Salitaen so Puron Lenguahe tan Manbilay ya Ando lan Ando!
“Anapen si Jehova, . . . Anapen so inkatunong, anapen so kauyamoan. Palagi niyamot kayo ed agew na sanok nen Jehova.”—SOFONIAS 2:3.
1. (a) Anto iran metodo so uusaren na saray estudyante ed panaral na sankailin lenguahe? (b) Akin a mansalita na puron lenguahe?
SARAY estudyante so makapanaral na balon pansasalita diad pangusar na gramatikan metodo o say sinalitan-lenguahen metodo. Diad silong na gramatikan metodo, kaslakan a sikaray mangusar na saray textbook tan manaral na pangramatikan totontonen. Diad silong na sinalitan-lenguahen metodo, aligen daray tanol tan saray padron na salitan sinalita na managbangat da. Parehon saratan a metodo so nausar ed panaral ed “puron lenguahe.” Tan makana a sikatayo so mansalita na sayan lenguahe no manilalo tayon “niyamot ed agew na sanok nen Jehova.”—Sofonias 2:1-3; 3:8, 9.
2. Panon tayon makapanaral ed tatawagen a pangramatikan totontonen parad puron lenguahe?
2 Say manunan textbook ya usaren ed puron lenguahe so say Biblia. Say maseet a panaral ed satan tan nibased Biblia iran palapagan so manbangat ed sikayo na tatawagen a pangramatikan totontonen parad puron lenguahe. Sakey a panagaral na Biblia ed abung ya ikondukta na sakey ed saray Tasi nen Jehova so maabig a gapo. Parad saraman so dedikado la ed Dios, say maparanay tan maseet a panagaral na Kasulatan so nakaukolan. Balet wala taray nikadkaduman epektibon dalan ed panaral na puron lenguahe? Tan anto iran gungguna so naala manlapud pansalita ed satan?
Panon ya Aralen so Puron Lenguahe
3. Anto so sakey a dalan ed panaral na puron lenguahe?
3 Sakey a dalan ed panaral na puron lenguahe so pisiglaot ed saray katuaan ya aaralen yo ed saray punton kabat yo la, a singa sakey ya estudyante na lenguahe et kalkalnan onaligwas a mangisiglaot ed nanduruman pangramatikan totontonen. Alimbawa, diad sakey a panaon et akabatan yo a si Jesu-Kristo so Anak na Dios, balet agyo kabat a maong iray kimey to. Nanlapulad satan, say panaral ed Biblia so akapanbangat ed sikayo a si Kristo natan et manuuley a bilang mangatatawen ya Ari tan legan na Sanlibon Taon ya Uley to, say matulok a katooan et nipaatagey ed inkayadyari. (Apocalipsis 20:5, 6) On, say pangisiglaot ed balo iran kanonotan ed saray kabkabat la so mamaaligwas ed pakatalos yo ed puron lenguahe.
4. (a) Anto so sananey a dalan a naaralay ‘pangramatikan totontonen’ na puron lenguahe, tan anton salaysay ed Biblia so nausar a mangiyulustra ed saya? (b) Anto so agawa legan a si Gideon tan taloran lasus a lalaki to so inmakto? (c) Say salaysay nipaakar ed Gideon so manbangat na anton leksion?
4 Sananey a dalan a naaralay ‘pangramatikan totontonen’ na puron lenguahe so panisip ed Biblikal iran ebento. Pian iyilustra: Salien a ‘nengnengen tan denglen’ so nikurit a salaysay ed Uko-ukom 7:15-23. Nia! Say Israelitan ukom a si Gideon so angapagapag na saray puersa to ed taloran ulop na tunggal lasus a lalaki. Diad bilunget, marendeen iran linmosor a manlapud Palandey Gilboa tan niliktob so kampo na akaugip iran Midianitas. Kasin sarayan talon lasus et naayuraan a maong? Andi no nipaakar ed militar. Siempre, sikaray elekan a balawen na malastog iran militarista! Balang sakey a laki so walaan lambengat na sakey a tambuyog, sakey a baleg a buyog, tan sakey a banuot ed loob na buyog. Balet talineng! Diad nigeter a sinyal, say sanlasus a lalaki a pati si Gideon so amaknol ed saray tambuyog da tan nanmisimisi ed saray buyog da. Ontan met ed saray duan lasus. Leleg ya intagey na amin iray maapuy a silew, narengelan yoran oneyag: “Say kampilan nen Jehova tan si Gideon!” Alay pangigtot na saya ed saray Midianitas! Sikaray apatubakyar ed saray tulda ra, say atikkot iran mata ra so ataktakot ed saray manlukson apuy a mangipabitar na maanino ran ohas tan amarngat na maaniton takot. Leleg a saray Midianitas so ginmapon binmatik, saray lalaki nen Gideon so natultuloy ya amaknol ed saray tambuyog da, tan pinanlalaban na Dios so sakey a sumpad sananey. Agaylan mabiskeg a leksion ed puron lenguahe! Makapangiliktar so Dios ed saray ariripen to ya andian na atooan a militar a puersa. Niarum ni, “agtaynanan nen Jehova iray totoo to nisesengeg ed baleg a ngaran to.”—1 Samuel 12:22.
5. Panon a makatulong a mamapino ed panagsalita tayo iray Kristianon miting?
5 Sano saray estudyante et abangatan na sakey a sankailin lenguahe ed panamegley na sinalitan-lenguahen metodo, salien dan aligen iray tanol na managbangat tan saray padron na salita a siaalwar. Agaylan walaray maabig a pankanawnawan mansalita na puron lenguahe ed saray Kristianon miting! Narengelan tayo ditan ya ibalikas na arum so inkasikara ed satan a lenguahe na Makasulatan a katuaan, tan sikatayon mismo so apribilehyoan a mankomento. Kasin natatakot tayo ompan aliwa so naibaga tayo? Komon aliwan satan so manunan imanoen tayo, ta say lingo ya akorehi na matatken a mangimaton ed ontan a miting a singa say sinimban Panagaral na Panag-Bantayan so mamapino ed panagsalita tayo. Sirin, onatendi tan mibiang a maparanay ed saray Kristianon miting.—Hebreos 10:24, 25.
Mangitatarok na Inkarutak
6. Akin a wala so ontan a pandumaan ed baetan na saray Tasi nen Jehova tan saray relihyoson organisasyon ed Kakristianoan?
6 Bilang Tastasi to saramay mangiyabawag na gagala nen Jehova tan mangipakabat na mangatatawen a Panarian to so mansalita na puron lenguahe. Ipapakabat da so ngaran to tan manlilinkor ed sikaton “benebenek,” o diad saksakey a kanonotan. (Sofonias 3:9) Anggaman walaan na Biblia iray relihyon na Kakristianoan, ag-ira mansalita na puron lenguahe o ontawag ed ngaran na Dios ed pananisia. (Joel 2:32) Anggapoy mantutunosan a mensahe ra a nibased Kasulatan. Akin? Lapud ipasen dan atagtagey iray relihyoson tradisyon, minumundon pilosopya, tan katooran ed politika nen say Salita na Dios. Saray gagala, ilalo, tan metodo ra so parad sayan marelmeng a mundo.
7. Anto iray pandumaan ed baetan na saray Tasi nen Jehova tan palso iran relihyon a niparungtal ed 1 Juan 4:4-6?
7 Say Kakristianoan—diad tua et say sankamundoan ya imperyo na palson relihyon—ya agmansasalita na parehon lenguahe a singa gagawaen na saray Tasi nen Jehova. Makapaliket, diad saramay mansasalita na puron lenguahe, insulat nen apostol Juan: “Sikayo kien kayo na Dios, . . . tan dinaeg yoraman a totoo, ta say wala ed sikayo so babaleg nen samay wala ed mundo. Kien ira na mundo; kanian salitaen da so nipaakar ed mundo tan say mundo denglen to ra. Kien itayo na Dios. Say makagamor na pikakabat ed Dios denglen to itayo; samay agbetang na Dios agto itayo denglen.” (1 Juan 4:4-6) Walan tinalo na ariripen na Dios iray palson managbangat lapud say Dios, ya akisakey ed totoo to, “so babaleg nen [say Diablo, a] walad mundo,” say agmatunong a sosyedad na too. Lapud saray apostata et “kien na mundo” tan walaan na mauges ya espiritu to, “sikaray mansalita no antoy nanlapud mundo tan say mundo denglen tora.” Balet saray sinansakey a mala-karnero so ondengel ed saramay kien na Dios, a natetebek a saray totoo nen Jehova so mansasalita na puron lenguahe na katuaan na Biblian nitatarok ed panamegley na organisasyon to.
8. Anto so pakabidbiran ed too na kaugsan?
8 Sakey a baleg ya apostasya so nipasakbay, tan sakey a ‘misteryo na kaugsan’ so walan mankikimey la ed inmunan siglo K.P. Diad dugan panaon, saray lalakin angawat—o angala—na saray panagbangat a posisyon ed kongregasyon so nambangat na dakel a palson doktrina. Say lenguahe ra so arawi a manlapud puro. Kanian linmesa so atibkel a “too na kaugsan,” say klero na Kakristianoan, ya aliktob na palson relihyoson tradisyon, minumundon pilosopya, tan agmakasulatan a bangabangat.—2 Tesalonica 2:3, 7.
Narerengelan so Puron Lenguahe ed Sankamundoan
9. Anto iran relihyoson aligwas so wala legan na koma 19 siglo?
9 Metmelag lambengat a kabiangan na matakot-Dios a totoo so ‘akibakal nisesengeg ed pananisia a niiter ed saray sasantos.’ (Judas 3) Iner so pakaromogan na ontan iran mananisia? Diad dakel a siglo, pinokpokan na palson relihyon iray karaklan ed espiritual a kabilungetan, balet amta na Dios iray pigaran walaan na pangabobon to. (2 Timoteo 2:19) Insan, diad utel na komersyo, industriya, tan sosyal iran pansalat na koma 19 siglo, wala so mapatnag ya inlesa na saray boses a manlapud karaklan a babel a palson relihyoson gotgotan. Sasalien na melag iran grupo a talosan iray tanda na panaon tan manpalbeng ed komaduan ipapawil nen Jesus, balet aliwan amin so mansalita na puron lenguahe.
10. Dinan a “komaduan isasabi” a grupo so pinili na Dios a mansalita na puron lenguahe, tan akin a mapatnag a say lima nen Jehova so walad sikara?
10 Anggaman ontan, apalinew nen 1879 no dinan itan a “komaduan isasabi” a boses so pipilien nen Jehova a mansalita na puron lenguahe a bilang Tastasi to. Diad satan sakey a melag a grupo na panagaral-ed-Biblia ya indaulo nen Charles Taze Russell so manduruypo ed Pittsburgh, Pennsylvania, E.U.A. Walan maseguro ra a say komaduan isasabi nen Jesus so onggapo ed agnanengneng a kiwawala to, sakey a panaon na minumundon irap so kipapaarapan, tan saya so tombokan na Sanlibon Taon ya Uley nen Kristo a mangipawil na Paraiso ed dalin, a tekep na andi-geter a bilay parad matulok a katooan. Nen Hulyo 1879 sarayan Bible Students so ginmapon mangipalapag na sayan magasin a kabkabat natan a bilang Say Panag-Bantayan. Anemiran libo lambengat so nibunog ed inmunan paway. Balet “say lima nen Jehova” so walad saramay Tastasi, ta sayan dyurnal so nipapalapag la natan ed 111 iran lenguahe, a tekep na sakey a promedyo na pangimprinta a masulok a 15,000,000 a kada paway.—Ipareng so Gawa 11:19-21.
11, 12. Anto iray arum a Makasulatan iran katuaan ya atalosan na saramay mansasalita na puron lenguahe?
11 Diad panamegley na Biblia tan saray palapagan na Tastasi nen Jehova, tan nagkalautla ed maseet a panangibawag na sarayan Kristianos na maong a balita, say puron lenguahe so walan akabatan ed sankadalinan. Tan agaylan engrande iran gungguna so pangagayagaan na saramay mansasalita ed satan! Imbes ya ibabagan ‘say Dios so Dios, si Kristo so Dios, tan say Masanton Espiritu so Dios’ ed misteryoson Trinitarianismon salita, akipakna ra ed kipapasen na Biblia a si Jehova so Sankatagyan, si Jesu-Kristo a bilang abebbeban sakey so Anak To, tan say masanton espiritu so makapakelaw ya aktibon puersa na Dios. (Genesis 1:2; Salmo 83:18; Mateo 3:16, 17) Amta na saray managsalita na puron lenguahe a say too et aglinmesa manlapud abebbeban nengneng na bilay noagta pinalsa na maaron Dios. (Genesis 1:27; 2:7) Atalosan da a say kamarerwa so naandi ed patey—sakey a katuaan a mangekal ed takot ed inatey. (Eclesiastes 9:5, 10; Ezequiel 18:4) Say impierno so atalosan a lubok na too, aliwan maapuy a pasen na panamairap a ginawa na mauges a dios. (Job 14:13) Amta ra met a say kioli so inter-Dios ya ilalo parad inatey.—Juan 5:28, 29; 11:25; Gawa 24:15.
12 Saramay mansasalita na puron lenguahe so mangipanengneng na respeto ed dala tan bilay. (Genesis 9:3, 4; Gawa 15:28, 29) Akabatan da a say mangaraldalin a bilay nen Kristo so bili na dondon ya imbayar parad matulok a totoo. (Mateo 20:28; 1 Juan 2:1, 2) Ag-iran balot manpikasi ed “sasantos,” a kabat dan nepeg a saray pikakasi ra et niderekta ed si Jehova a Dios ed panamegley nen Jesu-Kristo. (Juan 14:6, 13, 14) Lapud kondenaen na Salita na Dios so panagtalintao, agnauusar iray imahen ed panagdayew da. (Exodo 20:4-6; 1 Corinto 10:14) Tan sikara so onarawi ed saray kalot na demonismo lapud italirak da so espiritismo, ya akondena met ed Biblia.—Deuteronomio 18:10-12; Galacia 5:19-21.
13. Akin a saramay mansalita na puron lenguahe et agnikelawan?
13 Saray ariripen nen Jehova, a mansasalita na puron lenguahe, so agnikelawan no iner ira ed daloy na panaon. Imbangat ira nen Jehova a wala la ra ed “panaon na anggaan,” tekep nen Jesus a presenti a bilang maglorian agnanengneng ya espiritu. (Daniel 12:4; Mateo 24:3-14; 2 Timoteo 3:1-5; 1 Pedro 3:18) Tekep na mabiskeg a mangatatawen iran puersa ed benegan to, ngalngali la onlugan si Kristo a mibakal a manggawa na pangukom na Dios a sumpad sayan sistema na bengabengatla. (Daniel 2:44; Apocalipsis 16:14, 16; 18:1-8; 19:11-21) On, tan saramay mansasalita na puron lenguahe so okupadon mangiyaabawag na maong a balita a say Panarian na Dios ed silong nen Kristo so asingger lan mangitarok na engranden gungguna ed amin a matulok a totoo ed sakey a paraison dalin. (Isaias 9:6, 7; Daniel 7:13, 14; Mateo 6:9, 10; 24:14; Lucas 23:43) Amin na satan et pasimar lambengat! Maseguro, say puron lenguahe so sankaimportantian, sankakanaan a pansasalita ed dalin!
14. Anto iray arum a gunggunan nangayagaan na saramay mansasalita na puron lenguahe?
14 Saray gunggunan pangagayagaan na saramay mansasalita na puron lenguahe so mangilaktip ed “say kareenan na Dios” a manbantay na puso tan saray pakayari ed nonot. (Filipos 4:6, 7) Tutuloken daray ganggan ed Biblia, a mangiyalibansa na bunigas, liket, tan pakapenek a manlalapud pamaliket ed si Jehova. (1 Corinto 6:9, 10) On, tan saray managsalita na puron lenguahe so walaan na ilalo ed andi-geter a bilay ed nisipan a balon mundo na Dios.—2 Pedro 3:13.
Usaren Itan O Nabalang Itan
15. Panon kayon nagunggunaan manlapud pakatalos ed puron lenguahe?
15 No sikayo so mansalita na puron lenguahe ed balon mundo, nepeg yon amtaen itan a maong a magmaliw a lenguahen nonoten yo. Sano say sakey et manaaral na sakey a lenguahe, sikaton ununa so mannonot ed gendat a pansasalita to tan ipatalos iray kanonotan to ed samay balo. Balet kuantomas a nakakabisado to so balon lenguahe, onggapon sikato so mannonot ed satan ya agnakaukolan so pangipatalos. Mipadpara, diad maseet a panagaral, nabenbenan yo so maabig a pakatalos ed puron lenguahe a nakabatan yo no panon ya iyaplika iray ganggan tan prinsipyo na Biblia pian resolbien iray problema tan mansiansia ed “basbas na bilay.”—Salmo 16:11.
16. Anto so nagawa no agyo maparanay ya usaren so puron lenguahe?
16 Nepeg yon maparanay ya usaren so puron lenguahe, tano andi nabalang yo so abilidar a mansalitad satan a maong. Pian iyilustra: Pigaran taon ed apalabas, pigara ed sikatayo so nanaral na sankailin lenguahe. Nayarin nanonotan tayoray pigaran salita ed satan a pansasalita balet maseguron abalang tayo so pangabisado ed satan lapud agtayo maparanay ya uusaren itan. Parehon bengatla so nagawa ed puron lenguahe. No agtayo maparanay ya usaren itan, nabalang tayo so pangabisado ed satan, tan satan so walaan na makapuy a pansumpalan ed espiritual. Nepeg tayo sirin a salitaen itan a maparanay diad saray miting tan Kristianon ministeryo. Sarayan kimey, ya atekepan na personal a panagaral, so makatulong ed sikatayon mangibalikas a sussusto ed puron lenguahe. Tan alay kaimportantian na satan!
17. Anto so mangiyulustra a say panagsalita so makaliktar bilay o makapatey?
17 Say panagsalita so makaliktar bilay o makapatey. Saya so nipanengneng legan na gotgotan ed baetan na Israelitan tribo nen Efraim tan Ukom a Jefte ed Gilead. Pian nabidbir iray Efraimitas a manasalin ontakas a mameltang ed Ilog Jordan, saray Gileaditas so angusar na kontrasenyas a “Shibboleth,” a walaan na unaan a tanol a “sh”. Saray lalaki na Efraim so angiburi ed inkasikara ed saray bantay a Gileaditas ed saray babaliwan na Jordan ed pangibalikas a “Sibboleth” imbes a “Shibboleth,” ya agsusto so pangibalikas ed pangilukas a tanol na salita. Bilang nansumpalan, 42,000 iran Efraimitas so inatey! (Uko-ukom 12:5, 6) Mipadpara, say ibabangat na klero na Kakristianoan so mitanol ed puron lenguahe parad saramay agmakabat ed katuaan na Biblia. Balet napaneknekan a makadesyang so pansalita ed palson relihyoson dalan ed agew na sanok nen Jehova.
Sikatayoy Mansiansian Nankakasakey
18, 19. Anto so kaimportantian na Sofonias 3:1-5?
18 Tutukoyen so agmatoor a Jerusalem ed inmunan panaon tan say modernon kasimbangan to, say Kakristianoan, inkuan ed Sofonias 3:1-5: “Abagey la imay manutunganga tan manurutak ed inkasikato, say managapos a syudad! Agto inmunor ed boses to; agto angawat na panangibangat. Agto nanmatalek ed si Jehova. Sikato so ag-inmasingger ed Dios. Saray prinsipe to ed pegley to so onmuang a leon. Saray uko-ukom to so lobo ed labi ya agmangikera na pukel ya anggad kabuasan. Saray propeta to so anlemew tan totoon liputan. Saray saserdote ton mismo so manleglemew ed no antoy masanto; sikaray nanggawa na karawalan ed ganggan. Si Jehova so matunong ed leet to; agto manggawa na mauges. Kada kabuasan a nansiansian angiter na dilin desisyon to ed kaptekan. Diad agew apaneknekan ya agkulang. Balet say agmatunong a sakey so andi baing.” Anto so kaimportantian na saratan a salita?
19 Namparan say kadaanan a Jerusalem tan modernon agew a Kakristianoan so nanrebelde a sumpad si Jehova tan dinutakan da so inkasikara na palson panagdayew. Say lingo na saray papangulo ra so nansumpal ed panamairap. Anggaman ed paulit-ulit a pasakbay na Dios, ag-ira tinmulok tan sinmingger ed sikato. Saray prinsipe ra so singa masebeg a maakan a leon, ya arogantin angipulisay ed inkatunong. Singa onmuang iran lobo, saray uko-ukom da so amuyak ed hustisya ed kapirangot. Saray saserdote ra so walan ‘nanmudmura ed masanto tan nanggawa na karawalan ed ganggan’ na Dios. Kanian ngalngali la ‘tiponen nen [Jehova] iray nasyones tan dagupen iray panarian, pian ikalbo ed sikara so sanok to, amin a mandarlang a sanok to.”—Sofonias 3:8.
20. (a) Anto so nepeg a gawaen pian makaliktar ed agew na sanok nen Jehova? (b) Panon kayon makapanilalon mangayaga ed andi-geter iran bendisyon a manlapud Dios?
20 Say agew na sanok nen Jehova so maples ya onsasabi. Sirin, pian makaliktar ed balon mundo na Dios, aralen tan salitaen so puron lenguahe a tamtampol. Diad panggawa lambengat na satan et naromog yo so salimbeng manlapud espiritual a desyang natan tan ed maples a manasingger ya englobon kalamidad. Saray Tasi nen Jehova so mangiyaabawag na agew na sanok na Dios tan say makapaseseg a mensahe ed Panarian to. Alay liket dan mansalita nipaakar ed gloria na inkaari to! (Salmo 145:10-13) Mikasakey ed sikara, tan makapanilalo kayon mangayaga ed angi-geter a bilay tan arum iran bendisyon a manlapud Lapuan na puron lenguahe, say Soberanon Katawan a Jehova.
Panon so Pangebat Yo?
◻ Anto iray arum a dalan ed panaral na puron lenguahe?
◻ Akin a makagungguna so mansalita na puron lenguahe?
◻ Anto so nagawa no agyo usaren a maparanay so puron lenguahe?
◻ Panon a makaliktar so too ed agew na sanok nen Jehova tan mangayaga ed andi-geter iran bendisyon?
[Litrato ed pahina 8]
Si Gideon tan saray lalaki to so mamaknol na saray tambuyog da tan intagey daray banuot da
[Litrato ed pahina 10]
Manlapud 1879 a manpatuloy apalinew a si Charles Taze Russell tan saray kaiba to so uusaren na Dios ed pangiyalibansa na puron lenguahe
[Litrato ed pahina 12]
Kasin sikayo so akisakey ed saray Tasi nen Jehova ed pansalita na puron lenguahe?