Saray Espiritual a Bengatla so Iyuuna na Kristianon Pamilya

“Mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan.”​—1 PEDRO 3:8.

1. Anton panagpili so niwalad amin ed sikatayo, tan panon a makaapekto ed arapen tayo so pinili tayo?

MATUKOTUKOY ya onaaplika so asaglawin teksto ed sankabayagan lan institusyon na katooan​—say pamilya! Tan agaylan makanakana a saray ateng so mangipanengneng na panangidaulo ed sarayan pamaakaran! Saray positibo tan negatibon kalidad da so gendagendat a naimano ed saray anak da. Ingen, say pankanawnawan manpili so walad kada membro na sakey a pamilya. Bilang Kristianos, makapanpili tayo ed pagmaliw a maespiritual a totoo odino silalaman a totoo. Sikatayo so makapanpili ed pamaliket odino ed pamaermen ed Dios. Satan a panpili so nayarin mansumpal balangla ed bendisyon, andi-angaan a bilay tan deen​—odino sakey ya ayew, maandon patey.​—Genesis 4:1, 2; Roma 8:5-8; Galacia 5:19-23.

2. (a) Panon nen Pedro ya impanengneng so panagpaga to ed pamilya? (b) Anto so espiritualidad? (Nengnengen so paimano’d-leksab.)

² Saray salita na apostol ed 1 Pedro kapitulo 3, bersikulo 8, so tinmumbok a tampol kayari na pigaran maabig a simbawa to ed saray sanaasawa. Talagan interesado si Pedro ed pankaabigan na saray Kristianon pamilya. Kabat ton say mabiskeg ya espiritualidad so tombok na sakey a nankakasakey, maaro tan maabagey a sankaabungan. Kanian, impatnag to’d bersikulo 7 a no say simbawa to ed saray asawan lalaki so imbaliwala, say resulta et espiritual a babeng ed baetan na asawan laki tan si Jehova.a Saray pikakasi na asawan laki so nasebelan no paulyanan toray pankaukolan na asawa to odino sikatoy maruksan pidenengan to.

Si Kristo​—Sakey ya Ayadyarin Alimbawa na Espiritualidad

3. Panon nen Pablo ya impabitar so alimbawa nen Kristo para’d asawan lalaki?

³ Say espiritualidad na sakey a pamilya so dependi’d maong ya alimbawa. Sano aagamilen na asawan laki so Inkakristiano, sikato so mangiyuuna ed panangipanengneng na espiritual a kalidades. No agmananisia so asawan laki, say ina so gendagendat a magunaet a manakbat ed responsabilidad. Diad balanglan kaso, si Jesu-Kristo, say ayadyarin modelo so nepeg a tumboken. Say kondukta to, saray salita to, tan say panagnonot to so lawas makapaseseg tan makaligliwa. Naulit-ulit, ya ipapaimano nen apostol Pablo ed managbasa so maaron padron nen Kristo. Alimbawa, inkuanto: “Say asawan laki sikato so olo na asawan bii, a singa si Cristo met sikato so olo na iglesia, a sikaton dili so manangilaban ed laman. Asawan lalaki, [itultuloy ya] aroen yo so saray kaasawaan yo, a singa met si Cristo ya inaro to so iglesia, tan insaklang to so inkasikato nisengeg ed sikato.”​—Efeso 5:23, 25, 29; Mateo 11:28-30; Colosas 3:19.

4. Anton alimbawa na espiritualidad so inletneg nen Jesus?

⁴ Si Jesus so matalonggaring ya alimbawa ed espiritualidad tan inkaulon nipatnag ed aro, panangasi, tan panangabagey. Sikato so walaan na dilin-panagsakripisyo, aliwan dilin-panagpaliket. Lawas ton indalangirang so Ama to tan nirespetoy inkaulo to. Tinumbok to so panangiwanwan na Ama to, kanian nikuanton: “Angapo so nagawaan ko ed inkasiak: onong na narengel ko, mangokomak, et say panangokom ko matonong; ta ag ko anapen so linawak a dili, noag say linawa na saman so angibaki dia ed siak.” “Angapo so gawaen ko ed inkasiak, noag onong na inbangat na Ama ed siak, salitaen ko so saraya’n bengatla.”​—Juan 5:30; 8:28; 1 Corinto 11:3.

5. Diad pangitatarok para’d saray patumbok to, anton alimbawa so impanengneng nen Jesus para’d asawan lalaki?

⁵ Anto so kabaliksan na saya para’d asawan lalaki? Kabaliksan ton say modelon nepeg dan tumboken ed amin a bengatla et si Kristo, a lawas impauleyan ed Ama to. Singa bilang, no panon ya itatarok nen Jehova so tagano para’d amin a pormay-bilay ed dalin, ontan met a si Jesus so angitarok na tagano para’d saray patumbok to. Agto pinaulyan iray manunan materyal a pankaukolan da. Saray milagro to ed impamakan na 5,000 a lalaki tan ed 4,000 so prueba na panagtalima tan responsablin liknaan to. (Marcos 6:35-44; 8:1-9) Ontan met natan, saray responsablin ulo na pamilya so manaasikaso’d pisikal iran pankaukolan na sankaabungan da. Balet kasin say responsabilidad da so angangga ditan?​—1 Timoteo 5:8.

6. (a) Anton makana iran pankaukolan na pamilya so nepeg ya asikasoen? (b) Panon a nipanengneng na asawan lalaki tan kaamaan so pakatalos?

⁶ Saray pamilya so walaan met na arum niran lalon importantin pankaukolan, a singa say tinukoy nen Jesus. Sikaray walaan na espiritual tan emosyonal iran pankaukolan. (Deuteronomio 8:3; Mateo 4:4) Sikatayoy mankikimey a kaibay arum, namparan diad pamilya tan diad kongregasyon. Nakaukolan tayo so maong a giya a mamayubo’d sikatayon magmaliw a makapabiskeg. Diad sayan pamaakaran, walaay manunan betang iray asawan lalaki tan kaamaan​—nagkalalo no sikaray mamatatken odino ministeryal ya ariripen. Saray mansusulon atateng so mankaukolan met na mipadparan kalidades sano tutulongan daray anak da. Nepeg a natalosan na saray ateng so aliwa labat lan say ibabaga na saray membro na pamilya noag ontan met no antoy agni nibaga. Kakaukolanen na satan so pakatebek, panaon, tan anos. Saya so sakey a rason no akin a nikuan nen Pedro a saray asawan lalaki so nepeg a magmaliw a makunsidera tan miamong ed kaasawaan da unong ed pikakabat.​—1 Timoteo 3:4, 5, 12; 1 Pedro 3:7.

Saray Kapeligroan a Nepeg a Paliisan

7, 8. (a) Anto so nakaukolan ta pian napaliisan na sakey a pamilya so espiritual ya inkakneb? (b) Anto so nakaukolan nilikud ed maong a panangigapo ed Kristianon kurso? (Mateo 24:13)

⁷ Akin ya ontanlan importanti so pangasikaso ed espiritualidad na pamilya? Diad pangiyilustra, nitepet tayo, Akin ya importanti a say piloto na barko so mangimanon maong ed saray tsart to sano igigiya to so barkon walad mapeligron danudanum a walaan na kutlaong? Nen Agosto 1992 say manbabaroy a barkon Queen Elizabeth 2 (QE2) so indalan ed lugar a kutlaong na saray buer tan batobato a ditan et nikuan a kaslakan so pakasasagmakan na kalilingo ed nabigasyon. Sakey a lokal a manaayam diman so nankomento: “Dakel a karera so sinmaew lapud satan a lugar.” Atalapos na QE2 so sakey ya akaturon bengatla’d dalem na danum. Nansumpal itan ed magastos ya inkalingo. Say kakatlon kabiangan na barko so aderal, tan say barko so kinaukolan a patundaen ed serbisyo to ed loob na pigaran simba pian naapiger.

⁸ Ontan met, no agmaalwar a surien na “piloto” na pamilya so tsart, say Salita na Dios, say pamilya to so magmainomay a managmak na espiritual a pakasakitan. Para’d sakey a matatken odino ministeryal ya aripen, ompan say resulta et say pakabalang to na saray pribilihyo’d loob na kongregasyon tan angangko ta seryoson pakaderal ed arum a membro na pamilya. No ontan, balang Kristiano so kaukolan a manasikaso ta pian agnatalonaan na espiritual ya agpangingalngalep, a manmamatalek lambengat ed datin niyugalin maong a panagaral tan seseg. Diad Kristianon kurso tayo, agmagenap so pakawalaan lambengat na maabig ya igagapo; say panbaroy so nepeg a matalonan nasumpal.​—1 Corinto 9:24-27; 1 Timoteo 1:19.

9. (a) Panon kaimportanti so personal a panagaral? (b) Antoran mitunosan a tepet so nitepet tayo ed inkasikatayo?

⁹ Ta pian napaliisan iray espiritual a kutlaong, batobato, tan buer, sikatayo so kaukolan a mansiansian mibansag ed panaon na “saray tsart” tayo diad regular a panagaral ed Salita na Dios. Agtayo makapandependi lambengat ed saray manunan aral ya angitarok ed sikatayo’d katuaan. Say espiritual a biskeg tayo so dependi ed regular tan asimbang a programa na panagaral tan serbisyo. Alimbawa, kaleganay iyaatendi tayo’d Panagaral na Panag-Bantayan ed kongregasyon na sayan mismon kopyan bebembenan tayo, tepetan tayo so inkasikatayo, ‘Kasin siak, odino sikami bilang pamilya, so peteg a nanaral ed sayan artikulo, ya inanap miray teksto tan dinalepdep so kiusaran da? Odino kasin ginulisan mi labat iray ebat? Ompan agmi anggan binasa ni ingen so artikulo sakbay ya onatendi’d miting?’ Saray matuan ebat ed sarayan tepet so nayarin mamaliing ed sikatayon seryoson nonoten iray ugali tayo’d panagaral tan managyat na pilalek ya onaligwas​—no satan so nakakaukolan.​—Hebreos 5:12-14.

10. Akin ya importanti so dilin-panangusisa?

¹⁰ Akin ya importanti so ontan a dilin-panangusisa? Lapud manbibilay tayo’d mundon dominado na espiritu nen Satanas, mundon, diad dakel a masilib a paraan et mangugunaet a maneral ed pananisia tayo’d Dios tan ed sipasipan to. Mundon say kaliktan to et pansiansiaen to itayon ontanlan okupado ya anggapolay panaon tayon mangasikaso’d saray espiritual a pankaukolan. Kanian nitepet tayo’d inkasikatayo, ‘Kasin say pamilyak so mabiskeg ed espiritual? Kasin siak bilang sakey ya ateng so mabiskeg unong ed nepeg kon pagmaliwan? Kasin sikami bilang sakey a pamilya so mamabayubo’d espiritual a puersan mamapakiwas ed kanonotan ya ontutulong ed sikatayon mandesisyon unong ed inkatunong tan katooran?’​—Efeso 4:23, 24.

11. Akin a makagungguna ed espiritual iray Kristianon miting? Mangiter na sakey ya alimbawa.

¹¹ Say espiritualidad tayo so nepeg a napabiskeg na kada miting ya aatendian tayo. Saraman a mablin oras ed Kingdom Hall odino diad Panagaral na Libro ed Kongregasyon so ontutulong ta pian narepreskoan tayo kayari na andukey iran oras a kaukolan tayon usaren ed pangunaet a makaliktar ed maruksan mundo nen Satanas. Agaylan makarespresko, alimbawa, so panaral ed libron The Greatest Man Who Ever Lived! Saya so ontulong ed sikatayon makagamor na magmaong a pakatalos ed si Jesus, say bilay to, tan say ministeryo to. Maalwar a basaen tayoray nisitan kasulatan, personal a mansukimat, ta pian dakel so naaralan tayo manlapud inletneg nen Jesus ya alimbawa.​—Hebreos 12:1-3; 1 Pedro 2:21.

12. Panon a suboken na lawak a ministeryo so espiritualidad tayo?

¹² Say sakey a maabig a subok ed espiritualidad tayo et say Kristianon ministeryo. Ta pian makapansiansia ed pormal tan impormal a panagtasi tayo, mabetbet diad arap na agmananginunang odino onsusumpan lapag, kaukolan tayo so dugan motibo, panangaro ed Dios tan panangaro ed kaabay. Siempre, anggapoy siopaman a malabay a nipulisay, tan nayarin nagawa itan ed lawak a ministeryo tayo. Balet tandaan tayo a say nipupulisay et say maong a balita, aliwan sikatayo bilang indibidual. Inkuan nen Jesus: “No say mundo bosolen to kayo, amta yo a binosol to ak ya akauna nen sikayo. No taga mundo kayo say mundo aroen to so saray kayarian to. Balet lapu’d aliwa kayo a taga mundo, no ag say pinili ta kayo ed mundo, kanian say mundo bosolen to kayo. . . . Balet amin irayan bengabengatla gawaen da ed sikayo nisengeg ed ngaran ko, lapu’d ag da amta so angibaki ed siak.”​—Juan 15:18-21.

Saray Kiwas so Mangipapasabi na Mabibiskeg a Mensahe Nen Saray Salita

13. Panon a napaandi na sakey a too so espiritualidad na pamilya?

¹³ Anto so nagawa ed sakey a pamilya no amin nilikud ed sakey so manrerespeto ed inkalinis tan inka-oksuy na abung? Diad sakey ya agew na mamauran, amin nilikud ed samay malingwan so maalwar a tuloy pian agmakapangawit na bakat na pitek ed loob na abung. Saray bakat na mapitek a sali ed inerman so paneknek a saman a too et balasubas, a sengegay kaaruman a kimey para’d arum. Ontan met so onaplika no nipaakar ed espiritualidad. Anggan say sakey a masiblet odino mapaulyan a too so makapanmantsa ed reputasyon na pamilya. Amin ed sankaabungan, aliwan saray ateng lambengat, so nepeg a manbanikel a mangisindag ed kanonotan nen Kristo. Agaylan makarepresko sano amin so maniiban mankimey a walaan na ilalo ed andi-anggaan a bilay! Say lira-na-kanonotan na satan a pamilya et espiritual (balet aliwan dilin-matunong). Mataltalag iray pakasuysuyan na panamaulyan ed espiritualidad ed ontan a sankaabungan.​—Eclesiastes 7:16; 1 Pedro 4:1, 2.

14. Antoran materyal a tukso so iiyan nen Satanas ed dalan tayo?

¹⁴ Amin tayo so walaan na manuna iran materyal a pankaukolan a nepeg a nasustine ta pian mantultuloy so inagew-agew a kabibilay tayo. (Mateo 6:11, 30-32) Balet mabetbet a saray pankaukolan tayo so natatalonaan na saray bengatlan kaliktan tayo. Alimbawa, iyoopresi na sistema nen Satanas ed sikatayo so amin a nengneng na agamilen tan kagawaan. No say naynay a labay tayo et say sankabaloan tan say uso, agtayon balot napenek, ta say sankabaloan so maganon ondaan, tan nipanengneng lamet so sananey a balon modelon produkto. Say komersyoy mundo so angiletneg na sikulon agbalot ontunda’d itetelek to. Satan so manasagyat ed sikatayon mananap na nagkalalon dakel a kuarta ta pian napenek iray ondaraak a bengatlan panpipilalekan. Saya so nayarin nitonton ed “katoksoan tan say kalot,” odino “amin a nengneng na mauges.” Nayarin mansumpal itan ed ag-asimbang a panagbilay ya ondaraiset lan ondaraiset so panaon para’d espiritual a kimey.​—1 Timoteo 6:9, 10; The Jerusalem Bible.

15. Diad anton paraan a makana so alimbawan ipapanengneng na ulo na pamilya?

¹⁵ Dia lamet, a say alimbawan ipapanengneng na ulo na Kristianon sankaabungan so importantin tuloy. Say asimbang ya awawey to ed sekular tan espiritual iran responsabilidad so nepeg ya onkanan inspirasyon ed arum a membro na pamilya. Maseguron makapadismaya no say ama so ekselenti ed insangin panangibangat balet ta onsaew a manumpal ed saray dili ton salita. Agmanbayag et magmainomay a naimano na saray anak so pananontonan ton gawam-so-ibabagak, aliwan-say-gagawaen ko. Ontan met, say sakey a matatken odino ministeryal ya aripen a mamapaseseg ed arum a mibiang ed pankabkaabungan a ministeryo balet ta mataltalag a nanengneng a kaulop toy pamilya ed satan a kimey so agmanbayag et nabalang toy kredibilidad, parehon diad pamilya tan diad kongregasyon.​—1 Corinto 15:58; ipareng so Mateo 23:3.

16. Antoran tepet so nitepet tayo ed inkasikatayo?

¹⁶ Kanian, walay gungguna na panusisa tayon maong ed kabibilay tayo. Kasin sikatayo so okupadon manadampot na minumundon itatalona tan diad ontan et napapaulyanan tayo so iyaligwas ed espiritual? Kasin sikatayo so onaaligwas ed minumundo iran gegemtan balet ta onkekesay diad kongregasyon? Tandaan so simbawa nen Pablo: “Matua so saya a salita, No wala so maliket ed betang ya obispo, maong a gawa so pirawa’to.” (1 Timoteo 3:1) Say liknaan na inkaresponsabli ed kongregasyon so lalon nipanengneng ed espiritualidad tayo nen say promosyon ed trabaho. Say maalwar ya inkasimbang so kaukolan a pansiansiaen ta pian saray amo tayo et agnaabuloyan a mangontrol ed sikatayo a singano sikaray angitalagaan tayo na inkasikatayo tan aliwan ed si Jehova.​—Mateo 6:24.

Say Makabaliksan a Pitatalosan so Mamaaligwas na Espiritualidad

17. Anto so ontulong diad panamayubo na peteg a panangaro ed sakey a pamilya?

¹⁷ Nilaksan ayaman natan so magmamaliw a panagpundoan. Panon? Saray membro na pamilya so onsesempet labat pian diman onugip tan mangan, tan kayari to et sikaray onalis a tampol. Mataltalag iran magayagan mandudungo. Anggapo la so ampetang a liknaan na inkamaapit ed pamilya. Say nansumpalan? Kulang so pitatalosan, anggapoy makabaliksan a tongtongan. Tan satan so nayarin mansumpal ed kakulangan na interes ed arum a membro, angangko ta say kakulangan na peteg a panagpaga. Sano inaro tayo so balang sinansakey, mangipanaon tayon mitongtong tan ontalineng. Mamaseseg tan ontulong itayo. Lalanoren na sayan aspekto na espiritualidad so makabaliksan a pitatalosan ed baetan na sanasawa tan ed saray ateng ed ananak.b Kakaukolanen to so panaon tan taktika legan a tatangguyoren tayo so sinansakey a manginabang ed saray liket, eksperiensia, tan problema da.​—1 Corinto 13:4-8; Santiago 1:19.

18. (a) Anto so mabetbet a sakey a manunan babeng ed pitatalosan? (b) Niletneg ed anto iray makabaliksan a siglaotan?

¹⁸ Say maong a pitatalosan so mankakaukolan na panaon tan sagpot. Kabaliksan to’y panangibiig na panaon a mitongtong tan ontalineng ed balang sinansakey. Sakey ed saray sankabalgan a babeng ed saya et say manangopot na panaon a kagawaan a galgalangen ed dakel iran ayaman​—say TV. Mangipaparungtal iya na sakey ya angat—​kasin say TV so mangokontrol ed sika, odino sika so mangokontrol ed satan? Say panangontrol ed TV et kakaukolanen to so mapekder a determinasyon​—pati say mabiskeg a determinasyon a mangerep ed satan. Balet say panggawa ed satan so mangilukas na dalan para’d sikatayo a magmaliw a sensitibo ed balang sinansakey bilang membro na pamilya tan bilang sanaagi ed espiritual. Saray makabaliksan a siglaotan et kakaukolanen to so maong a pitatalosan, a talosan so balang sinansakey, saray pankaukolan tan gayaga tayo, ed pangibaga ed balang sinansakey ya agaylay pangapresya tayo ed amin a mapangasin bengatlan ginawa ra para’d sikatayo. Diad arum a salita, say makabaliksan a tongtongan so mangipanengneng ya agtayo ibabaliwala iray arum.​—Uliran 31:28, 29.

19, 20. No inaro tayon amin so walad pamilya, anto so gawaen tayo?

¹⁹ Kanian, no walaan tayoy liknaan na panangaro tan panangabagey ed balang sakey ed oksuy na pamilya​—tan lalaktipen na satan so panangasikaso ed saray agmananisian membro na pamilya—​baleg so nagawaan tayo pian napabiskeg tan napansiansia so espiritualidad tayo. Diad oksuy na pamilya, tumboken tayo so simbawa nen Pedro: “Say kaonoran a salitak, mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan. Aleg ya ibales so mauges ed mauges, ni say ayew ed ayew; no ag ingen say panamaabig lawas; ta amta yo’n peteg ya atawag kayo’n amin ya ontawir na bendicion.”​—1 Pedro 3:8, 9.

²⁰ Nawalaan tayo la natan na panamendisyon nen Jehova no pambanikelan tayon pansiansiaen so espiritualidad tayo, tan saya so nayarin manbunga na pakatawir tayo ed panamendisyon to ed arapen sano naawat tayo so regalon andi-anggaan a bilay diad paraison dalin. Walaray arum nin bengatlan nagawaan tayo bilang sakey a pamilya pian tulongan so balang sinansakey ed espiritual. Say ontumbok ya artikulo so maningbat ed saray gungguna ed panggawa na saray bengatla a nankakasakey bilang sakey a pamilya.​—Lucas 23:43; Apocalipsis 21:1-4.

[Saray paimano ed leksab]

Kasin Natandaan Mo?

◻ Anto so espiritualidad?

◻ Panon a naalig na sakey ya ulo na pamilya so alimbawa nen Kristo?

◻ Panon tayon napaliisan iray pakasigensigenan ed espiritualidad tayo?

◻ Anto so mamaandi ed espiritualidad na sakey a pamilya?

◻ Akin a say makabaliksan a pitatalosan so makana?

[Litrato ed pahina 12]

Say iyaatendi ed Panagaral na Libro ed Kongregasyon so mamabiskeg ed espiritualidad na pamilya