“Say Kaonoran a Kabusol” so Natalo!

SANEN ugaw kayo ni, nayarin antakot yo so bilunget. Saray makapataktakot ya estorya tan anggan arum ya estoryan enkantada so nayarin mangonigon ed sika. Agaylan makapaligen iman sanen tainan na ina odino ama yo so akaselsel a lamparaan legan a panggugunaetan yo so unugip!

Say patey so mangekebbiew met ed dakel. Ingen, aliwan nepeg ya ontan. Akin? Lapud peteg a kabaliksan na patey.

Kabaten so Kabusol Yo

Inyabawag nen makabat ya arin Solomon na kadaanan ya Israel: “Ta saray mabilay amta ra a sikara ompatey ira; balet saray inaatey agda amta so bengatla.” (Eclesiastes 9:5) Unong ed sayan madibinon impuyan a kanonotan ed dilin Biblia yo, say patey so simplin kasuniyan na bilay. Say inatey so andian la na amta.

Diad panutukoy ed patey diad manangiyilustran paraan, insulat nen Kristianon apostol Pablo: “O patey, iner so kawalaan na inpanalom? O patey, iner so kawalaan na otot mo?” Anto so otot a pansesengegay patey? Ikuan nen Pablo: “Say otot na patey say kasalanan.” (1 Corinto 15:55, 56; Oseas 13:14) Sirin, anto so lapuan na sayan makapatey ya otot? Diad sakey a pasen na Kasulatan et ibabaga nen Pablo: “Onong a say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) Intilak na apostol so andi-duaruwan pakabidbiran ed satan a “sakey a too” sanen ikuanto: “Lapud kinen Adan so pateyan na amin.” (1 Corinto 15:22) On, lapud intunganga na inmunan ateng tayo, si Adan, amin tayo so magmainomay a napeketan na otot na patey.​—Genesis 3:1-19.

No walaan na maong a bunigas tan sakey a maaron pamilya a manaayam ed maabig iran kaliberliber, anggapo ed sikatayo so malabay ya ompatey. Anggaman kuan, unong ya ipapanengneng na Biblia, “say panaon tan ag-iilaloan iran nagawa” so nayarin manigway ed sikatayo. (Eclesiastes 9:11, NW) Diad tua et agtayo amta so nagawa ed bilay tayo nabuas. (Santiago 4:14) Balet sakey a bengatla so maseguro​—amin tayo so akatawir na kasalanan tan patey. Kanian, say patey so ontutumbok ed sikatayo tan manadapmeg a singa sakey a kabusol.

Panalona ed Impatey na Inadaro

Say patey so nagkalautlan sakey a kabusol sano ondapo ed sakey ya inadaro. “Maug-uges itan para’d sika,” kuan na sakey ya asawan-biin walaay taning ed masiken to unong a nononoten to so ipatey. Akin a nibaga to ’tan? Lapud ikuan na Biblia: “Angan anto a say limam naromog to a gawaen, sikato so gawaen mo ed pakapanyarim; ta angapo so gawa, no kanonotan, no pakaamta, no kakabatan, dia ed Sheol, a laen mo.” (Eclesiastes 9:10) Saray inatey so agla manirap. Balet ta niwala so kaermenan ed mabilay a kakanayon tan kakaaro. Wala ta so nagawaan nipaakar ed ontan a paniirap?

Lugan na saray pahina na Salita’y Dios, say Biblia, so dakel a makaligliwan salita. Alimbawa, say panbasa tan pandalepdep ed saray salmo so peteg a sakey a lapuan na pakaambegya. Peteg a makaligliwa iray salitan singa saraya: “Nagalang so Katawan, a sikato agewagew ya ililibitan to itayo na awi’ tayo, salanti Dios a sikatoy kilalaban tayo.”​—Salmo 68:19.

Sakey nin lapuan na ligliwa et say Kristianon kongregasyon. Insulat nen apostol Pablo nen inmunan siglo K.P.: “Pagalangan mo so saray bibi-i a babalo a sikara so peteg a balo. Bang-balet no wala so balo ya wala’ra so anak to odino apo [a makalegpet ed sikato], amtaen na saraya komon ya onona ya ipanengneng so kasimpitan da ed kaamong da’n dili, tan tomangan da so kaatengan da, ta saya sikato so makapalikliket ed arap na Dios. Aleg komon a pailista a manlinkor ya angan siopaman a singa balo no angapo ni anem-a-plo a taon to, tan asawa na saksakey a too, ya wala so maong a balita to nipaakar ed saray maabig a gawa; no nankomis ed saray anak, no amanawes [amarawes, NW] ed saray sankaili, no inorasan to so sali-sali na saray sasanto, no tinolongan to so saray maermen, no tinumbok to ed malet so ganagana’n maabig a gawa.” (1 Timoteo 5:3, 4, 9, 10) Tutulongan tan liligliwaen met na saray Tasi nen Jehova iray ontan a kapananisiaan.

Mabetbet a say sankabalgan a probleman kaukolan a resolbien na inateyan et samay mangilalanor ed emosyon. “Inararok a maong so asawak,” so insulat na sakey a lakin inatey so asawa to ed apalabas lambengat a duaran taon. “Saya so sankaermenan ya agawa’d bilay ko, tan ngalngalin agko nasungdoan.” Say toon agangano nin angasawa odino akiasawa so angipanabang ed bilay to diad sankaapitan iran siglaotan na too. Sano inatey so kapareha, natural lambengat a manermen a tuloy so mabilay ya asawa. Siopa so nakerewan to na tulong?

Diad saratan a sirkumstansya, saray maabig a Kristianon kalimog so nayarin makapabiskeg. “Say kaaro mangaro ed saray amin a panaon, et say agi nianak nipaakar ed kasumlangan,” kuan na makabat a proverbio. (Uliran 17:17) Say abalon bii odino laki so mankakaukolan na tulong​—kakaiban makapangiter na peteg a tulong. Saray makabat a kakaaro so mamaseseg a pansalitaen so maermen, anggaman say panggawa na ontan so sengegan na pannangis. Angangko ta say Kristianon akasagmak la na ot-ot tan kaermenan diad inkaandi na asawa so makapangiyopresi na arum a mapangasin tulong. “Ibalap yo so apunaw ed puso,” isisimbawa na Biblia. (1 Tesalonica 5:14) Balet tandaan a saray abalon bibii tan lalaki so makailiw ed saray kapareha ra. Kanian, say inateyan so nepeg a mitongtong ed arum dia lambengat ed silong na saray sirkumstansyan manggawa ed amin a mansiansian masimpit ed kondukta.​—1 Pedro 2:12.

Say sankaabigan a tambal ed ot-ot ya itatarok na patey et say pansiansian okupadon ontulong ed arum​—aliwan mainomay a kimey para’d saramay sisiaen dan sikara so mankakaukolan na tulong! Dia so kiwasan na ag-inkasiblet. Say andi-siblet a panggawa na saray bengatla para’d arum so ontulong a mamaandi ed kaermenan tan panagogol, ta inkuan nen Jesus: “Lalo a mapalar so mangiter nen say mangawat.”​—Gawa 20:35.

Pananalo Sumpad Patey

Say ketket na ampingilan so makapaotot a tuloy, makapatey ni ingen. Anggaman kuan, genda-gendat a say pangekal ed dagum na bigis a nibiret ed baog yo so makapainawa. Balet antoray walan ilalo para’d inawa ed otot a pansesengegay patey?

Kayari impangipaliwawa a say kasalanan so otot a pansesengegay patey, inkelyaw nen Pablo: “Salamat ed Dios, ta itdan to itayo na panalo lapu ed Katawan tayo a Jesu-Cristo.” (1 Corinto 15:57) Panon a say pananalo sumpad patey so nisiglaot ed si Kristo? Impanengneng nen Jesus ya onia so kipapasen sanen inkuanto nipaakar ed inkasikato: “Singa say Anak na too ya ag dia linma a panlinkoran, noag say manlinkor, tan iter to’y bilay to a panondon ed amayamay.” (Mateo 20:28) On, para’d saramay mangaagamil na pananisia ed Anak na Dios, si Jesu-Kristo, tan ed dondon bagat ya intarya nen Jehova diad panamegley to, say patey ya atawir ed si Adan so agmansumpal ed permanentin ipapatey.​—Juan 3:16.

Peteg a makapaseseg iray balikas nen Jesus: “Ag kayo mankelaw ed saya, ta onsabi horas, ya amin so saray wala ed saray lobok narengel da so voces to, et ompaway ira; saray nangawa na maong, nipaakar ed kioli ed bilay; bang saray nangawa na mauges, dia met ed kioli ed bilay ed kaokom.”​—Juan 5:28, 29.

Pigaran siglos ed asasakbay, impasakbay na propeta na Dios a si Isaias: “Inakmon to [nen Jehova a Dios] so patey ed ando lan ando; et say Katawan a Jehova punasen to naani so saray lua ya onagus ed saray amin a lupa.” (Isaias 25:8) Lamet, diad Apocalipsis 21:4 et ipaparungtal na Biblia iyan makapakelaw ya ilalo: “Punasen to [na Dios] so amin a lua ed kamataan da; tan andi gapo la naani ipatey; tan angapo la naani onnangis o dageyem, o ot-ot. Ta saray ona a bengatla sikara so linmabas la.” Napapabiskeg diad sayan ilalo ed Biblia para’d saramay nanaugip ed patey, saray inateyan so agnakaukolan ya “onermen, onong na singa saray arum, ya angapo so ilalo ra.”​—1 Tesalonica 4:13.

Salien pan iretrato ed kanonotan so itatarya na Dios para’d katooan, unong a niparungtal ed Biblia. Say pagani-gani lan “baleg ya irap” so mangipapaniring na kadederal ed peles a marelmeng a sistema na bengabengatla. (Apocalipsis 7:14) Saramay mangaagamil na palson relihyon so naderal. Naandi laray maagum a mapulitika tan komersyal ya elemento a pansesengegan na eras tan bakal. Ibantak la nen Jesu-Kristo ed kaaralman si Satanas a Diablo, a sengegan na agaylan ipapatey na too. Insan igapo nen Kristo so Milenyon Uley to, a legan na satan et iyaplika to ed katooan so balor na dondon bagat to. Saray inaatey so ompawil ed inilaloan-a kikioli, tan say liwawa manlapud Salita na Dios so onsisinag a maliwliwawa a saray maaniton panmoria nipaakar ed patey, a kabusol na katooan, so naandi la. Amin a mabilay ed satan a panaon so nawalaan na pankanawnawan manaral ed saray dalan na Dios tan manbilay unong ed matunong iran estandarte to.​—Uliran 4:18; Gawa 24:15; Hebreos 2:14, 15; Apocalipsis 18:4-8; 19:19-21; 20:1-3.

“Insan onsabi kasampotan,” kuan nen Pablo, “sano iter to so panarian ed Dios tan Ama. . . . Ta sikato so nakaokolan a manari, anga ed pakapangian to’d saray kabusol to ed silong na saray sali to. Say kaonoran a kabusol ya naekal naani say patey.” (1 Corinto 15:24-26) Amin a kakapuyan ya intarok na impankasalanan nen Adan so naandi la. Onggapo so pinal a subok, tan saray manangaro ed Dios so nasubok ed katooran da. (Apocalipsis 20:4-10) Kayari kipawil ed inkayadyari, sarayan matulok a totoo so manbilay, aliwa lambengat a diad pitomplo odino anggan ed sanlasus tan samploran taon, noagta ando lan ando. Agaylan sakey a langkap a nanlapud Dios diad panamegley na inadaron Anak to!​—Roma 6:23.

Kanian, sirin, kaunongan karukey so pakapambilay yo? Say karukey na bilay yo so nayarin onnatnat ed andi-anggaan. Anggaman manbibilay kayo ed sayan “panaon na kasumpalan” na mundo, nayarin sikayo so aglan balot ompatey. (Daniel 12:4; Juan 11:25, 26; 17:3) No gawaen yo so madibinon linawa, nayarin makapambilay kayon peteg diad insipan a balon mundo na Dios.​—2 Pedro 3:13.

Anggaman kuan, no matatken kayo la, kaukolan a realistikon kunsideraen yo so posibilidad ya ipatey. On, say ilalo ed kioli so mangitarok na gayaga. Balet ta nayarin onkelaw kayo no panon so pangiyuksoy nen Jehova ed bilay na pamilya diad satan a balon sistema na bengabengatla. Agkayo mapaga ed saratan a pamaakaran, ta asikasoen itan nen Jehova diad magnayon a panliket na saramay matoor ed sikato diad ando lan ando.

Legan a sarayan maatap a “kaonoran ya agew” na mundo nen Satanas so mamapaarap ed panampotan to, agyo aabuloyan so takot ed patey a manamsam ed pribilihyo yon manlingkor ed si Jehova natan. (2 Timoteo 3:1) No inatey so sakey ya inadaro yo ed bilay, ligliwa yo’y inkasikayo ed temporaryon pakayari na patey. (Apocalipsis 20:13, 14) Manmatalek ed ilalo na kioli. Insan, balanglan makaloob kayo ed balon mundo diad kiliktar ed baleg a kairapan odino diad panamegley na kioli, manmatalek ed apuyanan a paseguro a say patey, say unor a kabusol, so nitarok ed kaandi.​—Apocalipsis 7:9, 14.

[Litrato ed pahina 5]

Napabiskeg na saray maong a Kristianon kalimog so inateyan diad espiritual

[Litrato ed pahina 7]

Say pansiansian okupado a panulong ed arum so mamawas na ermen diad impatey na sakey ya inadaro