Say Kalimgasan na Obanan

AGAYLAN makapaliket so pakapitongtong ed matoor a lalaki tan bibii ed inmunan panaon! Isipen pay pitongtong ed lalakin singa di Noe, Abraham, Moises, tan Juan a Managbautismo, tan ontan met ed bibiin singa di Sara, Rahab, Rut, tan Debora! Agta naayat kayon ondengel ed sikaran mangestorya ed anengneng daran matalonggaring ya ebento na abayag lan panaon?

Anggan natan, agta panliketan yon denglen iray matoor a matatatken a mangipanabang ed saray eksperiensia no panon a sikara tan arum so nansiansia ed integridad da ed Dios diad silong na saray subok, pati ed saray pananebel, panagpekpek, tan inkipangaw lapud inkatunong? Maseguron tuloy! Say panangaro tayo ed Dios tan panamabli tayo ed sikara so ombulaslas legan ya ibaga ra’d sikatayo iray liknaan da tan nagkalautla ed impapuson apresasyon da parad maaron panatalima nen Jehova.

Diad limog na totoo na Dios, saray matoor a matatken a lalaki tan bibii so lawas rerespetoen lapud eksperiensia, pikakabat, tan kakabatan da. Diad tua, say onggendan a ganggan so nilaktip ed Ganggan ya inter na Dios ed Israelitas: “Onalagey ka naani ed arapan na ubanen ya olo, et pagalangan mo naani lupa na masiken, tan nepeg mo so ontakot ed Dios mo: Siak si Jehova.” (Levitico 19:32) Say Hebreon salita parad edad odino maedad so nanlapud lamut a mankabaliksan na “manoban” tan nipatalos met ya “obanan.” Kanian nailaloan iray Israelitas ya onalagey bilang tanda na respeto parad matatatken, a gagawaen diad marespeton takot ed Dios.

Kasin satan a marespeton awawey so wala natan? Alimbawa, kasin saray kalangweran so makaaron mangilulukas na saray puerta parad matatatken? Kasin gendagendat a papalugaran na saray tobonbalo odino susto lad edad so matatken diad napnon elevator? Odino kasin saray malalangwer nin indibidual so gendagendat a mangipalugar ed yurongan da parad saray matatken diad napnon bus odino tren? Say isaew ed panggawa na saratan a bengatla so naimano met ed limog na Kristianos.

Anggaman ontan, pian napaliket si Jehova a Dios nepeg ya onkiwas iray Kristianos a mitunosan ed panmoria to tan paliisan so panagnonot, panagsalita, tan kakikiwas na saramay ‘mangaro ed saray lamalaman da, matulay ed saray kaatengan da, maingongot ed saray maabig.’ (2 Timoteo 3:1-5) Anto sirin so ibabaga na Salita na Dios nipaakar ed inkatobonbalo no isiglaot ed obanan?

Say Kabiskegan na Tobonbalo

Bibidbiren na Biblia so biskeg na inkatobonbalo tan saray bentaha to diad impangibagan: “Say gayaga na saray tobonbalon lalaki sikato so biskeg da.” (Uliran 20:29) Diad kadaanan ya Israel say pakayari na kalangweran iran Levita so nausar ed templo, mabetbet diad ambetbelat iran kimey. Natan, dakel a kimey ed saray pagawaan, diad saray ayaman a Bethel, tan diad saray proyekton panagpaalagey na Watch Tower Society so gagawaen na kalangweran a lalaki tan bibiin angiyopresi ed biskeg tan saray abilidad da diad kiyabante na intereses na Panarian. (Mateo 6:33) Kanian pangagayagaan day maabig iran pribilihyo diad serbisyo ed Dios.

Say kapkapanaon ya uliran so manampot ed saray salitan, “say kalimgasan na saray mamasiken sikato so ubanan ya olo.” Sano itekep so biskeg ed inkatobonbalo tan say eskperiensia tan kakabatan diad dakel a taon, sakey a mabiskeg a tuloy ya impantekep so naporma.

Pian iyilustra: Sakey a malangwer a manpapasal a karpentero so kinerew a mangikabit na pigaran dingding, sikatoy sigugunaet a manumpal ed asainmin a walaay biskeg na inkatobonbalo. Say matatatken a lalon eksperiensiadon karpentero so akaimano ed malangwer a katulongan to ya anggaman mabiskeg et maminpigan danay ton martilyoen so pasak. Say matatatken a kumikimey so angirekomenda ed malangwer ya egnaan toy putan na martilyo, imbes a diad asingger ed uloy martilyo. Saya so manggawa’d malangwer a toon mamasak a mas mapuersa, a mangimper na panaon tan enerhya.

Mipadpara, say mapukal a malangwer, a bii et naaralan to ed pangisalisali a no maminsan et saray abel so onkesen no ag-ira pesakan unong ed saray instruksion. Anggaman ontan, say eksperiensiadon bii so makaamta ed kaimportantian na pangibiig ed saray kawes tan panpesak ya akabiig iray arum ya aysing. Naaralan to met ya agla kaukolan so pamalantsa no tupien toray kawes kayari pangala to ed balaybayan odino diad dryer.

Say pakaaral manlapud eksperiensiadon totoo so mamainomay ed bilay. Anggaman kuan, wala so panaon sano anggan say eksperiensiadon too et agto la nasarag a gawaen iray arum a trabahon datin magmainomay ton sumpalen. Matukotukoy so naimano na sakey a managsulat: “Alay abig to komon no nawalaan na pikakabat iray kalangweran tan nawalaan na biskeg iray matatatken.” Balet agaylay abig sano apresyaen na saray matatatken so biskeg na saray kalangweran tan siaanos ya inabang da’d sikaray agamoran dan eksperiensia diad inlabas na saray taon​—tan sipapaabeban awaten na saray tobonbalo iray suhestion da! Diad sayan dalan et nagunggunaan so parehon grupo na edad.

Pangamor na Kalimgasan

Agmagenap so edad labat. “Aliwa a saray ankabaleg so mangakabat, odino saray mamasiken so makatalos na katunongan,” kuan nen malangwer ya Elihu. (Job 32:9; Eclesiastes 4:13) Pian peteg a napabli lapud obanan, say matatken so kaukolan a manggawa na nagkalalo ni ed bilay to nen say nginingiras a pangusar to’d saray agew ton manbantay na telebisyon, iyatendi ed saray palabas ed esport, odino basta manligliwa. Tan anggan diad saray saginonor a taon, kaukolan a mantultuloy a manaral iray matatken.

Arum a totoo et ilastog dan gawaen iray bengatla unong ed panlabayan da, odino ikuandan: “Say eksperiensia so sankaabigan a managbangat.” Ingen, isisimbawa na Salita na Dios: “Say makabat a too ondengel komon, tan namunat ed aral; tan pian say too a makatalos narandan to so mangaralem a simbawa.” (Uliran 1:5; ipareng so 1 Corinto 10:11.) Say eksperiensia so aliwan lawas a sankaabigan a managbangat, ta makaaral tayo ed saray lingo na arum ya agtayo la nagaway parehon kasulitan da. Niarum ni, labay ya ipaslep na Kristiano a “say ubanan ya olo sikato so balanget na gayaga; naromog ed dalan na inkatunong.” (Uliran 16:31) Say bilay ya inusar ed matoor a serbisyo ed si Jehova so marakep ed panmoria to tan makanepegan a respetoen na arum bilang maong ya ehemplo. Siempre, nigapo ed masakbay a kabiangan na bilay so panaral nipaakar ed Dios tan pangamor na eksperiensia “ed dalan na inkatunong” tan saratan so nepeg ya agbalot-ontundan kurang.​—Roma 11:33, 34.

Niyilustra iya diad eksperiensian lalanoren toy pitoy-taon a laki diad Sweden. Tinepetan toy manangasikaso na Eskuelaan ed Teokratikon Ministeryo no nayarin manpalista ed eskuelaan. Tinmepet so manangasikaso, “Akin?” Diad saman, inmebat so malangwer: “Agnayarin manngiras ed bilay!” (Eclesiastes 12:1) Agaylan positibon ehemplo parad malangwer tan matatken!

Panangigalang ed Obanan

Sakey a makapagonigon a tendensya diad modernon sosyedad et say pamablin tuloy ed pisikal a biskeg tan abilidad ed esport tan manliknan mas superyor nen saray matatken. Anto so nepeg ya awawey na Kristiano ed saray obanan ed kongregasyon?

Imbes ya ibaliwala iray matatatken a Kristianos, nepeg a kunsideraen tayo ra tan mangipanaon a pilimogan ira. Alimbawa, diad sinimba iran miting na saray Tasi nen Jehova diad Kingdon Hall, kasin panggugunaetan yon ibano iray matatatken? Peteg ya aapresyaen daray panangibano na ankekelag ya ugugaw tan saray arum. Tan agaylay gayaga na matatatken diad kiwala ed saray sosyal a pantitipon na kapananisiaan ed grupoy nanduruman edad! Anggaman dakel so panparpara na malalangwer a sanasawa ed arum a sanaasawan kaedaran da, walay tumang na pangilaktip ed saray matatatken ed saratan a maliket a pantitipon.​—1 Tesalonica 3:12; 5:15.

Agaylan importantey pagmaliw a makunsidera sano mitotongtong ed matatatken! Sanen say masiken ya agin walaay 40 taon na impanlingkor ed si Jehova so akitongtong ed sananey a matatken no panoy kausar to’d kongregasyon, inkuan na malangwer a laki: “Dagdaiset lay nitulong yo.” Agaylan ansakit a balikas! Tua a say masiken ya agi et agtanton mabiskeg a singa nen saman, kinmesay lay pibibiang to ed lawak a ministeryo, tan arum ed saray pribilihyon panangasikaso so mapatnag a mairap lan tuloy lapud peles iran abilidad to; ingen, dakel so nitulong to. Sikatoy walaay taotaon na atugyop a kakabatan tan eksperiensia ed dalan na inkatunong. Lapud saratan a matatatken so impasyan nankimey bilang manangipulong na Panarian, nansungdo ed panamasegsegang, anakbat na ambelat a Kristianon responsabilidad, tan angipasal ed arum, pangagayagaan natan na totooy Dios so mabiskeg ya organisasyon a tutulongan na espiritu to. Kanian, respetoen tayo komon irayan matatatken bilang makabat a managkonseho, maaron pastol, tan epektibon managbangat.

Wala met so maong a rason a seryoson kunsideraen iray suhestion na matatatken. Alimbawa, insuhiri na eksperiensiadon agin laki a say puerta na sakey a Kingdom Hall so ag-ipasen ed sagur na bilding. Lapud sinononot a tuloy iray malalangwer ya agagin lalaki ed itsura na paalagey, kanian agda tinumbok so suhestion to. Anggaman ontan, kayari na pigaran taon, say puerta so kaukolan ya iyalis lapud dederalen itan na dagem tan uran a manlalapud sagur. Say praktikal a kakabatan ed eksperiensia so mas importante nen saray bengatlan nipaakar ed karakpan. No pagalangan na saray malalangwer iray matatatken diad italineng ed saray opinyon tan praktikal a kakabatan da, saya so mangimper na panaon tan kuarta. Anggano agtumboken so suhestion na matatatken, sikatoy napagalangan diad pangipaamtan kinunsideray suhestion to balet lapud arum a rason kanian sananey so desisyon.​—Ipareng so Uliran 1:8.

Onnengneng ed Arapen, Aliwan Diad Apalabas

Onia so panmoria na arum a matatatken a totoo: “Anggapolay singa panaon a singa nensaman sanen sikatay malangwer ni.” Anggaman ontan, imbes a nodnonotey linmabas a panaon, saratan a matatatken so napaseseg ya onnengneng ed arapen sano nagamoran day mangatatawen a langkap da odino nipawil lamet so inkaugaw a biskeg da diad silong na Panarian na Dios. Kaleganan to, kaukolan dan bidbiren iray limitasyon da lapud itatatken. Sayan panamidbir tan liknaan na panpaelek so importanten tuloy sano nayarin agnaiimanoy sakey a matatken diad saray pribilihyo ed serbisyo.

Alimbawa, nayarin maparanay a walaay betang nen saman so agin masiken ed saray programa na distrito kumbension. Natan dakerakel so makayarin mamatatken tan dakel so napanpilian a lalakin walaan na saray abilidad ed panagbangat. Anggaman malangwer ni, arum ed sarayan mamatatken so mapatnag ya amaneknek na seseg tan abilidad, makapanbangat a maong tan makapangiter na maabig a simbawa, tan sarag dan pasesegen iray arum. (1 Tesalonica 5:12, 13; 1 Timoteo 5:17) Bilang nansumpalan, nayarin liknaen na masiken ya agi a sikatoy agnaimano ta anggapoy betang to ed programay kumbension tan nayarin agmaliket ta niiter iray pribilihyo ed malalangwer iran mamatatken. Ingen, satan a negatibon liknaan a papawalaen na ag-inkayadyari na too so natalonaan. Diad tua, amin ed kongregasyon so makatulong diad pangipaamta ed matatatken a sikaray nakakaukolan, a sikaray aaroen lapud katooran da, tan papablien iray opinyon da.

Siempre, kaukolan a tandaan na matatatken ya unong a labay toy napagalangan et nepeg to met ya igalang iray kaparan managdayew. (Mateo 7:12; Roma 12:10) Imbes a liknaen dan sikaray apilitan a manretiro lapud edad da tan maniirap lapud negatibon panmoria, nepeg a pangayagaan na saray matatatken so dakel a taon na matoor a serbisyo ra. Tan maseguro, ya amin tayo so nepeg a misalamat lapud panamendisyon nen Jehova et wala so ondaraak a bilang na kualipikadon manangasikason mibiang ed belat na kimey tan mangawat ed saray responsabilidad ed kongregasyon legan a saray ulop na “arum a carnero” so onsisimpuk ed Kristianon organisasyon​—Juan 10:16; Isaias 60:8, 22; 2 Timoteo 2:2.

Lapud ot-ot, kaleteyan, odino arum a sengegan, saray obanan so no maminsan et maunganget. Mankakaukolan iya na pakatalos tan empatya ed biang na arum iran membro na pamilya odino kongregasyon. Kakaukolan to met a saray matatatken so impasyan mankimey pian namantini ray positibon awawey, pian mansiansian malangwer diad puso tan kanonotan. Sanen say malalangwer a kakuarto na membro na Mananguley ya Ulop na Saray Tasi nen Jehova so ontaynan ed Bethel pigaran taon lay linmabas, sikatoy tinepetan na matatatken a laki a mangisuheri na kasalat to tan inkuanton labay toy malalangwer, matatken ya agi [ed espiritual] ya ontulong ed sikaton mansiansian malangwer tan aktibo. Say alanaan a masiken ya agi et agto gagalay manretiro tan mantantan, ta walay kimey a kaukolan [ton] gawaen. Agaylan maabig ya ehemplo ed panilalo tan panmantine na positibon panmoria!

Agnasuppiat, “say gayaga na saray tobonbalon lalaki sikato so biskeg da, say kalimgasan na saray mamasiken sikato so ubanan ya olo.” Agaylan makapakelkelaw, sano usaren na malalangwer a totoo iray biskeg da tan iyaplika na saray matatatken so kakabatan da diad pangegemtan ed dalan na inkatunong! Saray matatatken tan malangwer a Kristianos so parehon makakaeksperiensia na baleg a gayaga legan a nankakasakey iran mangiyaalibansa na tuan panagdayew ed si Jehova a Dios, say “inkadaan na saray agagew.”​—Daniel 7:13.

[Litrato ed pahina 24]

Saray obanan a Kristianos so walaan na dakel ya itulong diad kagunggunaan na arum