Mankakasakey Diad Panmaegley na say Puron Lenguage
“Diad satan iter ko ed totoo so sakey a puron lenguahe, ta pian amin da so ontawag ed ngaran nen Jehova, ta pian manlingkor ira ed sikato a benebenek.”—SOFONIAS 3:9
1. Kasin nadngelan la na totoo a nansalita si Jehova a Dios?
SAY lenguahe nen Jehova a Dios so puro. Balet kasin nadngelan na totoo a sikato so nansalita? Siempre, on! Agawa itan sanen say Anak to, si Jesu-Kristo so wadia ni ed dalin 19 siglo so linmabas. Singa bilang, sanen si Jesus so abautismoan, nadngel so Dios a nankuan: “Saya so Anako, say inadarok, ya inabobonan ko.” (Mateo 3:13-17) Satan so balikas na puron katuaan, a nadngel nen Jesus tan si Juan a Managbautismo ed lenguahe na too.
2. Anto so ipapanengneng nen apostol Pablo ed impanukoy ed “pansasalita na . . . angheles”?
2 Pigaran taon ed saginonor nansalita so Kristianon apostol a Pablo ed “pansasalita na totoo tan angheles.” (1 Corinto 13:1) Anto so ipanengneng na saya? Peteg, ipanengneng to ya aliwan saray totoo lambengat noag ontan met ed saray espiritun persona so walaan na lenguahe tan pansasalita! Siempre, say Dios tan saray angheles so agmakapantalosan diad pangusar na saray boses tan lenguahe a narengel tan natalosan tayo. Akin ya andi? Lapud say atmospera a singa akaliber ed dalin so nakakaukolan pian napawala so vocal sound waves a narengel tan natalosan na totoo.
3. Panon so inlesa na lenguahe na too?
3 Panon so inlesa na lenguahe na too? Ikuan na arum a saray inmunan atateng tayo so nanpoligesges pian mitalosan ed balang sakey diad panamegley na ungol tan pannangis. Ikuan na libron Evolution (Life Nature Library): “Sakey a bakes a too ed ngalngali sakey a milyon a taon la so linmabas . . . so posiblin angiyugali ed pigaran tanol na panagsalita.” Balet si bantog a lexicographer a si Ludwig Koehler so nankuan: “Say panagsalita na too so sekreto; satan so madibinon regalo, sakey a milagro.” On, say panagsalita na too so sakey a dibinon regalo, ta initdan na Dios so inmunan too, a si Adan, na sakey a lenguahe. Mapatnag ya atawag itan ed saginonor a Hebreo. Satan a lenguahe so sinalita na saray Israelitan ilalak nen “Abram a Hebreo,” sakey a matoor a patriaka a say ateng ton si Sem so ilalak nen managpaalagey-na-biung a si Noe. (Genesis 11:10-26; 14:13; 17:3-6) Nisengeg ed mapropetikon bendisyon na Dios ed si Sem, makatunongan ya ibaga a say lenguahe to so agnaapektoan ed bengatlan mamilagron ginawa nen Jehova a Dios ed apalabas a 43 iran siglo.—Genesis 9:26.
4. Siopa si Nimrod, tan panon a sikato so inusar nen Satanas a Diablo?
4 Diad satan a panaon ‘amin a dalin so saksakey ed lenguahe tan saksakey a grupo na saray salita.’ (Genesis 11:1) Manbibilay ed saman so sakey a laki a si Nimrod, “sakey a makapanyarin umaanop a sumpad si Jehova.” (Genesis 10:8, 9) Say agnanengneng a manunan kabusol na katooan, si Satanas, so nikabkabiig ya angusar ed si Nimrod pian mangiletneg na mangaraldalin a kabiangan na organisasyon nen Diablo. Labay nen Nimrod a manggawa na ngaran parad inkasikaton dili, tan satan a malamang ya awawey so nikayat ed saray patumbok to, a linmoob ed nikadkaduman panangipaalagey a proyekto diad dalin na Shinar. Unong ed Genesis kapitulo 11, bersikulo 4, inkuan da: “Gali dia! Manpaalagey tayo parad inkasikatayon dili na sakey a syudad tan sakey met a tore a say toktok to so walad katawenan, tan manggawa tayo na nagalgalang a ngaran parad inkasikatayon dili, ta ompan lamang nikaykayat tayo ed amin a tapew na dalin.” Satan ya inpanuulop ya isusumpa ed ganggan na Dios a “panoen so dalin” so anampot sanen winetwet nen Jehova so lenguahe na saray rebelde. “Diad ontan,” kuan na salaysay na Biblia, “intaytayak ira nen Jehova manlapud satan a pasen angga ed amin a tapew na dalin, tan kalkalna ran tinmaynan ed pangipaalagey na syudad.” (Genesis 9:1; 11:2-9) Satan a syudad so tinawag a Babel, odino Babilonia (mankabaliksay, “Inkawetwet”), “lapud diman a ginotgot nen Jehova so pansasalita ed amin a dalin.”—Byington.
5. (a) Anto so naamper sanen winetwet na Dios so lenguahe na katooan? (b) Anto so ibaga tayo nipaakar ed lenguahe nen Noe tan si Sem?
5 Satan a milagro—say inkawetwet na lenguahe na too—so angitonton ed pamano ed dalin unong ya inganggan na Dios ed si Noe, tan angamper ed antokaman a walan getma nen Satanas a mangiletneg na nankakasakey ya agmalinis a panagdayew ed inkasikato diad panamegley na saray totoon sinmumpad say Soberanon Katawan na tawen tan dalin. Peteg, diad pangagamil na palson relihyon ed antokaman a nengneng, saray totoo so biktima na Diablo, tan sikaray manlilinkor ed saray demonyo sano sikaray manggawa na saray dirios tan diosas parad inkasikaran dili, a pangaranan ira ed nanduruman lenguahe ra, insan dayewen iratan. (1 Corinto 10:20) Balet say kiwas a ginawa na saksakey a tuan Dios ed Babel so angamper ed pamorma na sakey a nankasakey a palson relihyon a mangipaarap ed dayew a kakaliktanen to. Siempre, say matunong a Noe tan anak ton si Sem so agbalot akibiang ed saman a kompleton insaew ed dalin na Shinar. Kanian makatunongan ya ibaga a nansiansiay lenguahe ra a sinalita nen matoor ya Abram (o Abraham)—say pansalita ya inusar na Dios ed impitongtong ed say toon si Adan ed hardin na Eden.
6. Diad agew na Pentecostes 33 K.P., panon ya impanengneng nen Jehova a makapangiter na abilidad a mansalita ed saray pansasalita?
6 Si Jehova, ya angetwet ed orihinal a lenguahe na too, so makapangiter na abilidad a mansalita ed saray pansasalita. Peteg, ginawa to itan a mogmon bengatla diad agew na Pentecostes ed taon 33 ed Komon a Panaon tayo! Unong ed Gawa 2:1-11, ngalngali 120 babangatan nen Jesu-Kristo so walan nantitipon ed bandad tagey a kuarto ed Jerusalem. (Gawa 1:13, 15) Biglabigla, wala so engal a nanlapud tawen “a singa siplog na maksil a dagem.” “Diladila a kuanmono apuy” so nagmaliw a nannengneng tan nibunogbunog. Diad satan, saray babangatan so “napnoan na masanton espiritu tan ginmapon nansalita na saray nanduruman salita, unong ya angiter ed sikara na espiritu a mansalita.” Diad saraman a madibinon inter a lenguahe, nansalita ra “nipaakar ed saray makapakelaw a bengatla na Dios.” Tan agaylan milagro iman, leleg a saray Judios tan proselitas ed nanduruman pansasalita, a nanlapud saray arawin pasen a singa say Mesopotamia, Ehipto, Libya, tan Roma so akatalos ed mangiter-bilay a mensahe!
Sakey ya Inter-Dios a Lenguahe Natan!
7. Anto iran ilalo so wala no wala lambengat so saksakey a lenguahen salitaen tan natalosan ed sankamundoan?
7 Nisengeg ta makapangiter so Dios na nanduruman pansasalita a mamilagro, agta makapaliket no gawaen ton posibli so pansalita lambengat na saksakey a lenguahe a salitaen tan natalosan ed sankamundoan? Satan so mangiyalibansa na babaleg a pantatalosan ed limog na atooan a pamilya. Unong ya inpangikuan na The World Book Encyclopedia: “No amin a totoo so mansalita na parehon pansasalita, say kultura tan ekonomikon pisisiglaotan so lalon maapit, tan say abig linawa so ondaak ed baetan na saray bansa.” Bueno, ag-onkulang ed 600 sankatalbaan iran lenguahe so walan niproponi ed saray linmabas a taotoan. Diad saraya, say Esperanto so walaan na lalon aligwas lapud ngalngali 10,000,000 a totoo so akaaral ed satan nanlapulad inkalesa to nen taon 1887. Anggaman ontan, agbalot tinmalona so sagpot na too a mamakasakey ed totoo diad panamegley na saksakey a sankatalbaan a lenguahe. Diad tua, say lalon ondarakel iran problema so mangogotgot ed sayan mundo a bilang ‘marelmeng a totoon onabante manlapud mauges ya anggad sankaugsan.’—2 Timoteo 3:13.
8. Anggano niyadapta so sakey a sankatalbaan a lenguahe ed mundo natan, anto nin siansia so wala, tan akin?
8 Diad relihyoson panangibaga, wala so baleg ya inkawetwet. Balet agta saya so ilaloan tayo, ta tatawagen na libro na Biblia ya Apocalipsis so sankamundoan ya imperyo na palson relihyon a “Babilonia a Baleg”? (Apocalipsis 18:2) On, ta say kabaliksan na “Babilonia” et “Ikawetwet.” Anggano say sakey ya artipisyal a lenguahe odino gendat a pansalita a singa Ingles, Pranses, Aleman, o Ruso so niyadapta a bilang sankatalbaan a lenguahe ed mundo natan et wala ni so agpankakasakey ed relihyoson tuloy tan arum nira. Akin? Lapud say “interon mundo so mandokdokol ed pakayari na mauges a sakey,” si Satanas a Diablo. (1 Juan 5:19) Sikato so mismon tipiko na inkasiblet, tan siaagum a nanggunaet a narayew na amin a katooan, unong a ginawa to ed saray agew nen Nimrod tan say Tore na Babel. Siempre, say sakey a sankatalbaan a lenguahe a salitaen na makasalanan a totoo so nayarin mangiter na pankanawnawa ed si Satanas a mangiletneg na nankasakey a panagdayew ed Diablo! Balet agbalot iyabuloy nen Jehova itan; petepeteg, asingger to lan itarok ed anggaan na amin a palso, say Diablon-inpuyan a relihyon.
9. Panon a saray totoo ed amin a nasyones tan rasa so natitipon la natan?
9 Anggaman ontan, sakey a makapakelaw a katuaan a saray maabig a totoo ed amin a nasyones tan rasa so natitipon la natan. Nagagawa iya unong ed termino na Dios tan nisesengeg ed pandayew ed sikato. Natan, gagawaen na Dios a posibli parad katooan a manaral tan mansalita na say saksakey a puron lenguahe diad dalin. Tan peteg a satan so sankatalbaan a lenguahe. Peteg, si Jehova a Dios so manbabangat ed sayan puron lenguahe ed dakel a totoo ed amin a nasyones ed dalin natan. Saya so diad panumpal na propetikon sipan na Dios ed panamegley na propeta tan tasi ton si Sofonias: “Diad satan iter ko ed totoo so sakey a puron lenguahe [diad literal, “sakey a malinis a bibil”], ta pian amin da so ontawag ed ngaran nen Jehova, ta pian manlingkor ira ed sikato a benebenek.” (Sofonias 3:9) Anto iyan puron lenguahe?
Say Impangikabaliksan na Puron Lenguahe
10. Anto so puron lenguahe?
10 Say puron lenguahe et say katuaan na Dios a naromog ed mismon Salita to, say Masanton Kasulatan. Satan so nagkalautlan katuaan nipaakar ed Panarian na Dios, a mangitarok na kareenan tan arum iran bendisyon ed katooan. Sayan puron lenguahe so mangitalirak ed relihyoson lingo tan palson panagdayew. Mamasakey ed amin na saraman so mansalita ed satan ed puro, malinis, mabunga a panagdayew ed say mabilay tan tuan Dios, si Jehova. Natan, saray 3,000 a lenguahe so onakto bilang babeng ed pakatalos, tan saray nilasus a palson relihyon so manwetwet ed katooan. Kanian alay liket tayo ta iiter na Dios ed saray totoo so pansalat ed sayan makapakelaw, puron lenguahe!
11. Anto so agawaan na puron lenguahe ed totoo na amin a nasyones tan rasa?
11 On, say puron lenguahe so aaralen natan na totoo ed amin a nasyones tan rasa. Bilang say mogmong espiritual a pansasalita ed dalin, manserbi a bilang mabiskeg a managpasakey a puersa. Makayari itan ed amin na saraman so mansasalita ya “ontawag ed ngaran nen Jehova, ta pian manlingkor ed sikato a benebenek,” o diad literal, “ed takeb na sakey.” Sirin sikara so manlinkor ed Dios “ed sakey a pikasakey,” “tekep na nankakasakey a pangabobon tan ed sakey a nankasakey a takeb.” (The New English Bible; The Amplified Bible) Say patalos nen Steven T. Byington nabasa tayo: “Insan siak [Jehova a Dios] so mangipaarap na saray bibil na amin a totoo a malinis, pian sikaran amin so ontawag ed ngaran nen Jehova tan mikoopera ed serbisyo to.” Say ontan a sankamundoan a nambabangil a lenguahen kooperasyon ed serbisyo na Dios so wala lambengat ed limog na saray Tasi nen Jehova. Diad 212 a daldalin natan, ngalngali apatiran milyon na sarayan manangiyabawag na Panarian so manpupulong na maong a balita ed dakel a lenguahe na too. Ingen, saray Tasi so “mansasalitan mantutunosan” tan “matukotukoy a nankasakey ed parehon nonot tan ed parehon linya na kanonotan.” (1 Corinto 1:10) Onya lapud ta, inerman so kawalaan da ed dalin, amin na saray Tasi nen Jehova so mansasalita na sakey a puron lenguahe, ed dayew tan gloria na mangatatawen ya Ama.
Aralen so Puron Lenguahe Natan!
12, 13. (a) Akin a nepeg yon manpaga nipaakar ed pansalita na puron lenguahe? (b) Akin a saray salita ed Sofonias 3:8, 9 so makanakana natan?
12 Akin a nepeg yon manpaga ed pansalita na puron lenguahe? Diad sakey a dakel a bengatla, lapud mantegteen so bilay yo ed panaral tan pansalita ed satan. Kasakbayan lambengat na impangisipan na Dios ya “iter ko ed totoo so sakey a puron lenguahe,” impasakbay to: “‘Kanian manalagar kayo ed siak,’ so kuan nen Jehova, ‘angga ed agew ya iyalagey ko a mansamsam, ta say panangigeter ko sikato so panipon ed nasyones, ta tugyopen koray panarian, pian ikalbok ed sikara so sanok ko, amin a maapuy a sanok ko; ta diad apuy na imun ko et naakmon so amin a dalin.’”—Sofonias 3:8.
13 Saraman a salita na Soberanon Katawan a Jehova so inmunan sinalita ed 26 iran siglo ed apalabas ed Juda, a kabisera na Jerusalem. Balet satan a balikas so nagkalautlan parad agew tayo lapud say Jerusalem so sakey a nengneng na Kakristianoan. Tan say panaon tayo, nanlapulad inkiletneg na mangatatawen a Panarian na Dios nen 1914, so agew nen Jehova ed panugyop na nasyones tan pankakasakey ed panpanarian. Intarok to iran amin a pinankasakey ed silong na panangimano to diad panamegley na baleg a pantasin kimey. Insan, saya so amarngat ed sikara ya onsumlang ed gagala to. Anggaman ontan, si Jehova a Dios so sipapangasin mamapasakey ed amin na sarayan nasyones ed pansalita na puron lenguahe. Tekep na satan, amin a mananap na bilay ed nisipan a balon mundo to so makapanlinkor a nankakasakey sakbay a naopot ya amin a nasyones ed maapuy a balikas na madibinon sanok ed “bakal na baleg ya agew na Makapanyarin-amin a Dios,” kaslakan a natatawag ya Armagedon. (Apocalipsis 16:14, 16; 2 Pedro 3:13) Makapaliket, saraman so mansalita ed puron lenguahe tan ontawag ed ngaran nen Jehova ed pananisia a bilang nankasakey a tua iran managdayew so mangayaga ed madibinon salimbeng legan na kapantokan na satan a sankamundoan a desyang.
14. Diad panamegley nen Sofonias, panon ya impanengneng na Dios so anggaan na sayan sistema na bengabengatla et manawag na tamtampol a kiwas?
14 Diad panamegley na propeta ton si Sofonias, a pinalinew nen Jehova a saraman so manilalon makaliktar ed anggaan na kaplesan a mauges a sistema na bengabengatla so nepeg a mangala na tamtampol a kiwas. Unong ed Sofonias 2:1-3, inkuan na Dios: “Mandaragup kayo, on, mandaragup kayo, O nasyon ya andi-baing to. Sakbay a mamapaway na antokaman so pangigeter, sakbay ya ilabas na agew a singa taep, sakbay ya onsabi ed sikayo so masebeg a sanok nen Jehova, sakbay na isabi na agew na sanok nen Jehova, anapen yo si Jehova, amin yon mauyamo ed dalin, ya angagamil na dilin pangoksuyan To. Anapen so inkatunong, anapen so kauyamoan. Aglapiga sikayo so niyamot ed agew na sanok nen Jehova.”
15. (a) Anto so inmunan kasumpalan na Sofonias 2:1-3? (b) Siopa so akaliktar ed impangukom na Dios ed Juda, tan anto so misiglaotan ed sayan kililiktar ed agew tayo?
15 Saraman a salita so walaan na inmunan kasumpalan ed kadaanan a Juda tan Jerusalem. Saray makasalanan a totoo na Juda so agkinmiwas a paborable ed kerew na Dios, unong ya inpanengneng na impangukom to ed sikara ed saray lima na Babilonia ed taon 607 K.K.P. Unong a say Juda so “nasyon ya andi-baing” ed arap na Dios, ontan met so Kakristianoan ya anggapoy baing a “nasyon” ed arap nen Jehova. Anggaman ontan, lapud itotombok ed salita na Dios, arum iran taga-Juda tan saray arum so akaliktar, sakey ed sikara et si matoor a propeta nen Jehova a si Jeremias. Arum iran akaliktar so sakey ya Etiopianon manggaran na Ebed-melek tan saray ilalak nen Jehonadab. (Jeremias 35:18, 19; 39:11, 12, 16-18) Mipadpara natan, “sakey a baleg ya ulop” na “arum a karnero” nen Jesus so atugyop ed amin a nasyones so makaliktar ed Armagedon diad balon mundo na Dios. (Apocalipsis 7:9; Juan 10:14-16) Saraman lambengat so manaral tan mansalita na puron lenguahe so magmaliw a magayaga iran makaliktar.
16. Anto so nepeg a gawaen na sakey pian niyamot “ed agew na sanok nen Jehova”?
16 Unong ya inggeter nen Jehova a say Juda tan Jerusalem so napaandi, ontan met a nepeg a napegpeg so Kakristianoan. Peteg, say kadederal na amin a palson relihyon so asingger la, tan saraman so mankaliktan a makaliktar so nepeg ya onkiwas a tamtampol. Nepeg dan gawaen “sakbay ya ilabas na agew a singa ed sakey a taep,” a magmainomay ya ipalir na dagem, a kuanmono taep a nibantak ed dagem ed sakey a pangilingan a datal. Pian nilaban a manlapud sanok na Dios, nepeg tayon mansalita na puron lenguahe tan onkiwas ed pasakbay na Dios sakbay na isabi na maapuy a sanok nen Jehova a Dios ed sikatayo. Diad agew nen Sofonias tan ontan to met natan, saray mauyamo so mananap ed si Jehova a Dios, a pati ed inkatunong tan kauyamoan. Say panaanap tayo ed si Jehova et mankabaliksan na pangaro ed sikato ed interon puso, kamarerwa, kanonotan, tan biskeg tayo. (Marcos 12:29, 30) “Aglapiga [saraman so manggawa ed satan] so niyamot ed agew na sanok nen Jehova.” Balet akin ya inkuan na propesiyan “aglapiga”? Lapud say kilalaban so mantegteen ed katooran tan sungdo. (Mateo 24:13) Saramay ontulok ed matunong iran estandarte na Dios tan mansiansian mansalita na puron lenguahe so niyamot ed agew na sanok nen Jehova.
17. Anto iran tepet so siansian kunsideraen tayo?
17 Lapud asingger la so agew na sanok nen Jehova tan mantegteen so kilalaban ed panaral tan panangusar na puron lenguahe, natan so panaon a nalanor a maong ed panagaral tan pansalita ed satan. Balet panon a makapanaral so sakey ed puron lenguahe? Tan panon kayon nagunggunaan manlapud pansalita ed satan?
Panon so Pangebat Yo
◻ Panon so inlesa na pansasalita na too?
◻ Anto so puron lenguahe?
◻ Akin a saray salita ed Sofonias 3:8, 9 so ontanlan makanakana natan?
◻ Anto so nepeg tayon gawaen pian niyamot “ed agew na sanok nen Jehova”?
[Litrato ed pahina 21]
Diad Babel, intaytayak na Dios so katooan diad panamegley na impanwetwet ed lenguahe ra