Kairapan na Too​—Akin ya aabuloyan na Dios Itan?

DIAD gapo na awaran na too, anggaporay lua lambengat na kaermenan odino ot-ot. Agmaniirap so totoo. Say katooan so naikdan na ayadyarin gapoan. “Say Dios anengneng to so amin a bengatla a ginawa to, et nia maong iran toloy.”​—Genesis 1:31.

Balet onsusumpa so arum, ‘Sakey lambengat a tongtong basilyo so istorya nipaakar ed si Adan tan Eva ed tanamanan na Eden.’ Makapaermen, dakel a klero na Kakristianoan so mangibabaga ed saya. Anggaman ontan, si Jesu-Kriston mismo a walaay atagey ya autoridad so amekder a maawaran iray ebento diad Eden. (Mateo 19:4-6) Niarum ni, say mogmon paraan pian talosan no akin ya aabuloyan na Dios so kairapan na too et diad pangusisa ed sarayan ebento ed asakbay ya awaray too.

Say inmunan too, si Adan, so naikdan na makapenek a kimey ya asikasoen so tanamanan na Eden. Ontan met, impasen na Dios ed arapan to so kalat a pamalaknab ed Edenikon ayaman to pian magmaliw a sankagloboan a tanamanan na panliliket. (Genesis 1:28; 2:15) Pian natulongan si Adan a nagawaan iyan baleg a trabaho, sikato so tinarokan na Dios na sakey ya asawa, si Eva, tan imbaga to’d sikara a magmaliw a mabunga tan manparakel tan pian panoen so dalin. Ingen wala ni bengatlan nakakaukolan ta pian naseguro so italona na gagala na Dios parad dalin tan katooan. Lapud agawan kaolibay na Dios, say too so walaan na bulos a linawa; kanian, nakakaukolan a say linawa na too so agbalot misumlangan ed linawa na Dios. Tano andi, niwala so ag-inkauksoy ed talba, tan say gagala na Dios a panoen so dalin na mareen ya atooan a pamilya so agnamoria.

Agmet automatiko so panpasakup na too ed uley na Dios. Satan so magmaliw a maaron panangibalikas na kawayangan na too. Alimbawa, nabasa tayo a sanen nipaarap si Jesu-Kristo ed sakey a mairap a subok, sikato so nampikasi: “Ama, no labay mo, yarawim so saya a copa ed siak: angaman ontan aliwa a say linawak no ag say linawam so nasumpal.”​—Lucas 22:42.

Ontan met, dependi itan ed si Adan tan si Eva no labay dan paneknekan so panpasakup ed uley na Dios. Diad sayan gagala et angiyuksoy si Jehova a Dios na sakey a simplin subok. Sakey ed saray kiew ed tanamanan so tinawag a “kiew na pakaamtaan na maong tan mauges.” Inrepresenta to so kanepegan na Dios a manetermina ed saray estandarti na dugan kondukta. Diad malinew a salita, isesebel na Dios so pangan na bunga manlapud sayan partikular a kiew. No si Adan tan si Eva so onsunggay ed satan, satan so mansumpal ed ipapatey da.​—Genesis 2:9, 16, 17.

Say Gapo na Kairapan na Too

Sakey ya agew, sakey ya espiritun anak na Dios so anuppiat ed paraan na panuley na Dios. Diad impangusar ed sakey ya uleg bilang paraan na pitatalosan, intepet to ed si Eva: “Nia, [talagan ta a] say Dios inkuan to, Ag kayo mangan ed angan anto ya kiew na tanamanan?” (Genesis 3:1) Kanian say lapuan na panduaruwa so nitanem ed kanonotan nen Eva no kasin say paraan na panuley na Dios so susto.a Diad ebat inter nen Eva so dugan ebat, a naaralan to manlapud asawa to. Anggaman ontan, sinumlang na espiritun pinalsa so Dios tan nantila nipaakar ed saray pansumpalan na itutunganga, diad impangibagan: “[Seguradon] ag kayo ompatey: No ag say amta na Dios dia ed agew a pangan yo ed saman, nalukasan so saray mata yo ed satan, et singa kayo Dios, ya amta yo so maong tan mauges.”​—Genesis 3:4, 5.

Makapaermen, apalikdo si Eva diad paniisip a say itutunganga so mansumpal, aliwan ed kairapan na too, noagta magmaong a kabibilay. Legan a lalo ton nenengnengen so bunga, nagkalalo iyan makaroyroyo, tan ginapoan ton kinan iman. Diad saginonor, iningganyo to met si Adan a mangan ed saman. Makapagonigon, pinili nen Adan a pansiansiaen so pabor na asawa to imbes a say Dios.​—Genesis 3:6; 1 Timoteo 2:13, 14.

Diad panamegley na impanagyat ed sayan rebelyon, impagmaliw na espiritun pinalsa so inkasikato a sumusumpa ed Dios. Kanian sikato so tinawag a Satanas, manlapud Hebreon salita a mankabaliksan na “sumusumpa.” Sikato met so nantila nipaakar ed Dios, a ginawa to so inkasikaton managpauges. Kanian, sikato so tatawagen met a Diablo, manlapud Griegon salita a mankabaliksan a “managpauges.”​—Apocalipsis 12:9.

Kanian, ginmapo so kairapan na too. Talora ed saray pinalsa na Dios so lingon angusar ed langkap dan kawayangan, a pinili so sinisiblet a kabibilay a misumlangan ed Manamalsa ra. Say onlelesan tepet natan et, Panon a resolbien na Dios iyan impanrebeldi diad sakey a maptek a paraan a mamapawil na talek na nakekeraan iran matudion pinalsa to, kaiba iray matoor ya anghel diad tawen tan arapen a kailalakan nen Adan tan Eva?

Say Makabat a Kiwas na Dios

Arum so nayarin onsuppiat a sankaabigan komon no dineral a tampol na Dios si Satanas, Adan, tan Eva. Balet satan so agmanresolbi ed saray salisalan a pinalesa na impanrebeldi. Sinuppiat nen Satanas so paraan na panuley na Dios, ya isusuherin magmaong so panbilay na totoo no sian ed uley na Dios. Ontan met, say itatalona to ed impamabeneg ed inmunan duaran too sumpad uley na Dios so amalesa na arum niran salisalan. Lapud si Adan tan Eva so nankasalanan, kasin kabaliksan na saya a walay bengatlan lingo ed paraan na impamalsa na Dios ed too? Kasin wala so siopaman diad dalin a mansiansian matoor ed sikato? Tan komusta so nipaakar ed saray anghelikon anak nen Jehova ya akatasi ed impanrebeldi nen Satanas? Kasin itandoro ra so inkatunong na inkasoberano to? Mapatpatnag, a nakakaukolan so magenap a panaon pian resolbien irayan salisalan. Satan so rason no akin ya aabuloyan na Dios si Satanas a niwala anggad agew tayo.

No nipaakar ed si Adan tan si Eva, diad agew na intunganga ra, sikaray sinintensyaan na Dios. Kanian say paraan na ipapatey so ginmapo. Saray kailalakan da, a ninginew kayari impankasalanan nen Adan tan Eva, so anawir ed kasalanan tan ipapatey manlapud ag-ayadyarin atateng da.​—Roma 5:14.

Ginmapo si Satanas a say kadapag to ed salisalan et say inmunan duaran too. Uusaren to so niyabuloy a panaon pian panggunaetan a banlongan so amin a kailalakan nen Adan. Sikato met so tinmalona diad panamalikdo ed dakel ya angheles a miulop ed impanrebeldi to. Anggaman ontan, karaklan ed anghel ya ananak na Dios so sitotoor ya angitandoro ed inkatunong na pananguley nen Jehova.​—Genesis 6:1, 2; Judas 6; Apocalipsis 12:3, 9.

Say salisalan et nipaakar ed uley na Dios sumpad uley nen Satanas, salisalan a naimanon tuloy ed panaon nen Job. Pinaneknekan na sayan matoor a too diad panamegley na kondukta to a lablabayen to so matunong ya uley na Dios nen say satanikon independensya, a singa met ginawa la na saray matakot-ed-Dios a lalakin singa si Abel, Enoc, Noe, Abraham, Isaac, Jacob, tan si Jose. Si Job so nagmaliw a tema na sakey a tongtongan ya agawa diad tawen ed arap na matoor ya angheles na Dios. Diad panuporta ed matunong ya uley To, inkuan na Dios ed si Satanas: “Inimanom si aripen ko a Job? ta angapo so singa sikato ed dalin, a naskey tan matunong a laki, sakey a matakot ed Dios, tan pinmaliis a nanlapu ed mauges.”​—Job 1:6-8.

Lapud agto awaten so inkatalo, ibabaga nen Satanas a manlilingkor si Job ed Dios lapud sinisiblet lambengat iran rason, ta daakan a bebendisyonan na Dios si Job diad materyal ya aligwas. Kanian impilit nen Satanas: “Balet yunat mo so limam natan, tan diwiten mo so amin ya wala ed sikato, et ikaindan to ka ed lupam.” (Job 1:11) Alabas si Satanas, sinuppiat to ni ingen so integridad na amin a pinalsa na Dios. “Amin a say too wala ed sikato iter to nipaakar ed bilay to.” (Job 2:4) Sayan panagpauges a panangataki et agto lambengat lalanoren si Job noagta amin a matoor a managdayew na Dios diad tawen tan ed dalin. Ipaparungtal nen Satanas ya italirak da so pisiglaotan da ed si Jehova no saray bilay da so niiyan ed kapeligroan.

Si Jehova a Dios so walaan na sigpot a talek ed integridad nen Job. Diad pamaneknek ed satan, inabuloyan to si Satanas ya idapo so kairapan na too ed si Job. Diad katooran to, aglambengat nilinisan nen Job so reputasyon to noagta, nagkalalon importanti et intandoro to so inkatunong na inkasoberano nen Jehova. Apaneknekan a matila so Diablo.​—Job 2:10; 42:7.

Anggaman ontan, say sankaabigan ya alimbawa na katooran ed silong na subok et si Jesu-Kristo. Inyalis na Dios so bilay na sayan anghelikon Anak manlapud tawen ed panag-anakan na sakey a birhen. Kanian ag-atawir nen Jesus so kasalanan tan ag-inkayadyari. Imbes sikato so binmaleg ya ayadyarin too, say eksakton kasimbangan na inmunan laki sakbay na inkabalang na inkayadyari to. Ginawa nen Satanas a sakey a nikadkaduman puntirya si Jesus, a tinarokan to na dakel a tukso tan subok, a pinantokan na pakaskasin ipapatey. Balet sinmaew si Satanas a mamuyak ed integridad nen Jesus. Diad sakey a kumpleton paraan, intandoro nen Jesus so inkatunong na uley na Ama to. Pinaneknekan to met a say ayadyarin toon si Adan so andian na baraan ed impiulop ed impanrebeldi nen Satanas. Apaneknekan komon nen Adan a nagmaliw a matoor ed silong na mas memelag a subok.

Anto Ni so Napapaneknekan?

Ngalngali 6,000 a taon na kairapan na too so linmabas nanlapulad impanrebeldi nen Adan tan Eva. Legan na sayan panaon et inabuloyan na Dios so katooan a man-eksperimento na amayamay a pormay gobierno. Say makapakebbiew a rekord na kairapan na too so mamapaneknek a say too et agto nayarian ya uleyan so inkasikato. Diad tua, say anarkya so kasmak natan diad dakel a pasen na dalin. Say independensya ed Dios, a singa idadalangirang nen Satanas, so makadesyang.

Agmet kaukolan a paneknekan nen Jehova so antokaman nipaakar ed inkasikato. Kabat to a say paraan na panuley to so matunong tan diad sankaabigan a pankaabigan na saray pinalsa to. Anggaman ontan, pian sipepenek a naebatan ya amin a tepet a pinalesa na impanrebeldi nen Satanas, aabuloyan toray matudion pinalsa to na pankanawnawan ipanengneng so panlabi ra parad matunong ya uley to.

Saray tumang lapud aro’d Dios tan pagmaliw a matoor ed sikato et palampasan ton tuloy so agmanbayag a peryodo na kairapan ed lima na Diablo. Iyiilustra iya na kaso nen Job. Pinaabig nen Jehova a Dios si Job manlapud sakit ya intarok na Diablo ed sikato. Niarum ni, “benendicionan to [Dios] so kaunoran a kasampotan nen Job a lalo nen say gapu to.” Kaunoran, kayari na 140-taon ya indukey na bilay to, “si Job inatey, a sikato so masiken tan nagnap [napnek, NW] ed saray agew.”​—Job 42:10-17.

Ipapaimano iya na Kristianon managsulat na Biblia a si Santiago, a mangibabagan: “Nadngelan yo so impansungdo nen Job tan anengneng so resultan inter nen Jehova, a si Jehova so matamoy a tuloy ed panamabli tan maabagey.”​—Santiago 5:11, paimanod-leksab, NW.

Anampot lay panaon nen Satanas tan say mundo to. Agla mabayag et say linawa na Dios so mametek ed amin a kairapan ya intarok na impanrebeldi nen Satanas ed katooan. Anggan saray inatey so napaoli. (Juan 11:25) Insan, saray matoor a totoo a singa si Job so nawalaan na pankanawnawa ed pakagamor na andi-anggaan a bilay ed paraison dalin. Sarayan arapen a bendisyon ya ikalbo na Dios ed ariripen to so mangitandoro ed sikato a nagkalalo ni bilang matunong a Soberano a talagan “matamoy a tuloy ed panamabli tan maabagey.”

[Paimano ed leksab]

[Kahon/Saray litrato ed pahina 8]

MARUKSAN DIRIOS NA TOTOO

SARAY kadaanan a dirios so mabetbet a nireretrato bilang napgaan-ed-dala tan maaagum. Pian paliketen ira, pinoolan ni ingen na atateng so mabilay ya ananak da ed apoy. (Deuteronomio 12:31) Diad biek met a dapag, imbaga na saray paganon pilosopo a say Dios so andian na liknaan a singa say sanok odino panangabagey.

Saray impuyan-na-demonyon panmoria na sarayan pilosopo so akaimpluensya ed inkuan a totoo na Dios, saray Judio. Say Judion pilosopo a si Philo, kabansag nen Jesus, so angibaga a say Dios so “agmainomay a natenyeg na antokaman a liknaan.”

Agmet akaliktar ed impluensya na Griegon pilosopya so istrikton sekta na saray Judio. Inadapta ra iray bangat nen Plato a saray totoo so nanlapud imortal a kamarerwa ya asikop ed laman na sakey a too. Sakey ni, unong ed inmunan-siglon manag-awaran a si Josephus, sinisia na saray Pariseo a saray kamarerwa na marelmeng so “maniirap ed anggapoy anggaan a dusa.” Anggaman ontan, anggapoy iiter na Biblian basiyan parad ontan a panmoria.​—Genesis 2:7; 3:19; Eclesiastes 9:5; Ezequiel 18:4.

Komusta met iray patumbok nen Jesus? Kasin inabuloyan da so inkasiran naimpluensyaan na paganon pilosopya? Diad impakabidbir ed sayan kapeligroan, pinasakbayan nen apostol Pablo iray kaparan Kristiano: “Manasikaso kayo ta onpan wala so mangawa na deral ed sikayo lapu ed filosofia to tan andi kakanaan a panamalingo, unong na daan ya ugali na totoo, unong ed saray dinaralin bangat na mundo, tan aliwa’n unong ed Cristo.”​—Colosas 2:8; nengnengen met so 1 Timoteo 6:20.

Makapaermen, pigaran mankuan a Kristianon manangasikaso ed komadua tan komatlon siglo so angibaliwala ed satan a pasakbay tan imbangat dan say Dios so andian na liknaan. Ibabaga na The Encyclopedia of Religion: “Diad interamenti, saray atributo na Dios so natalosan a maong unong ed ibabaga nipaakar ed Judio tan pilosopyan kanonotan ed saman a panaon . . . Say ideya a say Dios Ama et walaay ontan a liknaan a singa say abagey . . . so kaslakan a nikuenta bilang agnaawat anggan panon man anggad bandad kaunoran na koma duamplon siglo.”

Diad ontan et inadapta na Kakristianoan so palson bangat na maruksan dios a manudusa ed saray managkasalanan diad pamapairap ed sikara ed ando lan ando. Diad biek a dapag, malinew ya ibabaga nen Jehova a Dios ed Salita to, say Biblia, a “say bayar na kasalanan et say patey.”​—Roma 6:23.

[Credit Line]

Tagey: Acropolis Museum, Greece

Courtesy of The British Museum

[Litrato ed pahina 7]

Say gagala na Dios a pagmaliwen so dalin a sakey a paraison singa Eden so nepeg a nasumpal!