Say Biblia—Kasin Satan so Nanlapud Dios?
SI Jehova, sakey a Dios na aglimitadon pakayari tan pakauley, so maseguron walaan na kanepegan a mitalosan ed atooan a palsa to ed antokaman a kaliktan ton dalan. No pilien ton mitalosan ed panamegley na nisulat a salita, kaukolan met ya ipreserba to so mensahe to ed loob na saray panaon. Onya kasi so kipapasen na say Biblia?
Ngalngali 1,500 taon sakbay nen Kristo, sanen nigapo so panagsulat na Biblia, walara so dakel ya arum iran relihyoson sulsulat. Anggaman ontan, amin na saraya so asabin ag-uusaren tan diad kaunoran et apaandi. Arum so walan akotkot na saray arkeologo tan nagmaliw a produkton niparayag ed saray museo. Diad biek a dapag, saray kabiangan na Biblia a walan nisulat ed masulok a taloran libon taotaon so agbalot alingwanan, tan saray kopya so walan nansiansia anggad agew tayo. Saya so makatantanda, nagkalautla sano konsideraen so apalesan panamusol a sumpad Biblia ed interon awaran. Anggapon balot so libron nipuntirya ed ontanlan mauges ya isusumpa tan panamusol. Say pamasa o pamunog ed Biblia so walan nadusa ed panmulta, pangipisok, pamairap, tan naynay et patey.
Panon a say ontan lambengat a libro et akapansiansia ed leksab na ontan iran sirkumstansya? Say mismon Biblia so mangibaga ed sikatayo: “Saray salita nen Jehova so mansungdo ed ando lan ando.” (1 Pedro 1:25) Say impanungdo tan ag-inkaderal na say Biblia so makapangipaneknek a bilang masanton Sulat na Dios.
Niarum ni, nepeg tayon lohikon ilaloan a say mensahe na Dios ed katooan so niwala ed sankamundoan. Kasin onya so kipapasen na Biblia? Petepeteg ya ontan! Anggapo ni so arum a libro ed awaran ya akaabot ed Biblia nipaakar ed saya. Say sirkulasyon na Biblia so akalkulan walala ed 3,000,000,000 a marka. Nagkalalo ni, anggapo ni so arum a libron walan nipatalos ed ontanlan kinarakel a lenguahe. Say Biblia so nabasa la natan, ya intero o ed kabiangan, ed masulok nen 1,900 a nanduruman pansasalita. Say American Bible Society so angireport a satan so naromog la natan ed 98 porsiento ed populasyon na mundo. Tatawagen na The New Encyclopædia Britannica so Biblia a “a bilang say sankaimpluensyaan a tugyop na saray libro ed awaran na too.” Sirin, aliwan alablabas so paneskribe ed satan a bilang say sankabalgan a libro ed dalin.
Say akindalem a pantutukoyan na Biblia a manlapud gapo ya anggad sampot so mabiskeg ya ebidensyan mismo a peteg ya inpuyan na Dios. Kasin satan so realistikon nailaloan a saray sulsulat na nanduruman 40 indibidual ed loob na 1,600 a taon so napaneknekan ya amin et mantutukoyan tan walaan na sakey a manunan tema? Saya so imposibli no ipalima ed tsansa o dia lambengat ed pangiwanwan na too. Ingen, saya so kipapasen na 66 iran libro a manugyop na Biblia. Sakey lambengat a mas-atagtagey nen say too, andi-geter ya intelehensya so makapanggawa na ontan a makatantandan bunga.
Aliwa Lambengat ya Awaran
Say maawaran a karga na Biblia so makatantanda. Balet say mensahe a manlapud Dios a mankarga na ekslusibon maawaran a datos so mamaneknek na limitadon kakanaan ed sikatayo. Nakaukolan tayo so panangiwanwan tan praktikal a kakabatan, tan naromog met itan ed Biblia. Alimbawa, pasesegen tayo na Biblia a mamayubo ed “aro, gayaga, deen, andukey-a-panagtepel, panangasi, kaabigan, pananisia, tayadnu, dangka”—saratan a tema so nisulat ed saray pahina to. (Galacia 5:22, 23; Colosas 3:12-14) Idanet na Biblia so inkakuli, kalinisan, inkamatua, katooran ed panasawa, panrespeto tan pangaro ed kaparan too; tan mankarga na dakel a mayaman a simbawa ed awawey na too ed limog na pamilya tan say komunidad.
Sano niyaplika, ompatnag a say konseho na Biblia so peteg a makagungguna. Mangibulos itan ed sikatayo a manlapud inkakulang-kulang tan panagsalamangka. (Juan 8:32) Say praktikal a kakabatan to so agnaparaan. Peteg, a maseguron, mankarga itan, na dibinon kakabatan.
Say ibabaga a say “salita na Dios et mabilay tan mangiter na pakayari” so nanagnap a mitunosan ed dalan ya agawaan na Biblia ed impamasimbalo ed totoo. (Hebreos 4:12) Bilang nansumpalan ed impangipapuso na saray estandarte et minilmilyon natan so analona ed makapasakit ya ug-ugali tan amasimbalo ed datin makaderal a kurang da parad kaabigan.—Efeso 4:22.
Anto so nagawa sano saray estandarte na Biblia so inkaindan? Say resulta so ermen tan irap, bakabakal, eras, makaalis iran sakit ed sekso, tan inkaapag-apag na buleg. Say ontan a bengabengatla so walan nailaloan lambengat lapud say pangipulisay ed Masanton Biblia et kabaliksan to so pangikaindan ed panangiwanwan na Dios, a walan amalsa ed too tan kabat to so kakaukolanen to.
Mamasakbay met so Biblia ed arapen, bengatlan imposibli parad totoon gawaen. Say inlesa na saray pakayari ed mundo a manlapud Babilonia ya anggad saray siglo a mamaarap ed dilin agew tayo so mapropetikon nipakabat ed say Biblia. (Daniel, kapitulo 2, 7, 8) Kaaruman ni, ngalngali duaran libon taotaon nen saman, wala so nilaktip ed Biblia a bilang suston paneskribe ed saray kipapasen na mundo ed sayan koma 20 siglo. (Mateo, saray kapitulo 24, 25; Marcos, kapitulo 13; Lucas, kapitulo 21; 2 Timoteo 3:1-5; 2 Pedro 3:3, 4; Apocalipsis 6:1-8) Say andukey a listaan na asumpal iran propesiya ed Biblia so mamaseguro ed sikatayon saray ilalo parad sakey a maliket ya arapen a walan nisalaysay ed saray pahina to et tua.
Say Responsabilidad Tayo
Amin na saya so manlippuan ebidensya a say Dios so walan peteg ya akitalosan ed totoo. Tua, impasabi na Dios so mensahe to diad lima na ag-ayadyarin totoo. Balet agikatunongan iya ed panisian say Biblia so agotentiko no ipareng ed insalita komon ed sangin mensahe a manlapud Dios, o sakey ya ipasabi ed panamegley na angheles, o sakey a mamilagron nisulat ed tawen tan direktan nipalima ed totoo ed dalin.
Anggaman ontan, say pamidbir ed masanto, o dibinon, lapuan na Biblia so mangipaabala ed sikatayo na sakey a responsabilidad. Makanepegan ya ilaloan itayo nen Jehova a mamasan maparanay ed Salita to. (Salmo 1:1, 2) Say mabungan panagbasa ed Biblia so mankaukolan na dugan awawey. Nepeg ya isepsep na say sakey a say Biblia so agnabasa a kuanmono sakey lambengat ya antokaman a piraso na literatura. Nepeg ya onasingger so sakey ed satan, “aliwan singa salita na totoo, noagta, unong a bilang salita na Dios.”—1 Tesalonica 2:13.
Pigaran bengabengatla ed Biblia so nayarin mairap a talosan. Balet diad maparanay a panagbasa, ombaleg so sakey ed pakatalos tan makagamor na lalon kompleton retrato na linawa na Dios tan saray gagala to. (Hebreos 5:14) Palagi sikayo so agni nanagnap ya akumbensi a say Biblia so masanton Salita na Dios. Balet, mitunusan ed satan, panon yon nibalikas so panisia o agpanisia ed Biblia no agyo maalwar ya inaral itan?
Anggaman wala so panduwaruwa natan nipaakar ed dibinon lapuan to, sakey a maalwar a panusisa ed Masanton Biblia so walan angilanor ed dakel a maisip iran sinansakey a mangiyabawag ed saray salita nen apostol Pablo: “Naromog komon so Dios a tua, anggaman balang too so aromog a matila”!—Roma 3:4.
[Graph ed pahina 4]
(Parad aktual a format, nengnengen so publikasyon)
Say Biblia natan so naalmo ed ngalngali 98 porsiento na populasyon na mundo
Anggapo ni so arum a libro ed awaran ya akaabot nipaakar ed akalkulan sirkulasyon na Biblia a 3,000,000,000 a marka. The New Encyclopædia Britannica so manawag ed satan “a bilang say sankaimpluensyaan a tugyop na saray libro ed awaran na too”
[Litrato ed pahina 4]
Walan nansiansia so Biblia, anggaman arum a relihyoson sulsulat so nagmaliw lambengat iran produkto ed museo
Tagey: Asiryanon salaysay ed Delap
Kawanan: Saray pikakasi ed Ehipton dios a si Ra
[Credit Line]
Namparan: Courtesy of the Trustees na The British Museum
[Litrato ed pahina 5]
Nisulat na 40 nanduruman indibidual ed loob na 1,600 a taotaon, say Biblia so manutumbok ed sakey a manunan tema a manlapud gapo ya anggad sampot. Say sakey lambengat a mas atagtagey nen say too, andi-geter ya intelehensya so makapanggawa na ontan a makatantandan bunga
[Litrato ed pahina 5]
Say inlesa na saray pakayari ed mundo a manlapud Babilonia ya anggad saray siglo a mamaarap ed dilin agew tayo so mapropetikon nipakabat ed say Biblia. (Daniel 2, 7, 8)
Nikawanan: Caesar Augustus
[Credit Line]
Museo della Civilta Romana, Roma
[Litrato ed pahina 6]
Ngalngali duaran libon taon nen saman, say Biblia so sussuston angipasakbay ed saray kipapasen na mundo natan. (Mateo 24, 25; Marcos 13; Lucas 21; 2 Timoteo 3:1-5; 2 Pedro 3:3, 4; Apocalipsis 6:1-8) Say agnasuppiat ya inkasusto na propesiya ed Biblia so mamaseguro ed sikatayo a satan a sipan na Dios ed sakey a paraiso ed dalin so peteg a nasumpal
[Credit Line]
Reuters/Bettmann Newsphotos