Sibubulos a Pastolan so Pulok na Dios

“Pastolan yo so saray polok na Dios ya wala ed sikayo, panpagaan yo ra ya ag iparalan ed kabiskegan no ag dia ed kalakal a mabolos.”​—1 PEDRO 5:2.

1. Akin a nepeg tayon ilaloan iray Kristianon mamatatken a ‘pastolan a mabolos so polok na Dios’?

SIBUBULOS a papastolan nen Jehova iray totoo to. (Salmo 23:1-4) Say “maong a pastor,” si Jesu-Kristo, so sibubulos ya angiter ed ayadyarin atooan a bilay to para’d malakarneron totoo. (Juan 10:11-15) Kanian, sinimbawa nen apostol Pedro iray Kristianon mamatatken a ‘pastolan a mabolos so polok na Dios.’​—1 Pedro 5:2.

2. Antoran tepet so manepeg a kunsideraen nipaakar ed panagpastol ya aktibidades na Kristianon mamatatken?

² Say inkamabulos so tanda na ariripen na Dios. (Salmo 110:3) Balet nagkalalo nen say Kristianon inkamabulos na sakey so nakakaukolan diad katuro bilang manangasikaso, odino katulongan a pastol. Sioparay onkualipika a magmaliw a katulongan a pastol? Anto so lalanoren na panagpastol da? Panon a nagawaan ed sankaabigan?

Panangidaulo ed Sankaabungan

3. Akin a nibaga a say paraan na panatalima na Kristianon laki ed pamilya to so walaan na epekto no kasin sikatoy onkualipikan magmaliw a pastol ed kongregasyon?

³ Sakbay a naturo so sakey a laki ed “betang ya obispo,” kaukolan ton kapeten iray Makasulatan a kakaukolanen. (1 Timoteo 3:1-7; Tito 1:5-9) Sakey ni, inkuan nen apostol Pablo a say manangasikaso so kaukolan ya “uleyan to’n maong so abung to a dili, a peteken to so saray anak to ed amin a kabintaan.” Wala so maabig a rason nipaakar ed saya, ta inkuan nen Pablo: “[No, NW] ag to amta so mangoksoy ed abung to’n dili, panon so pangimaton to ed iglesia [kongregasyon, NW] na Dios?” (1 Timoteo 3:4, 5) Sanen [sikatoy] anuro na mamasiken ed saray kongregasyon na islay Creta, nibaga ed si Tito a mananap na “laki ya angapo so kabalawan to, asawa na saksakey a bii, ya walara so anak to a mananisia, ya ag ira nidalem ed kaugsan, tan ag ira matulay ed gangan.” (Tito 1:6) On, say paraan na panatalima na Kristianon laki ed pamilya to so nepeg a nakunsidera ed panetermina no kasin sikatoy onkualipikan manakbat na ambetbetlat a responsabilidad na panagpastol ed kongregasyon.

4. Niarum ni ed regular a panagaral na Biblia tan panagpikasi, panon a nipanengneng na Kristianon atateng so panangaro ra ed saray pamilya ra?

⁴ Saray lalakin mangidadaulo’d kaabungan da diad maabig a paraan so manggawa na mas ni nen say basta regular a panagpikasi tan panaral na Biblian kaulop iray pamilya ra. Sikaray lawas akaparaan ya ontulong ed saray inadaro ra. Para’d saramay magmaliw ya atateng, onggapo iya ed kiyanak na ugaw. Kabat na Kristianon atateng a no mas maapit so itumbok da’d maridios a rutina, lalon masakbay so kipasal na anak da’d eskedyul na Kristianon aktibidades ed inagew-agew a bilay da. No panon kaabig so pangidaulo na Kristianon ama diad sarayan sirkumstansya et satan so mangisisindag ed saray kualipikasyon to bilang matatken.​—Efeso 5:15, 16; Filipos 3:16.

5. Panon a pabalegen na Kristianon ama iray anak to “diad disiplina tan manametek-kanonotan nen Jehova”?

⁵ Diad pangidaulo ed sankaabungan to, say maseet a Kristianon ama et tutumboken to so konseho nen Pablo: “Agyo pasasanoken iray anak yo, noag itultuloy yon pabalegen ira diad disiplina tan manametek-kanonotan nen Jehova.” (Efeso 6:4, NW) Say regular a panagaral na Biblian kaibay pamilya, parehon say asawan bii tan ananak so mangiyopresi na maabig iran pankanawnawa para’d maaron instruksion. Kanian naawat sirin na ananak so “disiplina,” odino manangorihen instruksion. Say nagagawan “manametek-kanonotan” so ontulong ed kada anak a nakabatan iray panmoria nen Jehova ed saray bengatla. (Deuteronomio 4:9; 6:6, 7; Uliran 3:11; 22:6) Diad makarepreskon paraan na sayan pantitipon ed espiritual, maalwar ya ontatalineng so mataliman ama legan a mantotongtong iray ilalak to. Say maabig iran manangitonton a tepet so nausar a manangguyor ed matua iran balikas da nipaakar ed saray kapagaan tan awawey da. Agkaukolan ya isipen na ama a kabat ton amin so walad malangwer a kanonotan da. Peteg, “say mangiter na ebat ed arapen na idengel to, sikato so inkaatiw tan makapabaing ed sikato,” kuan na Uliran 18:13. Natan et nalmoan na maslak ya atateng a saray situasyon a kipapaarapan na ananak da so duman tuloy ed saramay naeksperiensia ran mismo sanen malangwer ira. Kanian, panbanikelan na sakey ya ama ya aralen so abenegan tan saray detalye na problema sakbay ya ibaga to no panon so nepeg a panresolbi ed satan.​—Ipareng so Santiago 1:19.

6. Akin a say Kristianon ama so nepeg ya ontupleg ed Salita na Dios sano tutulongan toy pamilya to?

⁶ Anto so nagawa kayarin akabatan iray problema, kapagaan, tan kanonotan na ananak na sakey? Say ama a mangidadaulo diad maabig a paraan so ontutupleg ed Kasulatan, a “maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.” Bangatan toray ilalak to no panon ya iyaplika iray impuyan a giya ed Biblia. Diad sayan dalan, saramay malangwer ed edad so magmaliw ya “angapo komon so pankulangan to, a nabangatan a maong ed amin a gawa a maabig.”​—2 Timoteo 3:16, 17; Salmo 78:1-4.

7. Anton alimbawa so nepeg ya iletneg na Kristianon kaamaan no nipaakar ed panagpikasi?

⁷ Nipapaarap iray maridios a tobonbalo ed mairap iran situasyon diad saray minumundon kaeskuela ra. Kanian panon a pakepaen na Kristianon kaamaan iray katatakot na ilalak da? Say sakey a paraan et diad regular a panpikasin kaiba ira tan pangipikasi’d sikara. Sano nipaarap irayan kalangweran ed makasubok iran situasyon, nayarin aligen da so panagmatalek na atateng da ed Dios. Sakey a 13 años a bii ya ininterbio sakbay a nabautismoan diad simbolo na dedikasyon to ed Dios et insalaysay to a naeksperiensia to so panagludlurey tan panangabuso na saray kaeskuela to. Sanen indepensa to so nibased-Biblian pananisia to’d kablian na dala, arum ed saray bibii so amekpek tan nanlutda ed sikato. (Gawa 15:28, 29) Kasin sikatoy binmawi? Andi. “Nansiansia ak a nampikasi ed si Jehova a tulongan to ak a mankalmado,” insalaysay to. “Anonotan ko met so imbangat ed siak na atateng ko diad panagaral na pamilya mi nipaakar ed pankaukolan na pamokpok tayo ed inkasikatayo ed mauges.”​—2 Timoteo 2:24.

8. Panon a makapangidaulo ed maabig a paraan so matatken ya andian na ilalak ed sankaabungan to?

⁸ Say matatken ya andian na ilalak so nayarin mangiter met na magenap ya espiritual tan materyal iran probisyon para’d saramay walad sankaabungan to. Laktipen na saya so akulaw to tan nayarin saray susustinien ton Kristianon kakanayon a miaayam ed abung to. (1 Timoteo 5:8) Sirin say pangidaulo’d maabig a paraan so sakey ed saray kakaukolanen a nepeg a dampoten na lakin aturon manakbat na responsabilidad bilang matatken ed kongregasyon. Panon, sirin, so nepeg a panmoria na aturon mamasiken ed saray pribilihyon responsabilidad da ed kongregasyon?

Mangidaulon “Tekepan To na Seseg”

9. Anto so nepeg ya awawey na Kristianon kaamaan ed saray asainmin da ed serbisyo?

⁹ Diad inmunan siglon Komon a Panaon tayo, nanlingkor si apostol Pablo bilang mayordomo ed sankaabungan na Dios, say Kristianon kongregasyon ed silong na inkaulo nen Kristo. (Efeso 3:2, 7; 4:15) Insan, sinimbawa nen Pablo iray kapananisiaan to ed Roma: “Kanian . . . ed kiwawala na nanduroma a langkap ed sikatayo, onong na gracia a niiter ed sikatayo, o no panamarles [propesiya, NW], manparles [manpropesiya, NW] itayo komon onong ed katokoyan na pananisia tayo; ono ministerio, iter tayoy inkasikatayo ed ministerio; o say mangibangat, dia ed panangibangat to; o say manbilin dia ed panamilinto; say mangiter, gawaen to komon ed mabolos a linawa; say manuley, tekepan to na seseg; say mangipatnag na panangasi, tekep na liket.”​—Roma 12:6-8.

10. Diad pangasikaso’d pulok na Dios, anton alimbawa so inletneg nen Pablo para’d saray mamatatken natan?

¹⁰ Pinanonotan nen Pablo iray taga-Tesalonica: “A singa sakey ya ama ed saray dili’n anak to, a kakalaran mi kayo, tan pababayanien mi kayo, tan tatasian, ta pian komon mankurang kayo a makanakana ed Dios, a manawag ed sikayo ya onloob ed panarian tan gloria to’n dili.” (1 Tesalonica 1:1; 2:11, 12) Say simbawa so initer ed ontan a matamoy, maaron paraan a nayarian ya isulat nen Pablo: “Maoyamo kami ed pegley yo, a singa sakey a sigsiwa a managano na dili’n anak to. Ontan mi met, a maibibeg kami’n mangaro ed sikayo, apaliket kami’n toloy a mangipanabang ed sikayo, na aliwa’n say evangelio na Dios labat, no ag met saray dili’n kakamarerwa mi, ta nagmaliw kayo a sankablian ed sikami.” (1 Tesalonica 2:7, 8) Mitunosan ed singa-aman alimbawa nen Pablo, saray matoor a mamasiken so mapagan tuloy nisesengeg ed amin diad kongregasyon.

11. Panon a nipanengneng na saray aturon mamatatken so inkaligsa?

¹¹ Say inkatamoy, pati say inkaligsa so nepeg a pakabidbiran ed maaron panangasikaso ya aagamilen na matoor a Kristianon managpastol tayo. Dakel so ipapatnag na awawey da. Sisimbawaen nen Pedro iray mamatatken a pastolan so pulok na Dios ya “ag iparalan ed kabiskegan” odino ed “mabanday a pananobo.” (1 Pedro 5:2) Nipaakar ed saya, angibalikas na manamasakbay a paimano si iskolar a William Barclay, insulat to: “Wala so paraan na panangawat na betang tan pananumpal na serbisyo a kuanmono saman so makapataktakot tan makapasyodot a kimey, a kuanmono makapakesaw, kuanmono ambelat a pakasanokan. Posibli so ikerew ed sakey a lakin gawaen so sakey a bengatla, tan pian gawaen to itan, balet no gawaen to itan ed siuunganget a paraan say interon kiwas so naderal. . . . Balet talagan ibabaga [nen Pedro] ya amin a Kristiano so nepeg a maligsa ya atekepan na giwgiw pian sumpalen so ontan a serbisyo unong a sarag to, anggaman kabkabat to a sikatoy agmakanan manggawa ed satan.”

Saray Mabulos a Managpastol

12. Panon a nipatnag na Kristianon mamatatken so inkamabulos?

¹² ‘Pastolan yo so polok na Dios ya wala ed sikayo, . . . a mabolos,’ ipapaseseg met nen Pedro. Say Kristianon manangasikaso a manatalima ed karnero so ontanlan manggawa ed satan a sibubulos, diad dilin bulos a linawa to, ed silong na direksyon na Maabig a Pastol, si Jesu-Kristo. Say mabulos a panlingkor et kabaliksan to met so isusuko na Kristianon managpastol ed autoridad nen Jehova, ‘say pastor tan obispo na kakamarerwa yo.’ (1 Pedro 2:25) Sibubulos ya ipapatnag na Kristianon katulongan a pastol so respeto para’d teokratikon oksuyan. Gagawaen to itan sano ididirihe to iraman so mankakaukolan na simbawa diad Salita na Dios, say Biblia. Anggaman say eksperiensia so ontulong ed matatken a mamaalagey na simpenan na nibased-Biblian konseho, agkabaliksan na saya a sikatoy naynay a walaan na Makasulatan a solusyon ed amin a problema. Anggano amta to so ebat ed sakey a tepet, makabat so pangonsulta ton kaibay mantetepet diad Watch Tower Publication Index odino mipadpara iran indese. Sirin sikatoy manbabangat ed duaran dalan: Idedemostra to no panon so pananap na makatulong ya impormasyon tan sipapaabeban ipapanengneng toy respeto ed si Jehova diad pangipapaimano’d ipapalapag na organisasyon na Dios.

13. Antoran kundang so nagawa ta pian makatulong ed mamatatken a mangiter na mabiskeg a simbawa?

¹³ Anto so nayarin gawaen na matatken no anggapo so nipalapag a literatura na Sosyedad ed espisipikon walan problema? Andi-duaruwan, sikatoy manpikasi a nawalaan na aralem a pakatalos tan mansukimat na pigara iran Biblikon prinsipyon onaaplika ed pamaakaran. Nayarin naromog ton makagungguna met ya isuheri ed onkekerew na tulong a kunsideraen to so ehemplo nen Jesus. Nayarin itepet na matatken: “No si Jesus, say Baleg a Managbangat so wala’d situasyon mo, anto kasiy padesir mon gawaen to?” (1 Corinto 2:16) Say ontan a panagkatunongan so ontulong ed ontetepet a manggaway makabat a desisyon. Balet agaylan agmakabat ed matatken a basta mangiyopresi na personal ya opinyon to a kuanmono satan so mabiskeg a Makasulatan a simbawa! Imbes, nayarin singbaten na mamatatken iray mairap a problema ed balang sinansakey. Nayari ni ingen ya isubmiti daray importanten bengatla para’d diskusyon ed miting na ulop na mamatatken. (Uliran 11:14) Saray nansumpalan a desisyon so manggawa ed sikaran mansalitan mankakasakey.​—1 Corinto 1:10.

Makana so Kaumildian

14, 15. Anto so kakaukolanen ed mamatatken sano mangiyuuksoy ed sakey a Kristianon “wala so nasagmakan ed anton pankasalananan”?

¹⁴ Nakaukolan ya ipanengneng na Kristianon matatken so kaumildian sano ibabangat toray arum, nagkalautla sano mangokonseho’d sikara. “Agagi,” inkonseho nen Pablo, “no wala so nasagmakan ed anton pankasalananan, sikayo a naespirituan sikato komon so ipawil yo ed espiritu na tayadno.” (Galacia 6:1) Makapasagyat, say Griegon nipatalos dia ya “ipawil yo” so mitukoyan ed terminon uusaren na surhyon ed paneskribe’d panangipawil ed pukel ta pian napaliisay anggad-patey ya inkabaldado. Isisiglaot iya na leksikograpo a si W. E. Vine a panangipawil na “saramay maespiritual, ed toon nankasalanan, a singa samay akidwas a membro na espiritual a laman.” Saray kasalat a patalos et “pian ipawil ed dugan posisyon; pian itarok ed suston lira to.”

¹⁵ Say panangiyuksoy ed dilin kanonotan na sakey so agmainomay, tan nayarin mairap a tuloy ya ilira iray panagnonot na toon nankasalanan. Balet say tulong a niyopresi diad espiritu na kaumildian so maseguron naawat tekep na pisasalamat. Kanian, nepeg a tumboken na Kristianon mamatatken so konseho nen Pablo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kaoyamoan, kadeenan, kasondoan.” (Colosas 3:12) Anto so nepeg a gawaen na mamatatken sano say indibidual a mankakaukolan na panangiyuksoy so walaan na mauges ya awawey? Nepeg a sikaray ‘ontombok ed . . . kaoyamoan.’​—1 Timoteo 6:11.

Panagpastol a Walaay Panagalwar

16, 17. Sumpad antoran kapeligroan so nepeg a bantayan na saray mamatatken sano mangokonseho’d arum?

¹⁶ Wala so nagkalalo ni ed konseho nen Pablo diad Galacia 6:1. Papasesegen toray kualipikadon espiritual a lalaki: “Sikato komon [nankasalanan a sakey] so ipawil yo ed espiritu na tayadno; ya motekteken mo so inkasikan dili, ta ompan lamang natokso ka met.” Agaylan seryoson pansumpalan so niwala diad agpakatumbok ed satan a simbawa! Adagdag na saray report ed sakey a kleron Anglikanon aromog a nankasalanan na pikakalugoran ed duaran mimimisa, inkuan na The Times na London a saya so “agnailaloan a situasyon: panangonseho, nayarin singa ama odino singa agin laki so pananimbawa to a naplag so biktima ed katukson manmatalek ed sikato.” Say kolumnista ed peryodiko so anukoy ed ibabaga nen Dr. Peter Rutter a “saray manangabuson kurang ed baetan na saray pasyente tan saray lalakin managbangat da​—saray doktor, abogado, pari tan manangimpleyo—​so nagmaliw ya ibabaliwala, makaderal tan makapabaing ya epidemya ed malukak ed sekson sosyedad tayo.”

¹⁷ Agtayo nononoten a saray totoo nen Jehova so agnatalaban na saratan a tukso. Sakey a respetadon matatken a sitotoor a nanlingkor ed dakel a taon so alanor ed imoralidad lapud sikatoy nanggawa na panagpastol ya idadalaw ed agin bii sano bukbukor to. Anggaman magbabawi, abalang na agin laki so amin a pribilihyo to ed serbisyo. (1 Corinto 10:12) Panon, sirin na aturon mamasiken a gawaen so panagpastol ya ibibisita ed dalan ya ag-ira natukso? Panon dan niyarunsa so pribadan panpikasi tan pankanawnawan nakonsulta so Salita na Dios tan Kristiano iran palapagan?

18. (a) Panon a say pangiyaplika na prinsipyo ed inkaulo so ontulong ed mamatatken a paliisan so makakompromison situasyon? (b) Antoran oksuyan so nayarin gawaen para’d panggawa na panagpastol ya idadalaw ed agin bii?

¹⁸ Sakey a bengatlan nepeg a kunsideraen na mamatatken et say prinsipyo na inkaulo. (1 Corinto 11:3) No onkekerew so kalangweran na giya, panbanikelan ya ipibali iray ateng to’d diskusyon sano matukoy. Sano kerewen na kasadon agin bii so espiritual a tulong, kasin niyarunsa yon presenti so masiken to legan na ibisita yo? Anto no imposibli iya odino sikato so agmananisian mamapairap ed sikato [bii] ed arum a paraan? No ontan, gawaen so parehon oksuyan a gagawaen sano mamapastol kayo’d agin marikit. Makabat so ibisita na duaran espiritual a kualipikadon agagin lalaki ed agin bii. No agposibli iya, nayarin pilien so matukoy a panaon ed duaran agagin lalaki a misingbat a kaibay agin bii diad Kingdom Hall, nayarin diad kuarton niyamot so diskusyon. Tekep na pigaran presentin pigaran agagin lalaki tan bibii ed hall ta pian napaliisan so antokaman a pakatiroran, anggaman agnanengneng tan agnarengel so diskusyon da.​—Filipos 1:9, 10.

19. Say sibubulos a pamastol ed karnero na Dios so mangitarok na antoran maabig a resulta, tan diad siopa so pangibalikasan tayo na pisasalamat ed saray mabulos a managpastol?

¹⁹ Say sibubulos a pamastol ed karnero na Dios so mangitarok na maabig iran resulta​—mabiskeg ed espiritual, nididirihen-maong a pulok. Singa si apostol Pablo, saray kaplesan-agew a Kristianon mamatatken so mapagan tuloy ed saray kapananisiaan da. (2 Corinto 11:28) Nagkalautlan ambelat so responsabilidad ed pamastol ed totoo na Dios diad sarayan maatap a panaon. Kanian, sikatayo so peteg a misalamat ed maabig a kimey a gagawaen na agagi tayon lalakin manlilingkor bilang mamatatken. (1 Timoteo 5:17) Lapud pamebendisyon to’d sikatayo na “saray langkap ed totoo” a sibubulos ed pamapastol, itatarok tayoy dayew ed Manangiter na “amin a maong a palankap tan amin ya ayadyarin palankap,” say maaron mangatatawen a Pastol tayo, si Jehova.​—Efeso 4:8; Santiago 1:17.

Panon Mon Ebatan?

◻ Panon a makapangidaulo so laki ed sankaabungan to ed maabig a paraan?

◻ Antoran kalidad so nepeg a pakabidbiran ed panangasikaso na Kristianon mamatatken?

◻ Panon a nayarin nipanengneng na mamatatken so inkamapaabeba tan kauyamoan ed panagkonseho?

◻ Anto so makatulong pian magmaliw ya epektibo so espiritual a panangiyarunsa?

◻ Panon a napaliisan na mamatatken so makapakompromison situasyon sano mamapastol ed pulok?

[Litrato ed pahina 18]

Nepeg a mangidaulo so Kristianon matatken ed sankaabungan to diad maabig a paraan

[Litrato ed pahina 21]

Say Kristianon panagpastol so nepeg a nagawa ed kauyamoan tan asimbang a panangukom