Kasin Panggagayagaan Mo so Personal a Panagaral?

SIOPAMAN a masimoon ya aripen na Dios so naliketan diad pangideboto na malaem a panaon ed personal a panagaral ed Biblia. (Salmo 1:1, 2) Ingen, lapud dakel a bengatlan manguupot na panaon tan biskeg da, dakel so naiirapan a mangiter na malaem a panaon tan biskeg ed personal a panagaral a singa ed labay da.

Anggaman ontan, pian makapantultuloy bilang aktibon ariripen na Dios, kaukolan na amin a pasimbaloen so gayaga tan biskeg da ya inagew-agew diad pakarumog na balo tan araldalem iran aspekto na katuaan na Salita na Dios. Saray katuaan na Biblia a mamapakiwas a tuloy ed sika ed abayag lan panaon so nayarin agtanton mamapakiwas ed sika natan. Kanian, maabig, anggan makana ni ingen, a panpelengan tan panggunaetan mo a nadampot so balon aralem a pakatalos ed katuaan pian napansiansiam so inkasikan aliing ed espiritual.

Panon a pinabiskeg na inmunan totoon walaay pananisia so espiritualidad da diad panamegley na personal a panagaral ed Salita na Dios? Panon ya arum ed modernon-agew ya ariripen nen Jehova et nanggunaetan dan lalon makapagayaga so panagaral da tan ontan met a mabunga? Panon a sikara so atumangan ed saray sagpot da?

Apasimbalo so Biskeg Da Diad Personal a Panagaral?

Si arin Oseas ed Juda so nanggawa na kampanya to sumpad panagtalintao tekep na babaleg a seseg kayari na impakawalaan na ‘libro na ganggan nen Jehova diad panamegley nen Moises’ ya imbasa ed sikato. Anggapoy duaruwa a satan so aliwan ununan pankanawnawa a kinonsidera to iyan kabiangan na Salita na Dios; balet diad pakakadngel ed mensahe a direkta manlapud orihinal a manuskrito ya amaseseg ed sikato ed pibabakal to para’d puron panagdayew.​—2 Awaran 34:14-19.

Atebek nen propeta Daniel ‘iray bilang na taon para’d kasumpalan na pankibalatar na Jerusalem’ tan maseguron satan so agnanlapu lambengat ed libro na Jeremias noagta nanlapu met ed “saray libro.” Maseguron kaiba dia iray libro a singa say Levitico (26:34, 35), Isaias (44:26-28), Oseas (14:4-7), tan Amos (9:13-15). Say apekderan to ed magunaet a panagaral to ed saray libro na Biblia so angitonton ed sayan debotadon too pian anapen so Dios diad magunaet a pikakasi. Say masimoon a kerew to so naebatan ed kaaruman a kiparungtal tan panamaseguro lamet nipaakar ed syudad na Jerusalem ontan met ed totoo to.​—Daniel, kapitulo 9.

Si Oseas, a nanggawa na “maptek dia ed saray mata nen Jehova,” tan si Daniel, a “balbaleg ya inadaro” ed imaton na Dios, so aliwan duma ed sika natan. (2 Arari 22:2; Daniel 9:23) Saray personal a sagpot da ya amakiwas a tuloy ed sikara diad panagaral ed Kasulatan a wala ed saman a panaon so angitonton ed sikara ed babaleg ya espiritualidad tan tinmulong ed sikara a panggayagaan so mas mabiskeg a siglaotan ed Dios. Ontan met so nibaga ed dakel niran inmunan ariripen nen Jehova, a singa si Jepti, sakey a salmista ed abung nen Asap, Nehemias, tan Esteban. Amin na saraya so amaneknek ed maalwar a personal a panagaral ed kabiangan na Biblia a wala ed panaon da.​—Uko-ukom 11:14-27; Salmo 79, 80; Nehemias 1:8-10; 8:9-12; 13:29-31; Gawa 6:15–7:53.

Abuloyan so Ministeryo a Magmaliw ya Insentibo

Kaslakan ya ariripen nen Jehova natan a manlilingkor ed sikato ed loob na dakel a taon so walaan na eskedyul para’d personal a panagaral na Biblia. Aromog dan saya so makana ta pian sikara so mansiansian alerto ed espiritual tan sigpot a nakapet daray Kristianon responsabilidad. Anggaman ontan, dakel ed sikara so mamidbir ya aglawas mainomay so panimbang ed panangusar ed panaon tan biskeg da ed baetan na panagaral tan ed arum a pamaakaran ya agnepeg ya ibaliwala.

Siansia ni, say pansiansian alerto ed espiritual ed panamegley na magunaet a personal a panagaral so makana diad pidedeneng ed saray nakakaukolan ed Kristianon ministeryo ed sayan abanten kipapasen na sankamundoan a panagpulong na Panarian a kimey. Saraman so mangagayaga ed balo tan araldalem iran pakatalos ed Salita na Dios so mangapet ed angat na panenyeg ed naeerasan a kapusoan. Saya so tua balanglan say sakey so niasain ed baleg a pansigayan diad espiritual a paraan a nayarin iilaloan odino say sakey et mantultuloy ed natatayek iran teritorya a walay inkalapagan ya agpananginunang.

Maparanay a Panagpakan ed Salita na Dios

Say gagawaen na arum so nayarin mangiter ed sika na saray ideya ed no panon mon napanggayagaan a nagkalalo so rutina na panagaral mo odino panon mo tan say pamilyam so makapanggawa na nagkalalon makatumang a panangusar ed panaon na panagaral. Say sakey ed saray bengatla ya aglabay a saewen na sakey ya aripen na Dios et say panagaral ed Salita na Dios a mismo ed maparanay a paraan. Dakel so nanggawa a kalat da so panbasa na ag-onkulang a talora odino apatiran kapitulo na Biblia kada simba. Kasin labay mon basaen so interon Biblia ed loob na sakey taon? Diad ontan et maliket ka a mangusar na nagkalalon panaon ed panbasa ed satan, anganko et kapalduay oras ed kada agew.

Kasin abasam so interon Biblia ya aglambengat aminsan? Akin ya agmanggawa na balon kalat lamet? Para’d pananguman, sakey a Kristianon asawan bii so nanbasa ed saray libro na Biblia unong ed alasir na inkisulat da. Sikato so akagamor na dakel a detalye, base ed kronolohikon abenegan, ya asaew to ed inmuna. Sananey nin Kristianon asawan bii so nanbasa ed interon Biblia ya aminliman danay ed loob na apalabas a limaran taon, diad kada pankakawnawa et nanlapud duman punto-de-bista. Diad sankaunaan, binasa ton diretso manlapud Genesis anggad Apocalipsis. Diad komaduan impanbasa, sinegek to so lugan na kada kapitulo ed sakey odino duaran linya ed sakey a kuaderno. Manlapud komatlon taon a manpatuloy, inggapo to ed baleg ya idesyon a walaan na reperensya, ununa et pinili ton sinukayan iray cross-reference ed margin insan nanimanon maapit ed saray paimanod-leksab ontan met ed saray inpormasyon ed apendise. Diad komaliman danay, inusar toray mapa na Biblia pian napadaak so pakatalos manlapud heograpikon aspekto. Inkuanto: “Para’d siak, say panagbasa na Biblia so nagmaliw a makagungguna a singa tagano.”

Arum a magunaet ya estudyante na Biblia so akaromog a makagungguna so pakawalaan na sakey a kopya na Biblia ya usaren labat ed personal a panagaral, ya antikey ya inonota iray makapainteres a komento ed saray margin to, makatenyeg-kanonotan iran ilustrasyon, odino saray pahina na arum iran palapagan a nayarin tuplegan ed saginonor. Sakey a sigpot-panaon a ministro so mangipapasen ed satan a makapaliket a diad kada sampot na bulan et isulat to ed kopya to iray balon punto a naaralan to legan na bulan. “Diad paniilalo ed sarayan mablin oras ko,” inkuanto, “so ontutulong ed siak ed pakadampot ed sananey iran kalat ed ontumbok a bulan.”

Arum a Maabig Iran Ideya

Kasin liknaen mon say eskedyul mo et okupado na inagew-agew tan sinimban kapilitan iran gawaen tan diad ontan et kaukolan mo so pigaran suhestion ed magmaong a pangusar ed limitadon oras mo? Bueno, awit mo’y labay mon basaen, tan usaren ya epektibo iray libren panaon mo. Diad ayaman odino diad gendat a panaaralan mo, anggad posibli et oksuyen iray libro tan arum a kagawaan ed panagaral ta pian sikaray mainomay a nadampot. Gawaen so panagaralan mo a mainawa balet aliwan komportablin tuloy a pagmaliwen to kan makakaugip. Kasin walaan ka na sakey a paliwawan asainmen? Basaen ya intero so materyal diad sankasakbayan a posiblin pankanawnawa, insan abuloyan iray ideya a nipanonot ed sika sano manpapainawa odino manggagawa na nanduruman bengatla.

Saray arum so nayarin mikoopera ed sika diad panggawa na magmaong a panangusar ed panaon para’d manbabalesan a gungguna. Alimbawa, nayarin ipabasam a maksil ed arum iray mainomay a talosan legan a sika so manggagawa na bengatlan dati lan gagawaen mo odino manseserbi na tsa ed maabig a managbasam. Komusta balet so nipaakar ed pipakna na amin ed ayaman a mangipanaon para’d personal a panagaral? “Anto so nangayagaan mon binasa ed agano ni?” No maminsan et nayarian mo’y makagamor ed nanaaralan na kakaarom diad pangigapo na tongtongan ed sayan paraan.

Kasin sika so interesado ed pangipaamta na pigaran balo iran ideya ed programa na panagaral mo? Sika so makapangiletneg na panaon a kalat para’d panagaral ed parehon paraan na dakel ed panangiletneg na panaon a kalat para’d pangitongtong ed arum nipaakar ed Biblia. Sakey a sigpot-panaon (payunir) a manangipalapag so angiletneg na binulan a kabkaabigan a kalat para’d saray oras na panagaral tan naliliketan legan a naiimano to’y karakel na panaon ya uusaren to ed panagaral a sikato so manasingger ed kalat to. Lilimitaan na arum so panaon para’d panagbantay na telebisyon tan diad satan a paraan et makagamor na panaon para’d panagaral. Dakel so mamipili ed tema na panagaral a gegemtanen da ed loob na pigaran panaon, singa saray bunga na espiritu, awaran na saray libro na Biblia, odino dunong na panagbangat. Arum so manggagayagan manggagawa na kronolohiko iran tsart, a singa say pangipanengneng na sakey ed siglaotan na Israelitan arari tan propetasa odino saray Gawa na Apostoles tan ed saray sulat nen Pablo.

Sika a kalangweran, kasin kaliktan mo so mas mabiskeg a pananisia? Akin ya agmangala na sakey a palapagan para’d impasyan panagaral legan na bakasyon? Sakey a bautismadon estudyantin haiskul so amili ed Mankind’s Search for God, sakey a libron impalapag na Watch Tower Society. Kada kapitulo, sikato so nanggawa na antikey iran sumaryo ed sakey a kuaderno ed no anto so naaralan to. Saman so makapaangat tan angala na nagkalalon panaon nen say inisip to. Anggaman ontan, sanen asumpal to so interon Biblia, sikato so mandinayew a tuloy ed inkamatua na mensahe na Biblia.

Magmaliw a Nagkalalon Entusiastikon Manaral

Baleg a bilang na modernon-agew a matoor ya ariripen nen Jehova so walaan la na “daakan a kimey ed katawan.” (1 Corinto 15:58, NW) Anggano walay nirepason eskedyul tan masimoon iran gunaet, say rutinan tutumboken mo ed sakey a tipikon simba so agtanton nauman. Ingen, say ag-onsaew ya entusiasmom ed pakagamor na araldalem a pakatalos ed katuaan tan diad pamasiansia ed inkasikan sigpot a mikabat tan mitukoyan ed nipaparungtal iran gagala nen Jehova so ontulong ed sika pian ontalona diad pamaaligwas na niyugalin panagaral mo.

Makapaseseg so pakadngel ed saray tumang na saraman so inmaligwas ed panagaral da. Sakey a Kristianon laki, diad pakakaimano to ed pakakaandi na positibon awawey nipaakar ed panagsukimat na araldalem a pakatalos ed katuaan, so angorganisa na bilay to ta pian sikato so makapangideboto na nagkalalo ed saray libren oras to ed personal a panagaral. “Satan so angitarok ed siak na liket ya agko alikna nensaman,” kuanto. “Tekep na lawas-onbabaleg a talek ed madibinon inka-autor na Biblia, naimanok a siak so makapitongtong ed arum nipaakar ed pananisiak tekep na tuan inkasigla. Naliknak a siak so apabiskeg a tuloy, mabunigas ed espiritual, tan kontento ed kada sampot na agew.”

Sakey a managbiahen manangasikaso na Tastasi nen Jehova, a manbibisita na dakel a kongregasyon, so aniskribe ed arum iran gungguna ed onian paraan: “Saraman so maseseg ed personal a panagaral so inkalapagan a mabilabilay tan malinlinew iray balikas da. Magmaong so pitotoo da ed arum, tan sikaray agmainomay a nisuawi na negatibo iran komento manlapud arum. Sano walad lawak na ministeryo, sarag day mibagay tan alerto ed saray pankaukolan na totoon naaabet da.”

Inyarum to so sakey a punto a nayarin kaliktan na arum a pansiansiaen ed kanonotan sano analisaen da so dilin padron na panagaral da. “Diad saray miting para’d Makasulatan iran tongtongan, dakel so angiyugalin direktan manbasa na saray komento ra manlapud niimprinta. Sikaray nagkalalon nagunggunaan no sikaray mandalepdep ed no panon a say materyal so mitukoyan ed apalabas a naaralan da odino ed dilin kabibilay da.” Kasin isipen mon napaaligwas mo iyan pamaakaran?

Si propeta Daniel, kayari na masulok a 90 taon na bilay to, so ag-akalikna na magenap a pakatalos ed saray paraan nen Jehova. Diad saray kaunoran a taon to, sikato so kinmerew na nipaakar ed agto sigpot a natalosan: “O Katawan ko, anto naani so kasumpalan na saraya a bengatla?” (Daniel 12:8) Anggapoy duaruwa a sayan agmanguman ya entusiasmon panaral na nagkalalo ed katuaan na Dios so tombok na sankaabigan a katooran to ed interon maawaran a kurang na bilay to.​—Daniel 7:8, 16, 19, 20.

Balang sakey ed ariripen nen Jehova so walaan met na ontan a seryoson responsabilidad a singa si Daniel ya ontalindeg a malet bilang sakey ed saray Tasi To. Magmaliw a lalon entusiastikon manaral pian napansiansiam so inkasika a mabiskeg ed espiritual. Panggunaetan so pangarum na sakey odino duaran balon paway ed sinimba, binulan, odino tinaon ya eskedyul mo ed personal a panagaral mo. Nengnengen no panon a say Dios so mamindisyon ed antokaman a samet a sagpot a gawaen mo. On, panggayagaan so personal a panagaral mo na Biblia tan saray resultan itatarok to.​—Salmo 107:43.

[Paimano ed leksab]