Panagsigay na Totoo Diad Sankagloboan a Danudanum
“No, natan, et iyaabawag ko so maong a balita, aliwan katunongan itan a siak so manlastog, ta say inkapilitan so impasen ed siak. Peteg, ya abagey ak la no agko inyabawag so maong a balita!”—1 CORINTO 9:16.
1, 2. (a) Siopan peteg so akabet ed angat ya imparungtal na 1 Corinto 9:16, tan akin ya ontan so ebat yo? (b) Anton responsabilidad so inawat na Tastasi nen Jehova?
SIOPARA diad sayan koma-20 siglo so peteg ya akabet ed angat ya inparungtal na saray salita nen Pablo a walad tagey? Siopa so oonla a nilaksalaksa ed mundo pian mansigay na saray lalaki tan bibiin “mapaga ed espiritual a pankaukolan da”? (Mateo 5:3) Siopara so niiyan ed kaatapan diad kipangaw tan ipapatey, tan siopara so nanirap na ontan ed amayamay a daldalin lapud pananumpal ed ganggan nen Kristo diad Mateo 24:14?
2 Onebat so rekord: Saray Tasi nen Jehova. Nen katantaon lambengat masulok ya apatiran laksan Tastasi so nan-kabkaabungan a ‘mangiyaabawag na maong a balita’ diad 211 iran bansa tan teritorya tan diad masulok a 200 iran lenguahe. Saraya so aliwan basta apilin grupo na nipasal iran misionero. Andi, amin na saray Tasi nen Jehova so manliknan walaan na responsabilidad a mangipulong tan manbangat ed kabkaabungan tan ed amin a matukoy a pankanawnawa. Akin a liknaen da itan a pankaukolan ya ipanabang ed arum iray sisiaen da? Lapud bidbiren da ya itarok na pikakabat so responsabilidad.—Ezequiel 33:8, 9; Roma 10:14, 15; 1 Corinto 9:16, 17.
Panagsigay na Totoo, sakey a Sankagloboan ya Angat
3. Panon kalaknab so nepeg a pagmaliwan na panagsigay a kimey?
3 Sayan baleg a panagsigay a kimey so agniyapasakey, a singa panangibaga, diad arum ya ilog odino linok odino ed anggan sakey a dayat. Andi, unong ya inganggan nen Jesus, atan so nagawa “diad amin a nasyones.” (Marcos 13:10) Sakbay na itokotok ed Ama to, imbaga nen Jesus ed saray babangatan to: “Onla kayo sirin tan manggawa na babangatan diad totoo ed amin a nasyones, a bautismoan yora diad ngaran na Ama tan ed Anak tan ed masanton espiritu, a bangatan yoran mangunor ed amin a bengabengatlan inganggan ko ed sikayo. Tan, nia! walaak ed sikayo ya anggad konklusyon na sistema na bengabengatla.”—Mateo 28:19, 20.
4. (a) Anto so anurpresa ed asakbay iran Judion patumbok nen Jesus? (b) Panon so panmoria na saray Tasi nen Jehova ed laknab na panagpulong a kimey da?
4 Parad saray Judion patumbok nen Jesus, nayarin atan so makapakigtot a ganggan. Sikato so mangibabaga ed Judion babangatan to a sikara la natan so onla ed “marutak” a Hentiles ed amin a nasyones tan bangatan ira. Nankaukolan itan na panamasimbalo parad sikara pian nasepsep so inkaseryoso tan onkiwas ed atan ya asainmin. (Gawa 10:9-35) Balet anggapo so napanpilian; imbaga nen Jesus ed sikara diad sakey a parabolo a “say uma et say mundo.” Kanian, moriaen na saray Tasi nen Jehova natan so interon mundo bilang say eksena na saray kanepegan da ed panagsigay. Anggapo so “12-milyas” [20 kilometron] ketegan a mamepeget ed kimey dan nanlapud Dios. No maminsan nakaukolan so panalwar ed saray pasen ya anggapo so relihyoson kawayangan. Anggaman kuan, mansigay ira tekep na liknaan na inkaganatan. Akin ya ontan? Lapud saray ebento ed mundo tan say kasumpalan na propesiya na Biblia so mangipanengneng a sikatayo so wala la ed unor a kabiangan na sankagloboan a panagsigay a kimey.—Mateo 13:38; Lucas 21:28-33.
Aligwas ed Sankagloboan a Panagsigay a Kimey
5. Anton nengneng na totoo so onkikiwas ed sankagloboan a panagsigay a kimey?
5 Maslak ed alanaan iran mananawir na Panarian so “asigay” manlapud nasyones sakbay na 1935, kanian say nagnap a bilang da so akumpleto la. Kanian, nagkalautla nanlapulad 1935, saray Tasi nen Jehova so manaanap ed saramay mapaabeban totoo a nadeskribe bilang “saray mauyamo” a “mangayarian ed dalin.” (Salmo 37:11, 29) Saraya so totoon “mansibek tan mannangis ed amin a makapadimlan bengabengatla a nagagawa.” Sikara so onkikiwas ya ondapag ed uley na Panarian na Dios sakbay a say “baleg a kairapan” so maneral ed nipaabeba tan abulok a sistema na bengabengatla nen Satanas tan saray managdayew to so nigana ed “mandarlang a palbaan” na kaunoran a kadederal.—Ezequiel 9:4; Mateo 13:47-50; 24:21.
6, 7. (a) Antoran kundang so ginawa nen 1943 no nipaakar ed panagpulong a kimey? (b) Antoray resulta?
6 Kasin say sankagloboan a panagsigay a kimey so matalona anggad sayan panaon? Abuloyan ya onebat a mismo iray katuaan. Nen 1943, say Guerra Mundial II so siansian mantutultuloy, ingen say matoor ya alanaan iran agagi diad sankamundoan a hedkuarters na saray Tasi nen Jehova diad Brooklyn, Nueva York, so akaamta la a sakey a baleg a sankagloboan a panangipakurang ed panagsigay so nepeg a gawaen. Kanian, antoran kundang so inala?a—Apocalipsis 12:16, 17.
7 Nen 1943 inletneg na Watchtower Society so sakey a misioneron eskuelaan a tinawag a Gilead (Hebreo, “Pongol na Tasi”; Genesis 31:47, 48) a ginmapon angipasal ed nilasus iran misionero ed kada anemiran bulan ta pian sikara so nibaki a bilang simbolikon sumisigay ed sankadalinan. Diad saman, wala lambengat so 126,329 a Tastasin aktibon mansisigay na totoo diad 54 daldalin. Diad loob na samploran taon saraman a bilang so peteg a linmukso ed 519,982 Tastasi diad 143 daldalin! Maseguro, say Eskuelaan a Gilead so mamapawala na masubeg iran sumisigay a lalaki tan bibii, a mabulos ya onla ed biek-taew iran kultura tan onadapta ed balon pansigayan a danudanum. Bilang nansumpalan, nilibon matuan-impanpuson totoo so kinmiwas. Saraman a misionero, tan lokal a Tastasi ya akikimeyan da, so angiletneg na sakey a pundasyon parad makapakelaw ya idaraak a nagagawa natan.
8, 9. (a) Antoran alimbawa so nayarin nisita ed matalonan misioneron kimey? (b) Panon a saray misionero so akanengneng na matalonan imbulaslas ed saray lawak da? (Nengnengen met so 1992 Yearbook of Jehovah’s Witnesses.)
8 Dakel a matoor iran beterano manlapud saraman ya asakbay iran klase na Gilead so manlilingkor ni diad biek-taew iran asainmin da, anggamano sikara la natan so manedad na masulok a 70 odino anggan 80 ni ingen. Sakey ya alimbawa a mangyanino na dakel ed saraya et say 82-taon a si Eric Britten tan si akulaw ton, Christina, a nangraduar ed koma-15 klase na Gilead nen 1950 tan siansian manlilingkor ed Brazil. Sanen sikara so linman manlingkor diad Brazil, wala so onkulang a 3,000 a Tastasi ed saman a bansa. Natan wala so masulok a 300,000! Peteg, say ‘melag so nagmaliw a mabiskeg a nasyon’ diad Brazil lapud say panagsigay a kimey so mabunga.—Isaias 60:22.
9 Tan anto so nibaga tayo nipaakar ed saray misionero diad Aprika? Maslak so angiyadapta ed duman tuloy a kultura tan naaro daray Aprikanon totoo. Mipadpara et say sanagin John tan Eric Cooke tan saray kaasawaan da, si Kathleen tan si Myrtle, a kaplesan a manlilingkor ed Abalaten ya Aprika. Si John tan Eric so nangraduar ed komawalon klase nen 1947. Saray bansa a nanlingkoran na sarayan duaran sanagi et diad Angola, Zimbabwe, Mozambique, tan Abalaten ya Aprika. Arum iran misionero so inatey diad Aprika lapud sakit, tan saray arum lapud bakal tan panamasegsegang, a singa di Alan Battey tan Arthur Lawson, ya inatey legan na agano nin sibil a bakal diad Liberia. Ingen, apaneknekan a say Aprikanon danudanum so mabungan tuloy. Walara natan so masulok a 400,000 Tastasi ya atayak ed liber na atan a baleg a kontinente.
Amin so Walaan na Betang
10. Akin tan diad anton paraan a saray payunir so manggagawa na nakomendaan a kimey?
10 Anggaman ontan, nepeg a bidbiren ya anggaman say biek-taew iran misionero so manbilang na nilibu, saray lokal a manangipalapag tan payunirb so nagmaliw a nilaksa. Sikara so manggagawa na baleg a panagpulong a kimey ed sankadalinan. Nen 1991 wala so promedyo na masulok a 550,000 iran payunir tan managbiahen ministro. Agaylan makapasagyat itan a bilang sano isipen tayo ya amin na sarayan matoor a Tastasi a manggagawa na nikadkaduman gunaet pian mibiang ed baleg a panagsigay a kimey, so manpromedyo ed inerman na 60 ya anggad 140 oras ed panagpulong a binulan. Dakel so manggagawa ed saya diad baleg a personal a panagsakripisyo tan gastos. Balet akin ya ontan? Lapud inaro ra si Jehova a Dios da ed amin a puso, kanonotan, kamarerwa, tan biskeg da, tan inaro daray kakaabay da a singa ed sikaran dili.—Mateo 22:37-39.
11. Anton seguradon ebidensya so wala a say espiritu nen Jehova et onkukurang ed limog na totoo to?
11 Anto so nayarian tayon ikuan nipaakar ed masulok a talora tan kapalduan laksan arum a Tastasi ya andi ed sigpot-panaon a serbisyo balet mangiiter na 100 porsiento ed serbisyo nen Jehova, unong ed saray sirkumstansya ra? Arum so asawan bibii, anggan ina a manaasikaso ed angkelag ya ananak, ya anggaman ontan et angitalaga na pigara ed importantin panaon da ed sankagloboan a panagsigay a kimey. Dakel et asawan lalaki odino kaamaan a walaan na sigpot-panaon a sekular ya anapan; ingen, angibiig ira na panaon ed saray sampot-simba tan saray labi pian manbangat na katuaan ed saray sangkaili. Wadtan met so baleg ya ulop na walad kasulowan a lalaki tan bibii tan saray kalangweran a mibibiang diad panagpulong tan mangirerekomenda ed katuaan diad kondukta ra. Anto nin relihyoson grupo so walaan na masulok ya apatiran laksan andian-na-sueldo iran boluntaryo a kada bulan et mangipupulong na maong a balita ed uley na Panarian na Dios? Seguradon saya so mamaneknek a say espiritu nen Jehova et onkukurang!—Salmo 68:11; Gawa 2:16-18; ipareng so Zacarias 4:6.
Bengabengatlan Ontulong ed Ibulaslas
12. Akin tan diad antoran bilang a saray totoo so onkikiwas ed katuaan?
12 Sayan baleg a panagpulong a kimey so mangitatarok na tinaon a makatantanda iran resulta. Nen 1991 masulok a 300,000 a balon Tastasi so abautismoan ed sigpot ya inkipalseb ed danum. Atan so kasimbangan na masulok a 3,000 iran kongregasyon a kada sakey et walaan na 100 Tastasi! Panon ya amin na saya so adampot? Nodnonoten tayo so inkuan nen Jesus: “Anggapo so too a makadago ed siak likud no say Ama, ya angibaki ed siak, so mangiyasingger ed sikato . . . Nisulat ed saray Propeta, ‘Tan nabangatan ira ya amin nen Jehova.’ Balang sakey ya akadngel ed Ama tan akaaral so ondago ed siak.” Sirin, aliwa lambengat ed atooan a gunaet a say sakey et onkiwas ed sankagloboan a panagsigay. Natebek nen Jehova so kipapasen na puso tan iyasingger to ed inkasikato iramay makana.—Juan 6:44, 45; Mateo 10:11-13; Gawa 13:48.
13, 14. Anton maabig ya awawey so impatnag na dakel a Tastasi?
13 Anggaman ontan, say atooan iran sumisigay so ahenten uusaren nen Jehova a mangiyasingger na totoo ed sikato. Kanian, say awawey da ed totoo tan ed teritoryan pansisigayan da so importante. Agaylan makapaseseg so inengneng a say kaslakan so angipapuso ed saray salita nen Pablo ed saray taga-Galacia: “Kanian ag-itayo ontunda a manggawa na maabig, ta dia ed nigeter a panaon sikatayo so manani no ag-itayo onkesaw.”—Galacia 6:9.
14 Dakel a matoor iran Tasi so manpupulong diad loob na saray dekada, legan a maapit a manbabantay ed saray nagagawa ed mundo. Anengneng da so inyalagey tan inkagba na Nazismo, Fasismo, tan arum nin totalitaryan iran sistema. Arum so akatasi ed dakel iran bakal ya agawa nanlapulad 1914. Naimatonan daray papangulo na mundon nanmatalek ed Liga na Nasyones tan insan ed Nasyones Unidas. Anengneng da so impanebel ed kimey nen Jehova tan diad saginonor et legal a binidbir diad dakel a daldalin. Diad amin na saya, saray Tasi nen Jehova so agtinmunda a manggawa na maabig, ontan met ed panlilingkor a bilang sumisigay na totoo. Agaylan matalonan rekord na katooran!—Mateo 24:13.
15. (a) Anton tulong so wala ed sikatayo diad pangiyadapta ed saray pankaukolan na sankamundoan a teritorya tayo? (b) Panon a saray palapagan so akatulong diad asainmin yo?
15 Walaray arum nin bengatlan akatulong ed sayan sankamundoan ya inbulaslas. Say sakey et say manangibagay ya awawey na saray sumisigay na totoo ed saray pankaukolan na teritorya. Diad indagup na totoon walaan na nanduruman kultura, relihyon, tan lenguahe, apalaknab na saray Tasi nen Jehova so pakatalos da ed sarayan nambabangil iran punto-de-bista. Tan say sankamundoan a kongregasyon so akatulong a tuloy diad panagparaan na saray Biblia tan literaturay Biblia ed masulok a 200 iran lenguahe. Say New World Translation of the Holy Scriptures, diad interamenti odino ed kabiangan, so wala la natan ed 13 iran lenguahe, a pati Czech tan Sloveno. Say brosyur ya Enjoy Life on Earth Forever! so wala la natan ed 198 iran lenguahe, manlapud lenguahen Albaniano ya anggad Zulo, tekep ed impangimprinta na 72 laksa iran kopya. Say libron The Greatest Man Who Ever Lived so wala la ed 69 iran lenguahe. Say Mankind’s Search for God, a nipalapag ed 29 iran lenguahe, so mangiter na kakabatan ed lapuan tan saray sisisiaen na manuna iran relihyoson sistema na mundo tan mamuprueba ed nikadkaduman tulong diad sankagloboan a panagsigay.
16. Panon so inkiwas na arum ed saray pankaukolan ed arum a daldalin?
16 Anto ni so amalaknab ed sankagloboan a panagsigay a kimey? Nilibu so mabulos ya inmebat ed say ‘Macedonian tawag.’ Unong a si Pablo so mabulos ya inmalis manlapud Asya Minor ya amaarap ed Macedonia ed Europa, diad tawag na Dios, dakel a Tastasi so inmalis ed saray dalin tan teritorya a ditan et wala so babaleg a pankaukolan ed saray manangipulong na Panarian, ontan met ed mamatatken tan ministeryal ya ariripen. Sikara so singa ed literal iran sumisigay ya akaromog a say lokal a danudanum da so atanek lan asigay tan tinmaynan ya amaarap ed danudanum no iner a dagdaiset iray baloto tan dakel so saray sira.—Gawa 16:9-12; Lucas 5:4-10.
17. Antoran alimbawa so walad sikatayo nipaakar ed saramay inmebat ed ‘Macedonian tawag’?
17 Saray agano nin klase na eskuelaan na misioneron Gilead so angisakup ed saray estudyante a nanlapud nanduruman bansa ed Europa ya akapanaral na Ingles tan imparungtal da so inkasikara parad serbisyo ed arum iran dalin tan kultura. Ontan met, diad panamegley na Eskuelaan na Panangipasal ed Ministeryal, dakel a walad kasulowan ya agagin lalaki so naikdan na duaran bulan a kumpleton panangipasal tan insan nibaki ed arum a nasyones pian pasesegen iray kongregasyon tan sirkito. Arum nin nikadkaduman pasen a pansigayan so diad saray teritorya a nalulukasan natan diad Mamabukig a Europa tan ed saray datin republika na Sobyet.—Ipareng so Roma 15:20, 21.
18. (a) Akin a saray payunir so gendagendat ya epektibon ministros? (b) Panon dan natulongan iray arum diad kongregasyon?
18 Sakey nin kaaruman a katulongan diad sankamundoan a panagsigay a kimey et say Eskuelaan na Payunir a Serbisyo ya atendian na saray regular payunir. Diad panamegley na duaran simban lerleran a panangobre ed palapagan a Mansinag A Singa Silesilew ed Mundo, a nagkalautlan nitarya parad saray payunir, apaaligwas da so abilidad da ed ministeryo legan a kunsideraen daray tema a singa say “Pananumbok ed Dalan na Aro,” “Tumboken si Jesus a bilang Modelo,” tan “Panamayubo ed Dunong na Panagbangat.” Agaylay pisasalamat na amin iran kongregasyon diad impakawalaan na sarayan ulop na kualipikado iran sumisigay ed kabkaabungan a makapangipasal ed dakel diad sayan baleg a panagsigay a kimey!—Mateo 5:14-16; Filipos 2:15; 2 Timoteo 2:1, 2.
Kasin Onaligwas Tayo?
19. Singa si apostol Pablo, panon itayon onaligwas ed ministeryo tayo?
19 Singa si Pablo, kaliktan tayon nawalaan na positibo, onnenengneng-ed-arapen ya awawey. (Filipos 3:13, 14) Sikato so akibagay ed amin a nengneng na saray totoo tan sirkumstansya. Amta to no panon so pananap na kaslakan a letnegan tan no panon so pikatunongan a nibased lokal iran awawey tan kultura. Makapangigapo tayo na saray panagaral ed Biblia diad pagmaliw ya alerto ed saray kiwas na unabong ed mensahe na Panarian tan insan iyadapta so presentasyon tayo ed saray pankaukolan na too. Dingan na malaknab a nengneng na saray katulongan ed panagaral na Biblia a wala ed sikatayo, makapangiyopresi tayo na sakey a matukoy ed panmoria na indibidual. Say inkamatukoy tan inkaalerto tayo so importanti met iran bengatla diad mabungan panagsigay.—Gawa 17:1-4, 22-28, 34; 1 Corinto 9:19-23.
20. (a) Akin a say panagsigay a kimey tayo so ontanlan importanti natan? (b) Anto so sinansakey a responsabilidad tayo natan?
20 Akin a sayan nikadkaduman sankagloboan a panagsigay a kimey so ontanlan importanti natan? Lapud diad saray propesiya ed Biblia a niparungtal ed saray ebenton agawa la tan nagagawa, mapatnag a say sistema nen Satanas ed mundo so mamapaarap ed mapeligron kapantokan. Kanian, anto so nepeg tayon gawaen a Tastasi nen Jehova? Say taloran aaralen ya artikulo ed sayan magasin so angipabitar ed responsabilidad tayo a magmaliw a makuli tan maseseg ed panagsigay a kimey tayo ed betang tayo ed sankagloboan a danudanum. Walaan tayo na mapekder a paseguro manlapud say Biblia a si Jehova so agmangilingwan ed maseet a panagsigay a kimey tayo. Inkuan nen Pablo: “Say Dios so aliwan agmatunong pian lingwanan so gawa yo tan say aro ya impanengneng yo ed ngaran to, a tinulongan yo so saray sasanto tan nantultuloy a nanlingkor. Balet panpirawatan mi so balang sakey ed sikayo a mangipanengneng na mipadparan inkakuli pian nawalaan na nagnap a paseguro ed ilalo ya angga ed kasampotan.”—Hebreos 6:10-12.
[Paimano ed leksab]
a Nengnengen met so Revelation—Its Grand Climax At Hand!, pahina 185 tan 186, impalapag na Watchtower Bible and Tract Society of New York, Inc.
b “Manangipalapag a payunir . . . Sakey a sigpot-panaon a kumikimey ed Tastasi nen Jehova.”—Webster’s Third New International Dictionary.
Kasin Nanonotan Yo?
◻ Akin a moriaen na saray Tasi nen Jehova so interon mundo a bilang say eksena ed panagsigay a kimkimey da?
◻ Anto so bendisyon na misioneron eskuelaan na Gilead ed panagsigay a kimey?
◻ Antoray arum a bengatlan akatulong ed intalona na saray Tasi nen Jehova?
◻ Panon itayon onaligwas a sinansakey ed Kristianon ministeryo tayo?
[Tsart ed pahina 20]
SARAY RESULTA NA INTERNASYONAL A PANAGSIGAY
Taon Daldalin Tastasi
1939 61 71,509
1943 54 126,329
1953 143 519,982
1973 208 1,758,429
1983 205 2,652,323
1991 211 4,278,820
[Litrato ed pahina 21]
Say panagtasin kimey so siansian nagagawa ed limog na saray taga-Galilean sumisigay