Pakatebek ed Maong a Balita

“SAY tawen so aliwan tanton asul lapud say bulag a too so agmakakanengneng ed satan,” kuan na sakey a proberbio a Danes. Balet diad okupadon inagew-agew a kabibilay tayo, kasin nanengneng tayo a say tawen so asul, a singa panangibaga? Kasin momoriaen tayo so arapen tekep na talek? Kasin peteg tayon panisiaan so maong a balita ya ipaparungtal na Salita na Dios, say Biblia?

Diad inmunan artikulo, akonsidera tayo iray aspekto na literal ya inkabulag. Usisaen tayo pa natan so klase na pakanengneng a nagkalalon importanti. Lalanoren toy magnayon a liket tayo ontan met ed ilalo para’d pinabli tayo.

Anggapoy duaruwa, nidudunget tayo ed “saray panaon a maatap a mairap a pidenengan.” (2 Timoteo 3:1, NW) Anto so nagagawa legan a saray totoo so mipupuligesgesan a manbilay, mansusungdo ed saray kairapan ed bunigas tan problema ed pamilya, tan mideneng ed sosyal ya ag-inkahustisya tan kakulangan na aro? Makapaermen, dakel so makakaimano a say talek da ed kapara ran too, relihyon tan gobierno so onkakapoy. Diad pakakalikas ya anggapo so solusyon, arum so mangikuan a saray problema ra so agbalot naresolbi ed sakey a normal a paraan. Diad peryodikon Brazil a Jornal da Tarde, naimano nen Jacob Pinheiro Goldberg: “Saray totoo, diad arap na maruksan inkapeteg so nasisigen a tuloy na saray lingo ya agda natalosan, tan sikaray onpapapeg ed makapadismayan mistisismo.” Ingen, anggan sano aliwa so pansumpalan na saray bengatla, labay tayon usaren so maabig tan makabat a panagnonot, agta ontan?

Isipen pan magano a nakaukolan mo so ayaman para’d pamilyam, tan agmo kapapagaan so kuarta. Anganko et onnenengneng ka ed kaliber-liber tan onbibisita ed nanduruman abung diad nanduruman kakaabay. Anggaman saray ahenti na abung tan lote so manggugunaet a mangunsidera ed saray pirawat mo, agmo nayarian so mananap na klase na ayaman a kaliktan mo. Ingen, lapud say inkakontento tan pankaabigan na pamilyam so nalalanor, sika so ag-onsuko, agta ontan? Natan nonoten pa so liket sano diad kaunoran et narumog mo so ayaman a panpirpirawatan mo.

No panon a mangusar ka na panaon ed pananap na balon ayaman, akin ya ag-usisaen so Biblia pian nengnengen so solusyon ed saray problemam? No panon a nakaukolan tayon simbangen iray katuaan sano mandesisyon nipaakar ed ayaman, ontan met a nakaukolan tayon talosan a maong no anto so nabasa tayo ed Salita na Dios. Tan say nagkalalon makagungguna nen say pananap na sakey ya ayaman et say pananap tan pangawat tayo na katuaan nipaakar ed si Jehova tan si Jesu-Kristo. Inkuan nen Jesus: “Saya sikato so andiangaan a bilay, ya naantaan da ka a saksakey a tua’n Dios, tan saman so inbakim, salanti Jesu-Cristo.”​—Juan 17:3.

Balet no say mensahe na Biblia so mablin tuloy, akin a dakel nin tuloy so mansiasiansian bulag ed maong a balita to? Say sakey a rason et, tan saya so nayarin manurpresa ed dakel, “say sankamundoan [so] mandokdokol ed kaugsan.” (1 Juan 5:19) Bilang resulta, si Satanas a Diablo et “binulag to so kaisipan da lapu’d ag panisia, pian say silew na evangelio na gloria nen Cristo a sikato so talintao na Dios, ag komon onsinag ed sikara.” (2 Corinto 4:4) Anggaman makanengneng tayo, say utek so mangipapatalos ed liwawa ya onloloob ed mata tayo. Kanian, say pagmaliw a bulag et naukeran met bilang “agpakayari odino agmabulos a manebek odino mangukom.” Saya so mangipanonot ed bantog a daparan: “Anggapo so bulag a singa saraman so agmalabay a makanengneng.”

Say sakey a toon bulag so agmakanengneng ed no anto so walad arapan to, kanian sikato so nayarin mapeligro ed pakasakitan. Say literal ya inkabulag na dakel so agnatan naresolbi, ingen anggapo so obligadon mansiansian bulag ed espiritual.

Pananalona ed Espiritual ya Inkabulag

No panon a say marutak iran kipapasen so mamakapoy na pakanengneng, say nabubulok ed moral a kaliber-liber so panlapuan na pakabulag ed moral. Nagkalalo ni, impasakbay nen Jesus so sumpa ed gaway-too iran doktrina tan tradisyon. Impalinew to a saray relihyoson papangulo nen saman so mamapalikdo ed pulok: “Sikara so bulag a manangitonton. Et no say bulag itonton to so bulag, sikara’n dua napelag ira ed abot.”​—Mateo 15:14.

Imbes a napapalikdo na bulag iran papangulo, agaylan maliket iraman so mangilulukas na kamataan da ed maong a balita nipaakar ed Panarian na Dios! Inyabawag nen Jesus: “Nisengeg ed pangokom linmaak dia ed mundo, pian saray ag makanengneng makanengneng ira.” (Juan 9:39) Anggaman kuan, panon a say bulag ed espiritual so makanengneng? Bueno, ituloy tayo so pangonsidera ed literal ya inkabulag.

Nanduruma iran probisyon so wala natan a nausar na saray walaay depekto ed pakanengneng. Saya so aliwan naynay a kaso. Anggapo so peteg a seryoson gunaet a ginawa a makatulong ed bulag sakbay ya inletneg nen Valentin Haüy so espisyal ya eskuelaan para’d bulag nen 1784. Saginonor, naimbento nen Louis Braille so paraan a mangipapaamta ed ngaran to; satan so ginawa to pian tulongan a makabasa iray walaay depekto ed pakanengneng.

Komusta so nipaakar ed bulag ed espiritual? Nen apalabas iran taon et ginawa so seryoso iran sagpot pian iyabawag so maong a balita anggan ed sankasulinekan iran parte na dalin. (Mateo 24:14) Saray Tasi nen Jehova so malikeliket a mangitarok na ilalo ed namparan piguratibo tan pisikal iran bulag.

Insulat na sakey a biin taga Brazil: “Kaliktan kon ibaga ya anggaman ed pisikal a depekto, siak so makanengneng​—ed espiritual. Agaylan makapakelkelaw a Dios! Maliket tayon naamtaan a ‘buskagen nen Jehova so lima to tan peneken toray pilalek na ami bengatlan mabilay.’” (Salmo 145:16) Tan nanonotan ni nen Jorge, bulag ed pisikal: “Say bilay ko so nayarin naapag a tuloy ed duaran kabiangan: sakbay tan kayari na Tastasi. . . . Diad tulong da, siak so akanengneng ed mundo tekep na inkalinew tan inkamasnag. Pangagayagaan ko so ekselinten pitotongtong ed amin ed kongregasyon.” Makapaliket a singa ontan, say Biblia so mangiiter na panamaseguro ed sikatayo ya agla mabayag et anggapo so anggan sakey ed dalin a magmaliw a bulag​—literal odino diad espiritual a paraan. Panon a magmaliw ya ontan? Panon a napaneknekan a tua ed sankadalinan a “si Jehova lukasan to so matamata na bubulag”?​—Salmo 146:8.

Say Mogmon Permanentin Tambal​—Say Panarian na Dios

Anggaman ed idaraak na makabat ed medisina, dakel a sakisakit so mantutultuloy a pansesengegan na pakabulag, ot-ot, tan ipapatey. Anto, sirin, so nakakaukolan pian napunas so malnutrasyon, makapoy ed kalinisan iran kipapasen, tan gonigon a mangeekal ed namparan pakanengneng tan gayaga ed bilay? Say impamaabig nen Jesus ed bulag tan arum so melag labat a padron para’d arapen. Makapaliket, say panagbangat tan panagtambal a kimey to so mangiyaanino ed saray bendisyon a ninatnat ed dalin ed silong na Panarian a gobierno na Dios.

Say panamaabig ed sankamundoan a laknab so asingger la.a Sayan madibinon panamaabig a programa so agaylay abig ya inyilustra nen apostol Juan: “Impanengneng to ed siak so sakey a malinis ya ilog na danum na bilay a manesiab a singa cristal, ya ompapaway ed trono na Dios tan say Cordero, dia ed pegley na lansangan to. Tan dia ed biek na saya ya ilog tan dia ed saman wala so kiew na bilay, ya wala so bunga to a labindua, a binulan so pangiter to na bunga to: tan saray bulong to nipaakar onkana’ra a pakatambal ed saray naciones.”​—Apocalipsis 22:1, 2.

Saray balikas a singa say “danum na bilay” tan “kiew na bilay” so mangiyiilustra a kayarin mangangga iyan marelmeng a sistema, say makapaabig iran probisyon na Panarian na Dios so kalkalnan mangibangon ed katooan ed inkayadyari. Diad tua, saray gungguna na dondon bagat nen Jesus (pati say sigpot a pakaperdona na saray kasalanan), tekep na pikakabat ed si Jesu-Kristo tan ed Ama to, so mangitarok na nagnap a bunigas tan andi-anggaan a bilay.​—Juan 3:16.

Liket ed Balon Mundo na Dios

Iretrato ed kanonotan, sirin, so dalin ya andian na krimen, polusyon, odino kairapan. Isipen mo pay pamilyam a manbibilay a mareereen ed nipawil a Paraiso. (Isaias 32:17, 18) Agaylan gayaga so pakaimano ed nanduruman kolor tekep na nagnap a kanonotan tan saray pakalikna!

“Say natural a kipapasen para’d too et pian manbilay ed sakey a mantultuloy a manguuman a kaliber-liber​—na liwawa, kolor, saray nengneng. Anggapo so makapasawa ed kaliber-liber ed inkasipor,” ibabaga nen Faber Birren. “Say kolor so sakey ed saray natural a pangayagaan ed sayan mundo. Satan so sigpot a kipapasen, aliwan say panangipuera, tan dakel a makapaliket a panagbilay so mandidipendi ed satan.”

Agaylan mablin regalo so pakanengneng! Agaylan gayaga sano saray mata na datin bulag​—literal odino espiritual—​so makanengneng la!

On, diad onsasabin nipawil a Paraiso, say inkabulag tan arum nin agpakayari so aglan balot panlapuan na ermen! Anggapo lan balot so napalikdo. Lapud say puron aro so ontalona, amin so naliwawaan ed espiritual. Satan, tan nagkalalo ni, so nagawa ed asingger ya arapen, balet natan la so panaon a magmaliw a naabobonan na samay Sakey a manumpal ed mapropetikon sipan to: “Satan la nilukas so saray mata na bulag”!​—Isaias 35:5.

[Paimano ed leksab]

[Litrato ed pahina 7]

Satan la nilukas so saray mata na bulag!