“Patawag To so Saray Mamasiken”

“Wala ta so mansasakit ed sikayo? Patawag to so saray mamasiken na kongregasyon.”​—SANTIAGO 5:14, NW.

1, 2. (a) Diad anton mapeligron situasyon a naroromog na saray ariripen nen Jehova so inkasikara, tan panon so nayarin liknaan da? (b) Antoran tepet so mankaukolan natan na saray ebat?

WALA tayo la ed “panaon a maatap a mairap a pilimogan.” Saray totoo so masiblet, materyalistiko, makinon, mabetbet a mamapalesay gulo ed “kaunoran iran agew.” (2 Timoteo 3:1-5, NW) Bilang Kristianos a manbibilay diad kaplesan a marelmeng a sistemay bengabengatla, manisigen ed sikatayoy taloran baleg a kapeligroan: si Satanas a Diablo, say mundo na agmaridios a katooan, tan say dilin atawir tayon makasalanan iran tendensya.​—Roma 5:12; 1 Pedro 5:8; 1 Juan 5:19.

² Diad kasisigensigen ed sarayan kapeligroan, nayarin no maminsan et nalikna tayoy pakabebelatan. Iner, sirin, so pakaromogan tayo’y ontulong ed sikatayon sitotoor a mansungdo? Siopa so natuplegan tayo para’d panangiwanwan sano nidunget ed panagdesisyon nipaakar ed Kristianon aktibidades tan panagdayew tayo?

Say Wala Lan Tulong

3. Diad siopa so pakagamoran tayo na makaligliwan panamaseguro, tan panon?

³ Say pikakabat a si Jehova so Subol na biskeg tayo so mangiter na makaligliwan panamaseguro’d sikatayo. (2 Corinto 1:3, 4; Filipos 4:13) Si salmistan David, ya akaeksperiensia na madibinon tulong so angiyabawag: “Ipiam ed Jehova so dalan mo; manmatalek ka met ed sikato. Et sikato igawa to.” “Paawit mo ed Jehova so awit mo, et sikato benbenan to ka. Ag ton balot paulian so matunong a natentenyeg.” (Salmo 37:5; 55:22) Agaylay pisalamat tayo ed ontan a pananuporta!

4. Panon so pangiyoopresi nen Pedro tan Pablo na ligliwa?

⁴ Naligliwa tayo met ed pikakabat ya agtayo bukbukor so nidudunget ed saray subok tan kapeligroan. Pinaseseg nen apostol Pedro iray kaparan Kristianos: “A sikato so sumpaen yo [si Satanas a Diablo] na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo ya wala ed mundo.” (1 Pedro 5:9) Maseguron pilalek na amin a Kristianos so ontalindeg a malet ed pananisia. Tua, nayarin mabetbet a say liknaan tayo so singa si apostol Pablo a “naeletan ed balang diking.” Ingen, sikato so ‘ag nairapan.’ Singa sikato, nayarin naguguloan itayo balet “ag [tayo] naekal so panilalo.” Anggano sikatayoy papasegsegangen, “ag [itayo] akaindan.” No “gineba,” sikatayoy ‘ag abagbag.’ Kanian, ‘ag [tayo] onkapuy.’ Panbabanikelan tayo ya “ag . . . onnengneng ed saray bengatlan nanengneng, no ag ingen dia ed saray ag nanengneng.” (2 Corinto 4:8, 9, 16, 18) Panon tayon nagawaan iya?

5. Antoran nankatlon tulong so itatarok nen Jehova?

⁵ Si Jehova, say “Dumerengel na pikakasi,” so mangitatarya na nankatlon tulong. (Salmo 65:2, NW; 1 Juan 5:14) Ununa, itatarok toy direksyon diad impuyan a Salita to, say Biblia. (Salmo 119:105; 2 Timoteo 3:16) Komadua, pabibiskegen itayo na masanton espiritu a manggaway linawa to. (Ipareng so Gawa 4:29-31.) Tan komatlo, say mangaraldalin ya organisasyon nen Jehova so akaparaan ya ontulong ed sikatayo. Anto so nepeg tayon gawaen pian makaawat na tulong?

“Saray Langkap ed Totoo”

6. Anton tulong so intarya nen Jehova ed Tabera, tan panon?

⁶ Sakey ya insidenten agawa’d agew nen propeta Moises so ontulong ed sikatayon mangapresya’d maaron panagpaga nen Jehova diad pangitatarya na tulong ed ariripen To. Saman so agawa ed Tabera, a kabaliksan toy “panamool; dalang; apuy.” Diad sayan pasen na kalawakay Sinai, ya amarngat na apuy so Dios sumpad mareklamon Israelitas. “Say akilaok a karaklan” ed totoo na Israel a pinmaway ed Ehipto so akibiang ed sikara diad impangibalikas na ag-inkapnek ed taganon inter na Dios. Diad impakaimano’d sanok na Dios tan impakalikna ed belat na responsabilidad ed totoo tan saray pankaukolan da, inkelyaw nen Moises: “Agko nayarian a bokbokor a talimaen so sarayan amin a katooan ta ambelat a toloy ed siak. Et no onia labat la so gawaen mo ed siak, kerewen ko ed sika a patey moak pa la ed limam, daput no nagamoran ko so panangasim ed arapan mo; tan agmo pa komon yaboloy a nanengneng ko so ingkapangaskasian ko.” (Numeros 11:1-15) Panon so inyebat nen Jehova? Anuro na “pitomplo’n lalaki a mamasiken na Israel” tan inyan to’y espiritu to’d sikara ta pian makayari ran mibiang ed administratibon kimey nen Moises. (Numeros 11:16, 17, 24, 25) Tekep na saratan ya apabtangan a kualipikadon lalaki, akaparaan a tampol so tulong ed saray Israelita tan say “magangana a karakel na bilang.”​—Exodo 12:38.

7, 8. (a) Panon nen Jehova ya intarok so “saray langkap ed leet na totoo” diad kadaanan ya Israel? (b) Anton inmunan-siglon panangiyaplika ed Salmo 68:18 so ginawa nen Pablo?

⁷ Kayari impanayam na Israelitas diad Insipan a Dalin ed dakel a taon, piguratibon tinmatdang si Jehova ed Palandey Sion tan impagmaliw to’y Jerusalem a kabisera na tipikon panarian, a si David so ari na satan. Diad pangidayew ed Dios, “say Makapanyarinamin,” inkasil nen David so boses ton manganta: “Sika tinmokotok ka ed tagey, inbasbas mo so saray arakep; sika inawat mo so saray panangaro [langkap, NW] ed leet na saray totoo.” (Salmo 68:14, 18) On, saray adakep legan na impangautibo’d Insipan a Dalin so akataryan ontulong ed saray Levita ed kimkimey da.​—Esdras 8:20.

⁸ Diad inmunan siglo K.P., impaimano nen Kristianon apostol Pablo so mapropetikon kasumpalan na saray salita na salmista. Nansulat si Pablo: “Balet say balang sakey ed sikatayo sikato so naitdan na gracia onong ed sukat na pamalangkap nen Cristo. Kanian kuanto, Sanen sinmegep ed tagey, inawi’to ya dinakep so inkadakep, tan angiter na [saray] langkap ed . . . totoo. Natan saya so kuan a, Sikato so sinmegep, anto so labay ton ibaga no ag say sikato so linmasor met ed saray pasen a kalekleksaban dia ed dalin? Saman so linmasor sikato lanlamang met so sinmegep ed katagtageyan na amin a katawenan, pian panayaman to ya ami bengatla.” (Efeso 4:7-10) Siopa so “saman”? Anggapoy arum noag say representante nen Jehova, say Babaleg a David tan Mesianikon Ari, si Jesu-Kristo. Sikato so samay pinaoli tan intandoro na Dios ed “sankatageyan.”​—Filipos 2:5-11.

9. (a) Sioparay inmunan-siglon langkap ed totoo? (b) Sioparay modernon-agew a langkap ed totoo?

⁹ Siopa, sirin so “saray langkap ed totoo” (odino, “tugyopen na totoo”)? Isalaysay nen Pablo a say Hepen Representante na Dios et “arum [so] inyan to . . . ya apostoles; tan saray arum, profetas; tan saray arum, manangipulong na maabig a pakabat; tan saray arum, pastor tan manangibangat, ya onkana a pakayadyarian na saray sasantos, a nipaakar ed gawa na panaglinkor, anga ed kipaalagey na laman nen Cristo.” (Efeso 4:11, 12) Amin a papatumbok nen Kristo a nanlingkor bilang apostoles, propetas, manangipulong, pastol, tan manangibangat so akapanggawa ed satan diad silong na teokratikon direksion. (Lucas 6:12-16; Gawa 8:12; 11:27, 28; 15:22; 1 Pedro 5:1-3) Diad agew tayo, saray kualipikadon mamasiken ed espiritual a tinuro na masanton espiritu so manlilingkor bilang manangasikaso ed ngalngali 70,000 a kongregasyon na saray Tasi nen Jehova ed sankamundoan. Sikara so langkap ed totoo tayo. (Gawa 20:28) Diad maples a sankamundoan ya ilalaknab na panangipulong-na-Panarian, ondarakel so agagin lalakin “manadampot” tan manasakbat na saray responsabilidad a mitukoyan ed “betang na manangasikaso.” (1 Timoteo 3:1, NW) Diad pakaturo ra, sikara met so magmaliw a langkap ed totoo.

10. Panon a say deskripsyon nen Isaias ed “saray principe” so matukoy ed betang na Kristianon mamatatken natan?

¹⁰ Sarayan Kristianon mamatatken, odino langkap ed totoo, so matukoy ed deskripsyon ya inter nen propeta Isaias sanen ipapasakbay toy betang na “saray principe,” saray administrador ed silong na uley na Panarian. Balang sakey so kaukolan a magmaliw “a singa sakey ya amotan [ed] dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.” (Isaias 32:1, 2) Ipaparungtal na saya no panon a nepeg a makatulong so maaron panangasikaso na sarayan aturon lalaki. Panon kayon nagkalalon nagunggunaan ed satan?

Say Inkamabulos-linawa

11. Sano onleletey ed espiritual, panon tayon makaawat na tulong?

¹¹ Say nalelener a too so gendagendat ya onkerew na tulong. Agtalawan. Sano say bilay so wala’d kapeligroan, anggapoy mankaukolan na panangitulak ta pian onkerew na tulong. Agta aminpigan danay a kinmerew si David na tulong ed si Jehova? (Salmo 3:4; 4:1; 5:1-3; 17:1, 6; 34:6, 17-19; 39:12) Sano onleletey ed espiritual, angangko ta nalelener ed kaandi-ilalo, kaukolan tayoy manpikasi ed si Jehova tan kerewen ya iwanwan to itayo diad panamegley na masanton espiritu to. (Salmo 55:22; Filipos 4:6, 7) Anapen tayo so ligliwa diad saray Kasulatan. (Roma 15:4) Ontupleg tayo ed saray Kristianon palapagan na Watch Tower Society para’d praktikal a simbawa. Mabetbet a saya so manggawa ed sikatayon resolbien iray dilin problema tayo. Anggaman ontan, no ompatnag a natalonaan tayo na saray kairapan, nayarian tayo met a kerewen iray konseho na aturon mamatatken ed kongregasyon. Diad tua, talagan walaray panaon a kaukolan a “patawag [tayoray] mamasiken.” Akin a patawag iray Kristianon mamatatken? Panon dan natulongan iramay mankaukolan na espiritual a tulong?

12-14. (a) Anto so makabat a kurson tumboken sano say sakey so mansasakit? (b) Unong ed Santiago 5:14, antoy isisimbawan gawaen na “mansasakit” a Kristianos? (c) Diad anton nengneng na sakit so tutukoyen na Santiago 5:14, tan akin ya ontan so ebat yo?

¹² Sano sikatayoy mansakit, sikatayoy manpainawa ta pian napabiskeg so laman. Balet no mantultuloy so sakit tayo, makabat so ikerew tayo na tulong ed kualipikadon doktor. Agta ontan met so nepeg a gawaen tayo no sikatayoy onletey ed espiritual?

¹³ Imanoen so isisimbawa nen babangatan a Santiago ed sikatayo nipaakar ed saya. Kuanto: “Wala ta so mansasakit ed sikayo? Patawag to so saray mamasiken na kongregasyon; tan sikato so ipikasi ra, a poyokan da na larak ed ngaran nen Jehova.” (Santiago 5:14, NW) Diad anton nengneng na sakit dia so tutukoyen nen Santiago? Ikuan na arum a komentarista na Biblia a satan so paninagem ed pisikal, ya ikakatunongan a say pamoyok na larak so kaslakan ya agamil ed medisina diad saman a panaon. (Lucas 10:34) Sisiaen da met a wala’d kanonotan nen Santiago so mamilagron tambal diad panamegley na langkap ed panagtambal. Anggaman ontan, anto so ipapanengneng na konteksto?

¹⁴ Impandumaan so “maliket” ed “maermen.” Ipapatnag na saya a siningbat nen Santiago so espiritual a sakit. (Santiago 5:13) “Saray mamasiken [mamatatken, King James Version] na kongregasyon,” aliwan saray doktor odino saraman ni ingen so awalaan na mamilagron langkap na panagtambal, so kaukolan a tawagen. Tan anto so gawaen da? Inkuan nen Santiago: “Sikato so ipikasi ra . . . Tan say pikakasi ed pananisia so manggawa ed agmakayari a natambal.” (Santiago 5:14, 15, NW; ipareng so Salmo 119:9-16.) Diad makakumbinsen pamaneknek a tutukoyen nen Santiago so espiritual a paninagem et say katuaan ya ipapaseseg to’y panangipatua na saray kasalanan a mitukoyan ed ilalo’d panagtambal. Insulat to: “Manpapatuaan kayo na kasalanan ed sakey tan sakey, tan manpipikasian so sakey tan sakey, ta pian onabig kayo.” No say graben kasalanan so sengegan na paninagem ed espiritual, say mansasakit so nailaloan ya onabig labat no onkiwas a paborable ed pananimbawan nibase’d Salita na Dios, magbabawi, tan tundaan to’y makasalanan a kurang to.​—Santiago 5:16; Gawa 3:19.

15. Anton nengneng na kiwas so nirerekomenda ed Santiago 5:13, 14?

¹⁵ Wala ni so bengatlan naimano manlapud konsehon iiter nen Santiago. Sano maermen, nepeg a ‘manpikasi’ so Kristiano. No sikatoy maliket, “pankantaen yo na pandayew.” Kada situasyon​—balanglan say sakey so maermen odino maliket—​so mankakaukolan na aksyon. Nakakaukolan so panagpikasi ed sakey a dapag, tan makapaliket iran balikas ed sananey a dapag. Kanian, anto sirin so nailaloan tayo sanen intepet nen Santiago: “Wala ta so mansasakit ed sikayo?” Irerekomenda to lamet so positibon aksyon, on, say inkamabulos-linawa. “Patawag to so saray mamasiken na kongregasyon.”​—Salmo 50:15; Efeso 5:19; Colosas 3:16.

No Panon a Makatulong so “Saray Mamasiken”

16, 17. Panon itayon tulongan na mamasiken a mangiyaplika ed saray prinsipyoy Biblia?

¹⁶ No maminsan et mairap tayon amtaen no panon tayon iyaplika iray prinsipyoy Biblia ed personal iran sirkumstansya tayo. Dia a napaneknekan na Kristianon mamatatken a sikaray importanten tuloy a panlapuan na tulong. Alimbawa, ipikasi ra so mansasakit ed espiritual tan “poyokan da na larak ed ngaran nen Jehova” diad onsianon pamoyok da na makatambal ya instruksion a manlalapud Salita na Dios. Kanian baleg so nitulong na saray mamatatken ed espiritual ya iyaabig tayo. (Salmo 141:5) Mabetbet a say kaukolan tayo labat et say panamekder a sikatayo so mankakatunongan ed suston dalan. Say pangipanon na saray pamaakaran ed eksperiensiadon Kristianon matatken so mamabiskeg ed determinasyon tayon gawaen so maptek.​—Uliran 27:17.

¹⁷ Sano akerew ya ombisita, kaukolan a saray Kristianon mamatatken so “siaabagey a mitongtong ed nagogonigon a kakamarerwa.” Sikara met so “manuporta ed saray makapuy, [tan] masungdo ed amin.” (1 Tesalonica 5:14, NW) Say ontan a maapit, makapantatalosan a siglaotan na “saray mamasiken” tan “saray makapuy” so mamaaligwas ed kabibilay ya ompugta’d sigpot ya iyabig ed espiritual a bunigas.

Personal a Responsabilidad tan Pikakasi

18, 19. Unong ed Galacia 6:2, 5 antoy betang na Kristianon mamatatken?

¹⁸ Nepeg a sakbaten na Kristianon mamatatken so responsabilidad da ed pulok na Dios. Sikaray kaukolan a magmaliw a matulong. Alimbawa, inkuan nen Pablo: “Agagi, no wala so nasagmakan ed anton pankasalananan, sikayo a naespirituan sikato komon so ipawil yo ed espiritu na tayadno; ya motekteken mo so inkasikan dili, ta ompan lamang natokso ka met. Mantatarokan kayo na awit [saray sakbat, NW] na sinansakey, tan sumpalen yo ya ontan so gangan nen Cristo.” Insulat met na apostol: “Balang sakey taroken to naani so awi’ton dili.”​—Galacia 6:1, 2, 5.

¹⁹ Panon tayon sakbaten iray awit na arum tan ingen et awiten tayo so dilin awit tayo? Say pandumaan ed kabaliksan na saray Griegon salitan nipatalos a “saray sakbat” tan “awit” so mangiter na ebat. No say Kristiano so manirap ed espiritual satan so makapabelat ed sikato, saray mamatatken tan arum niran kapananisiaan so ontulong ed sikato, sirin tutulongan dan mangawit ed “saray sakbat” to. Anggaman ontan, say indibidual a mismo so nailaloan a manakbat na dilin “awit” ton responsabilidad ed Dios.a Sigagayaga iray mamatatken a manakbat ed “saray sakbat” na saray agagi ra diad panamegley na panamaseseg, Makasulatan a konseho, tan pikakasi. Ingen, aglaen na saray mamatatken so personal ya “awit” tayon espiritual a responsabilidad.​—Roma 15:1.

20. Akin a say pikakasi so nepeg ya agpaulyanan?

²⁰ Say pikakasi so makana tan nepeg ya agpaulyanan. Balet naromog na dakel a mansasakit ed espiritual a Kristianos a mairap so panpikasi. Sano mangipikasi so mamatatken na pananisia ed biang na mansasakit ed espiritual, anto ta so getma? Sikato so “bangonen [nen Jehova, NW],” a singa diad kaandi-ilalo, tan pabiskegen ton getmaey kurso na katuaan tan inkatunong. Say mansasakit ed espiritual a Kristiano so nayarin walaan na mauges ya awawey balet ta sikatoy ag-akagawa na arum a graben kasalanan, ta kuan nen Santiago: “No nankasalanan napaandi’ra ed sikato.” Say Makasulatan a konseho na mamatatken tekep na masimoon a pikakasi so no maminsan et managdag ed maletey ed espiritual a mangipatua ed seryoso iran kasalanan ya agawaan to tan mangipatnag na pagbabawi. Diad ontan saya so mamawalay panamerdona ed biang na Dios.​—Santiago 5:15, 16.

21. (a) Akin a masuyat iray arum a Kristianon onasingger ed mamasiken? (b) Anto so kunsideraen ed ontumbok ya artikulo?

²¹ Nidunget ed angat ed pangasikaso’d saray ulop na balo ni ya onloloob ed Kristianon kongregasyon, walaay baleg ya agawaan iray maseet a mamasiken ed pangitatarok na magenap a panangasikaso. Peteg, sarayan langkap ed totoo so maabig a probisyon a manlalapud si Jehova pian ontulong ed sikatayon mansungdo ed sarayan maatap a panaon. Ingen, walaray Kristianon masuyat a patulongan ed sikara, iisipen dan sarayan agagi so okupadon tuloy odino nabebelatan ed saray problema. Say ontumbok ya artikulo so ontulong ed sikatayon mangapresya a sarayan lalaki so maliket ya ontulong, ta mabulbulos iran manlingkor bilang katulongan a managpastol diad Kristianon kongregasyon.

[Paimano ed leksab]

Panon Mon Ebatan?

◻ Sano kaukolan tayo so tulong, antoran nankatlon tulong so itatarok nen Jehova?

◻ Sioparay modernon-agew a langkap ed totoo?

◻ Kapigan so nepeg ya iyasingger tayo ed mamasiken?

◻ Anton tulong so nailaloan tayo manlapud Kristianon mamatatken?

[Litrato ed pahina 15]

Kasin pangagayagaan yoray espiritual a gungguna na pikakasi, panagaral na Biblia, tan tulong a manlalapud saray Kristianon mamatatken?