No Panon a say Kakristianoan so Nagmaliw a Kabiangan na Sayan Mundo
ASABI panaon, say Imperyon Romano, ya angigapoan na akaunan Inkakristiano, so nagba. Dakel a manag-awaran so mangibabagan say inkagba so panaon met na say pinal ya impanbiktorya na Inkakristiano ed paganismo. Diad pangibalikas na midumaan a panmoria, insulat na Anglikanon obispo a si E. W. Barnes: “Legan na inkagba na primera klasen sibilisasyon, say Inkakristiano so tinmundan mablin pananisia ed si Jesus, say Kristo: nagmaliw itan a relihyon a mausar bilang manamakasakey na sosyedad ed mundon nanaapag.”—The Rise of Christianity.
Sakbay na saman ya inkagba, legan na komadua, komatlo, tan komapat iran siglo K.P., irerekord na awaran a diad dakel a dalan, sarama’y angibagan tinmumbok ed si Jesus so nansiansian biig manlapud mundo na Romano. Balet ipaparungtal to met so inkatibukel na apostasya diad doktrina, kondukta, tan organisasyon, unong ed impasakbay nen Jesus tan apostoles to. (Mateo 13:36-43; Gawa 20:29, 30; 2 Tesalonica 2:3-12; 2 Timoteo 2:16-18; 2 Pedro 2:1-3, 10-22) Diad kaunoran agawa iray pikokompromiso’d mundo na Griego-Romano, tan arum a mangibabagan Kristiano ra so angadapta’d paganismo na mundo (a singa saray piesta tan panagdayew to ed inan-diosa tan taloran dios), say pilosopiya to (a singa say sisisiaen ya ag-ompatey a kamarerwa), tan say administratibon organisasyon to (a nanengneng ed indengan na kleron klase). Saya ’man ya abulok a nengneng na Inkakristiano so anangguyor ed dakel a kabanyakan a totoo tan nagmaliw a puersan inmunan nanggunaetan a pagiten na saray imperador a Romano balet diad saginonor et inawat tan nanbanikelan dan inusar para’d dili ran gagala.
Tinalo na Mundo
Say manag-awaran na Iglesia a si Augustus Neander so angipanengneng ed saray nalalanor a kapeligroan diad sayan balon siglaotan na “Inkakristiano” tan say mundo. No isakripisyo na Kristianos so pagmaliw da a biig manlapud mundo, “say resulta et kawetwet na iglesia ed say mundo . . . no iner a say inkadalisay na iglesia so nabalang, tan, anggaman kuanmono manatalo et tataloen to’y inkasikato,” insulat to.—General History of the Christian Religion and Church, Tomo 2, pahina 161.
Onta’y agawa. Diad kagapo na komapat a siglo, si Romanon imperador a Constantino so analin mangusar ed “Kristianon” relihyon ed agew to a mamakasakey ed nabubuyak ya imperyo to. Diad sayan gagala a pinabtangan toray mankuan a Kristianos na relihyoson kawayangan tan inyalis so pigaran pribilihyo na paganon inkasaserdote ed kleron klase ra. Sasalitaen met na The New Encyclopœdia Britannica: “Intarok nen Constantino so iglesia ed iyaarawi to manlapud mundo pian awate’y responsabilidad ed sosyedad tan tinulongan so paganon sosyedad a natangguyor para’d iglesia.”
Relihyon na Estado
Kayari nen Constantino, ginetma nen Imperador Julian (361-363 K.P.) a sumpae’y Inkakristiano tan ipawil so paganismo. Balet ta sikato’y sinmaew, tan 20 a taon ed saginonor et insebel nen Imperador Theodosius I so paganismo tan inpaskar so Trinitaryon “Inkakristiano” bilang relihyon na Estado na say Imperyon Romano. Tekep na dunong ed inkasusto, say Pranses a manag-awaran a si Henri Marrou so nansulat: “Diad sampot na uley nen Theodosius, say Inkakristiano, odino ta pian lalon susto, say ortudoks a Katolisismo so nagmaliw ya opisyal a relihyon na interon Romanon mundo.” Sinandian na Ortudoks a Katolisismo so tuan Inkakristiano tan nagmaliw a “taga mundo.” Sayan relihyon na Estado so duman tuloy manlapud relihyon na akauna iran patumbok nen Jesus, a nipaakar ed sikara et inkuanto: “Aliwa kayo a taga mundo.”—Juan 15:19.
Say Pranses a manag-awaran tan pilosopo a si Louis Rougier so nansulat: “Legan na ilalaknab to, asagmak na Inkakristiano so baleg a pananguman angga’d punton agla nabidbir. . . . Say sankaunaan ya iglesia na saray duka, a nambilay ed panangasi na arum so nagmaliw ya agnatalon iglesia ya akipakna’d peles iran sekular a pakauley sanen agto ’ra ayarian a banlongan.”
Diad kagapo na komaliman siglo K.P., say Romano Katolikon “Santo” a si Augustine so nansulat ed manunan sulat to a The City of God. Ditan et dineskribe to ’ray duaran syudad, “diad say Dios tan diad say mundo.” Kasin sayan sulat so angipabitar ed panbiigan na saray Katoliko tan say mundo? Peteg ya andi. Kuan nen Propesor Latourette: “Diretsaan a binidbir nen Augustine [a] saray duaran syudad, say mangaraldalin tan say mangatatawen so mantekep.” Imbangat nen Augustine a “say Panarian na Dios so ginmapo la’d sayan mundo diad inkiletneg na [Katolikon] iglesia.” (The New Encyclopœdia Britannica, Macropœdia, Tomo 4, pahina 506) Kanian, anggan anto’y orihinal a gagala nen Augustine, saray teorya to so angapekta diad pibabalin maong na Iglesia Katolika ed mapulitika iran kurang na sayan mundo.
Naapag ya Imperyo
Nen 395 K.P., sanen inatey si Theodosius I, opisyal ya apaldua’y Imperyon Romano. Say Bukig, odino Byzantine, Imperyo a say kabisera to et diad Constantinople (datin Byzantium, a natan et Istanbul), tan say Sagur ya Imperyo, a say kabisera to (kayari 402 K.P.) et diad Ravenna, Italya. Bilang nansumpalan, naapag so Kakristianoan ed pulitika ontan met ed relihyon. No nipaakar ed siglaotan na Iglesia tan Estado, say iglesia ed Mamabukig ya Imperyo so tinmumbok ed teorya nen Eusebius na Caesarea (a kapanaonan nen Constantino a Baleg). Diad pangibabaliwala’d Kristianon prinsipyo a pagmaliw a biig ed mundo, inkatunongan nen Eusebius a no say imperador tan say imperyo so nagmaliw a Kristiano, say Iglesia tan Estado so magmaliw a sakey a Kristianon sosyedad, ya onakton manangilaman na Dios so imperador diad dalin. Diad inkalapagan, sayan siglaotan na Iglesia tan Estado so tutumboken la na saray iglesia na Mamabukig ya Ortudoks ed loob na saray siglo. Diad libro ton The Orthodox Church, impanengneng nen Timothy Ware, obispon Ortudoks, so resulta: “Say nasyonalismo so mamapaermen ed Ortudoks diad loob la na apalabas a samploran siglo.”
Diad Sagur say unor a Romanon imperador so inekal nen 476 K.P. na managlubak iran tribu na Aleman. Saya so ananda’d anggaan na Mamasagur ya Imperyon Romano. Nipaakar ed nansumpal a mapulitikan luang, ibabaga na say The New Encyclopœdia Britannica: “Aporma’y balon pakayari: say Iglesia Romana, ya iglesia na obispo ed Roma. Sisiaen a mismo na sayan iglesia a kasandi na naandi lan Imperyon Romano.” Ituloy ya ibaga na satan ya ensiklopedia: “Saray Romanon papa . . . so angilaknab ed sekular a pangayarian na gobierno’d iglesia diad labas na saray ketegan na iglesia-estado tan anibukel ed inkuan a teoryan duaran kampilan, a mangibabagan aglabat inter nen Kristo ed papa so espiritual a pakayari ed iglesia noag ontan met ed sekular a pakayari ed minumundon panpanarian.”
Nasyonal Iran Protestantin Iglesia
Diad loob na Kapegleyan Iran Panaon, namparan saray relihyon ya Ortudoks tan Katoliko so nantultuloy ya akibabalin tuloy ed saray pulitika, minumundon kaugsan, tan bakabakal. Kasin say Protestantin Repormasyon na koma-16 a siglo so ananda ed ipapawil na tuan Inkakristiano, a biig manlapud mundo?
Andi. Nabasa tayo’d The New Encyclopœdia Britannica: “Saray Managreporma a Protestanti ed saray tradisyon na Lutheran, Calvinista, tan Anglikano . . . so mapekder a nansiansia’d saray ideya nen Augustine, a liknaen dan nagkalautlan walaan na pirelasyonan ed teologo to. . . . Balang sakey ed taloran manunan Protestanti iran tradisyon na koma-16 a siglo ed Europa . . . so akaromog na suporta manlapud sekular iran pakauley diad Saxony [sentron Alemanya], Switzerland, tan Inglatera tan nansiansia’d parehon kipapasen no ipareng ed sananey ya estado a singa say midieval [1100 A.D. ya angga’d 1500 A.D.] ya iglesia.”
Imbes ya ipawil so puron Inkakristiano, intarok na Repormasyon so baleg a bilang na iglesia ed nasyon odino teritorya a nansalita na panangala na lupa ed saray mapulitikan estado tan aktibon tuloy a sinmuporta’d bakabakal da. Diad tua, namparan saray iglesia Katolika tan Protestanti so angiyalibansa’d relihyoson bakabakal. Diad libro ton An Historian’s Approach to Religion, insulat nen Arnold Toynbee nipaakar ed saratan a bakal: “Impanengneng da ’ray Katoliko tan Protestanti ed Pransya, Netherlands, Alemanya, tan Ireland, tan mankakaribal iran sekta na saray Protestanti diad Inglatera tan Scotland, ed maruksan panesebel da ed balang sakey diad panamegley na puersa na armas.” Saray kaplesan-agew a gutgutan a mangaapag ed Ireland tan say datin Yugoslavia so mangipapanengneng a saray iglesia na Romano Katoliko, Ortudoks, tan Protestanti so siansian mibabali ed saray kurang na sayan mundo.
Kasin kabaliksan na sayan amin a say tuan Inkakristiano, a biig manlapud mundo, so agla onkukurang ed dalin? Say ontumbok ya artikulo so mangebat ed satan a tepet.
[Kahon/Litrato ed pahina 10, 11]
NO PANON A SAY “INKAKRISTIANO” SO NAGMALIW A RELIHYON NA ESTADO
AGGINAGALAN balot a say Inkakristiano so magmaliw a kabiangan na sayan mundo. (Mateo 24:3, 9; Juan 17:16) Ingen, ibabaga ed sikatayo na saray libro’d awaran a diad komapat a siglo K.P. et nagmaliw ya opisyal a relihyon na Estado so “Inkakristiano” ed Imperyon Romano. Panon ya agawa iya?
Nanlapulad si Nero (54-68 K.P.) ya angga’d komatlon siglo K.P., amin a Romanon imperador a balanglan aktibon amasegsegang ed Kristianos odino angiyabuloy ed kapasegsegang da. Si Gallienus (253-268 K.P.) so sankaunaan a Romanon imperador ya angipaakseb na ganggan a mamaulyan ed sikara. Anggano onman, say Inkakristiano so nisebel a relihyon ed interon imperyo. Kayari nen Gallienus, nantultuloy so panamasegsegang, tan diad silong nen Diocletian (284-305 K.P.) tan saray kasublayan to, satan so pinmalalo ni ingen.
Sinmabi so kapantokan diad kasakbayan na komapat a siglo ed inkuan ya inkakumberti nen Imperador Constantino I ed Inkakristiano. Nipaakar ed sayan “inkakumberti,” kuan na libron Pranses a Théo—Nouvelle encyclopédie catholique (Théo—New Catholic Encyclopedia): “Imbaga nen Constantino a sikato’y Kristianon imperador. Balet diad katuaan to et sikato’y binautismoan labat sanen manpapanabos.” Anggaman kuan, nen 313 K.P., si Constantino tan say kaiba ton imperador a si Licinius so angipaakseb na ganggan ya angipagamor na relihyoson kawayangan ed saray Kristiano tan pagano. Kuan na New Catholic Encyclopedia: “Say impangilaknab nen Constantino na kawayangan ed panagdayew na Kristianos, ya angipatnag a say Inkakristiano so opisyal a binidbir bilang religio licita [unong ed ley a relihyon] nilikud ed paganismo, so sakey a kiwas na rebelyon.”
Anggaman ontan, iyaabawag na The New Encyclopœdia Britannica: “Agto [Constantino] ginawa so Inkakristiano a relihyon na imperyo.” Insulat na manag-awaran a Pranses a si Jean-Rémy Palanque, membro na Institute of France: “Anggaman ontan, say Romanon Estado . . . so nansiansia a talagan pagano. Tan anggano tinumbok nen Constantino so relihyon nen Kristo, siansian ag-amatunda’d saman a situasyon.” Diad libron The Legacy of Rome, inkuan nen Propesor Ernest Barker: “[Say impanbiktorya nen Constantino] so agnansumpal ed kiletneg a tampol na Inkakristiano bilang relihyon na Estado. Kontento la si Constantino a mamidbir ed Inkakristiano bilang sakey ed saray publikon panagdayew na imperyo. Diad tinmumbok a pitomplon taon, saray kadaanan a paganon ritual so opisyal ya inagamil ed Roma.”
Kanian diad sayan punto, say “Inkakristiano” so legal a relihyon na Imperyon Romano. Kapigan a nagmaliw itan ya ontan, unong ed nagnap a kabaliksan na balikas, ya opisyal a relihyon na Estado? Nabasa tayo’d New Catholic Encyclopedia: “Say totontonen [nen Constantino] so intuloy na saray kasublayan to nilikud ed si Julian [361-363 K.P.], a say panamasegsegang ed Inkakristiano so apatundan tampol diad impatey to. Diad kaunoran, diad unor a kakapat na koma-4 a siglo, si Theodosius a Baleg [379-395 K.P.] so nanggawa’d Inkakristiano ya opisyal a relihyon na Imperyo tan anebel ed publikon paganon panagdayew.”
Diad pamekder ed saya tan diad pangiparungtal no anto iyan balon relihyon na Estado, insulat na eskolar tan manag-awaran ed Biblia a si F. J. Foakes Jackson: “Diad silong nen Constantino say Inkakristiano tan imperyon Romano so sanulop. Diad silong nen Theodosius sikaray nankasakey. . . . Nanlapulad satan a say titulon Katoliko so nigana para’d saramay mamapagalang ed Ama, Anak tan Masanton Espiritu a walaan na pareparehon respeto. Say interon relihyoson totontonen na sayan imperador so nipaarap ed sayan gagala, tan nansumpal ed impagmaliw na Katolikon Pananisia bilang legal a relihyon na saray Romano.”
Insulat nen Jean-Rémy Palanque: “Si Theodosius, anggaman mibabakal ed paganismo, so angabobon met ed ortudoks [Katolikon] Iglesia; ya inganggan to nen 380 K.P. ed amin ya uuleyan to a mangagamil ed pananisia nen Papa Damasus tan say [Trinitaryon] obispo na Alexandria tan angekal ed saray kritiko na kawayangan ed panagdayew. Say baleg a Konsilyo na Constantinople (381) so angondena lamet ed amin a sisisiaen a sumpa’d iglesia, tan sinegurado na imperador ya anggapo so manuportan obispo ed saraman. Say Nicean [Trinitaryon] Inkakristiano so peteg tan tuan nagmaliw a relihyon na Estado . . . Say Iglesia so maapit a nikasakey ed Estado tan nangayaga ed nikabkabiig a suporta to.”
Kanian, aliwan say ag-alaokan ya Inkakristiano ed agew na apostoles so nagmaliw a relihyon na Estado na Imperyon Romano. Noag say komapat-a-siglon Trinitaryon Katolisismo, ya impilit ya impaakseb nen Imperador Theodosius I tan inagamil na Iglesia Katolika Romano, a peteg a kabiangan na mundo ed apalabas ya angga ni’d natan.
[Credit Line]
Imperador Theodosius I: Real Academia de la Historia, Madrid (Foto Oronoz)
[Picture Credit Line ed pahina 8]
Scala/Art Resource, N.Y.