Inengneng a Walaay Apresasyon ed “Abung na Dios”

“SAKEY a pamaakaran so kinerew ko ed Jehova, sikato so anapen ko, salanti pakapanayam ko komon ed abung nen Jehova, ed amin ya agew a panbilay ko, a mangamayo na karakpan nen Jehova, tan manbalita [nengnengen a walaay apresasyon, NW] ed templo to.”​—Salmo 27:4.

Say maapresyan Arin David so ninmengneng tekep na gayaga, odino panliket, ed templo nen Jehova. Kasin ontan met so liknaan mo nipaakar ed saray sentro na tuan panagdayew natan? Say masulok a 95 ayaman a Bethel ed saray sanga na Watch Tower Society so kabiangan na saray pasilidad a misiglaotan ed panagdayew ed si Jehova diad panaon tayo.

“Say inengneng ko ed apalabas a dakel a taon ya impanlingkor ed Bethel so mangipapalikna ed siak na baleg a pisasalamat tan apresasyon, a naaaruman a tinaon,” so salaysay nen Helga, a ginmapon nantrabaho ed ayaman ed Alemanya nen 1948. Si Helga so sakey ed 13,828 a magayagan komikimey ed Bethel ed sankamundoan na serbisyon taon nen 1993 a ‘nangamayo na karakpan nen Jehova.’ Anto so talagan kabaliksan na ngaran a Bethel? Panon a balang sakey ed saray Tasi nen Jehova, balanglan manlilingkor ed Dios, diad loob na Bethel odino diad paway, so onengneng a siaapresya ed sayan oksuyan?

Sakey a Ngaran a Mankaukolan na Debosyon

Say “Bethel” so sankamatukoyan a ngaran, ta say Hebreon salita a Behth-’Elʹ et kabaliksan to’y “Abung na Dios.” (Genesis 28:19, paimanod-leksab, NW) On, say Bethel so mipara ed sakey ya organisadon-tuloy ya abung, odino ‘abung a nipaalagey ed kakabatan,’ a say Dios tan say linawa to so kiaapasakeyan na imano. (Uliran 24:3) “Singa iya panbibilay na sakey a pamilya. Sikamiy walaan na inagew-agew a rutinan organisadon-tuloy,” so siaapresyan inkuan nen Herta. Sikato so manlilingkor la ed loob na masulok a 45 a taon ed parehon Bethel a panlilingkoran nen Helga. Balang membro na sayan baleg a pamilya so walaay trabaho tan pasen to, a mangipalikna ed sikato na liket tan ligen. Mitunosan ed ngaran a Bethel, say maong ya inka-uksoy tan panangorganisa so napatnagan ed kada departamento. Saya so mangiyaalibansa na kareenan, a pagmaliwen ton epektibo so panangipulong na maong a balita, tan mangiiter ed saray kongregasyon na mabiskeg a rason pian pablien a tuloy so “Abung na Dios.”​—1 Corinto 14:33, 40.

Akin a kaukolan iratan a pasilidad? Sayan magasin, alimbawa, so pinawala na sakey ya imprintaan na Bethel. Say panangipulong na mensahe na Panarian tan panangibunog na espiritual a tagano, a namparan impasakbay la nen Jesu-Kristo, so manggagawa ed organisasyonal ya oksuyan a singa say Bethel a peteg a nakaukolan​—suportado na mabulos iran komikimey tan ipapasen ya atagey a tuloy na amin a managdayew ed si Jehova.​—Mateo 24:14, 45.

Labay mo ta a nagkalalon amtaen so nipaakar ed kaslakan a kimey dia ed sanagew? Diad panaayaman da di Helga tan Herta, sakey a tanol so narerengel ed amin a panaayaman a paalagey diad eksakton 6:30 n.k., anggaman dakel ed sarayan masulok ya 800 a regular a komikimey so ombabangon a mas masakbay pian iparaan so kimey ed sanagew. Kasabi na 7:00 n.k., Lunes ya anggad Sabado, say pamilya so mantitipon ed pananganan pian singbaten so teksto ed saman ya agew, odino say panagdayew ed kabuasan. Katumbokan na saya so sakey a masustansyan almusal. Kada agew na trabaho et onggapo ed 8:00 n.k. tan manbayag na waloy oras, ya ontundan magano para’d panangugto. (Say pamilya so kaslakan a mantatrabaho na pegtaw no Sabado.) Balanglan diad kusina, imprintaan, laundry, saray opisina, saray talyer, bookbindery, odino ed arum niran departamento, dakel so trabaho.

Diad saray labi tan ed sampot-simba, saray membro na pamilya so mililimog ed lokal iran kongregasyon diad saray miting tan diad publikon panagpulong. Dakel ya agagin lalaki ed Bethel so manlilingkor bilang mamatatken odino ministeryal ya ariripen ed sarayan kongregasyon. Aapresyaen iyan tuloy na saray lokal a Tasi iyan pitutulongan, a sarayan duan grupo so matintinunos a mankikimey a mankakasakey bilang sakey ya ulop, manrerespetoan tan mantatalosan. (Colosas 2:19) Kabat na balang komikimey ed Bethel a say asainmin to ed “Abung na Dios” et walaay panangiyuna nen arum niran aktibidad. Anggaman ontan, say entusiasmo ed panagpulong tan kalalanor ed kongregasyon, tekep na asimbang ya awawey, so mamabiskeg ed espiritualidad na saray komikimey ed Bethel, mamapadaak ed gayaga to, tan manggagawa ed sikaton lalon produktibon membro na pamilya. Agaylan importanti irayan kualidad sano mankikimey ed sakey ya “abung” a say ngaran to et mitukoyan ed sigpot-kamarerwan debosyon!

Gagawaen a Matalona so Serbisyo ed Bethel

Anto so akatulong ed agnabilang a Tastasi nen Jehova pian gawaen a matalona so serbisyo ed Bethel? Onia so komento na saray membro na pamilya na Bethel ed Pransya ya abayag la ed serbisyo: “Say aro ed si Jehova. Say determinasyon a mansiansia ed inerman a pangipasenan to ed sikatayo; inkamapaabeba, panagpasakup, tan say katutulok ed direksyon a niiter ed sikatayo na Sosyedad.” (Denise) “Naimanok ya agaylan importanti ya igalang so prinsipyon sinaglawi nen Pablo ed Roma 12:10: ‘Diad pangipanengneng na galang, manpapalabian kayo.’ Ipapanengneng ed sikatayo na sayan kasulatan so kaimportantian na agpangipipilit a paaksobi so personal ya opinyon tayo noagta, imbes, say panangunsidera ed saray opinyon na arum. Diad arum a salita, aliwan say pangegemtan tayon natalonaay arum.” (Jean–​Jacques) “Say panangipanengneng na respeto tayo ed panaglingkor ed Bethel so nabuyak no moriaen tayon silalaman iray bengatla, diad punto-de-bista na too,” so kuan nen Barbara, “lapud saya so makapangitonton ed sikatayon nalingwanan a si Jehova so mangidadaulo ed organisasyon to. Satan a galang so nayarin nabalang no sikatayoy natiror lapud ag-inkayadyari na arum.”

Amin a walad Bethel so ag-ayadyari, kanian nonoten a maong so pililimog. Maabig no saray kalangweran odino saray balo ni et agda lilimitaan so pililimog da ed saray kaedad da. Saramay mahilig a manreklamo odino manisip a negatibo so agmakapaalagey iran kaulop ed Bethel odino ed kongregasyon. Diad biek a dapag, say pangalig ed “kakabatan ya wala a manlapu ed tagey,” ya adeskribe ed Santiago 3:17, so mangitatarok na saray bendisyon. Saya “unona, sikato so malinew, insan mareen, masimpit, tan mainomay a pikasian, napno na panangasi tan maong iran bunga, andi labien tan andi pankonkonwari.” Saratan a kualidad, pati ed andukey-a-panagtepel tan panangasi, so naiimano ed “Abung na Dios,” a manggawan marakep tan makapasagyat so pansiansia na sakey diman. Anggan saray aliwan-Tasin bisita so mabetbet a mangibabalikas na pandinayew ed maabig a kiwas na inkamakaaro, tan sigagayagan espiritu na saray komikimey.

Si Anny, manedad la na masulok a 70 tan membro na pamilya na Bethel ed Alemanya nanlapulad 1956, so mangisasalaysay no panon ton mansiasiansian sibubulos ed serbisyo: “Para’d espiritual a pankaabigan ko, panggugunaetan ko so pansiansian pibansag ed saray palapagan na Sosyedad, regular ya iyaatendi ed saray miting, tan regular a pibibiang ed panagpulong. Panggugunaetan ko met a mansiansian mabunigas ed laman diad panag-ehersisyon kinabuasan, matalag a panangusar na elebeytor, tan say maparanay a panakar no nayari, nagkalautla ed lawak a serbisyo.”

Dakel ya akaeksperiensia la ed bilay ed Bethel so miabobon ed si Anny. Sikaray agbalot tinmunda a mangamta, ag-ontutunda ed panagtrabaho. Kakaukolanen na pisikal a bunigas, a magenap so ugip da tan kabkaabigan ed tagano tan kaiinum. Sankaimportantian ed amin, agda papaulyanan so personal a panagpikasi tan panag-aral na Biblia.

Atagey so Nengneng Para’d Sagradon Serbisyo ed Bethel

“Iner so pantatrahoan mo?” so mebetbet a tepet ed saray membro na Bethel. Nanduruma iray asainmin a trabaho, balet balang sakey so makanepegan a pablien na amin. Akin? Lapud balang asainmin​—balanglan panagpaandar na makina a mangimprinta na espiritual a tagano, panagpesak na saray kawes, panagluto tan panaglinis para ed pamilya, odino pantrabaho ed opisina—​so sakey a sagradon serbisyo. Singa asalambit la ed tagey, agmanangidumaduma iray Kristiano. Tandaan ya amin a nakakaukolan iran kimey a gagawaen na saray saserdoten Levita ed templo, ed saray lolooban to tan saray pananganan, so impasen ya amin a sagradon serbisyo ed si Jehova. Laktipen na satan so panagpatey tan panagparaan na saray ayep para’d bagat, panagkarga na larak ed saray lampara, anggan say panaglinis tan panagbantay ed labi. Ontan met, balang asainmin ed Bethel so makapenek tan makanan aktibidad a ‘kimey ed Katawan’ diad ontan et sakey a nikadkaduman pribilihyo.​—1 Corinto 15:58.

Kunsideraen pan magano so sakey ya ugali a makaamper ed inengneng tayon walaay apresasyon ed “Abung na Dios.” Saray Kristiano balang la ed loob odino paway na Bethel so kaukolan a manbantay sumpad ibeg tan imon, ya “inkabulok na pukel.” (Uliran 14:30) Anggapoy rason na siopaman pian ibegan toray pribilihyo ed serbisyo na kaiban komikimey ed Bethel. Sakey ni, anggapoy pasen na imon ed sakey a pamilyan Bethel, a sakey a gawa na laman. Manalagar a sipapaabeba​—satan so maabig a simbawa para’d sakey a liknaen ton singano alampasan bangta say arum so apagamoran na nagkalalo nin pribilihyo. Tan ontan to met ni, manbibilay ed Bethel iray totoon walaay nanduruman abenegan ed pinansyal. Agaylan makapadismaya no moriaen na sakey iray sirkumstansyan “pangikumpara ed arum, NW.” Say pagmaliw a napnek ed ‘tagano tan kawesen’ so ontutulong ed dakel pian mansiansian sitotoor ed loob na dakel a taon ed “Abung na Dios.”​—Galacia 5:20, 26; 6:4; 1 Timoteo 6:8.

Saray Tasi nen Jehova tan minilyon niran arum so nagugunggunaan na baleg ed anggapoy bayar a serbisyon nagagawa ed Bethel​—kimey a ginawan andi-siblet lapud aro ed Dios tan ed kaparan too. Saray ayaman a Bethel tan saray imprintaan na Watch Tower Society, a singa arum niran teokratikon pasilidad, so susuportaan na boluntaryon kontribusyon. (2 Corinto 9:7) Singa si Arin David tan saray prinsipe tan saray pangulo na Israel, nipanengneng tayo so panamabli tan apresasyon ed “Abung na Dios” diad pangiter na moral tan pinansyal a suporta ed Sosyedad. (1 Awaran 29:3-7) Nengnengen tayo natan no panon a posibli “a mangamayo na karakpan nen Jehova,” ed Bethel.

Saray Bendisyon ed “Abung na Dios”

Sano onaatendi ed sakey ya asamblea, kasin sika so makakalikna na alay inkakontento, lapud ta napapaliberan ka na saray maliket a managdayew ed si Jehova? Isipen pa, say sakey a komikimey ed Bethel so walaan na pribilihyon manlingkor ed si Jehova ed limog na grupo na saray agagi ed inagew-agew! (Salmo 26:12) Agaylan ekselenti iran iilaloan para’d espiritual ya ibubulaslas so itatarok na satan! Sakey ya agin laki so nankuan a sikatoy abangatan ni na nagkalalon makatulong ed sikato a namoldi so personalidad to ed loob na sakey taon ed Bethel nen say agawa ed taloran taon ed arum a pasen. Akin? Lapud dia lambengat a sikato so awalaan na pankanawnawan mangimaton tan mangalig ed pananisia na ontanlan dakel a matatken la ed espiritual a Kristianos ed personalidad.​—Uliran 13:20.

Diad Bethel say sakey so napapaliberan na eksperiensiadon managsimbawa, a singa panangibaga. Niyarum ni, walay gungguna na italineng ed niparaan iran komento no panagdayew ed kabuasan tan ed panagaral na Panag-Bantayan tan diad italineng ed paliwawa no Lunes na labi. Saray balon sabi so makagamor na instruksion ed Bethel Entrants’ School tan napapabtangan a basaen ya intero so Biblia ed loob na ununan 12 a bulan.

Mangitatarok na kaaruman nin panamabiskeg iray report tan eksperiensia na saray bisitan manlalapud arum a bansa. Ontan met, ombibisita iray membro na Mananguley ya Ulop odino saray manangilaman da. “Anggaman dakel so kimey da,” nanonotan nen Helga, “saray agagi so lawas walaay panaon pian mangibano tan onimis.” Agaylan makapaseseg so personal a pakaimano ed makaligliwa tan inkaulimek na ontan iran matoor a totoo.

Nagkalautla diad Bethel et naimano na sakey no panon so ikukurang na organisasyon na Dios tan no panon a say masanton espiritu to so manasagyat ed mabulos a kapusoan tan saray lima pian onkiwas. “Diad Bethel say sakey et nalikna ton sikatoy mas asingger ed pinagkasentro na kimey,” inkuan na sakey ya agi, a manlilingkor ed Bethel ed Pransya nanlapulad 1949. Intuloy to: “Nibagak a tuan para’d siak say Bethel so pormay sigpot-panaon a serbisyon mangiiter na pankanawnawa ed siak a mangitalaga na sankabalegan a panaon tan biskeg ed serbisyo nen Jehova tan nalingkoran so sankarakelan a bilang na agagi.” Tan agta satan so gagala tayo ed bilay​—say panggawa ed linawa na Dios? Diad Bethel say sakey so ‘makapangiter na galang a sanagew.’ Agaylan bendisyon!​—Salmo 44:8, NW.

Singa say adiskobre tayo, say sakey a mankikimey ed ayaman a Bethel so makaimano ed karakpan nen Jehova tan naromog to so amayamay a bendisyon. (Hebreos 6:10) Kasin say serbisyo diad “Abung na Dios” so bengatlan makagungguna para’d sika? Saramay kabiangan na saray Tasi nen Jehova ya ag-onkulang a 19 anyos ed edad, a manggagayaga ed espiritual tan pisikal a bunigas, tan, singa si Timoteo a “walaan a maong a dengel” so makapan-aplay pian manlingkor ed Bethel. (Gawa 16:2) Dakel so nanggawa ed serbisyo da ed Bethel a legay-bilay a kimey, a singa asaglawi la. Para’d sikara say pankaliktan a tuloy na salmista​—a ‘panayam ed abung nen Jehova, ed amin ya agew a bilay to’—​so nagmaliw a kapetegan.

Baleg so respeto na saray Tasi nen Jehova ed espiritu na dilin-panagsakripisyo ya ipapanengneng na agagi ran lalaki tan bibii ed Bethel, a manusumpal ed saray asainmin da a sibubulos tan sigagayaga. Balanglan sikatayo so manlilingkor ed si Jehova ed Bethel odino inerman, balang sakey ed sikatayo so walaay maabig a rason a liknaen so singa alikna nen Arin David​—onnengneng a walaay apresasyon, odino liket, ed “Abung na Dios.”

[Litrato ed pahina 31]

Sarayan Kristiano et panggagayagaan da so sagradon serbisyo ed Bethel diad Alemanya ed loob na dakel a taon