Anto so Ilalo Para’d Saray Bulag?

TINIBUKEL nen John Milton iray anlong ton Paradise Lost tan Paradise Regained anggaman sikato so sigpot a bulag. Say kipapasen nen Helen Keller bilang bulag tan telek so ag-angamper ed saray sagpot ton bangatan tan tulongan iramay walaan na saray depekto ed pisikal. On, dakel a bulag so ontatalonan tuloy. Balet agaylan makapakelaw so pansumpalan no balang sakey so makapangayaga ed maabig a pakanengneng! Sika so nagkalautlan mipakna no walaan ka na pinabli odino sakey a kaaro a bulag odino walaan na makapoy a pakanengneng.

Tua a, diad arum a daldalin et walaray rehabilitation program a mangibabangat ed saray abilidad ed inagew-agew a kabibilay para’d totoon walaay depekto ed pakanengneng. Say braille tan saray ason impasal a mangigiya ed bulag so ontutulong ed bulag pian naasikasoy dakel a pankaukolan da. Anggaman kuan, moriaen na dakel a totoo so inkabulag bilang say tatakotan a tuloy ya agpakayari. Inkuan na sakey a managsulat: “Say pagmaliw a bulag et kabaliksan to so pakabalang na sakey ed kawayangan a mangusar ed sankabalgan a tuloy a kabiangan na nanengneng a mundo tayo.” Ontan met, dakel so kaukolan a mandependin tuloy ed arum.

Nayarin mankelaw ka, akin, a say inkabulag so ontanlan malaknab? Bueno, nadngelan mo ta la so nipaakar ed trachoma? Satan so pansesengegan na ngalngalin siameran milyon a kaso na inkabulag. Onia so ibabaga na The New Encyclopædia Britannica nipaakar ed satan: “Say sakit so makaalis tan onkakamayat ed grupo na totoon nanseseksekan ed marutak a kaliberliber. Say kakisiran na danum para’d panuras, tan say samplon nilibon apangat ya ondadapo ed dutak na too, so mangikakamayat na sakit. Diad arum iran paraan say trachoma so manunan problema ed sosyal nen say problema ed medikal; no saray estandarte ed panagbilay so napaaligwas, nabawasan so panseseksekan, naamper iray apangat, tan naseguro so magenap a suplay na danum, say pangaapekta na trachoma so maples a nakesayan.” Sananey nin milyon odino onsulok ni so walaay sakit ya onchocerciasis, odino river blindness. Komusta met so nipaakar ed xerophthalmia? Anggaman satan so mairap ya ibalikas, say katuaan et satan so kaslakan a sengegan na inkabulag. Say diyabetes, diptheria, baris, scarlet fever, tan makaalis iran sakit ed sekso so nayarin mansumpal met ed pakabulag.

Legan ya ontatatken itayo, say pakanengneng tayo so nayarin onkapoy bilang resulta na ontan iran sakit a singa say macular degeneration tan glaucoma; tan agtayo naekal so katarata. Inkuan na The New Encyclopædia Britannica: “Say katarata so manuna nin sengegan na pakakabulag diad dakel a bansa ed mundo, tan saya so nagkalalon makapasesga lapud katuaan a satan so mainomay a tuloy a natambal ed panamegley na pangopera.”

Anggaman ed balo iran nalmoan ed ophthalmology, say sigpot a pakaekal ed inkabulag so ompapatnag ya arawin tuloy ed arapen. Ibabaga na parehon ensayklopidya: “Saray aligwas ed panangamper tan say panagtambal tan panangopera ed inkabulag so magmaliw lambengat a makagungguna ed populasyon a walaay pakayarin makapanpatambal. Anggad say nutrisyonal tan saray estandarte ed kalinisan ed baleg a kabiangan na populasyon na mundo so napaaligwas, say pangamper ed pakabulag so mansiansia ed atagey a kipapasen to.”

Legan a saray antibiotic tan operasyon so peteg a walaay matukoy ya usar ed pangontra ed pakabulag, say ilalo ed permanentin panamaabig so mitukoyan ed sakey a bengatlan agawa ed ngalngali duan lasus taon lay apalabas.

Panamaabig ed Bulag ed Agew nen Jesus

Iretrato ed kanonotan so sakey a lakin man 30 años, a manaakar ed marabok a dalan. Diad impakarengel a sikato so onlalabas, duaran bulag a lalaki ed gilig na dalan so kinmelyaw: “Kasian mo kami!” Anggaman saray onbabantay so angiganggan ed sikara a mandeen, saray bulag so nagkalalon kinmelyaw a makmaksil: “Kasian mo kami!” Say laki so sipapangasin tinmepet: “Antoy laba’yo ya gawaen ko’d sikayo?” Magunaet dan inyebat: “Saray mata mi nalukasan komon.” Isipen pa natan: Diniwit na laki iray kamataan da, tan tampol a sikaray akanengneng!​—Mateo 20:29-34.

Agaylan gayaga para’d sarayan datin bulag a lalaki! Ingen, say inkabulag so malaknab. Saya so sakey lambengat ya inkagawa. Akin a satan so makanepegan na imanom? Lapud si Jesus a taga Nazareth so sipapangasin angipawil na pakanengneng na saraman a lalaki. Diad tua, nilikud ed pagmaliw a ‘nilanaan pian mangipulong na saray maong a balita ed saray duruka,’ si Jesus so ‘imbaki pian mangipawil na pakanengneng na saray bulag.’​—Lucas 4:18.

Saray totoo so nikelawan ed saratan a mamilagron panamaabig a ginawa diad panamegley na makapanyarin masanton espiritu na Dios. Nabasa tayo: “Dakel a katooan, nen anengneng da so umel a makasalita, say sikuel ya inmabig, tan say piley a makaakar, tan say bulag ya makanengneng: et ingalgalang da so Dios na Israel.” (Mateo 15:31) Anggapo so antokaman a bayar odino pangipatnag na abilidad odino pangipatnag na dilin dayew to ed ontan iran panamaabig, ya impabitar nen Jesus so aro tan panangasi nen Jehova a Dios. Anggaman ontan, si Jesus so walaan na panangabagey met para’d totoon bulag ed espiritual tan pakaskasi a “maermen tan abuybuyak ira, a singa saray carnero ya angapoy pastol da.”​—Mateo 9:36.

Anggaman say ontan ya awaran so makapainteres, nayarin mankelaw ka, Komusta met natan? Lapud natan et anggapoy makapanpaabig ed totoo a singa ed ginawa nen Jesus, kasin saraman a panagpaabig so walaan na kabaliksan para’d sikatayo? Kasin wala so antokaman ya ilalo para’d saray bulag? Ipangasin basaen so ontumbok ya artikulo.

[Blurb ed pahina 4]

“Anggad say nutrisyonal tan saray estandarte ed kalinisan ed baleg a kabiangan na populasyon na mundo so napaaligwas, say pangamper ed pakabulag so mansiansia ed atagey a kipapasen to.”​—The New Encyclopædia Britannica