Say Biblia​—Peteg Kasin Masanto?

PIGARA ta ed totoo natan so manmoria ed Biblia a bilang masanto, Salita na Dios? Diad sayan panaon na panduwaruwa, dakel so mangipasen ed satan ya anggapo-ed-panaon tan agmakana, a manduraruwan tuan masanto. Arum ni ingen ed saray relihyoson papangulo na Kakristianoan so mangibangat a say Biblia so napnoan na alamat tan tongtong basilyo. Panduwaruwaan da ‘no kasin say biblikal a pantalos ed awaran so sakey a bengatlan natalosan na sakey ya intelehentin too.’​—The Interpreter’s Dictionary of the Bible, Tomo 2, pahina 611.

Saray bantog ya eskolar so nantanem na saray bukel na panduwaruwa nipaakar ed inkamatukoy na pangisiglaot ed Biblia a bilang say Salita na Dios. Ikuan na sakey a “no say sakey et malabay a mangusar ed nengneng na Salita-na-Dios a lenguahe, say manepeg a termino parad Biblia so Salita na Israel, Salita na manunan asasakbay iran Kristianos.” (The Bible in the Modern World, nen James Barr) Anto so isipen yo? Kasin say Biblia so Salita na Dios? Peteg kasin Masanto?

Siopa so Nansulat na say Biblia?

Say impansulat ed Genesis, say unaan a libro ed Biblia, so niugalin nikredito ed si Moises, sakey a Hebreon nambilay ed apalabas a 3,500 a taon. Unong ed say Biblian mismo, ngalngali 40 lalaki a nanlapud nanduruman dalan na panagbilay so akibiang ed impansulat na arum ed Kasulatan, a nansumpal ed sakey a tugyop na 66 iran libro, o inkaapagapag na say Biblia. Anggaman kuan, ag-impasen na sarayan lalaki so inkasikaran peteg ya otor na say Biblia. Sakey a managsulat so nankuan: “Amin a Sulat so impuyan na Dios.” (2 Timoteo 3:16) Sananey so nansulat nipaakar ed saray managsulat na Biblia: “Saray totoo so nansalita a nanlapud Dios unong a sikara so tinenyeg na masanton espiritu.”​—2 Pedro 1:21.

Saya so mangipasen ed saray managsulat ed kategorya na sumusulat, o saray sekretaryo, akontrol, o inwanwan, na Dios. Unong ed Biblia, say managsulat so gendagendat a manpili na saray dilin salita to ed pangibalikas na intarok a madibinon inpormasyon. (Habacuc 2:2) Kanian satan no akin a dakel iray estilo na panagsulat ed interon Biblia. Balet say panagsulat so lawas inwanwan na Dios.

Maseguro, saray ibabaga na sarayan managsulat ed dibinon inkapuyan so aliwan mismon prueba a say Biblia so dibinon mensahe na Amalsa ed katooan. Anggaman ontan, balanglan say Sankatagyan so say Otor na Biblia o andi so malinlinew a nanengneng ed maalwar tan agmapalabon panusisa ed libron mismo. Kasin say Biblia so mangiter na ebidensya ed dibinon inka-otor? Peteg kasin nikuan tayon tekep na talek a say Biblia et masanto?