Pangayagaan so Malinis a Dalin Diad Arapen!

ALAY panliket tayo a si Jehova, say Dios na uksoy tan kalinisan, so manumpal ed orihinal a gagala ton pagmaliwen so dalin a sankagloboan a paraiso! (Isaias 11:6-9) Isisipan to: “[Say] salitak ya ompaway ed sangik; sikato naani ag ompawil ed siak a paoypaoy, no ag ingen sumpalen to naani so kaliktan ko, tan onaliguas naani ed bengatla a pangyakaran ko ed sikato.” “Ag nayarin pantilaan na Dios,” kanian sarayan salita so aliwan andi-kabaliksan.​—Isaias 55:11; Hebreos 6:18.

Sikatayo so nainawaan a siaaron onsalet si Jehova sakbay a kumpleton deralen na totoo, sakbay a kumpleton naderal so ekolohiya!​—Apocalipsis 11:18.

Ekalen nen Jehova so agmagbabawi, sigagala iran managdutak tan totoon rebelyoson mangibabaliwala ed saray prinsipyo to ed uksoy tan kalinisan. Anggapo so naabuloyan a maneral ed nipawil a Paraiso.​—Uliran 2:20-22.

Legan na uley na Panarian na Dios, diad silong na panangiwanwan nen Kristo Jesus, nabangatan iray totoo a mangekal ed antokaman a natitilak iran sengegan na pisikal a polusyon. Kanian, aliwan natan a sano nakaukolan ya amin ya ariripen na Dios et nagmaliw ya aktibon nalalanor diad personal tan kolektibo iran kurang ya ontulong ed anggapoy kaparan sankagloboan a panaglinis.​—Ipareng so Ezequiel 39:8-16.

Saray makaliktar ed anggaan na kaplesan a marelmeng a sistema na bengabengatla so manuporta ed sayan pisikal a panaglinis a programa tekep na parehon dedikasyon tan entusiasmo a pibibiangan da diad espiritual a kampanyay panaglinis natan.​—Salmo 110:3.

Peteg ya onsabi so alinisan a dalin, ya unaan na sankabalgan a kampanyay panaglinis ed amin a panaon, a sumpalen na Panarian na Dios. Amin a pakabidbiran na polusyon so naekal. Anggapo lay antokaman a graffiti. Anggapo laray basyon bote, lata, plastik bag, chewing-gum tan punggos na kendi, dyaryo, tan magasin ya ataytayak ed inerman a dayat odino malaparaison parke.

Pangayagaan so malinis a dalin diad arapen!

[Litrato ed pahina 7]

Kasin mibiang kayo ed onsasabin sankagloboan a panaglinis?