“Anapen so Kareenan tan Aligen Itan”

“Si Jehova so nibalbaleg, a mangayaga ed kareenan na aripen to.”​—SALMO 35:27.

1. Anto so kareenan a pangayagaan tayo natan?

AGAYLAN liket ed sayan naapag-apag a mundo so nawalaan na kareenan! Agaylan gayaga so pandayew ed si Jehova, “say mismon Dios na kareenan,” tan pinabang ed saray bendisyon na “sipan na kareenan to”! Agaylan makapaligliwa, diad leet na saray pakadetdetan ed bilay, a nakabatan so “kareenan na Dios a talonaan to so amin a nonot” tan naeksperiensia so ‘bedber na kareenan’ a mamakasakey ed totoo na Dios antokaman so nasyonalidad, lenguahe, rasa, o sosyal a nanlapuan da!​—1 Tesalonica 5:23; Ezequiel 37:26; Filipos 4:7; Efeso 4:3.

2, 3. (a) Ambegyan saray totoo na Dios ya interamenti et makasungdo, anto so nayarin nagawa ed sinansakey iran Kristianos? (b) Anto so isagyat na Biblia ed sikatayo gawaen?

² Bilang Tastasi nen Jehova, pablien tayo iyan kareenan. Anggaman ontan, agtayo naleglemew itan. Ag-otomatikon napansiansia so kareenan lapud sikatayo so mililimog ed Kristianon kongregasyon odino nibambanan kabiangan na Kristianon pamilya. Anggaman say alanaan a nakdaan tan saray kaiba ra ed “arum a karnero” so makapansiansia bilang sakey a pulok anggad anggaan, nayarin nabalang na sinansakey so kareenan da tan mantalinak.​—Juan 10:16; Mateo 24:13; Roma 11:22; 1 Corinto 10:12.

³ Pinasakbayan nen apostol Pablo iray alanaan a Kristianos ed agew to: “Manalwar kayo, agagi, ta ompan lamang wala so mamayubo ed siopaman ed sikayo na mauges a puso a kulang na pananisia diad iyarawi manlapud mabilay a Dios.” (Hebreos 3:12) Onaplika met iyan pasakbay ed say baleg ya ulop. Kanian sasagyaten na Biblia iray Kristianos: “Anapen yo so kareenan tan aligen itan. Ta saray mata nen Jehova so walad saray matunong, tan saray layag to walad saray kerekerew da; balet say lupa nen Jehova so sumpad saraman so manggawa na mauges a bengabengatla.”​—1 Pedro 3:10-12; Salmo 34:14, 15.

“Say Kaisipan na Laman”

4. Anto so makadisturbo ed kareenan tayo ed Dios?

⁴ Anto so makaamper ed panumbok tayo na kareenan? Sinaglawi nen Pablo so sakey a bengatla sanen inkuanto: “Say kaisipan na laman kabaliksan to so patey, balet say kaisipan na espiritu kabaliksan to so bilay tan kareenan; lapud say kaisipan na say laman kabaliksan to so pibubusol ed Dios.” (Roma 8:6, 7) Diad “laman,” tutukoyen nen Pablo so naplag a kipapasen bilang ag-ayadyarin totoo ya akatawir na makasalanan iran tendensya. Say isuko ed saray kilingan na naplag a laman so maneral ed kareenan tayo. No say sakey a Kristiano et agmanbabawin manggawa na imoralidad, pantila, pantakew, pandruga, o ed arum a dalan a mamuyak na madibinon ganggan, sikato so mamuyak ed kareenan ed si Jehova a datin nangayagaan to. (Uliran 15:8, 29; 1 Corinto 6:9, 10; Apocalipsis 21:8) Niarum ni, no abuloyan to iray materyal a bengatlan lalon importanti ed sikato nen espiritual a bengabengatla, say kareenan to ed Dios so seryoson tuloy a nasigensigen.​—Mateo 6:24; 1 Juan 2:15-17.

5. Anto so nalalanor ed pangalig ed kareenan?

⁵ Diad biek a dapag, inkuan nen Pablo: “Say kaisipan na laman kabaliksan to so bilay tan kareenan.” Say kareenan so kabiangan na bunga na espiritu, tan no ipasal tayo so puso tayo a mangapresya ed espiritual a bengabengatla, a manpikasi ya ontulong ed sikatayo so espiritu na Dios ed sikatayo, diad satan sikatayo so makaarawi ed “kaisipan na laman.” (Galacia 5:22-24) Diad 1 Pedro 3:10-12, say kareenan so misiglaotan ed inkatunong. (Roma 5:1) Ikuan nen Pedro a say pangalig ed kareenan so mangilaktip ed ‘iyarawi ed no anto so mauges tan panggawa no anto so maabig.’ Makatulong so espiritu na Dios ed sikatayo a “batiken so inkatunong” tan sirin nipreserba tayo so kareenan ed Dios.​—1 Timoteo 6:11, 12.

6. Anto so sakey ed saray responsabilidad na saray mamatatken no nipaakar ed kareenan ed kongregasyon?

⁶ Say pangalig ed kareenan so manunan paga na saray mamatatken ed kongregasyon. Alimbawa, no salien na sakey ya iparungtal iray makarutak ya agamil, saray mamatatken so responsable a manalimbeng ed kongregasyon diad pamaat ed manag-kasalanan. No awaten to so panamaat, nagamoran to lamet so kareenan to. (Hebreos 12:11) Tano andi, sikato so naekal pian say mareen a relasyon ed kongregasyon ed si Jehova et nipreserba.​—1 Corinto 5:1-5.

Kareenan ed Saray Agagi Tayo

7. Anton pangipatnag na ‘kaisipan na laman’ so impasakbay nen Pablo ed saray taga-Corinto?

⁷ Say ‘kaisipan na laman’ so makaderal aliwa lambengat ed kareenan tayo ed Dios noag ontan met ed maabig a relasyon tayo ed arum iran Kristianos. Insulat nen Pablo ed saray taga-Corinto: “Ta mangaraldalin kayo ni. Tano wala ed limog yo so imun tan siblangan, agkayo ta mangaraldin tan manaakar ed inkaugali na totoo?” (1 Corinto 3:3) Say imun tan siblangan so mogmong kasunian na kareenan.

8. (a) Anto so nayarin nagawa ed sakey a mamalesa na imun tan siblangan ed kongregasyon? (b) Diad anto so pandependian na kareenan tayo ed Dios?

⁸ Say pansigensigen ed kareenan ed kongregasyon diad pamalesa na imun tan siblangan so seryoson maong. Totongtongen so kalidad a misiglaotan ed kareenan a bilang sakey a bunga na espiritu, impasakbay nen apostol Juan: “No siopaman so mankuan: ‘Inarok so Dios,’ tan ingen bubusolen to so agi to, sikato so matila. Ta say agmangaro ed agi to, anta nanengneng to, agto naaro so Dios ya agto anengneng.” (1 Juan 4:20) Diad mipadparan dalan, no sakey ya indibidual et mamalesa na imun o siblangan ed limog na saray agagi, petepeteg kasin sikato so mikareenan ed Dios? Maseguron andi! Sikatayo so apaseseg: “Mantultuloy a mangayaga, a mamasimbalo, a naligliwa, a mankakasakey ed nonot, a manbilay ed kareenan, insan say Dios na aro tan kareenan so manayam ed sikatayo.” (2 Corinto 13:11) On, no mantultuloy tayon manbilay a mikareenan ed balang sakey, insan say Dios na aro tan kareenan so walad sikatayo.

9. Panon tayon amta a no maminsan et saray Kristianos so walaan na agpantatalosan tan agpantutunosan?

⁹ Agkabaliksan na saya ya anggapon balot so agpantatalosan ed baetan na saray Kristianos. Pigaran simba kayari na Pentecostes, wala so agpantutunosan ed balo nin Kristianon kongregasyon nipaakar ed inagew-agew a pangibunog na tagano. (Gawa 6:1) Diad sakey ya okasyon et wala so agpantutunosan ed baetan nen Pablo tan Barnabas ya amaarap ed “ampetang ya interak na sanok.” (Gawa 15:39) Kaukolan a bilinen nen Pablo si Euodia tan Sintike, ya agpanduwaruwaan a maabig, maseeseet iran agagin bibii, “ed parehon kanonotan ed Katawan.” (Filipos 4:2) Agpankelawan a si Jesus et angiter na detalyadon simbawa ed no panon a resolbien iray makasigensigen ed kareenan diad baetan na saray Kristianos tan indanet so inkaganatan na pangasikaso na ontan iran problema a tamtampol! (Mateo 5:23-25; 18:15-17) Agto komon inter iyan konseho noagto kabat iray kairapan ed limog na saray patumbok to.

10. Anto iran kipapasen no maminsan so onlesa ed sakey a kongregasyon, tan anton responsabilidad so ipasen na saya ed amin a nalalanor?

¹⁰ Natan, sirin, posibli a siopakaman et naopendi ed agmaalwar a salita o pakatebek ed agpanginonang na kaparan Kristiano. Say ugali na sakey a too so nayarin makapasiodot a maong ed sananey. Makapangbabangaan iray personalidad. Nayarin mabiskeg a tuloy ya agmikasakey so sakey ed desisyon na saray mamatatken. Diad ulop na mamatatken a mismo, say sakey a matatken so mabiskeg-impannonot tan manalin manalona ed arum a mamatatken. Anggaman ed katuaan ya ontan a bengabengtla so nayarin nagawa, siansianin anapen tayo so kareenan tan aligen itan. Say anggat so panamenben na sarayan problema ed sakey a Kristianon dalan pian diad ontan ed nipreserba so “manamasakey a bedber na kareenan.”​—Efeso 4:3.

11. Anto iran probisyon so ginawa nen Jehova a makatulong ed sikatayo a mangalig ed kareenan ed sinansakey?

¹¹ Ikuan na Biblia: “Si Jehova so nibalbaleg, a mangayaga ed kareenan na aripen to.” (Salmo 35:27) On, kaliktan nen Jehova itayon wala ed kareenan. Kanian, sikato so nanggawa na duaran manuna probisyon pian ontulong ed sikatayon makapangipreserba ed kareenan ed limog na inkasikatayo tan ed sikato. Say sakey et say masanton espiritu, a say kareenan et sakey a bunga, a pati ed misiglaotan a makapareen iran kalidad, a singa andukey-a-panagtepel, panangasi, kaumildian, tan dangka. (Galacia 5:22, 23) Say sananey et say madibinon kakabatan, a walan nabasa tayo: “Say kakabatan a manlapud tagey so ununa ed amin et masimpit, insan mareen, makatunongan, mainomay a pikasian, napno na panangasi tan maong iran bunga.”​—Santiago 3:17, 18.

12. Anto so nepeg tayon gawaen no say kareenan tayo ed saray agagi tayo so walan asigensigen?

¹² Sirin, sano say kareenan tayo ed arum so nasisisengsigen, nepeg tayon manpikasi parad kakabatan a manlapud tagey a mangipanengneng ed sikatayo no panon so ikiwas, tan nepeg ya onkerew tayo na masanton espiritu a mamabiskeg ed sikatayo a manggawa no anto so duga. (Lucas 11:13; Santiago 1:5; 1 Juan 3:22) Mitunosan ed pikakasi tayo, makapanilalo tayo sirin ed lapuan na madibinon kakabatan, say Biblia, parad pangiwanwan, tan ontan met a manusisa ed walan literatura na Biblia parad konseho ed no panon so pangiyaplika na Kasulatan. (2 Timoteo 3:16) Kaliktan tayo met so onkerew na simbawa a manlapud saray mamatatken ed kongregasyon. Sakey a pinal a kundang so itombok ed nawat a panangiwanwan. Ikuan na Isaias 54:13: “Ta amin iray anak mo nibangat ira ed Jehova, tan daakan naani so deen na saray anak mo.” Ipanengneng iya a say kareenan tayo so mandepende ed pangagamil tayo ed saray bengatlan ibabangat nen Jehova ed sikatayo.

“Maliket Iray Mareen”

13, 14. (a) Anto so iparungtal na balikas nen Jesus a “mapareen”? (b) Panon tayon magmaliw a manag-padeen?

¹³ Si Jesus, ed Sermon to ed Palandey, angikuan: “Maliket iray mapareen, ta natawag ira ya ‘ananak na Dios.’” (Mateo 5:9) Say “mapareen” dia so agontutukoy ed siopaman a simplen kemeg ed nengneng. Say orihinal a Griegon salita et mankabaliksan a “manag-padeen.” Say sakey a manag-padeen et onsiano ed panangipawil na deen sano nasigensigen itan. Angaman ontan, nagkalalo ni, a manunan manggunaet so manag-padeen ya onarawi ed pansigensigen ed kareenan. ‘Manari so deen ed puso to.’ (Colosas 3:15) No panggunaetan na ariripen na Dios a magmaliw a manag-padeen, diad satan naparaisetan iray problema ed limog da.

¹⁴ Say pagmaliw a manag-padeen et mangilalanor ed panamidbir na dili tayon kaleteyan. Alimbawa, nayarin say sakey a Kristiano et panget o magmaliw a masenti o mainomay a napasakitan. Sano walad silong na pakadesdesan, saray emosyon to so mamalingwan ed sikato ed saray prinsipyo na Biblia. Saya so nailaloan ed ag-ayadyarin katooan. (Roma 7:21-23) Anggaman ontan, say panbubusulan, siblangan, tan sanok so nilista a bilang gawa na laman. (Galacia 5:19-21) No naromog tayoratan a kilingan ed inkasikatayo​—o no itarok ira na saray arum ed pakaimano tayo ​—​nepeg tayon sisisimoon tan mantultuloy a manpikasi parad espiritu nen Jehova a mamayubo ed sikatayo na dangka tan kaumildian. Peteg, balang sakey so manggunaet a mamayubo na ontan iran kalidad a kabiangan na balon personalidad to.​—Efeso 4:23, 24; Colosas 3:10, 15.

15. Panon a say kakabatan a manlapud tagey et onsumlang ed agmakatunongan ya inkaawet na ulo?

¹⁵ Diad sakey ya okasyon, sakey a kongregasyon o sakey ya ulop na mamatatken so nasigensigen na sakey ya anawet-ulo, a lawas mamipilit ed dilin dalan to. Tua, diad madibinon ganggan, say sakey a Kristiano so nepeg a magmaliw a mabiskeg-ed-kanonotan, ya anggan mapekder. Tan no nalikna tayon walaan tayo na maong ya ideya a makagungguna ed arum, anggapo so mauges ed pangibalikas ed inkasikatayo, basta isalaysay tayoray rason tayo. Balet agtayo labay a magmaliw a singa saramay walad mundo a “lawas aglukas ed antokaman a pikasakeyan.” (2 Timoteo 3:1-4) Say kakabatan a manlapud tagey et mapareen, makatunongan. Saramay onkikiwas a mamorma na padron na inkaawet na ulo so nepeg ya ontumbok ed konseho nen Pablo ed saray taga-Filipos ya ‘agmanggawa lapud panpasirayew.’​—Filipos 2:3.

16. Panon a say konseho nen Pablo ed libron Filipos et makatulong ed panalona ed inkapamasirayew?

¹⁶ Diad satan a parehon sulat, pinaseseg itayo nen Pablo a nepeg tayon, ‘atekepan na kaabebaan na kalakal,’ a sisimoon ‘ya ipasen iray arum ya atagtagey nen sikatayo.’ Saya so mogmong kasunian na panpasirayew. Say sakey a matatken a Kristiano so agmannonot ed pangiyuna na dili toran ideya, ya isalba so dignidad, o panalimbeng ed dili ton posisyon tan pakauley. Saya so onsumlang ed pananimbawa nen Pablo a ‘pansiansiaen so inkasikayo, aliwan ed personal ya interes yo lambengat, noagta ontan met ed personal ya interes na saramay arum.’​—Filipos 2:4; 1 Pedro 5:2, 3, 6.

Mamareen Iran Salita

17. Anton aliwan pangusar na dila so manigensigen ed kareenan ed kongregasyon?

¹⁷ Say sakey a mamabatik ed kareenan so nagkalautlan maalwar ed panangusar to na dila. Impasakbay nen Santiago: “Say dila so melag a membro tan ingen manggawa na baleg a panlastog. Nia! Agaylan melag ya apoy so mamarngat na pool ed baleg a kakiewan!” (Santiago 3:5) Say galgalaw a panagtalabutob, panamalaw ed arum ed benegan da, agmapangasi tan ansakit iran salita, panmeremere tan panagreklamo, tan ontan met ed agmatuan panrayew nisesengeg ed personal a bentaha​—amin na saraya so gawa na laman a manigensigen ed kareenan na totoo na Dios.​—1 Corinto 10:10; 2 Corinto 12:20; 1 Timoteo 5:13; Judas 16.

18. (a) Diad kipapasen na sakey ya agginagalan aliwan panangusar na dila, anto so dugan kurang parad balang sakey a nalalanor? (b) Sano say sanok so sengegan ed siopakaman a mangibalikas na mapasakit iran salita, panon so ikiwas na matatken iran Kristiano?

¹⁸ Tua, inkuan nen Santiago: “Say dila, anggapon balot ed katooan so makaamo ed satan.” (Santiago 3:8) Anggan saray matatken a Kristianos no maminsan et makapansalita na saray bengatlan petepeteg a panbabawian da ed saginonor. Kaliktan tayon amin a naperdona so lingo-lingo tayo na saray arum unong a pirdonaen tayo ra. (Mateo 6:12) No maminsan say ibetag na sanok so mamawala na makapasakit iran salita. Insan, say sakey a manag-padeen so makanonot a “say ebat, sano mauyamo et mamarawi na sanok, balet say salitan mansengeg na sakit so mamasanok.” (Uliran 15:1) Maparanay, sikato so basta onengas na aralem tan mangikaindan ya onebat ed masanok iran salita na lalon makapasanok a salita. Kayari to, sano napapa so sanok, say baleg-impanpuson manag-padeen et mankabat no panon a lingwanan iray bengatlan nibaga ed petang na momento. Tan say sakey a maapabeba a Kristiano so makaamta no panon a sikatoy onkerew na panamerdona tan manambal ed antokaman a sugat a ginawa to. Satan so sakey a tanda na inkabiskeg ed moral a simamatuan mangikuan a, “Dispensa mo ak.”

19. Anto so naaralan tayo a manlapud si Pablo tan si Jesus nipaakar ed no panon so pangiter na konseho?

¹⁹ Say dila so nausar pian simbawaen iray arum. Mapublikon binaat nen Pablo si Pedro sanen say kaunoran et kinmiwas na aliwa ed Antioka. Tan nangiter na mabiskeg a konseho si Jesus ed saray mensahe to ed pitoran kongregasyon. (Galacia 2:11-14; Apocalipsis, kapitulo 2, 3) No aralen tayorayan alimbawa, naaralan tayo a say konseho so nepeg ya agtanton mapalna a nabalang so getma to. Anggaman ontan, si Jesus tan si Pablo so aliwan mapasang o masubeg. Say konseho ra so aliwan mangipaway na dilin pakadismaya. Sikara so petepeteg a manasalin ontulong ed saray agagi ra. No nalikas na sakey a mangiiter na konseho a sikato so agnagnap a mangontrol ed dila to, pilien to so ontunda a magano tan manpabetel a daiset sakbay ya ikuan so antokaman. Tano andi, nayarin sikato so makapansalita na makapasakit iran salita a sengegan na lalon problema nen saman so sasalien ton benbenan.​—Uliran 12:18.

20. Anto so nepeg a manuley ed amin a salitaen tayo o ibaga ed saray agagin lalaki tan bibii?

²⁰ Unong ya asaglawi la, say deen tan aro so maapapit a mansiglaotan a bilang bunga na espiritu. No anto so salitaen ed agagi tayo​—o nipaakar ed sikara​—​so lawas kidalangirrangan na aro ed sikara, sirin satan so mangarum ed kareenan ed kongregasyon. (Juan 15:12, 13) Saray balikas tayo so lawas “atekepan na liga, alaokan na asin.” (Colosas 4:6) Nepeg a saratan et mataway, a singa kuan, a mamagayaga ed puso. Nankonseho si Jesus: “Wala komon so asin ed inkasikayo, tan manpaknaan so sakey tan sakey ed sikayo ed deen.”​—Marcos 9:50.

“Mamasya Kayo”

21. Anto so mapatnag ed totoo na Dios ed sinimban miting da tan legan na saray asamblea tan saray kumbension?

²¹ Insulat na salmista: “Nia! Aglay abig tan alay kaligliwaan ed saray agagin manayam a nankakasakey!” (Salmo 133:1) Petepeteg, panliketan tayo a kaibaray agagi tayo, nagkalautla ed sinimban miting tan legan na saray asamblea tan babaleg iran kumbension. Diad ontan iran panaon say deen so mapatnag anggan ed saray taga-paway.

22. (a) Anton palson kareenan a saray nasyones ed saginonor et manisip ya adampot da a mangitonton ed anto? (b) Anton peteg a kareenan a say sipan a kareenan na Dios a mangitonton ed anto?

²² Agmanbayag nonoten na saray nasyones a nadadampot da so deen ya andi so tulong nen Jehova. Balet legan ya ibabaga ra so, “Deen tan andi-paga!” insan biglan kadederal so onsabi ed amin ya agmikareenan ed Dios. (1 Tesalonica 5:3) Kayari na satan, say baleg a Prinsipe na Kareenan so mangigapo ed panagtambal na katooan a manlapud makadesyang iran pansumpalan na orihinal ya impakabalang na kareenan na too ed Dios. (Isaias 9:6, 7; Apocalipsis 22:1, 2) Sirin, say sipanan ed kareenan na Dios so mansumpal ed sankamundoan ya inkakalmado. Anggan saray atap na lawak so makaeksperiensia na deen a manlapud karelmengan.​—Salmo 37:10, 11; 72:3-7; Isaias 11:1-9; Apocalipsis 21:3, 4.

23. No pangayagaan tayo so ilalo ed sakey a mareen a balon mundo, anto so nepeg a gawaen tayo natan?

²³ Agaylan maglorian panaon itan! Kasin magayaga kayon onnengneng ed satan? No ontan, “aligen so kareenan ed amin a totoo.” Pansiansiaen natan so kareenan ed saray agagi yo, tan nagkalautla ed si Jehova. On, “ta manaalagar kayo ed sarayan bengabengatla, mamasya kayo a naromogan to ed kaunoran ya andi-mantsa tan andi-dutak tan walad kareenan.”​—Hebreos 12:14; 2 Pedro 3:14.

Kasin Nanonotan Yo?

◻ Anto so makabuyak ed kareenan tayo ed si Jehova?

◻ Anton nengneng na agpantatalosan so nakakaukolan a naresolbe ed say kongregasyon?

◻ Anton probisyon so ginawa nen Jehova a makatulong ed sikatayon mananap na kareenan tan aligen itan?

◻ Anton silalaman iran awawey so makadisturbo ed kareenan ed kongregasyon, tan panon tayon talonaan iratan?

[Litrato ed pahina 10]

Manlipua so kareenan ed limog na saramay imbangat nen Jehova

[Litrato ed pahina 12]

Alay kaligliwaan na kareenan na saray agagin manlinkor ed pankakasakey!