“Anapen Yo si Jehova, Sikayo ya Amin a Maoyamo”

“ANAPEN yo si Jehova, sikayo ya amin a maoyamo ed dalin, ya angonor na saray pangoksoyan to. Anapen yo so inkatunong, anapen yo so kaoyamoan. Nayari a sikayo naani niyamot dia ed agew na sanok nen Jehova.”​—Sofonias 2:3.

Saratan a salita so impaarap nen Sofonias ed saray “maoyamo ed dalin,” tan sikaray pinaseseg ton “anapen [da] so kaoyamoan” ta pian nasalimbengan ira ed “agew na sanok nen Jehova.” Ipapaseguro na saya a nakakaukolan so kaoyamoan para’d kililiktar. Balet akin?

Akin ya Anapen so Kaoyamoan?

Say kaoyamoan so kalidad na pagmaliw a maumildi, aliwan mapasirayew odino mankinon. Saya so maapit a nisisiglaot ed arum niran kalidad, a singa say inkamapaabeba tan kaumildian. No ontan, saray maoyamo so paibangat tan mabulos a mangawat na disiplina manlapud lima na Dios, anggaman nengneng toy makapaermen itan natan.​—Salmo 25:9; Hebreos 12:4-11.

Say kaoyamoan a mismo so andian na pisiglaotan ed edukasyon odino kipapasen na sakey ed bilay. Anggaman ontan, saramay walaay atagey ya inaral odino matalona ed minumundon paraan so ompan manilalo a sikaray kualipikadon manggawa na saray desisyon para’d inkasikara ed amin a bengatla, anggan ed pamaakaran na panagdayew. Saya so nayarin mangamper ed sikaran paibangat ed arum na sakey a bengatla odino diad pangawat na simbawa pian pasimbaloen so kabibilay da. Wala met iray mayaman a nayarin napelag lapud lingon kanonotan a say kaligenan da so mandedependi ed materyal a kaykayarian da. Kanian, liknaen dan agda kaukolan iray espiritual a kayamanan manlapud Salita’y Dios, say Biblia.​—Mateo 4:4; 5:3; 1 Timoteo 6:17.

Kunsideraen paray eskribas, Pariseos, tan saray manunan saserdote ed agew nen Jesus. Aminsan, sanen saray opisyal ya imbakin mangerel ed si Jesus so pinmawil ya agda kaiba, inkuan na Pariseos: “Pati sikayo met so nibalang? Anisia ta so siopaman ed saray manoley, ono ed saray Fariseos? Balet saraya a katooan agda amta so gangan a naayew ira.” (Juan 7:45-49) Diad arum a salita, para’d sikara, saray anggapoy amta tan ag di-aral lambengat so singa ugugaw a manisia ed si Jesus.

Anggan ontan, pigaran Pariseo so atangguyor ed katuaan, tan indepensa da ni ingen si Jesus tan saray Kristiano. Arum ed sikara et si Nicodemo tan Gamaliel. (Juan 7:50-52; Gawa 5:34-40) Kayari impatey nen Jesus, “baleg ya olop na saray sacerdotes so tinmoluk ed pananisia.” (Gawa 6:7) Agpanduaruwaan a say sankamatalonggaringan ya alimbawa et si apostol Pablo. Sikatoy nanaral ed salian nen Gamaliel tan tinmalonan tuloy tan respetadon manangiyalibansa na Judaismo. Anggaman ontan, asabi panaon a sipapaabeban inawat to so tawag nen Kristo Jesus tan nagmaliw a maseet a patumbok to.​—Gawa 22:3; 26:4, 5; Galacia 1:14-24; 1 Timoteo 1:12-16.

Amin na saya so mangiyiilustra a kaunongan man so inaral na sakey odino antokaman so liknaan na sakey nipaakar ed mensahen manlalapud Biblia, saray salita nen Sofonias so siansia nin onaplika. No labay na sakey ya abobonan na Dios tan niwanwan na Salita to, nakakaukolan a tuloy so kaoyamoan.

Saray ‘Manaanap na Kaoyamoan’ Natan

Minilyon a totoo ed sankamundoan so onkikiwas ed maong a balita na Panarian. Saray Tasi nen Jehova so mangikokondukta na masulok ya apatiran milyon a sinimban panagaral na Biblia diad saray ayaman na saratan a totoo. Sarayan nanlapu ed dakel tan nambabangil a nanlapuan tan nanduruman kipapasen ed panagbilay tan sosyal. Ingen, amin da so walaan na magenap ya inkamapaabeba pian awaten so mensahe na Biblia a nipasabi ed ayaman da odino inerman. Maabig so iyaaligwas na dakel ed sikara lapud mabulos dan panggugunaetan a talonaan iray babeng a nipapaarap ed sikara. On, sikaray kabiangan na saray “maoyamo ed dalin” natan.

Alimbawa, wadtan si Maria a taga Mexico. Sikatoy nan-aral na abogadisya ed unibersidad tan maligen ed pinansyal lapud tawir to. Nisesengeg ed saya, sikatoy awalaan na liberal iran ideya ya anguman ed sikato, unong ed impangipasen to, diad impagmaliw ton sakey a toon “rebelyoso, mapasang, dominante, tan ateistiko. Diad padesir ko et amin so naresolbi diad panamegley na kuarta tan say Dios so ag-importanti. Diad tua, liknaen kon sikatoy anggapo,” nanonotan ni nen Maria. “Para’d siak say relihyon so bengatlan naludlurey tan sakey lambengat a kakaukolanen na sosyedad,” so inyarum to ni.

Saginonor, naimano nen Maria iray panamasimbalo na kapinsan to sanen sikatoy nagmaliw a sakey ed saray Tasi nen Jehova. “Sikato nensaman so tatakotan, balet natan, sikato lay sakey a toon mareen tan maptek,” insalaysay nen Maria. “Inkuan na kakanayon a sikatoy sakey a managpulong tan manbabasa na Biblia, tan makasengeg ed satan et sikatoy agla oniinum odino manbibii natan. Kanian kaliktan kon sikatoy onla tan ibasaan toak na Biblia, ta isipen ko a diad onian paraan et naromog ko so deen tan inkaligen a kaliktan kon tuloy.” Say resulta et inawat nen Maria so sakey a panagaral ed Biblia ed sanasawan Tasi.

Dakel a bengatla so kaukolan ton talonaan, tan mairap met ed sikaton awaten so prinsipyo na Biblia nipaakar ed inkaulo pian manpasakup ed masiken to. Balet sikato so nanggawa na baleg iran panamasimbalo ed bilay tan awawey to. Impatua to: “Ninonot ko a nanlapulad inyakar na agagi ed ayaman mi pian itarok so tulong nen Jehova et niwala so liket, inkaligen, tan bendisyon na Dios ed ayaman ko.” Natan, si Maria so sakey a dedikado, bautismadon Tasi nen Jehova.

Diad pangegemtan na tuan panagdayew, wala so sakey nin pasen a say kaoyamoan, odino say kabaliksan to, so walaan na importantin betang. Mabetbet a tuloy, a say asawan bii ed pamilya so mangawat ed katuaan tan labay to so manlingkor ed Dios, ingen say asawan laki so masuyat. Angangko ta mairap ed pigaran asawan lalaki ya aksobien so ideyan wala ni so sakey​—si Jehova a Dios—​a kaukolan a panpasakupan na asawa ra. (1 Corinto 11:3) Sakey a bii ed Chihuahua, Mexico, so kinmerew na sakey a panagaral na Biblia, tan sinmabi panaon a sikato tan pitoran anak to so linmoob ed katuaan. Diad inmuna et sumpa so masiken to. Akin? Lapud agto labay a say pamilya to so manpulong ed kabkaabungan, a mangiyopresi na literatura na Biblia. Nayarin liknaen ton mangiyabeba ed sikato. Balet say pamilya to so tinmalindeg a malet ed desisyon dan manlingkor ed Dios. Sinmabi panaon et naimano na asawan laki so kablian na panangapresya ed oksuyan na Dios. Balet ta 15 taon so linmabas sakbay ya indedika to so inkasikato ed si Jehova.

Diad interon Mexico, dakel niray niarawin komunidad a ditan et saray lokal a manaayam so walaan na abangonan iran lenguahe tan kustombre na saray Indian. Say mensahe na Biblia so nipapasabi ed sarayan totoo tan ontutulong ed sikara pian paaligwasen so kultura ra, unong a naaralan na arum so manbasa tan mansulat legan ya aaralen da so katuaan. Anggaman ontan, say katuaan ya agtanton akapanaral odino dagdaiset iray materyal a kayarian da et agto kabaliksan a mainomay dan awaten so katuaan. Say kinon ed inkarasa tan mabiskeg a siglaotan ed saray kaugalian ya impabangon na atateng da so no maminsan et mairap para’d arum a mangawat na katuaan. Saya met so rason no akin a diad arum a barangay na saray Indian, saray mangaawat na katuaan so mabetbet a tataktakoten na arum a kabarangay da. Kanian say kaoyamoan so walaan na dakel a porma.

Onkiwas Tekep na Kaoyamoan

Komusta ka met a mismo? Kasin sika so onkikiwas ed katuaan na Salita’y Dios? Odino mairap mon awaten so arum a katuaan na Biblia? Angangko ta labay mon usisaen so inkasika pian amtaen no anto so mamopokpok ed sika. Kasin sika so napapagaan ta dakel ed saray atangguyor na katuaan so nanlapud dukan panagbilay? Kasin nalalanor ed kanonotan mo so kinon? Maabig ya isipen iray salita nen apostol Pablo: “No ag ingen pinili Dios so saray bengatla a makulangkulang na mundo ya onkana a pamabaing to ed saray makabat; tan pinili to so saray bengatla a makapuy na mundo, ya onkana a pamabaing to ed saray bengatla a mabiskeg; tan saray bengatla ya andi kana ed mundo, tan saray ag pinabli, sikara so pinili Dios, tan saray bengatla ya angapo, pian paandien da so saray bengatla ya wala, ta pian angapo so laman a manpangta ed arap na Dios.”​—1 Corinto 1:27-29.

Kasin ipulisay mo so sakey a kayamanan, lapud aromog mo lambengat itan ed sakey a langan pananginan? Siempre andi! Ingen, ontan so paraan a pamipili na Dios pian iparungtal so manangisalbay bilay a Salita na katuaan ed sikatayo, unong ya isasalaysay nen apostol Pablo: “Et wala so sayan kayarian tayo ed vaso a pitek, pian say sankatageyan ya inkabaleg na pakayari kien komon na Dios, ya ag manlapu ed sikatayo.” (2 Corinto 4:7) Say kaoyomoan tan inkamapaabeba so ontulong ed sikatayon nanengneng so tuan kablian na kaoyamoan tan aliwa lambengat iray “vaso a pitek,” odino atooan ya ahensya, a mangipapasabi ed sikatayo. Diad panggawa na ontan, napadaak tayo met so posibilidad a sikatayoy ‘niamot ed agew na sanok nen Jehova’ tan napibilang ed saray maoyamon ‘manawir ed dalin.’​—Sofonias 2:3; Mateo 5:5.