Panangekal na Polusyon—Manlapud Puso tan Kanonotan

AG-INIKDAN nen Jehova iray totoo na panpilalek ed dutak odino gutgut. Say planetan ayaman da so adisenyon magmaliw a paraiso na kalinisan, uksoy, tan karakpan. Agginagala na Dios a magmaliw itan ya aliwliwan bontonay basura.​—Genesis 2:8, 9.

Anggaman ontan, kayari impangikaindan na totoo ed madibinon panangiwanwan, sikara so angigapon manibukel na dilin nengneng na uksoy na mundo ra. Lapud andian na bentahay madibinon kakabatan tan kulang na eksperiensia, sikaray apilitan a manaral diad panamegley na palaranan. Paneknekan na sekular ya awaran so katuaan na Biblia ya agnayarian na totoon matalonan uleyan so inkasikara; ta diad loob na nilibon taon et say “too walaan na pakayari ed sananey . . . [ed] kaugsan to.” (Eclesiastes 8:9; Jeremias 10:23) Say modernon problema na polusyon, ed amin a nengneng to, so resulta na agmaptek ya uley na too.

Panangadapta ed Panmoria na Dios

Saray totoon malabay a mamaliket ed Dios so manggugunaet a manbilay unong ed saray estandarte na Manamalsa ed kalinisan. Kanian, saray Tasi nen Jehova so nidunget ed problema sanen niyeskedyul a nagawa so internasyonal a kumbension diad Prague, Czechoslovakia, ed kapegleyan-na-1991.a Ngalngali 75,000 a totoo so onatendi, ulop a nayarin kargaen na Estadyum na Strahov. Balet agnausar lay estadyum ed loob na limaran taon. Mankaukolan na panangapiger, aderal lapud saray kipapasen na klima. Ngalngali 1,500 a Tastasi nen Jehova so nanapiger tan nanpinta lamet ed satan ed masulok a 65,000 oras. Lapud sayan kampanya na panaglinis, diad panaon na kumbension et nagmaliw so estadyum a makanan pasen a pandayewan ed tuan Dios, si Jehova.

Anto so mamabayubo ed saray Tasi nen Jehova a magmaliw a duma, bangta say mundo diad interamenti et mangipapanengneng na samet a panamabli ed kalinisan tan uksoy? Say panamabli ed konseho na Biblia a saray Kristiano so nepeg a mangekal ed negatibon awawey, a singa say inkasiblet, agpanangunsidera, agum, tan kakulangan na aro. ‘Lakseb yo so too’n daan a [personalidad, NW] pati saray gawa to,’ kuan na Biblia. Salatan na “balo’n too [personalidad, NW] a sikato so pinasimbalo nipaakar ed kakabatan a nipara’d ed talintao na amalsa ed sikato.” Say personalidad a walaay panangaro parad kalinisan, uksoy, tan karakpan so andian na saray tendensya ed panagdutak.​—Colosas 3:9, 10; 2 Corinto 7:1; Filipos 4:8; Tito 2:14.

Kakaukolanen na balon personalidad iray Kristiano a magmaliw a sinononot ed polusyon, ya agsigagalan mandutak odino situtungangan mangibaliwala ed saray ley sumpad-polusyon ya ipapaakseb na gobgobierno. Tutulongan toran ompaliis ed panagbantak, masiblet, tan nginingiras ya awawey a mangitonton ed panagtakatak. Diad panrespeto ed kayarian na arum et napaandi so pangusar ed graffiti bilang panangibalikas na saray kanonotan tan liknaan, bilang agmauges a panliketan, odino bilang alternatibon pormay arte. Kakaukolanen ton saray ayaman, kotse, kawes, tan laman so pansiansiaen a malinis.​—Ipareng so Santiago 1:21.

No nipaakar ed totoon agmabulos a mangisulong ed sayan balon personalidad, kasin napakasalanan so Dios ed panebel [to’d] sikaran manbilay ed onsasabin Paraiso to? Andin balot. Siopaman a walaan ni na saray tendensya diad puso odino kanonotan to a mandutak so manigensigen ed nipawil a malaparaison karakpan na planetan Dalin, a sengegay ermen na saramay manpilalek a manmantine ed satan. Say desisyon na Dios ya “itarok ed kadederal iramay manederal ed dalin” so namparan matunong tan maaro.​—Apocalipsis 11:18, NW; 21:8.

Aktibon Mibiang?

Anggaman ontan, kasin kabaliksan na saya a saray Kristiano so kaukolan a mangiyalibansa ed sumpad-polusyon odino panaglinis iran kurang?

Say polusyon so peteg a makaderal ed bunigas tan pankaabigan na publiko. Si Jehova so walaan na matukoy a kapagaan ed saratan a pamaakaran, unong a nanengneng tayo ed saray ganggan ya inter to’d Israelitas. (Exodo 21:28-34; Deuteronomio 22:8; 23:12-14) Balet agton balot inwanwan ira a mangumberte ed arum a totoo diad saray pamaakaran na pankaabiganan na publiko; nisay imbaga ed inmunan-siglon Kristianos a gawaen so ontan.

Natan, saray pamaakaran ed kaliberliber so mainomay a magmaliw iran mapulitikan salisalan. Diad tua et arum a mapulitikan partido so espisipikon napoporma ed gagalan panresolbi ed saray problema ed kaliberliber. Say Kristianon paimluensyaan a midapag ed arum a mapulitikan linya so agla neutral ed pulitika. Inletneg nen Jesus so prinsipyo parad babangatan to: “Ag ira taga mundo, salanti onong ya ag ak taga mundo.” Say Kristianon mangikaindan ed satan a kakaukolanen so mangiiyan ed inkasikato ed kapeligroan na pidadapag ed “saray mamakauley ed saya a mundo, ta saraya onandi ra.”​—Juan 17:16; 1 Corinto 2:6.

Agnanggunaetan nen Jesus a resolbien ya amin iray sosyal a problema ed agew to; nisay inganggan to’d babangatan ton gawaen itan. Say ganggan to ed sikara so: “Onla kayo sirin, tan mangawa kayo na saray babangatan ed amin a naciones, ya binyagan yo ra . . . , Ya ibangat yo ra’n mangonor na amin a bengabengatla ya ingangan ko ed sikayo.” Agto inganggan ed sikara iray totontonen ed kaliberliber.​—Mateo 28:19, 20.

Diad pangisalaysay no antoy nepeg ya iyuna ed bilay na Kristiano, inkuan nen Kristo: “Anapen yo ni’n onona so panarian, tan say inkatonong to.” (Mateo 6:33) Sano si Jehova, diad panamegley na Mesianikon Panarian et mangipaskar ed matunong iran totontonen to diad sankagloboan ya eskala, saray problema ed kaliberliber so permanentin naresolbi tan diad kapenek na amin.

Kanian, saray Tasi nen Jehova so walaan na asimbang a talindeg. Nisesengeg ed Roma 13:1-7, kapilitan a masimoon ya ontulok ira ed saray ginogobiernon ley a mamabanlong ed kaliberliber. Niarum ni, say maridios a panangaro ed kaabay so mamakiwas ed sikaran respetoen so kayarian na arum​—publiko odino pribado—​diad agpaneral tan agpanbantak na basura ed inerman. Balet pihon ag-ira niwanwan a mangidaulo ed saray kurang na minumundon panaglinis. Sipepekder dan iyuuna so panangipulong ed mensahe na Panarian na Dios, a momoriaen a saya so dalan ed panggawa na magnayon a pankaabiganan.

Espiritual a Panaglinis

Naulit-ulit a pinasakbayan iray kadaanan ya Israelitas ed saray pansumpalan no dutakan da so dalin diad panpatedter na dala, diad pangadaptay imoral ya estiloy-bilay, odino diad agpanrespeto ed sagradon bengabengatla. (Numeros 35:33; Jeremias 3:1, 2; Malaquias 1:7, 8) Makatantanda, a sikaray kinondena lapud sayan espiritual a polusyon, aliwan lapud antokaman a pisikal a polusyon a nayarin sikara met so nankasalanan.b

Kanian, sirin, say espiritual a polusyon odino inkadutak so manunan pambanikelan a paliisan na Kristiano natan. Nagawaan to iya diad pangisulong na “balon personalidad,” a mangekal ed saray makadutak a tendensya a manlalapud puso tan kanonotan. Masulok ya apatiran laksan Tastasi nen Jehova so nagugunggunaan ed sayan espiritual a panaglinis, a nagagamoran so relihyoso tan moral a kalinisan ed limog da, ontan met ed sankaimanon pisikal ya inkalinis.​—Efeso 4:22-24.

Natan la so panaon parad kampanya na espiritual a panaglinis. Insan tumbokan itan na pisikal a panaglinis ed sankadalinan ed nigeter a panaon tan mangiliktar ed ayaman tayo ed pagmaliw a sankagloboan a bontonay basura diad pangiter ed kanepegan ton bulos-ed-polusyon a kaliberliber.​—Eclesiastes 3:1.

[Saray paimano ed leksab]