Kasin Nanonotan Mo?

Kasin papablien mo so abasam ya agano niran paway na Say Panag-Bantayan? Bueno, nengnengen no naebatan moray onggendan a tepet:

▫ Anton praktikal a tulong so niiter ed mansasakit tan maedad la ed loob na kongregasyon natan?

Diad akaunan Kristianon kongregasyon, walay sakey a listaan na saray balo a mankakaukolan na materyal a pananuporta. (1 Timoteo 5:9, 10) Ontan met natan, saray mamatatken so nayarin manggawa na sakey a listaan na saray mansasakit tan maedad la a mankakaukolan na nikadkaduman imano. Anggaman ontan, nepeg ya ag-imatalek labat ed saray mamatatken so pagmaliw a mabulos ed sayan bengatla. Amin tayo so kaukolan a manonot ed ontan iran pankaukolan. (1 Timoteo 5:4-8)​—8/15, pahina 24-25.

▫ Kasin say estorya ed Biblia nipaakar ed si Jonas ya inakmon na ayep ed dayat so agnapanisiaan?

Andi, balanglan say sperm whale, baleg a white shark, odino sakey a whale shark so makaakmon na sakey a too. Sakey ni, pinekderan a mismo nen Jesus a say salaysay nipaakar ed si Jonas so tua. (Mateo 12:39, 40)​—8/15, pahina 32.

▫ Antoray makapuy a pansumpalan ed maaniton panangusar na saray galing tan anting-anting?

Say panangusar ed saratan so talagan manidismaya ed totoo manlapud matudion pangabet ed saray problema ra tan mamapaseseg ed sikaran manilalo ed swirti a bilang solusyon ed amin a bengatla. Mangipalikna met iratan ed manguusar na palson kaligenan. Nagkalalo ni, say toon manisia ed pakayari na saray swirtin galing tan anting-anting so mangisusuko na bilay to ed saray agnanengneng a demonikon puersa.​—9/1, pahina 4.

▫ Antoray apatiran elemento a makatulong ed pagmaliw na panamaley a magnayon?

Saraya et say inkamabulos ya ontalineng, say abilidad ya onkerew na despensa, say kapasidad a mangiter na mantultuloy ya emosyonal a panagsuporta, tan say pilalek a pamuyok tekep na panangaro. (1 Corinto 13:4-8; Efeso 5:33; Santiago 1:19)​—9/1, pahina 20.

▫ Anto so sakey a paraan a panpapagamor nen Jehova na panagsungdo ed saramay nipapaarap ed saray subok?

Gagawaen nen Jehova iya diad panamegley na saray alimbawa na panagsungdo a nirekord ed Salita to, say Biblia. (Roma 15:4) Diad pannononot tayo ed saraya, sikatayo so napaseseg a mansungdo tan dakel met so naaralan tayo nipaakar ed no panon so mansungdo.​—9/15, pahina 11-12.

▫ Anto so maridios a debosyon?

Say maridios a debosyon et kabaliksan to so debosyon ed si Jehova a mamapakiwas ed sikatayo a gawaen so makapaliket ed sikato, anggaman ed arap na mairap iran subok, lapud inaro tayo so Dios manlapud puso.​—9/15, pahina 15.

▫ Panon so nepeg a panmoria tayo ed panangasi na Dios?

Nepeg ya agtayon balot ibabaliwala so baleg a panangasi na Dios. Nepeg tayon magmaliw a singa si Pablo tan ipanengneng so apresasyon tayo diad panggunaet a mipuligesgesan sumpad dilin ag-inkayadyari tayo. (1 Corinto 9:27) Diad sayan paraan nidemostra tayo, anggaman ed arap na saray kairapan, a walaan tayo na puron pilalek a manggawa na maptek.​—wE 10/1, pahina 23.

▫ Akin a matukotukoy ya inmunan indatak nen Pablo so panagtepel bilang say manunan aspekto na aro?

Nibaga ya anggapo so bengatla a singa say Kristianon panlilimog ya anggapo so andukey-a-panagtepel, salanti, agsiaanos a mideneng ed balang sinansakey. Satan so lapud sikatayon amin et ag-ayadyari, tan saray ag-inkayadyari tan impakalukso tayo so manubok ed arum. Kanian, say andukey-a-panagtepel so manuna diad pamawala na aro ed baetan na saray sanaagi.​—10/15, pahina 21.

▫ Kasin saray akaunan Kristiano so angusar ed ngaran na Dios?

Say ebidensya so mangibabaga na on. Binangatan nen Jesus iray patumbok to a manpikasi ed Dios: “Nagalang komon so ngaran mo.” (Mateo 6:9) Tan diad sampot na mangaraldalin a ministeryo to, sikaton mismo so nampikasi ed mangatatawen ya Ama to: “Inparungtal ko so ngaran mo ed saray totoo ya initer mo ed siak a nanlapu ed mundo.” (Juan 17:6) Nilikud ni, saray akaunan kopya na Septuagint, so nankarga na ngaran na Dios ed porma na Hebreon Tetragrammaton.​—11/1, pahina 30.

▫ Antoran alimbawa ed Biblia so mangipapanengneng a say paraan na pidedeneng ed saray lingo so mangapekta ed bilay tayo?

Si Saul so siaawet ya angipulisay ed simbawa, tan dinmakel iray lingo to, a diad kaunoran et nansumpal ed andi-abobon na Dios ya impatey to. (1 Samuel 15:17-29) Diad biek a dapag, anggaman ed saray lingo tan kasalanan nen David, sikato so magbabawin angawat na panangorihi tan nansiansian matoor ed si Jehova. Sarayan alimbawa ed Biblia a mangipapanengneng na panangaksobi na saray lingo tayo so ontulong ed sikatayon mamasiansia na maabig a siglaotan ed Dios tan diad ontan et nawalaan na ilalo ed andi-anggaan a bilay. (Salmo 32:1-5)​—11/15, pahina 29-30.

▫ Panon ya ilelegyas nen Jehova so baley to sano sikaray walad inkagipit lapud natural iran desyang odino arum a sengegan?

Ontulong si Jehova, aliwan diad panamegley na mamilagron pangibaliktar ed saray natural a puersa odino antokaman a makapakelaw a gawa, a singa no panon so nepeg ya ikiwas to unong ed nononoten na dakel a totoo, noagta diad panamegley na sakey a panamabiskeg ya agtalagan natatalosan na dakel a totoo​—say aro. On, inaro nen Jehova so baley to, tan pinabulaslas to ed leet da so aro ed balang sinansakey a mabisbiskeg pian sarag ton gawaen ed sikara so singano mamilagro. (1 Juan 4:10-12, 21)​—12/1, pahina 10.