No Panon So Pakaeksperiensia Yo ed Madibinon Kareenan a Lalon Nagnap
“O no sika lambengat so peteg a manimano ed saray ganggan ko! Sirin say kareenan mo so magmaliw a singa ilog, tan say inkatunong mo so singa daluyon na dayat.”—ISAIAS 48:18.
1. Anto so nakaukolan pian naeksperiensia tayo so kareenan a lalon nagnap unong a labay tayo?
SARAMAY mibiang a maparanay ed panagaral na kongregasyon ed Biblia diad tulong na sayan magasin so mamidbir ed kablian na kareenan ya iter na Dios, tan satan a kareenan so kaliktan da. Andi-duaruan satan so panggagayagan na dakel. Ingen aliwan amin so makakalikna ed satan a nagnap a singa labay da komon. Akin ya onia? Nipaakar ed saraman so nawalaan na madibinon kareenan, ibabaga nen Jehova: “Siak, Jehova, so Dios mo, say Sakey a mangibabangat ed sika pian nagunggunaan ka, say Sakey a manggawa ed sikan manakar ed dalan a nepeg mon panakaran. O no sika lambengat so peteg a manimano ed saray bilin ko! Sirin say kareenan mo so magmaliw a singa ilog, tan say inkatunong mo so singa daluyon na dayat.”—Isaias 48:17, 18.
2. (a) Anto so tutukoyen na balikas a “manimano”? (b) Diad panon karakel na ganggan na Dios so nepeg tayon imanoen? (1 Juan 5:3)
2 Mapatnag, siopaman so makagungguna diad iyatendi ed saray miting a ditan so panalaysayan ed Biblia. Balet saramay manimano lambengat ed saray bilin nen Jehova, a manggawa na personal a panangiyaplika ed saratan tan manbilay a tukoy ed satan, so tuan manggayaga ed madibinon kareenan. Kasin walaray pasen a nakaukolan yon panggawa ed saya a lalon nagnap? (2 Pedro 1:2) Aliwan magenap so pangimano tayo ed saray pigaran nakakaukolan na Dios balet insan ipuera la raman so naromog tayon mairap. Sanen sinali na Diablo a sagyaten si Jesu-Kristo ed sinisiblet a dalan na panagnonot to, si Jesus so mabiskeg ya inmebat: “Walan nisulat, ‘Say too so manbilay, aliwan diad tinapay lambengat, noagta ed amin a salitan ombesngaw ed sangi nen Jehova.’”—Mateo 4:4.
3. Antoran kipaakaran na bilay tayo so nepeg a nitarok a mitukoyan ed saray dalan nen Jehova pian tuan nawalaan itayo na daakan a kareenan?
3 Saray bilin na Dios so managlawi ed amin a kipaakaran na bilay tayo. Ununa ed amin, lalanoren da so relasyon tayo ed si Jehova. Insan apektaen da so panmoria tayo ed nanengneng a muyongan to tan say Kristianon ministeryo, say nengneng na panagtrato tayo ed saray membro na pamilya, tan say pidedeneng tayo ed saray totoo na mundo. Saramay magunaet a mangimano ed saray bilin nen Jehova ed amin na sarayan pamaakaran so napapalar ed daakan a kareenan. Imanoen tayo so pigaran bengatla a nayarin ontulong ed sikatayon personal a makaeksperiensia ed satan.
Kasin Wala ed Sarayan Bengatla So Mankaukolan na Imano Yo?
4. (a) Akin a say pakawalaan na panangiyaral ed Biblia odino iyakar ed Kingdom Hall so agmangarantiyan sikatayo so akikareenan la ed Dios? (b) Anto so nisakup diad panangagamil na pananisia ed si Jesu-Kristo? (Juan 3:36)
4 Kasin agano nin inggapo yo so panaaral na Biblia ed saray Tasi nen Jehova? Odino kasin sikayo la so mililimog ed lokal a kongregasyon diad pigara lan bulan odino taotaon? No ontan, andi-duaruwan aromog yo la so gayaga diad pakawalaan na pikakabat ed saray gagala na Dios a nilukas ed arap yo. Ingen say katuaan a say sakey a too so manggagayaga ed panagaral na Biblia odino naliketan diad iyaakar ed Kingdom Hall so agmamaneknek a sikato la so akikareenan ed Dios. Sikatayon amin so nianak ed kasalanan, tan say pikareenan ed Dios so posibli lambengat ed sikatayo diad panamegley nen Jesu-Kristo. (Isaias 53:5; Gawa 10:36) Say basta pasapasan pananisia ed si Jesus so agmangitarok ed ontan a kareenan. Nakaukolan so pangapresyan personal diad pankaukolan tayo ed dondon, diad pangagamil na pananisia ed kablian na bagat nen Jesus, tan insan iter so ebidensya na satan a pananisia diad pangunor ed saray ganggan to. (Santiago 2:26) Sakey ed saray ganggan ya inter nen Jesus sanen wadiad dalin et say kabautismoan ed danum na saraman so magmaliw a babangatan to. (Mateo 28:19, 20) Kasin sika la so abautismoan diad simbolo na dedikasyon mo ed si Jehova ed panamegley nen Jesu-Kristo?
5. Akin a say dedikasyon tan bautismo so importante diad pikakareenan tayo ed Dios?
5 Kasin wala so antokaman ed bilay yo a manggawa ed sikayon aliwa nin kualipikado ed bautismo? No kabat yo a wala ni, odino no diad kurang na panaaral yo et naaralan yon saya so kipapasen, agla manaabalan peteken iray bengatla. Bidbiren ya anggan anton awawey odino konduktan manggawa ed sakey a toon aliwan kualipikado ed bautismo so babeng met diad pikakareenan to ed Dios. Onkiwas a tekep na pankaganatan legan a wala ni so pankanawnawa. A singa nipanengneng ed 1 Pedro 3:21, saramay inikdan nen Jehova a Dios na maabig a konsiensia so ununan mangidedika na inkasikara ed si Jehova diad letnegan na pananisia ed bagat nen Kristo, pabautismoan diad simbolo na satan a dedikasyon, tan insan manggawa ed linawa na Dios. Insan say kareenan a kaulop na maabig a konsiensia nisengeg ed impakawalaan na naabobonan a talindeg ed arap na Dios so kayarian da; satan so aliwan posibli ed arum a dalan. Siempre, satan lambengat so gapowan.
6. Akin a say awawey tayo ed saray miting ed kongregasyon so walaan na pisiglaotan diad panggayaga tayo ed kareenan?
6 Ontumbok, imanoen so inkamaparanay yo diad iyaatendi ed saray miting na kongregasyon tan say pibibiang yo ed saratan unong a nayarian yo. Kasin sarayan miting so walaan na pasen ed bilay yo ya agyo abuloyan a sebelan na mundo odino diad personal iran aktibidades? Kasin sikayo so manpaparaan ed sarayan miting tan ibilang a pribilehyo so pibiang? Sarayan bengatla, met, so walaan na pihon pisiglaotan ed panggayaga na sakey ed kareenan. Akin? Lapud say espiritu na Dios so wala ed saray atiptipon a totoo to, tan say kareenan so sakey a bunga na satan ya espiritu. (Galacia 5:22) Diad sarayan miting so akatulongan tayon mantalos ed saray nakakaukolan nen Jehova, tan saya so nakaukolan tayo pian nagawaan so makapaliket ed mata to. Dia, met, et naaralan tayo tan no panon so pangiyalibansa na kareenan diad saray relasyon tayo ed kaparan totoo—diad kongregasyon, diad abung, diad eskuelaan, tan diad sekular a trabaho tayo. Saray miting tayo so sakey ed saray manunan dalan a pangibabangatan nen Jehova ed sikatayo, tan singa ituturo na Kasulatan, saraman lambengat so binangatan nen Jehova so manggayagan ed daakan a kareenan.—Isaias 54:13.
7. Anton pananumbok ed saray bengatlan asingbat ed saray miting so nakaukolan?
7 Say maapit a punton misiglaotan a mankanepegan na panangimano tayo et say progresibon panangiyaplika ed saray nanaaralan tayo diad personal a bilay tayo. Agtayo labay so magmaliw a singa saramay Israelitas ya angibagaan nen Jehova ya ‘dengel lan dengel balet agda natalosan.’ (Isaias 6:9) Nagkalalo, kasin labay tayo so magmaliw a singa saramay dineskribe nen Jehova ed si Ezequiel—totoon ontalineng ed propeta nen Jehova balet ta agda gawaen so imbaga to lapud pinili ran sumpalen so marutak odino minamateryalistikon pilalek da? (Ezequiel 33:31, 32) Diad piduma, saramay mandaragup ed abung nen Jehova ed agew tayo tan onggamor na panangabobon to so adeskribre ya ibabaga ra: “Ontatdang itayo ed palandey nen Jehova tan diad abung na Dios nen Jacob; tan sikatayo so bangatan to ed saray dalan to, tan sikatayo so manakar ed basbas to.” (Miqueas 4:2) No tuan ipapuso tayo so bilin a nanaawat tayo ed saray miting tayo, no diad kada miting et ibiig tayo so anggan sakey a punton personal a nakaukolan tayo tan insan satan so kimeyan, sikatayo so manani na mareen a bunga. A singa imbaga nen Jesus ed Lucas: 11:28: “Maliket iraman so ondengel ed salita na Dios tan sumpalen da!”
8. Panon a say pibibiang ed lawak na ministeryo a sankagnapan unong ya iyabuloy na saray sirkumstansya tayo so mangungguna ed sikatayo a personal?
8 Sakey ed saray bengatlan nidadanet ed saray miting tayo et say kaimportantian na pibiang a nagnap ed panangiyabawag na Panarian na Dios tan say panulong ed arum a magmaliw a babangatan. (Mateo 24:14; 28:19) Panon kamatalunggaring irayan aktibidades ed bilay yo? No tuan sikatayo so maniimano ed ibabaga nen Jehova ed sikatayo diad panamegley na Salita to tan diad panamegley na muyongan to, kabat tayo a saya so sankaimportantian a kimey a nagagawa ed dalin natan. (Apocalipsis 14:6, 7) Tan bantog a katuaan a saramay wala ed sigpot-panaon a serbisyo—tan ontan met ed saraman, anggaman agmakapanpayunir, so tuan maseseg ed ministeryo—so totoon wala ed limog tayo a matalonan maliket. Say kareenan a panggagayagaan da so aliwa lambengat a basta tedter na danum noagta, a singa imbaga nen Jehova, magmaliw a “singa ilog.” (Isaias 48:18) Kasin satan so nanaeksperiensia yo? Amin tayo so makayari.
9. Anto so ontulong ed sikatayo diad pamasiansia na inter-na-Dios ed sikatayon kareenan anggan sano nasagmak tayo so ansakisakit iran kairapan?
9 Say pangimano tayo ed amin sayan simbawa, anggaman ontan, so agmanggawa ed sikatayon nipuera la ed saray detdet na bilay ed peles a sistema na bengabengatla. Balet anggaman panon la so nayarin inkamairap na kipapasen, sikatayo so pinaseguroan na Dios ed maaron tulong to no sikatayo so onasingger ed sikato. (1 Pedro 5:6, 7) Kasin naaralan tayon kerewen so tulong nen Jehova tan panangiwanwan to ed amin a bengatlan gawaen tayo, a sibubulos itayon onasingger ed sikato diad pikakasi tan, kayari na impanggawa tayo ed anggaan na nayarian tayo ed mairap iran kipapasen, et impasakbat tayo ed si Jehova so awit tayo, simamatalek ya impudir tayo la ed sikato? (Uliran 3:5, 6; Salmo 55:22) Ampetapetang a sikatayo so pinaseseg na Filipos 4:6, 7: “Agmapaga ed antokaman a bengatla, noagta diad amin a bengatla ed panamegley na pikakasi tan pikekerew a tekep na pisasalamat et ipaamta yoray kerew yo ed Dios; tan say kareenan na Dios a talonaan to so amin a kanonotan so manbantay ed kapusoan yo tan say pakayari na panagnonot yo diad panamegley nen Kristo Jesus.” Agaylan makapakelaw itan a probisyon! Kasin naaralan yo la so nagunggunaan a nagnap ed kareenan na Dios ya agawan posibli?
Mantultuloy a Tumboken So Kareenan
10. Kayari na pananap ed kareenan, anto so nakaukolan ed biang tayo?
10 Bektan sikatayo so nawalaan na ontan a kareenan, agtayo nitepel so magmaliw ya andi-alwar ed satan. Nakakaukolan so magunaet a sagpot ta pian satan so napansiansia. Sirin ibabaga na 1 Pedro 3:10, 11: “Saman so mangaro ed bilay tan makanengneng ed saray maong ya agew, . . . anapen to komon so kareenan tan tumboken to.” No nalmo so sakey a kalat tan satan so agegemtan la, kakulangkulangan ed sakey a too so panleglemew ed satan a kalat. Kayari na impananap tan impakagamor ed kareenan, nakaukolan tayo so manbantay a sumpad saray bengatlan nayarin maneral ed satan. Nagkalalo nen say satan, nepeg a sikatayo so aktibon manumbok ed saratan a bengatlan ontulong ed satan a kareenan.
11. (a) Anton awawey so nayarin mangiter na kaatapan ed relasyon tayo ed si Jehova? (b) Kapigan so peteg a nepeg tayon pankerew ed Dios na tulong no nipaakar ed saray tukso? (Mateo 6:13)
11 No agegemtan tayo so kareenan ed Dios diad panamegley na paraan ya intarya to, nakaukolan tayo so magmaliw a maalwar ya agderalen itan a relasyon diad ipawil ed pangagamil na kasalanan. Siempre, lapud amin tayo so ag-ayadyari, amin tayo so mankasalanan. Balet wala so kaatapan sano patunongen na sakey a too so inkasikato iray awawey tan kiwakiwas a kokondenaen na Dios. Agtayo nitepel so basta pangipukay tan ikuan, “Talagan ontan labat so kipapasen ko.” (Roma 6:16, 17) Nakaukolan tayo so magbabawi ed gawan-mauges imbes a satan so patunongen, tan insan nepeg tayo so onkerew ed Dios na panamerdona diad letnegan na pananisia tayo ed bagat nen Jesus. Nakaukolan tayo met ya aralen so iyasingger ed Dios diad tulong sakbay a gawaen tayo so mauges, imbes a salien tayon bukor so milaban, a diad kaunoran et onsuko, tan insan onkerew na panamerdona. Diad tulong na Dios, sikatayo so ontalona diad pangisulong “ed balon personalidad ya apalsa unong ed linawa na Dios ed tuan inkatunong tan katooran.”—Efeso 4:20-24.
12. (a) Pian napanggayagaan so kareenan, anto nin arum iran relasyon so mankaukolan na imano? (b) Anto so nakaukolan ed sikatayo diad sayan pamaakaran?
12 Say panggayaga ed kareenan, siempre, so manasaglawi met ed relasyon tayo ed arum a totoo. Saray tuan Kristianos so manlingkor ed Dios a bilang kabiangan na sakey a muyongan; sikara so “panlilimog na sanaagi.” (1 Pedro 2:17) A singa imbaga nen Jesus a tua ed saray patumbok to, sikara so matalona diad aro ra ed balang sinansakey. (Juan 13:35) Balet anggapo ed sikara so ayadyari. Lapud saray dilin agtayo inkayadyari tan ed arum, nakaukolan tayo so manpikasin magunaet nipaakar ed arum iran kipapasen tan pankimeyan a maong pian naresolbe iray problema. Sikatayo so papasegen na Hebreos 12:14: “Tumboken so kareenan ed amin a totoo.” Tan diad saray relasyon tayo ed Kristianon agagi tayon lalaki tan bibii, wala so nikaduman obligasyon diad pantultuloy a panumbok ed kareenan. Mabitar, ibabaga na 1 Tesalonica 5:13: “Mareen ed balang sinansakey.” Kabaliksan na satan ya aliwa lambengatlan say itunda ed agpangibales noagta magmaliw ya aktibon manangiyalibansa ed kareenan, a gawaen so ununan kundang diad pangipawil na kareenan tan say pagmaliw a mabulos ya onsuko diad interes na kareenan.—Efeso 4:1-3.
13. (a) Diad pangiyalibansa na kareenan ed saray agmananisia, anto komon so gawaen tayo, balet panon tayon idemostra a satan a kareenan ed Dios so manuna? (b) Panon a posibli ed sikatayo so pakawalaan na kareenan sano wala so kaguloan ed liberliber tayo?
13 Diad paway na kongregasyon, anggaman ontan, aliwan amin so mabulos a magmaliw a mareen. Kanian, simamatua, isisimbawa na Roma 12:18: “No nayari, anggad satan so mandepende ed sikayo, mareen kayo komon ed amin a totoo.” Balet saray sagpot tayo ed panangiyalibansa na kareenan so agmangisakup na panangikumpromiso ed saray matunong a nakakaukolan nen Jehova. Nayarin iyarunsa tayoray panaon diad panggawa ed arum a bengatla, balet kabat tayo ya aliwan makabat so itunda lan iyatendi ed saray miting odino ontunda lan mibiang ed lawak na ministeryo ta pian napansiansia so kareenan ed saray kaasawan odino kakanayon. Tan kabat tayo ya ag-abobonan nen Jehova so pibiang tayo ed saray agmaridios a gawa ed saray katrabahowan tayo odino kakaeskuelaan tayo a pian nagamoran so abobon da. Bidbiren tayo a say peteg a kareenan so kayarian lambengat na saraman so ununa ed amin et panggagayagaan da so kareenan ed Dios, diad saraman so mangaaro ed ganggan nen Jehova tan manaakar ed saray dalan to. Sikato ’tan a kareenan so pinabpabli tayo ed labas na amin ni. (Salmo 119:165) Tua, diad liber tayo et nayarin wala so kaguloan. Saray agmananisia so nayarin mansasangsang tan manlalaban ed balang sinansakey; nayari ni ingen ya ibunton da so panamauges ed sikatayo lapud pananisia tayo. Balet kabat tayo no panon so impangibangat na Salita na Dios a pangikiwas tayo na inkasikatayo. Diad pantultuloy a panumbok ed kurang a mitukoyan ed saray matunong a dalan nen Jehova, sikatayo so agnasibletan na kareenan a sankablian.—Ipareng so Salmo 46:1, 2.
14. Anggaman sikatayo so personal a makasagmak na kairapan, anto so manggawan posibli ed sikatayo a mantultuloy a mamemben na akindalem a kaulimekan tan masnag ya indengan?
14 Diad samay unor a labi sakbay na impatey to, imbaga nen Jesus ed saray matoor ya apostoles to: “Imbagak irayan bengatla ed sikayo pian diad panamegley ko et nawalaan kayo komon na kareenan. Diad mundo et sikayo so walaan na kairapan, balet manpakpel! Tinalok so mundo.” (Juan 16:33) On, peteg a nasagmak tayo so kairapan. Bilang Kristianos, sagmaken tayo so kapasegsegang ed nanduruman nengneng. Nayarin nasagmak tayo so ag-inkahustisya, tan dakel so nasakitan na ambelat. Balet say madibinon kareenan so mamabiskeg ed sikatayo a makapangisungdo ed amin na saya. Lapud sikatayo so imbangat nen Jehova, kabat tayo no akin a saray Kristianos so napasegsegang. Sikatayo so agmanduaruwa no akin a wala so ag-inkahustisya tan no akin a sikatayo so manasagmak na sakit. Kabat tayo met no anto so itatarya na arapen. Kabat tayo a bilang nansumpalan na matoor a kurang na bilay nen Jesus tan say sakripisyon impatey to, say kililiktar so segurado. Nagkalalo ni, kabat tayo ya anggan anton probleman nidunget ed sikatayo natan, nayarian tayo so onarap ed Dios diad pikakasi a dingan na talek a sikatayo so simamaaron manalima ed sikatayo tan pabiskegen to itayo diad panamegley na espiritu to.—Roma 8:38, 39.
15. Panon a tua a say kareenan a ginawa nen Kristo a posibli so aliwan singa say iyoopresi na mundo?
15 Matukotukoy, imbaga nen Jesus ed Juan 14:27: “Itilak ko ed sikayo so kareenan, iter ko ed sikayo so kareenan ko. Agko iter ed sikayo diad nengneng na pangiter na mundo ed satan. Agyo aabuloyan a nagonigon iray kapusoan yo nisay abuloyan yon onkebet ed takot.” Seguradon tua—say mundo so andian na miparan kareenan ya iter na Dios ed panamegley nen Jesu-Kristo. Sikatayo so pabiskegen to diad arap na saray kipapasen a manggawa ed arum a mangisuko ed amin ya ilalo.
16. (a) Anton ilalo so manatalaran ed saraman so tuan mamapabli natan ed kareenan ya iter na Dios? (b) Panon tayon nidemostra a tuan pinabpabli tayo itan a kareenan?
16 Agaylan makapakelaw ya arapen so manatalaran ed amin na saramay mangaabrasa natan ed kareenan a manlapud Dios tan mangiter ed satan na inkatalunggaring a kanepegan to ed bilay da! Agla mabayag et say mundon mibubusolan ed Dios so naandi la. Amin a pinalsa so nasabi panaon et sigpot a mankakasakey ed kareenan diad panamegley na saray matunong a nakakaukolan na Soberano na Talba. Komon ta say pisasalamat tayo ed sayan engranden ilalo so mamakiwas ed sikatayon mankimey diad sigpot a pitunosan ed satan natan. Komon ta amin tayo so ontalineng a maalwar ed bilin nen Jehova tan saray ganggan to so ipaslep tayon mabiskeg ed kapusoan tayo ta pian tuan inaro tayoray dalan to tan gawaen so nakakaukolan to. A singa ibabaga na Uliran 3:1, 2: “Anako, agmo lilingwanan so ganggan ko, tan saray bilin ko so sumpalen komon na pusom, lapud saray dukey na agew tan taotaon na bilay tan kareenan so niyarum ed sika.”
Repason Tepetepet
◻ Unong ed Isaias 48:18, anto so nakaukolan pian nawalaan itayo na daakan a kareenan?
◻ Diad panggawa na antoran bengatla a nayarin naeksperiensia tayo so madibinon kareenan a lalon nagnap?
◻ Anto so nailaloan tayo no nipaakar ed panamasiansia na kareenan diad saray agagi tayon lalaki tan bibii?
◻ Panon tayon napansiansia so kareenan anggan sano aliktub na saray agmananisia?
[Litrato ed pahina 20]
Bautismo
[Litrato ed pahina 21]
Maparanay ya iyaatendi ed miting
Panangiyaplika ed naaralan tayo
[Litrato ed pahina 22]
Pibibiang a nagnap ed lawak na ministeryo
Panangipasakbat na awit tayo ed si Jehova