arkanghel so walaan na ngaran, unong a nabasa tayo ed Judas 9: “Bangta si arkanghel Miguel so walaan na gotgotan ed Diablo tan misasangsangan nisesengeg ed laman nen Moises, agpinmaga a managamil na pamabanday a panangukom a sumpa ed sikato, noag ingen inkuanto, ‘Pooten toka komon nen Jehova.’” Diad agpamalampas ed si Jehova diad panamegley na angat a pangitarok na pangukom a sumpad Diablo, sirin amagalang si Jesus ed mangatatawen ya Ama to.
10. (a) Panon ya angitonton si Miguel ed impanbakal ed biang na Panarian na Dios? (b) Anton betang so ginawa nen Miguel a mikonektaan dingan na nasyon na Israel?
10 Akibakal si arkanghel a Miguel ed biang na Panarian na Dios, ya angitonton ed panlinis na katawenan nen Satanas tan demonikon ulop to. (Apocalipsis 12:7-10) Tan inkuan na propetan Daniel a ‘sikatoy ontalindeg ed biang na totoo na Dios.’ (Daniel 12:1) Ompatnag, sirin, a si Miguel so “say anghel na tuan Dios a mangiyuna ed kampo na Israel” tan sikato iman so sakey ya inusar na Dios a mangitarok ed totoo to ed Nisipan a Dalin. “Manbantay kayo lapud sikato tan tuloken so boses to,” inganggan na Dios. “Agkayo onkiwas a rebelyoso a sumpad sikato, . . . lapud say ngaran ko wala ed sikato.” (Exodo 14:19; 23:20, 21) Anggapoy duwaruwa a walaan na baleg ya interes so arkanghel nen Jehova ed tipikon angaranan a totoo na Dios. Sankamatukoyan a sikatoy tinmulong ed sananey ya anghel ya imbaki a manligliwa ed propetan Daniel, tan walan naatake ed dalan na say mabiskeg a demonyo. (Daniel 10:13) Nayari sirin a makatunongan a nasampotan a satan ya anghel so aneral ed 185,000 iran bumabakal nen Senakerib et anggapon balot noag si Miguel ya arkanghel.—Isaias 37:36.
11. Diad panbabatik na anton kurso ed bilay ed dalin a si Jesus so makanepegan na galang tayo?
11 Aliwa lambengat a kanepegan nen Jesu-Kristo a nagalang lapud no sikatoy siopa noagta kanepegan to met a galangen tayo lapud walan agawaan to. Alimbawa, sikato lambengat so toon nambilay na ayadyarin bilay. Si Adan tan si Eva so pinalsan ayadyari, balet say inkayadyari da so antikey. Anggaman ontan, si Jesu-Kristo so nansiansian ‘matoor, andi-tilol, niarawi manlapud saray makasalanan anggaman ed silong na amin ya itarok na Diablo ed sikato ed dalan na pakatuksoan odino panamasegsegang. Diad panamegley na satan ya amin “ya anggapoy agawa ton kasalanan, nisay naromog so kapaklapan ed sangi to.” Sikato so manepenepeg a manangat ed saray relihyoson sumusumpa to: “Siopa ed sikayo so mamakasalanan ed siak?” Anggapo anggan sakey so makayari! (Hebreos 7:26; 1 Pedro 2:22; Juan 8:46) Tan lapud pamasiansia to ya andi-kasalanan ya integridad, angialangon si Jesus ed mangatatawen ya Ama bilang say makanepegan a sankatalbaan a Soberano tan apaneknekan a say Diablo so sakey a mauges tan baleg a matila.—Uliran 27:11.
12. (a) Anton klasen too si Jesus, tan anto so ginawa to tan nanirapan to ed biang na arum? (b) Akin a nikuan yo a si Jesus so makanepegan na galang tayo ed ginawa to tan lapud nanirapan to?
12 Kanepegan nen Jesu-Kristo so galang tayo, aliwa lambengat lapud sikatoy nambilay ya ayadyari, andi-kasalanan a bilay balet ontan met a sikato so maabig a too, sakey ya andi-siblet, dilin-managsakripisyon too. (Ipareng so Roma 5:7.) Sikatoy andi-kesaw a nanministro ed espiritual tan pisikal a pankaukolan na totoo. Agaylan gunaet so impatnag to ed abung na Ama to, tan agaylan anus so walan impatnag to ed impedeneng ed saray babangatan to! Agaylan impanirap so walan sibubunlok a dinalan to ed impanggawa na linawa na Ama to! Diad irap to ed hardin na Getsamane, ikuan na Biblia: “Diad panpapanabos sikato so nantuloy a nampikasin sisimoon; tan saray linget to singa ra tedter na dala ed dalin.” On, sikato so “kinmerew tan nanpikasi met . . . a tekep na mabiskeg a tagleey tan saray lua.” (Lucas 22:44; Hebreos 5:7) Agaylan sussusto so impangipasakbay nen propeta Isaias ed irap to ed Isaias 53:3-7!
13. Anton maabig ya alimbawa so ingeter nen Jesus ed sikatayo ed pamagalang ed mangatatawen ya Ama to?
13 Kanepegan met nen Jesus so galang tayo lapud maabig ya alimbawan intarya to parad sikatayo ed panamagalang na mangatatawen ya Ama to. Magmainomay ton ikuan: “Igalang ko so Amak.” (Juan 8:49) Diad amin a panaon angitarok na galang ed si Jehova a Dios diad panamegley na saray salita tan saray gawa to. Sirin, sano tambalen to so sakey a too, say salaysay na Biblia mangikuan, ya aliwan ingloria na totoo si Jesus, noagta a “sikaray angigloria ed Dios.” (Marcos 2:12) Sirin, diad sampot na say mangaraldalin a ministro to, dugarugan ikuan nen Jesus ed pikakasi to ed mangatatawen ya Ama to: “Walan ingloria ta ka ed dalin, a walan asumpal ko so kimey ya inter mo ed siak a gawaen.”—Juan 17:4.
No Antoy Ginawa To Parad Sikatayo
14. Anto so sumpalen na impatey nen Jesus parad sikatayo a manggawan makanepegan ed galang?
14 Tan agaylan balbaleg a si Jesus-Kristo so makanepegan na galang tayo lapud amin a walan ginawa to parad sikatayo! Sikatoy inatey parad saray kasalanan tayo pian sikatayo so niasingger ed si Jehova a Dios. Inkuan nen Jesus so nipaakar ed inkasikato: “Say Anak na too so sinmabi, ya aliwan panlikoran, noagta manlikor tan mangiter ed kamarerwa to a bilang dondon parad dakel.” (Mateo 20:28) Sirin, say patey so nanggawan posibli parad amin a say Panarian so parad sikatayon totoo: ag-ompatey a bilay ed katawenan parad 144,000 a tugyopen na nobya to tan andi-anggaan a bilay ed paraison dalin parad nilaklaksan arum ya amaneknek ed pananisia ra tan katutulok ed silong na subok.—Salmo 37:29; Apocalipsis 14:1-3; 21:3, 4.
15. Anto so sakey ya alimbawa nen Jesus, ed pangiparungtal na personalidad na Ama to ed sikatayo?
15 Makanepegan met si Jesu-Kristo na galang lapud, bilang say Baleg a Managbangat, sikato so walan ayadyarin angiparungtal ed linawa na Ama to tan personalidad ed sikatayo. Alimbawa, ed Sermon to ed Palandey, sikato so angituro ed inkabaleg na puso na Ama to ed pangisindag na banwa tan uran ed paraparan maabig tan mauges tan insan indanet to: “Sikayo met so magmaliw ya ayadyari, a singa ed mangatatawen ya Ama yo et ayadyari.”—Mateo 5:44-48.
16. Panon so impangisegek nen apostol Pablo ed makanepegan-galang a kurso nen Jesus?
16 Maong so impansegek na apostol Pablo ed makanepegan-galang a kurso nen Jesus sanen insulat to: “Anggaman sikato so niwala ed indengan na Dios, [sikato] so ag-angipasen, salanti, a sikato so mipara ed Dios. Andi, noag ingen nilokpos to so inkasikato tan inala to so ereng na sakey ya aripen ya agawan kaolibay na too. Nagkalalo nen satan, sanen sikato so aromog ed inkasikato ed too, sikatoy namapaabeba ed inkasikato tan nagmaliw a situtulok ya anggad patey, on, patey ed panamairapan a kiew.”—Filipos 2:5-8.
No Panon Tayon Igalang so Anak
17, 18. Diad antoran nanduruman dalan a mankapangitarok tayo na galang ed si Jesu-Kristo?
17 Lapud si Jesu-Kristo so andi-duwaruwan makanepegan ed galang tayo, makasabi tayo ed tepet a: Panon tayon igalang so Anak? Nagawa tayo diad panamegley na pangagamil na pananisia ed dondon a bagat to, tan napaneknekan tayo pananisia diad pangala na nakaukolan iran kundang na panagbabawi, komberte, dedikasyon, tan bautismo. Diad iyasingger ed si Jehova diad pikakasi ed ngaran nen Jesus, nagalang tayo si Jesus. Nagkalalon sikatoy nigalang tayo sano tumboken tayoray salita to: “No siopaman ed sikatayo so miulop ed siak, ikaindan to so inkasikato tan laen to panamairapan a kiew to tan mantultultoy ya ontumbok ed siak.” (Mateo 16:24) Nigalang tayo si Jesu-Kristo sano tomboken tayoray bilin to a mansiansian mananap ya ununa ed Panarian na Dios tan inkatunong to, tan sikatoy nigalang tayo sano sikatayoy ontumbok ed ganggan a mibiang ed panggaway-babangatan a kimey. Lamet, sikatayo so mamagalang ed si Jesus, sano ipatnag tayo so sanaagin panangaro ya inkuanton pakabidbiray amin a tuan patumbok to.—Mateo 6:33; 28:19, 20; Juan 13:34, 35.
18 Niarum ni, mangitarok tayo na galang ed Anak diad panawit ed ngaran to, a tatawagey inkasikatayo a Kristianos, tan insan diad panbilay unong ed satan a ngaran ed panamegley na maabig a kondukta tayo. (Gawa 11:26; 1 Pedro 2:11, 12) Inkuan nen apostol Pedro a sikatayo so nepeg ya ontumbok ed saray bakat nen Jesus a maapit. (1 Pedro 2:21) Dia sirin ed pangalig ed sikato ed amin a kondukta tayo, sikatoy nigalang tayo met. Tan maseguro, sano tinaon tayon selebraan so Memoryal ya impatey nen Kristo, sikatayo so mangiter na espesyal a galang ed sikato.—1 Corinto 11:23-26.
19, 20. (a) Anto iran palangkap so itatarya nen Jesus ed saray patumbok ton mangigalang ed sikato, natan tan ed arapen? (b) Nawalaan tayo na anton talek mitunosan ed Anak?
19 Anton palangkap so intarya nen Jesus ed saray babangatan to parad itumbok na kurson mamagalang ed sikato? Inkuanto: “Tua kuan ko ed sikayo, Anggapoy too ya anaynan na abung o agagin lalaki o agagin bibii o ina o saray anak o daldalain nisengeg ed siak tan nisengeg ed maong a balita ya agmangawat na maminlasus natan ed sayan panaon, abu-abung tan agagin lalaki tan agagin bibii tan saray ina tan saray anak tan daldalin, pati saray pasegsegang, tan dia ed onsasabin sistema na bengabengatla ed andi-angaan a bilay.”—Marcos 10:29, 30.
20 Ontumbok sirin a no mansakripisyo tayo nisesengeg ed si Jesus, seguroen ton pabtangan itayo. Pinaseguro tayo nen Jesus: “Balang sakey, sirin, a mangipatua naani ed siak ed arap na totoo, sikato met so ipatuak naani ed arap nen Amak a wala ed tawen.” (Mateo 10:32) Kanian unong a say mangatatawen ya Ama et mamagalang ed saray mamagalang ed sikato, manilalo tayo a say bogbogtong ya Anak nen Jehova so mangalig ed Ama to ed sayan bengatla, unong a ginawa na Anak ed arum iran pamaakaran.
Panon So Pangebat Yo?
◻ Panon a dakel ed Kakristianoan ya agpagalangen so Anak?
◻ Anto so pantasin inter nen Jesus ed sakbay toon inkiwala to?
◻ Anto iray arum a rason ed pamagalang tayo ed si Jesus?
◻ Anto iray arum a dalan a nagalang tayo si Jesus?
◻ Say pamagalang ed si Jesus so mansumpal ed anto iran gungguna?