Si Jehova—Say Matamoy tan Maabagey ya Ama Tayo
“Si Jehova so matamoy a tuloy ed panamabli tan maabagey.”—SANTIAGO 5:11, paimanod-leksab, NW.
1. Akin a saray mapaabeba so natatangguyor ed si Jehova a Dios?
SAY talba so ontanlan baleg ya ag-anggan nayarin bilangen na saray astronomo ya amin iray galaksi to. Say galaksi tayo, say Milky Way, so ontanlan malaknab ya ag-anggan nayarin bilangen na too so amin a bitewen to. Arum a bitewen, singa say Antares, so nilibon danay a babaleg tan mas masnag nen say agew tayo. Agaylan pakapanyari na Engranden Manamalsa na amin a bitewen diad talba! On, sikato “alaen to so saray ejercito ra ed bilang; sikato tawagen to ra ya amin ed ngaran.” (Isaias 40:26) Ingen, saya met lanlamang a makapakelkelaw a Dios so “matamoy a tuloy ed panamabli tan maabagey.” Agaylan makapaligliwa itan a pikakabat ed mapaabeban ariripen nen Jehova, nagkalautla ed saramay maniirap lapud panamasegsegang, sakit, gonigon, odino arum niran ir-irap!
2. Anto so mabetbet a panmoria na totoo na mundo ed matamoy ya emosyon?
2 Ipapasen na dakel a saray mas sensitibon emosyon, a singa say “malamoy ira’n panangasi tan panangabagey” nen Kristo, bilang sakey a kakapuyan. (Filipos 2:1) Lapud naimpluensyaan na pilosopiya na saray ebolusyonista, papasesegen daray totoo ya ipasen da so inkasikaran manunaan anggano kabaliksan na satan so pakasakitan na liknaay arum. Arum a pandinayewan a sikat ed pelikula tan isport so macho ya ag-onaakis nisay nanengnengan na matamoy a panamabli. Arum a mapulitikan manuley so onkikiwas met na singa ontan. Say Stoico a pilosopon si Seneca, a nambangat ed maruksan emperador Nero, a say “panangabagey et sakey a kaleteyan.” Onia so ibabaga na M’Clintock and Strong’s Cyclopœdia: “Saray impluensya na Stoicismo . . . so mantultuloy ya onkukurang ed kaisipan na totoo anggad natan.”
3. Panon so impaneskribe nen Jehova na inkasikato ed si Moises?
3 Diad kasuniyan, say personalidad na Manamalsa na katooan so makapaliket. Deneskribe to so inkasikato ed si Moises diad sarayan salita: “Jehova, Jehova, Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan; . . . manamerdona na inkauges, tan inpakasumpa, tan kasalanan; tan angananton pamaakaran agto ibilang ya malinis so nankasalanan.” (Exodo 34:6, 7) Tua, sinampotan nen Jehova iyan deskripsyon na inkasikato diad impangipabitar na inkahustisya to. Agto basta palabasen iray sigagagalan managkasalanan manlapud makanepegan a dusa. Siansia ni, dedeskribien to so inkasikaton manuna ed amin bilang sakey a Dios a mapangasi, diad literal et “napnapno na panangasi.”
4. Anto so makapaliket a kabaliksan na Hebreon salitan mabetbet a nipatalos a “panangasi”?
4 No maminsan say salitan “panangasi” so iisipen lambengat ya ambetel ed akindalem, diad hudisyal a pantalos et panangamper na dusa. Balet, say panangikumpara ed saray patalos na Biblia so mangiiter na mayaman a kabaliksan ed Hebreon adjective a nanlapud berbon ra·chamʹ. Unong ed arum ya iskolar, say lamot a kabaliksan to et “pagmaliw ya anlemek.” Say “Racham,” unong ya isasalaysay na libron Synonyms of the Old Testament, “so mangibabalikas na aralem tan matamoy iran liknaan na panangabagey, a singa nalilikna tayo diad pakaimano ed inkakapuy odino paniirap na saray pinabli tayo odino saramay mankaukolan na tulong tayo.” Say arum niran makapaliket ya uker na sayan maong a kualidad so naromog ed Insight on the Scriptures, Tomo 2, pahina 375-9.
5. Panon a say panangasi so mapatnag ed Mosaikon Ganggan?
5 Say matamoy a panangabagey na Dios so malinlinew a napatnagan diad Ganggan ya inter to ed nasyon na Israel. Saray pakaskasi, a singa saray balo, ulila, tan duruka, so nepeg a tratoen tekep na panangabagey. (Exodo 22:22-27; Levitico 19:9, 10; Deuteronomio 15:7-11) Amin, pati saray aripen tan ayayep, so nepeg a nagunggunaan manlapud sinimban painawan Sabaton. (Exodo 20:10) Nilikud ed satan, tatandaan na Dios iray sinansakey a matamoy so panagtrato ra ed saray duruka. Ibabaga na Uliran 19:17: “Say walaan na panangasi ed duka pautangen to si Jehova, et say maong a gawato ipawil to ed sikato a bayaran.”
Saray Limitasyon ed Madibinon Panangabagey
6. Akin ya angibaki si Jehova na saray propeta tan mensahero ed totoo to?
6 Aakbibiten na Israelitas so ngaran na Dios tan nandayew ed templo diad Jerusalem, ya “abung a nipaakar ed ngaran nen Jehova.” (2 Awaran 2:4; 6:33) Anggaman ontan, sinmabi panaon ya inabuloyan da so imoralidad, panagtalintao, tan panagpatey, ya angitarok na baleg a kabalawan ed ngaran nen Jehova. Mitunosan ed inkamaabagey to, siaanos a nanggunaetay Dios a peteken iyan mauges a situasyon diad agpangitarok na kalamidad ed interon nasyon. Sikato so “nanbaki ed sikara ed panamegley na saray igagangan to, a binangon to ya asaksakbay tan inbaki to, lapu ed walaan na panangabagey ed baley to, tan ed ayaman to a pasen: Balet niludlurey da so saray igagangan na Dios, tan minodmora ra so saray salita to, tan binalaw da so saray profeta to, anga ed say sanok nen Jehova inmalagey sumpa ed baley to, anga ed angapo so pamaakaran.”—2 Awaran 36:15, 16.
7. Sanen say panangabagey nen Jehova so sinmabi ed kapantokan to, anto so agawa ed panarian na Juda?
7 Anggaman si Jehova so maabagey tan matantan ya onsanok, sano nakakaukolan, sikatoy mangipapanengneng na matunong a sanok. Nensaman, say inkaabagey na Dios so sinmabi la ed kapantokan. Nabasa tayoray nansumpalan: “Kanian inyakar to [Jehova] ed tapew da so ari na saray Caldeo, ya amatey ed saray tobonbalo a lalaki ra ed kampilan ed abung na santuario ra, tan andian ira na panangabagey ed tobonbalo a laki odino virgen, masiken odino ubanan: initer to ra ya amin ed lima to.” (2 Awaran 36:17) Kanian say Jerusalem tan say templo to so aderal, tan say nasyon so nalan kautibo na Babilonia.
Pangabagey Parad Ngaran To
8, 9. (a) Akin ya inyabawag nen Jehova a sikatoy nawalaan na panangabagey parad ngaran to? (b) Panon ya apepe iray kabusol nen Jehova?
8 Saray kabangibang a nasyon so nangayaga ed inkadesyang na saya. Diad panagmudmoran paraan; inkuanda: “Saraya sikara so baley nen Jehova, et pinmaway ira ed dalin to.” Lapud asakitan ed sayan panamalaw, inyabawag nen Jehova: “Wala nen saman so panangasik lapu ed masanto a ngaran ko . . . Et pasantosen ko naani so baleg a ngaran ko, . . . et saray nacion naamtaan da naani a siak si Jehova.”—Ezequiel 36:20-23.
9 Kayarin akautibo so nasyon to ed loob na 70 a taon, say maabagey a Dios, si Jehova, so angibulos ed sikara tan inabuloyan toran ompawil tan mangipaalagey-lamet ed templo diad Jerusalem. Saya so amepe ed kabangibang a nasyones, a nikelawan a tuloy a ninmengneng. (Ezequiel 36:35, 36) Anggaman ontan, makapaermen a nibagan say nasyon ya Israel so naplag lamet ed mauges ya ag-agamil. Say matoor a Judio, si Nehemias, so tinmulong pian peteken so situasyon. Diad mapublikon pikakasi, nirepaso to so maabagey a pidedeneng na Dios ed nasyon, a kuanto:
10. Panon ya impabitar nen Nehemias so panangabagey nen Jehova?
10 “Kanian inyawat mo ra ed lima na saray kabusol da, ya amaermen ed sikara: et dia ed panaon na kairapan da, sanen naningel ira ed sika, dinmengel ka a nanlapu ed tawen; et unong ed saray dakel a panangasim initdan mo ra na saray manangilaban ya angilaban ed sikara ed lima na saray kabusol da. Balet kayari ya awalaan ira na painawa, nangawa ra na mauges lamet ed arap mo; kanian pinaulian mo ra ed lima na saray kabusol da, dia ed ontan ya walaan ira na pakauley ed sikara: angan ontan sanen nanpatauli ra, tan naningel ira ed sika, dinmengel ka, a nanlapu ed tawen; et inlaban mo ra ed saray dakel a panaon unong ed saray panangasim. . . . Angan ontan intepel mo ra ed saray dakel a taon.”—Nehemias 9:26-30; nengnengen met so Isaias 63:9, 10.
11. Anto so walan pandumaan ed baetan nen Jehova tan saray dirios na totoo?
11 Kaunoran, kayari siruruksan impangipulisay ed inad-aron Anak na Dios, abalang na Judion nasyon so apribilihyoan a talindeg to ed ando lan ando. Nambayag na 1,500 a taon so matoor a panangaro na Dios ed sikara. Saya so andi-anggaan a paneknek ed katuaan a si Jehova so tua a Dios na panangasi. Agaylan malinew a pidumaan ed maruksan dirios tan andiay liknaan a diosas a ginawa na makasalanan a totoo!—Nengnengen so pahina 8.
Say Sankabalgan a Balikas na Panangabagey
12. Anto so sankabalgan a balikas na panangabagey na Dios?
12 Say sankabalgan a balikas na panangabagey na Dios et say impangibaki to ed inad-aron Anak to ed dalin. Tua, say impanbilay nen Jesus ya atekepay integridad so angitarok na baleg a liket ed si Jehova, ya angiter ed sikato na ayadyarin ebat ed saray palson panamakasalanan na Diablo. (Uliran 27:11) Anggaman ontan, diad saman met lanlamang, say impakanengneng to ed maruksan impanirap tan makapabaing ya ipapatey na inad-aron Anak to so andi-duaruwan angitarok ed si Jehova na babaleg ya ot-ot nen dinanman a kaukolan a sungdoan na siopaman ya ateng ed dalin. Saman so maaron tuloy a bagat, a mangilulukas na dalan na kilalaban parad katooan. (Juan 3:16) Unong ya impasakbay nen Zacarias, ya ama nen Juan a Managbautismo, satan so angipatnag ed “matamoy a panangasi na Dios tayo.”—Lucas 1:77, 78.
13. Diad anton importantin paraan a si Jesus et angisindag ed personalidad na Ama to?
13 Say panangibaki ed Anak na Dios ed dalin so angiter met ed katooan na mas malinew a panmoria ed personalidad nen Jehova. Panon ya ontan? Diad paraan a sigpot ya insindag nen Jesus so personalidad na Ama to, nagkalautla diad pidedeneng to ed saray duruka diad matamoy tan maabagey a paraan! (Juan 1:14; 14:9) Nipaakar ed sayan bengatla, saray taloran managsulat na Ebanghelyo a si Mateo, Marcos, tan Lucas so manguusar na Griegon berbo, ya splag·khniʹzo·mai, a manlalapud Griegon salita parad “saray pait.” “Manlapud mismon lapuan to,” isasalaysay na iskolar na Biblia a si William Barclay, “naimanon say dedeskribien to et aliwan say ordinaryon kasi odino abagey lambengat, noagta sakey ya emosyon a mamakiwas ed too anggad akindale-dalem na inkatoo to. Satan so sankabiskegan a salita diad Griego parad liknaan na inkamaabagey.” Satan so nipatalos ed nanduruman paraan bilang “manliknay abagey” odino “panangabagey.”—Marcos 6:34; 8:2.
Sanen Nanabagey si Jesus
14, 15. Diad syudad na Galilea, panon ya apakiwas na panangabagey si Jesus, tan anto so iyiilustra na saya?
14 Say eksena et say syudad na Galilea. Sakey a laki a “napno na kating” so inmasingger ed si Jesus ya ag-angiter na niyugalin panamasakbay. (Lucas 5:12) Kasin sikato so siruruksan binaat nen Jesus lapud agto impangikelyaw na, “Marumsis, marumis,” a singa kakaukolanen na Ganggan na Dios? (Levitico 13:45) Andi. Imbes, tinalineng nen Jesus so desperadon kerew na laki: “No labay mo, nayarian mo ak a linisan.” “Lapu’d atenyeg so panangabagey to,” inyunat nen Jesus so lima to tan diniwit so akating, a nankuan: “Labay ko; nalinisan ka komon.” Et pinmawil a tampol so datin bunigas na laki. Diad ontan et aglabat idedemostra nen Jesus so mamilagro, inter-Dios iran pakayari to noagta ontan met ed matamoy a liknaan a mamakiwas ed sikaton mangusar ed saratan a pakayari.—Marcos 1:40-42.
15 Kasin nepeg ya ununan asinggeran si Jesus pian ipanengneng toy inkamaabagey? Andi. Ag-abayag, nabet to so tulor a nanlapud syudad na Nain. Anggapoy duaruwa, dakel laray anengneng nen Jesus a tulor, balet saya so nagkalautlan makapatenyeg na liknaan. Say inatey et say bogbogtong ya anak na balo. “Inabagey to,” inasinggeran nen Jesus tan inkuanto: “Agka mannangis.” Insan ginawa to so matalonggaring a milagro na panangipawil ed anak to ed bilay.—Lucas 7:11-15.
16. Akin a naabagey nen Jesus so dakel a totoon ontutumbok ed sikato?
16 Say mapatpatnag a leksion a naaralan manlapud saray ebento ed tagey et sanen si Jesus so ‘angabagey,’ sikato so manggawa na bengatlan positibo pian makatulong. Diad tinmumbok nin inkagawa, inusisa nen Jesus so dakel a totoon nantultuloy a tinmumbok ed sikato. Inreport nen Mateo ya “inabagey to ra, lapud maermen tan abuybuyak ira, a singa saray carnero ya angapoy pastol da.” (Mateo 9:36) Anggapoy tanton nagagawaan na saray Pariseo pian napenek so espiritual ya inka-eras na kabanyakan a totoo. Imbes, pabebelatan daray mapaabeba diad panamegley na saray agnakakaukolan a totontonen. (Mateo 12:1, 2; 15:1-9; 23:4, 23) Say panmoria ra ed kabanyakan a totoo so niwalwal sanen inkuan da ed saray ontatalineng ed si Jesus: “Saraya a katooan ya agda amta so gangan naayew ira.”—Juan 7:49.
17. Panon a say panangabagey nen Jesus ed dakel a totoo so amakiwas ed sikato, tan anton malaknab a giya so intarok to diman?
17 Diad kasuniyan to, si Jesus so apakiwas a tuloy lapud problema na totoo nipaakar ed espiritualidad. Balet talagan dakerakel so totoon interesado ya agto la sarag a naasikason sinansakey. Kanian binagaan toray babangatan ton manpikasi pian onkerew na dakel nin komikimey. (Mateo 9:35-38) Mitunosan ed saratan a pikakasi, imbaki nen Jesus iray apostol tekep na sayan mensahe: “Say panarian na tawen asinger la.” Saray niiter ya instruksion ed saman ya okasyon so onkakana bilang mablin giya parad saray Kristiano anggad agew tayo. Agpanduaruwaan, a say inkamaabagey nen Jesus so amakiwas ed sikato pian peneken so inka-eras na katooan ed espiritual.—Mateo 10:5-7.
18. Panon so ikikiwas nen Jesus sanen inisturbo na totoo so panpapainawa to, tan anton leksion so naaralan tayo manlapud saya?
18 Diad sananey ya inkagawa, alikna lamet nen Jesus so kapagaan parad espiritual iran pankaukolan na totoo. Diad sayan pankanawnawa sikato tan saray apostol so naksawan kayari na impasyan panagpulong, tan nananap ira na sakey a lugar a napanpainawaan. Balet sikaray nalmon tampol na totoo. Imbes a si Jesus so naingongotan lapud sayan panangisturbo na totoo ed panpainawa ra, irerekord nen Marcos ya ‘inabagey to ra.’ Tan anto so rason na sarayan masimoon a liknaan nen Jesus? “Singa ra saray carnero ya andian na managpastol.” Lamet, kinmiwas si Jesus unong ed liknaan to tan ginapoan ton imbabangat so dakel a totoo “nipaakar ed panaria’y Dios.” On, sikato so apakiwas a tuloy lapud inkaeras da ed espiritual ya insakripisyo to so nakakaukolan a panpainawa pian bangatan ira.—Marcos 6:34; Lucas 9:11.
19. Panon a say panagpaga nen Jesus ed dakel a totoo so linmaknab ni ed espiritual iran pankaukolan da?
19 Bangta manunan panpapagaan to so nipaakar ed espiritual iran pankaukolan na totoo, agmet binaliwala nen Jesus so manuna iran pankaukolan da ed pisikal. Diad saman lanlamang ya inkagawa, et “saray [nankaukolan] na pananambal tinambal tora.” (Lucas 9:11) Diad saginonor ya inkagawa, abayag lan kaulop to so totoo, tan sikaray arawi ed ayaman da. Diad impakalikas ed pisikal a pankaukolan da, inkuan nen Jesus ed saray babangatan to: “Kaskasian ko so dakerakel a katooan, lapu’d akipanayam ira’d siak ed talo ran agew, et angapo’y nakan da: et ag ko labay ira’n pasempeten a manaayunal, ta ompan onkapoy ira ed dalan.” (Mateo 15:32) Ginawa nen Jesus so bengatla pian napaliisay posiblin panirap. Mamilagron intarokan toray lalaki, bibii, tan ugugaw na panangan a pinawala manlapud pitoran tinapay tan pigaran ankekelag a sira.
20. Anto so naaralan tayo manlapud kaunoran a nikurit ya agawa ed impangabagey nen Jesus?
20 Say kaunoran ya inkagawan nikurit ya apakiwas na abagey si Jesus et diad sampot ya impanbaroy ton amaarap ed Jerusalem. Dakel a totoo so manbabaroy a kaiba to pian selebraan so Paskua. Diad dalan ya asingger ed Jerico, walay duaran bulag a mipapayabol a nantultuloy ya onkekelyaw: “Katawan, kasian mo kami.” Binano ira na totoo a mandeen, balet sikaray tinawag nen Jesus tan tinepetan no anto so labay dan gawaen to ed sikara. “Katawan saray mata mi nalukasan komon,” kerew da. Lapud “inpangabagey to” diniwit toray kamataaan da, tan sikaray akanengneng. (Mateo 20:29-34) Agaylan importantin leksion so naaralan tayo manlapud saya! Pagani-gani la si Jesus ed kaunoran a simba na ministeryo to ed dalin. Sikato so walaan na dakel a kimey a nepeg ton sumpalen sakbay a sagmaken to so maruksan ipapatey diad lima na saray ahenti nen Satanas. Ingen, agto aabuloyan so desdes ed sayan importantin panaon a mangamper ed pangipatnag to na matamoy a panangabagey parad agtanton importanti iran pankaukolan na too.
Saray Ilustrasyon a Mangipapabitar na Inkamaabagey
21. Anto so iyiilustra na panangansila na katawan ed baleg ya otang na aripen to?
21 Say Griegon berbon salitan splag·khniʹzo·mai, ya inusar ed sarayan salaysay na impanbilay nen Jesus, so nauusar met ed taloran ilustrasyon nen Jesus. Diad sakey ya istorya, sakey ya aripen so mikakasi ya ikdan na panaon pian nabayaran to so baleg ya otang to. Say katawan to, lapud ‘panangabagey,’ so angansila ed otang. Iyiilustra na saya a si Jehova so angipanengneng na baleg ya abagey ed impangansila ed baleg ya otang a kasalanan na balang sakey a Kristianon mangaagamil na pananisia ed dondon bagat nen Jesus.—Mateo 18:27; 20:28.
22. Anto so iyiilustra na parabolo nipaakar ed managdarak ya anak?
22 Insan wadtan so istorya na managdarak ya anak. Tandaan no anto so agawa sanen say managdarak ya anak so sinmempet. “Balet nen arawi ni, sikato so anengneng nen ama to, et atenyeg so panangabagey to, et binmatik, tan nilakap to ed beklew to, et sikato’y inangoban to.” (Lucas 15:20) Ipapanengneng na saya a sano say sakey a Kristianon sinmuawi ed basbas et mangipanengneng na tuan pagbabawi, si Jehova so siaabagey tan sitatamoy a mangawat ed sikato lamet. Kanian, diad panamegley na sayan duaran ilustrasyon, ipapanengneng nen Jesus a say Ama tayo, si Jehova, so “matamoy a tuloy ed panamabli tan maabagey.”—Santiago 5:11; paimanod-leksab, NW.
23. Anton leksion so naaralan tayo manlapud ilustrasyon nen Jesus ed mapangasin Samaritano?
23 Say komatlon mailustratibon impangusar ed salitan splag·khniʹzo·mai, so nisisiglaot ed maabagey a Samaritano ya “atenyeg so panangabagey to” ed pakaskasin kipapasen na Judion tinakewan tan tinaynan a pateypateyan. (Lucas 10:33) Bilang kiwas unong ed sarayan liknaan, ginawa na Samaritano so anggaay nayarian to pian tulongan so sankaili. Ipapanengneng na saya a si Jehova tan si Jesus so maniilalon tumboken na tuan Kristianos so alimbawa ra diad pangipanengneng na inkamatamoy tan inkamaabagey. Arum ed saray paraan a nipanengneng tayo iya so singbaten ed ontumbok ya artikulo.
Tepetepet ed Panagrepaso
◻ Anto so kabaliksan na pagmaliw a mapangasi?
◻ Panon ya impanengneng nen Jehova so panangabagey parad ngaran to?
◻ Anto so sankabalgan a balikas na panangabagey?
◻ Diad anton matalonggaring a paraan ya isisindag nen Jesus so personalidad na Ama to?
◻ Anto so naaralan tayo manlapud saray impangabagey nen Jesus tan manlapud saray ilustrasyon to?
[Kahon ed pahina 12, 13]
MALINEW A TERMINO PARAD “MATAMOY TAN MAARON PANANGASIKASO”
“O SARAY pait ko, saray pait ko!” inkelyaw nen propetan Jeremias. Kasin sikato so manrereklamo lapud mairap a pananai nisesengeg ed agmaabig a kinan to? Andi. Si Jeremias so angusar na sakey a Hebreon metapora pian deskrebien so kapagaan ton tuloy nipaakar ed onsasabin kaderal na panariay Juda.—Jeremias 4:19, NW.
Lapud si Jehova so walaan na ampetang iran liknaan, say Hebreon salita parad “saray pait,” odino “balon-balonan,” (me·ʽimʹ), so uusaren met pian deskribien toray matamoy ya emosyon. Alimbawa, pigaran dekada sakbay na agew nen Jeremias, say samploran-tribun panarian na Israel so akautibo na ari na Asirya. Inabuloyan nen Jehova iya bilang dusa lapud agda inkamatoor. Balet kasin pinaulyanan ira na Dios ya adakep? Andi. Sikato ni so siansian maap-apit ed sikara bilang kabiangan na kasipanan ton totoo. A tinukoy tora diad ngaran na promenintin tribo na Efraim, intepet nen Jehova: “Si Efraim ta so inadarok ya ana’ko? sikato ta so pinabpablik ya anak? ta siansia a nansalita ak na sumpa ed sikato, siak sinononotak ni a makanonot ed sikato: kanian say pusok mailiw [saray pait ko so inmengal, NW] ed sikato; petepeteg wala naani panangasik ed sikato kuan nen Jehova.”—Jeremias 31:20.
Diad impangibagan “saray pait ko so inmengal,” inusar nen Jehova so piguratibon panagsalita pian deskribien so masimoon a liknaan na panamabli to parad adakep a totoo to. Diad komentaryo to ed sayan bersikulo, say koma-19 a siglon iskolar na Biblia a si E. Henderson so nansulat: “Anggapo la so makalampas ed makatenyeg a panangipatnag na matamoy ya inaaman liknaan parad ompapawil a managdarak, ya ipapanengneng dia nen Jehova. . . . Anggaman sikato so nansalita sumpad [managtalintaon Efraimitas] tan anusa ed sikara . . . , agton balot nilingwanan ira, balet, imbes, aliketan diad ilalo na ultimon ipapawil.”
Say Griegon salita parad “saray balon-balonan,” odino “pait,” so uusaren ed mipadparan paraan diad Kristianon Griegon Kasulatan. Sano agnausar ed literal a paraan, a singa diad Gawa 1:18, tutukoyen to so matamoy ya emosyon na panamabli odino panangabagey. (Filemon 12) Say salita so no maminsan et nitetekep ed Griegon salitan mankabaliksan na “maong” odino “maabig.” Uusaren nen apostol Pablo tan Pedro so impantekepan a balikas sano mamapaseseg ed saray Kristiano a magmaliw a “matamoy tan maabagey,” diad literal et “akataryan tuloy ed panangasi.” (Efeso 4:32, NW; 1 Pedro 3:8) Say Griegon salita parad “saray balon-balonan” so nitekep met ed Griegon salita a pol·yʹ. Say impantekep et literal a mankabaliksan na “pakawalaan na baleg a balon-balonan.” Sayan mataltalag a Griegon balikas so inusar lambengat ya aminsan ed Biblia, tan tutukoyen to itan si Jehova a Dios. Say New World Translation so mangiiter na onian patalos: “Si Jehova so matamoy a tuloy diad panamabli.”—Santiago 5:11.
Nepeg a pisalamatan tayo a say makapanyarin tuloy a sakey ed talba, si Jehova a Dios, so aliwan singa saray maruksan dirios a pinawala na agmaabagey a totoo! Bilang pangalig ed Dios a “matamoy tan maabagey,” napapakiwas iray tuan Kristiano met a mideneng ed ontan a paraan ed balang sinansakey.—Efeso 5:1.
[Litrato ed pahina 10]
Sanen sinmabi ed kapantokan to so madibinon panangabagey, inabuloyan nen Jehova iray taga Babilonia a maneral ed sinmuawi ed basbas a totoo
[Litrato ed pahina 11]
Say pamabantay ed impatey na inad-aron Anak to so seguradon angitarok na agaylan ot-ot ed si Jehova a Dios nen say nayarin nasagmak na siopaman a panirapan
[Litrato ed pahina 15]
Nagnap ya insindag nen Jesus so personalidad na maabagey ya Ama to