Akin a Manlingkor ed si Jehova?

“ASINGGER la so agew nen Jehova! Say ‘baleg ya irap’ so asingger la, tan agkayo niliktar no agyo lingkoran so Dios.” No ontan so ibaga na sakey ed sikayo, panon so ikiwas yo?​—Sofonias 2:2, 3; Mateo 24:21.

Tua a nepeg tayon sinononot ed agew nen Jehova, tan say kililiktar ed asingsingger lan baleg a kairapan so mandedependi ed matoor a serbisyo’d Dios. Balet kasin sarayan katuaan so manuna iran rason no akin a mangisasaklang itayo na sagradon lingkor ed si Jehova a Dios? Akin a manlilingkor ka ed si Jehova?

Kaukolan so Suston Motibo

No say sakey a too so agmanlilingkor ed Dios a walaay dugan motibo, nayarin sikatoy ontunda no saray iilaloan to et agnagawa ed loob na sakey a peryodoy panaon. Alimbawa, arum a totoo so nanilalo ed si Jesu-Kristo ya ompawil nen 1843 odino 1844, petsan linmabas ya ag-agawa iray iilaloan da. Nipaakar ed saya, makapasagyat so insulat nen George Storrs, say manangipalapag na Bible Examiner tan diad saginonor et nagmaliw a kaaro nen Charles Taze Russell, say inmunan presidente na Watch Tower Society. Diad Bible Examiner na Setyembre 1846, insulat nen Storrs:

“Say obligasyon a lingkoran so Dios so nagkalalon nisesengeg nen say basta katuaan a say agew na Katawan so ngalngali lan mangangga. . . . Say nagawan reaksion no onlabas so 1846 tan 1847 no ontan, ya agnatasian so komaduan isasabi, so makapadismaya. Papaneknekan na eksperiensia iya​—labay kon ibaga say eksperiensia nen 1843 tan 1844. Iner so kawalaan la natan na saramay dakel a mangibabagan, ‘asagyat a manlingkor ed Dios’ unong a nakakaukolan lapud proklamasyon a panaon la na isabi na Katawan? Tan uliten ko lamet​—INER!!! Dagdaiset a sakey ed samplora ed saramay asagyat a manlingkor ed Dios so atilak a siansian manaakar ta pian gawaen so Kristianon propesyon da. Akin ya ontan? On ta sikaray abayuboan na mauges iran motibo. Say inkasiblet da so manunan bengatlan inmapela tan amaliket ed sikara. Singa ra samay managkasalanan a maniisip ed asingger lan ipatey to diad dokolan na sakit odino ed sakey a bagyo ed dayat. No sikato so kaukolan ya ompatey, sikato so magmaliw a Kristiano. No amta ton sikatoy arawi ed kapeligroan, sikato so magmaliw ya indiperente ed kapiganman.”

Manlingkor a Walaay Duga Iran Motibo

Say inkasiblet tan takot ed kadederal so nayarin mamakiwas ed arum a paspasaray a manggaway linawa nen Jehova. Arum so nayari nin ontanlan napaaripen ed ilalo na bilay diad Paraiso a sikaray kaukolan a manlingkor ed Dios lapu labat ed satan a rason. Ingen, no saray totoo a manunan pinakiwas na saratan a motibo so manisip a say agew nen Jehova tan say baleg a kairapan so arawi ni, sikaray ag-onkiling a maseseg a manlingkor ed Dios.

Siempre, aliwan kasibletan so pangayaga ed saray sipan tan nipasakbay a bendisyon na Dios. Kaliktan ton manliket itayo ed saray ilalon niletneg ed arapan tayo bilang papatumbok na Anak to, si Jesu-Kristo, “Manliket ed ilalo,” kuan nen apostol Pablo, ya inyarum to: “Masungdo ed kairapan; mansiansia a malet ed pikakasi.” (Roma 12:12) Tinekepan na pikakasi, “say liket nen Jehova” so ontulong ed sikatayon sungdoan iray subok tan siaanos a manalagar ed kasumpal na sipasipan na Dios. (Nehemias 8:10) Kaleganan to, walaan tayo na dakel iran rason a manlingkor ed si Jehova. Antoray arum ed saraya?

Obligasyon tan Pribilihyo

Bilang Sankatalbaan a Soberano, si Jehova so makanepegan tan mankaukolan na nikabkabiig a debosyon. (Exodo 20:4, 5) Kanian balang Kristiano so walaan na parehon sukat na obligasyon ed Dios balanglan say baleg a kairapan so onggapo nabuas, ed ontumbok a taon, odino diad saginonor. Sikato so naobligan manlingkor ed si Jehova ya andi-siblet lapud pangaaro ed Dios ed interon puso, kamarerwa, kanonotan, tan biskeg to. (Marcos 12:30) Isipen na arum ya asasakbay a Kristianos a say agew nen Jehova so asingsingger la, balet say iilaloan da so ag-agawa, tan sikaray inatey ya ag-akanengneng ed satan ya ebento. (1 Tesalonica 5:1-5; 2 Tesalonica 2:1-5) Anggaman ontan, no sikara so matoor angga’d patey, diad kaunoran et saraman ya alanaan a papatumbok nen Kristo so akaawat na tumang a kioli ed mangatatawen a bilay.​—Apocalipsis 2:10.

Saray bautismadon Tastasi nen Jehova so kaukolan a manlingkor ed sikato diad katooran lapud boluntaryo ran inawat so obligasyon a gawaen so linawa to. Isipen pa! Singa saray masanton angheles, nagawaan tayo so linawa na Sankatalbaan a Soberano. (Salmo 103:20, 21) Pinablin tuloy nen Jesus itan a pribilihyo ya inkuanton: “Say kanen ko sikato so pangawak na linawa na saman so angibaki ed siak, tan manumpal na kimey to.” (Juan 4:34) No sikatayo so walaan na mipadparan espiritu, sikatayo so maseseg a mangiyabawag ed saray panangidayew ed si Jehova tan ibaga ed arum iray gagala to, unong a niparungtal ed Kasulatan. Diad sayan paraan, sikatayo met so napribilihyoan ya ontulong ed espiritualidad na arum. Tan maseguron, say panggawa na linawa na Dios lapud panangaro’d sikato so sakey a makapaliket a pribilihyo, anggan kapigan so igapo na agew nen Jehova.

Mamawalay Motibasyon so Pisasalamat

Say pisasalamat ed aro na Dios diad impangitarya na dondon bagat na Anak to so nepeg a mamakiwas met ed sikatayon manlingkor ed si Jehova. Aminsan et sikatayo so niarawi ed Jehova a Dios lapud kasalanan. Anggaman ontan, inkuan nen Jesus: “Ta ontan la’y inpangaro na Dios ed mundo, ya inter to so bogbogtong ya Anak to, pian siopaman a manisia [mangagamil na pananisia, NW] ed sikato agnatawtaw, no ag ingen wala so bilay to’n andi angaan.” (Juan 3:16) Si Jehova so inmuna ed sayan pamaakaran, unong ya insulat nen Pablo: “Bangbalet say Dios ipurek to so dilin aro to ed sikatayo, ta anta, makasalanan itayo ni, si Cristo so inatey lapud sikatayo.” (Roma 5:8) Say pisasalamat para’d sayan balikas na panangaro na Dios so nepeg a mamakiwas ed sikatayon manlingkor ed sikaton sigpot-puso.

Say apresasyon para’d espiritual tan materyal iran probisyon nen Jehova so mangiter ed sikatayo na nagkalalon rason a manlingkor ed sikaton sitotoor. Say Salita na Dios so seguradon giya​—sakey a liwawa’d basbas tayo. Saray palapagan a nitarok diad panamegley na “matoor tan makabat ya aripen” so ontutulong ed sikatayon mangitukoy ed saray bilay tayo ed madibinon linawa. (Mateo 24:45-47; Salmo 119:105) Tan lapud iyuuna tayo so Panarian, mangitatarya met si Jehova na materyal ed sikatayo. (Mateo 6:25-34) Kasin ipapanengneng yo so apresasyon yo para’d sarayan bengatla?

Say pisasalamat ed inter-Dios a kawayangan manlapud palson relihyon so mamawala na sananey a rason a sitotoor a manlingkor ed si Jehova. Say relihyoson balangkantis a Babilonia a Baleg so “akayorong ed tapew na dakerakel a danum,” a kabaliksan toy “baley, tan karaklan, tan naciones, tan salita.” (Apocalipsis 17:1, 15) Ingen, agto yuyorongan iray ariripen nen Jehova, diad relihyoson impluensya tan panamanlong. Alimbawa, ipupulisay da so palson relihyoson doktrina a say kamarerwa na too so ag-ompatey. Amta ran say too so pinalsa a ‘mabilay a kamarerwa,’ a saray inaatey et “agda amta so bengatla,” tan wala so kioli. (Genesis 2:7; Eclesiastes 9:5, 10; Gawa 24:15) Kanian agda tatakotan nisay dadayewen iray inatey. Kasin say pisasalamat ed ontan ya espiritual a kawayangan et manggawa ed sikan nabarangkaan mo so apostasya tan ondapag ed puron panagdayew nen Jehova?​—Juan 8:32.

Say apresasyon ed inagew-agew a pananuporta nen Jehova so nepeg a mamadaak ed determinasyon tayon sitotoor a manlingkor ed sikato. Inyabawag nen salmistan David: “Nagalang so Katawan [Jehova, NW], a sikato agewagew ya ililibitan to itayo na awi’ tayo.” (Salmo 68:19) Ontan met inkuan na salmista: “Bangno paolian ak na amak tan inak, si Jehova ed satan ampopoen toak.” (Salmo 27:10) On, say toon sitotoor a manlilingkor ed si Jehova so makapangibantak ed piguratibon awit to, a singa saray kapagaan tan subok, ed Dios. Kasin ipapanengneng mo so apresasyon ed ag-onsaew a pananuporta nen Jehova diad sitotoor a panlingkor ed sikato?​—Salmo 145:14.

Idayew si Jehova tan say Inkaari To

Say pilalek ed pangigloria ed si Jehova so nepeg met a mamayubo ed sikatayon manlingkor ed sikato. Saray mangatatawen a palsa so nirepresenta a mangigogloria ed Dios ed saray salitan: “Sika so manepeg, Katawan mi [Jehova, NW] tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” (Apocalipsis 4:11) Indayew nen David so Dios diad impangikuan: “Kien mo, O Jehova, so kinabalgan, tan saray pakayari, tan say gloria; tan say palabo, tan say katageyan . . . kien mo so nanarian, O Jehova, . . . Saray kayamanan tan galang a manlapu ed sika, tan manuley ka ed amin . . . Dios mi, misalamat kami ed sika, tan idayew mi so magloria a ngaran mo.” (1 Awaran 29:10-13) Bilang ariripen nen Jehova, agta liknaen tayon obligadon sikatoy igloria tayo ed salita tan diad gawa legan ya aalagden so kasumpalan na saray sipan to?​—1 Corinto 10:31.

Say mabiskeg a talek ed pansalita nipaakar ed Panarian na Dios so mamalesa ni na sananey a lagyat a manlingkor ed si Jehova. Satan a mabunigas a motibo so marakep a nibalikas ed saray salita na salmista: “Amin na saray gawam pisalamatan da ka, O Jehova; tan saray pinasantos mo dakmomoan da ka. Salangbiten da so gloria na panarian mo, tan tongtongen da so pakauley mo. Ya ipakabat ed saray anak na totoo so makapanyari a gawagawa to, tan say magloria a kabingtaan na panarian to. Say panarian mo sikato so maando a panarian, tan say panuley mo miando ed saray kapolian.” (Salmo 145:10-13) Say pangiyabawag ed mensahe na Panarian so ganggan ed Kristiano tan sankaimportantian a kimey a nagagawa ed agew tayo. (Mateo 24:14; 28:19, 20) Walaan kayo ta na aralem a pilalek ya idayew si Jehova tan ibaga ed arum so nipaakar ed Panarian to?

Say panamasantos ed ngaran nen Jehova tan panangalangon ed inkasoberano to so nepeg ya importante ed sikatayo a labay tayon sikatoy sitotoor a lingkoran. Nayarin ipikasi tayo so kapasantos na ngaran nen Jehova tan kialangon na inkasoberano to. (Mateo 6:9) Onkiwas tayon mitunosan ed saray pikakasi tayo diad maparanay a pibibiang ed Kristianon ministeryo tan diad pangikayat na katuaan nipaakar ed ontanlan importante iran bengatla.​—Ezequiel 36:23; 39:7.

Gayaga tan Inkapnek

Diad matoor a panlingkor ed si Jehova, walaan tayo na inkapnek ed pamaliket ed puso to tan papaneknekan a matila so Diablo. Anggaman sititilan ibabaga nen Satanas a manlilingkor iray totoo ed Dios lapu ed sinisiblet iran rason, say matoor a serbisyo tayo ed si Jehova ya atekepan na panangaro, so mamapaneknek a say ibabaga na managbalaw so palso. (Job 1:8-12) Mangiter iya ed sikatayo na maong a rason a mantultuloy a gawaen so nikuan ed Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.” Niarum ni, sano manlilingkor tayo ed si Jehova a sitotoor anggaman ed gunaet nen Satanas a patundaen itayo, say manamenben-katooran a kurang tayo so maseguron mamabiskeg ed saray kapananisiaan.​—Filipos 1:12-14.

Say gayaga tan inkapnek ed pibibiang ed espiritual a panagani so nepeg a managdag met ed sikatayon sitotoor a manlingkor ed si Jehova. Aromog nen Jesus so liket diad pananulong ed totoo, nagkalautla diad espiritual iran dalan. Kuan na Mateo 9:35-38: “Si Jesus niliberliber to ray amin a ciudad tan balbaley, a nanbabangat ed saray sinagogas da, tan inpopulong to’y evangelio na panarian, tan nantatambal na amin a nengneng na sakit tan amin a nengneng na beblay. Et sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray carnero ya angapoy pastol da. Saman la inkuan to ed saray babangatan to, Dakel a tua so aaniyen, daiset ira balet so manani. Pikasi yo sirin ed Katawan na aaniyen, pian mangibaki na saray manani ed aaniyen to.” No say panaganin kimey so manbayag ni nen say iilaloan tayo, saya so mangiter ed sikatayo na lalon pankanawnawan makaromog na gayaga tan inkapnek diad itulong ed espiritualidad na arum. Saya met so dalan a nipanengneng tayo so aro ed kakaabay ya iilaloan ed sikatayo.​—Mateo 22:39.

Akin a Manlilingkor Ka ed Dios?

Akunsidera tayo labat iray pigara ed dakel a makakumbinsi iran rason a matoor a manlingkor ed Jehova. Maabig so sinononot a panpikasi ed saray personal a rason tayo’d panlilingkor ed Dios, ta balang sakey ed sikatayo so mikuentaan ed sikato. (Roma 14:12; Hebreos 4:13) Tan saraman so manggugunaet ed pakawalaan labat na sinisiblet iran motibo so agmangayaga ed madibinon pabor.

Anto so nailaloan no manunan panpapagaan tayo so pamasantos ed ngaran nen Jehova tan mangisasaklang na sagradon lingkor ed Dios tekep na agsinisiblet iran motibo? Siempre, bendisyonan itayo nen Jehova tan say ministeryo tayo! (Uliran 10:22) Naawat tayo met so maandon bilay lapud sikatayoy matoor a manlilingkor ed si Jehova.

[Litrato ed pahina 9]

Nilibo so manlilingkor ed si Jehova diad Hapon

[Litrato ed pahina 10]

Panlilingkor ed si Jehova diad Côte d’Ivoire

[Picture Credit Line ed pahina 8]

ANEMIRAN SERMON, nen George Storrs (1855)