Tepetepet Manlapud Managbasa

Lapud say inmunan saserdoten manngaran na Melquisedec so peteg a too, akin ya ibabaga na Biblia ya “angapoy kailalakan to”?

Saya so nibalikas diad Hebreos 7:3. Imanoen so bersikulo ed konteksto to:

“Ta saya so Melquisedec, ari ed Salem, Sacerdote na Dios a Sankatageyan, a sikato so angabet ed Abraham nen ompawil a nanlapud inpamagbag to ed saray ari, tan sikato so binendicionan to. A sikato met so inapagan nen Abraham na kabaliksan to, sikato so Ari ed Salem, a sikato so Ari na kareenan. Angapoy ama to, angapoy ina to, angapoy kailalakan to; angapoy sengeg na saray agew to, angan kasumpalan na bilay to, et agawa a miololibay ed Anak na Dios, mansiansia a sacerdote ya andi angaan.”​—Hebreos 7:1-3.

Unong ed asalambit, si Melquisedec so peteg a too, a singa met si Abraham, a diad sikato et awalaan na direktan pidedeneng. (Genesis 14:17-20; Hebreos 7:4-10) No ontan, si Melquisedec sirin so walaan na atateng, sakey ya ama tan sakey ya ina, tan sikato so nayarin walaan na ilalak. Kanian, bilang too sikato so walaan na kailalakan, odino listaan na kailalakan. Walaan met na anggaan so pisikal a bilay to. Diad arum a punto et si Melquisedec so inatey, unong ed balikas nen apostol Pablo diad Roma 5:12, 14. Balet lapud agtayo amta no kapigan so impatey nen Melquisedec tan intunda to bilang saserdote, diad satan a pamaakaran et sikato so nanlingkor ya agkabat no kapigan so intunda to.

Diad Hebreos, si Pablo so nankomento nipaakar ed si Mequisedec diad panisingbat ed betang nen Jesu-Kristo bilang superyor ya Atagey a Saserdote. Diad panutukoy ed si Melquisedec bilang sakey a tipo, odino padron, nen Jesus diad sayan makasaserdoten betang, inkuan nen Pablo: “Sikato [si Jesus] so niyan a Sankatageyan a Sacerdote . . . onong ed inkasacerdote nen Melquisedec.” (Hebreos 6:20) Diad anton pantalos?

Nayarin amoria nen Pablo a say rekord na Biblia so agmangiiter na saray detalye nipaakar ed boleg nen Melquisedec​—saray atateng to odino antokaman a posiblin kapolian to. Satan ya impormasyon so agtanton importanti ed Biblikon rekord. Sirin, manlapud punto de bista na kabat nen Pablo odino kabat tayo, susto-suston nibaga a si Melquisedec et “anggapoy kailalakan to” (New World Translation of the Holy Scriptures; American Standard Version), “andiay listaan na kapolian” (W. J. Conybeare), odino “andiay listaan na kailalakan.”​—J. B. Phillips.

Diad anton dalan a si Jesus so mipadparan ontan? Tua, amta tayo a say Ama nen Jesus et si Jehova a Dios tan say toon ina to et si Maria ed tribu nen Juda. Siansia, wala so panolibayan nen Melquisedec tan si Jesus. Panon ya ontan? Si Jesus so ag-inyanak ed tribu nen Levi, say tribu para’d saray saserdote diad nasyon na Israel. Andi, si Jesus so agnagmaliw a saserdote diad panamegley na kailalakan na too. Ontan met, si Melquisedec so agnagmaliw a saserdote “onong ed gangan na sakey a bilin a mangaraldalin,” salanti, diad inkiyanak ed makasaserdoten tribu tan pamilya. (Hebreos 7:15, 16) Imbes a magmaliw a sakey a saserdote diad panamegley na atooan ya ama a sikaton mismo et saserdote, “say Dios ingaton ton atagey a sacerdote [si Jesus] onong na inkasacerdote nen Melquisedec.”​—Hebreos 5:10.

Niarum ni, si Jesus so andian na siopaman iran kapolian odino kasublayan ed inkasaserdote to. Diad sayan pantalos met a sikato so andian na kailalakan. Sikato so maandon manumpal ed makasaserdoten serbisyo to bilang matulong a managbangat. Sayan andi-anggaan a serbisyo so kinomentoan nen Pablo diad impangikuan:

“Balet sikato [si Jesus], bangta mansiansia ed andi angaan, wala so inkasacerdote to ya ag nipatawir. Kanian nayarian to met ya ilaban anga ed kasumpalan so saray onasinger ed Dios dia ed panamegley to, ta manbilay lawas a mangyesel ed sikara.”​—Hebreos 7:24, 25.

Say pangunsidera tayo ed saray salita nen Pablo diad Hebreos 7:3 so nepeg sirin a nagkalalo nen say basta pangisimpen na samet a pikakabat ed ulo tayo. Satan so nepeg a mamabiskeg na apresasyon tayo ed maaron probisyon a ginawa nen Jehova a Dios para’d sikatayo pian nagamoran so andi-anggaan a kaperdona na kasalanan tan ed paraan na impangiyuksoy to para’d sikatayo pian maandon makaawat na tulong tan panangiwanwan.