Kasin Nanonotan Yo?

Kasin maalwar yon inimano iray agano niran paway na Say Panag-Bantayan? No ontan, angangko nayarin nasagyat kayon nonoten iray onggendan:

▫ Anto so “tanda ya onkana ed maong” ya itutulong nen Jehova ed papatumbok nen Jesus? (Salmo 86:17)

Saman so ‘liket ed Espiritu Santo’ ya amabiskeg ed asasakbay a Kristianos pian nasungdoan so nanduruman nengneng na panamasegsegang ya agawa ed sikara. (1 Tesalonica 1:6) Mipadpara met itan natan, tan si Jehova, say Manangiter na “amin a maong a palangkap tan amin ya ayadyarin palangkap,” so maliket a “mangiter na Espiritu Santo ed saray onkerew ed sikato.” (Santiago 1:17; Lucas 11:13) Kanian say gayaga ed masanton espiritu so tulong parad papatumbok nen Jesus a “tanda ya onkana ed maong.”​—w-E 12/15, pahina 18-19.

▫ Akin ya importante ed sikatayo so pangaksobi ed panmoria na Dios ed panagtila?

Kuan na Salmo 5:6 a ‘bagbagen [na Dios] iray mansalita na tila-tila.” Inkuan ni na Apocalipsis 21:8 a say pansumpalan na amin a matitila et say “komadua ya ipapatey.” Kanian, say pangaksobi ed panmoria na Dios ed panagtila so mangiter ed sikatayo na mabiskeg a rason a mansalitay katuaan ta pian naawat so langkap to a bilay.​—w-E 12/15, pahina 23.

▫ Anto so manibukel ed paraan na panagdayew na Samaritano? (Juan 4:20)

Saray Samaritano ed nansasamok a panagdayew da so angawat bilang Kasulatan ed manunan limara lambengat a libro nen Moises, say Pentateuk. Sanen ngalngali komapat a siglo K.K.P, angipaalagey iray templo ed Palandey Gerizim, diad pilaslasan ed templo na Dios ed Jerusalem. Anggaman aderal lay templo na saray Samaritano, siansian seselebraan day tinaon a Paskua ed Gerizim anggad sayan agew.​—w-E, 1/1 pahina 25.

▫ Kasin kakaukolanen iray Kristianos a mangiyalibansa ed sumpad-polusyon odino panaglinis iran kundang?

Sanen sikato so wadiad dalin, agnanggunaetan nen Jesus a resolbien ya amin iray sosyal a problema ed agew to. Sano iyimpuersa nen Jehova diad panamegley na Mesianikon Panarian to iray matunong a prinsipyo to ed sankagloboan ya eskala, saray problema ed kaliber-liber so permanentin naresolbi. Kanian, saray Tasi nen Jehova so walaan na asimbang a panmoria. Say panangaro ed kaabay so mamapakiwas ed sikaran respetoen iray kayarian na arum, balet iyuuna day panangipulong ed mensahe na Panarian na Dios. (Mateo 6:33)​—w-PN 1/15, pahina 30.

▫ Diad antoran dalan a si Jesus so kinmana bilang silew na mundo? (Juan 8:12)

Intalaga nen Jesus so inkasikato ed panangipulong na maong a balita na Panarian na Dios. (Lucas 4:43; Juan 18:37) Inparungtal to met iray relihyoson katilaan tan diad ontan et nitarok so espiritual a kawayangan parad saramay relihyoson nipangaw. (Mateo 15:3-9) Manuna ed amin, pinaneknekan ton sikatoy silew na mundo diad impangibagat ed ayadyarin atooan a bilay to bilang dondon. (Mateo 20:28; Juan 3:16)​—w-PN 1/15, pahina 10-11.

▫ Antoray pigaran rason no akin a kanepegan tayo so pauleyan ed si Jehova a Dios?

Si Jehova so Sankatalbaan a Soberano, tan lapud saya ya otang tayo ed sikato so panagpauley. Ontan met, lapud makapanyarin-amin si Jehova, anggapo so sitatalonan makasumpa ed sikato, kanian agtayo nibaliwalay pauleyan ed sikato. Amin ya intelihentin pinalsa so niwala diad gagalan lingkoran da so Managgawa ra, tan saya so mangipasen ed amin a naobligan pauleyan ed Dios ed amin a pamaakaran.​—w-PN 2/1, pahina 10-11.

▫ Anto so tinmulong ed si Jose a nabarangkaan so pilawanan ed asawa nen Potifar?

Si Jose so awalaan na mabiskeg ya espiritu na kalakal. Sikato so sinononot a tuloy ed siglaotan to ed si Jehova tan naapresya ton say pilalawanan et mansumpal ed pankasalanan to aliwa labat ed asawa ton laki balet, nagkalautla ed Dios.​—w-PN 2/15, pahina 17.

▫ Anto so labay ya ibaga nen Jesus sanen inkuanton “Siak so . . . katuaan”? (Juan 14:6)

Aglabat nansalita tan nanbangat si Jesus na katuaan; sikatoy nanbilay tan inpatnag to itan. Kanian, say Inkakristiano so aliwan basta ideya; noagta dalan na panagbilay.​—w-PN 3/1, pahina 15.

▫ Anton makaligliwan leksyon so karga na Salmo 51?

Tulongan itayo na sayan Salmo a manmoria a no sikatayoy akapankasalanan balet ta peteg a magbabawi, say mangatatawen ya Ama tayo et denglen toray nangis tayo parad panangasi tan iliktar to itayo a manlapud kaandi-ilalo. Anggaman ontan, pampagaan tayo komon so antokaman a pakabalawan na ngaran nen Jehova.​—w-PN 3/15, pahina 18.

▫ Anto so isisimbolo na bautismo ed danum?

Say bautismo so palaway a panangisimbolo na dedikasyon na sakey ed si Jehova a Dios. Ipapanengneng na say pangipalgep a saramay nabautismoan so inatey ed kursoy bilay a nisentro ed inkasikara. Say iyemwas et isisimbolo ton sikaray mabilay la natan a manggaway linaway Dios, ya iyuuna itan ed saray bilay da. (Mateo 16:24).​—w-PN 4/1, pahina 6.