‘Mikaaro ed Panamegley na Agmatunong Iran Kayamanan’

“Mikaaro kayo ed panamegley na saray kayamanan na ag inka tunong; . . . Say matoor ed dagdaiset, matoor met ed dakel.”​—LUCAS 16:9, 10.

1. Panon ya inggalang nen Moises tan saray anak a lalaki na Israel si Jehova kayari inkiliktar da manlapud Ehipto?

NILEGYAS na sakey a milagro​—agaylan makapabiskeg-pananisian eksperiensia! Say inyalis na Israel manlapud Ehipto so agawa lambengat lapud si Jehova, say Makapanyarin-amin, tan anggapo lay arum. Agpankelawan a si Moises tan saray Israelita so angikanta: “Si Jehova so biskeg ko tan kantak, tan sikato so nagmaliw a kilabanan ko; sikato ya so Dios ko, tan sikato so igalang ko; say Dios nen amak, tan sikato so itandurok la.”​—Exodo 15:1, 2; Deuteronomio 29:2.

2. Anto so inawit na totoo nen Jehova sanen sikaray inmalis ed Ehipto?

² Agaylan miduma so balon niwalan kawayangan na Israel manlapud kipapasen ed Ehipto! Natan et narayew da la si Jehova ya anggapoy makaskasbel. Tan agda tinaynan so Ehipto a kalimalima. Insalaysay nen Moises: “Saray anak na Israel . . . akikerewan da so saray Egipcios na kagkagawaan a pilak, tan kagawaan a balitok, tan kawekawes: Et si Jehova tinulongan to so saray totoo ed arapan na saray Egipcios, ed ontan la ya inyawat da ed sikara so kinekerew da. Et linakseban da so saray Egipcios.” (Exodo 12:35, 36) Balet panon dan inusar irayan kayamanan na Ehipto? Kasin satan so nansumpal ed ‘kitandoro nen Jehova’? Anto so naaralan tayo manlapud alimbawa ra?​—Ipareng so 1 Corinto 10:11.

“Yapay nen Jehova”

3.Say impangusar na Israel ed balitok ed palson panagdayew so anagdag ed si Jehova na anton kiwas?

³ Legan na 40-agew na temporaryon impansiansia nen Moises ed Palandey Sinai pian awaten iray bilin na Dios parad Israel, saray totoon manaalagar ed leksab so agmakareen. Legan ya ineekal daray ikaw a balitok, inganggan da si Aaron a manggawa na sakey ya imahen pian dayewen da. Inggawaan met ira nen Aaron na sakey ya altar, tan asakbay ed kaimbuasan et nagsisaklang iray bagat da diman. Kasin sayan impangusar da na saray balitok da so pansengegan na kipablian da ed Manangiliktar da? Andin balot! “Kanian tainan moak natan,” inyabawag nen Jehova ed si Moises, “ta ompetang so sano’ko ed sikara tan pian opoten ko ra.” Lapu lambengat ed kerew nen Moises et pinerdona nen Jehova so nasyon, anggaman saray rebelyoson manangidaulo so pinatey na salot manlapud Dios.​—Exodo 32:1-6, 10-14, 30-35.

4. Anto so ‘yapay ed si Jehova,’ tan siopa so angitarok ed satan?

⁴ Diad saginonor, say Israel so awalaan na pankanawnawan mangusar ed saray kayamanan a kien da diad paraan a talagan amaliket ed si Jehova. Sikaray nantipon na “sakey a yapay ed kinen Jehova.”a Balitok, pilak, gansa, asul ya inaaramey, nanduruman kinoloran a materyal, katat na karneron kalakian, katat na saray foca, kiew ya akasya so pigara ed saray donasyon parad panangipaalagey tan pananginan na agamil ed tabernakulo. Say salaysay so mangipapaarap ed imano tayo ed awawey na saray angiter. “Say siopaman a mabolos so puso to, sikato komon so mangyakar na yapay ed Jehova.” (Exodo 35:5-9) Impasyay inkiwas na Israel. Kanian, say tabernakulo et sakey ya oksuy na “dakep tan karangalan,” bilang pangaon ed saray salita na sakey ya iskolar.

Saray Kontribusyon Parad Templo

5, 6. Misiglaotan ed templo, panon ya inusar nen David so kaykayamanan to, tan panon so inkiwas na arum?

⁵ Anggaman indirehi nen Arin Solomon na Israel so pangipaalagey na permanentin abung parad panagdayew ed si Jehova, si David, say ama to, so nanggawa na malaknab a panagprepara parad satan. Tinipon nen David so dakel a balitok, pilak, gansa, balatyang, kiew, tan ankabli iran bato. “Lapu ed inpasen ko so pankaliktan ko ed abung na Dios,” imbaga nen David ed totoo, “bangta walaan ak na kayamanan ed kayarian ko a dili a balitok tan pilak, sikato so iter ko ed abung na Dios, nilikod lambengat so amin ya intadiak nipaakar ed masanto ya abung, salanti talonlibo a talento a balitok, . . . et initer da a nipaakar ed pankatangbayan ed abung na Dios . . . ed pilak [so] samplonlibo a talento.” Pinaseseg nen David so arum a magmaliw a mabunlok met. Say ebat et sobsobra: dakel nin balitok, pilak, gansa, balatyang, tan ankablin bato. “Lapu ed ayadyari a puso,” saray totoo so nanggawa na ‘mabolbolos a panangiyapay ed si Jehova.’​—1 Awaran 22:5; 29:1-9.

⁶ Diad sarayan boluntaryon kontribusyon, imbalikas na Israelitas so aralem ya apresasyon da parad panagdayew ed si Jehova. Sipapaabeban nampikasi si David: “Siopa ak, tan anto so baley ko, pian masarag kami a mangyapay dia ed ontan a mabolbolos unong na saya a nanengneng? ta saray amin a bengatla nanlapu ra ed sika, tan ed kayarian mo a dili angiter kami ed sika. . . . Nipaakar ed siak, dia ed inkatunong na pusok inyapay ko a mabolbolos so saraya ya amin a bengatla.”​—1 Awaran 29:14, 17.

7. Anton manamasakbay a leksion so naaralan tayo ed agew nen Amos?

⁷ Ingen, sinmaew iray tribo na Israel a pansiansiaen a manunaan so panagdayew ed si Jehova ed saray kanonotan tan kapusoan da. Diad koma-siam a siglo K.K.P., sakey a naapag ya Israel so nankasalanan lapud panangibaliwala ed espiritual a paraan. Onia so inyabawag nen Jehova nipaakar ed mamaamianen a samploran-tribon panarian na Israel diad panamegley nen Amos: “Kasi lara so saray manaayam a mankanawnawa ed Sion, tan saray maligeligen ed palandey na Samaria!” Deniskribe tora bilang lalakin “ondokol . . . ed saray dokolan a garing, . . . ononat ira ed tapew na saray tandakan, . . . siraen daray cordero na polok, tan saray kilaw na baka a manlapu ed pegley na panangipokokan; . . . ya oninom ira na alak ed saray yaong.” Balet say inkayaman da so ag-analimbeng ed sikara. Impasakbay na Dios: “Kanian niolop ira ed saray ununa a nadakep, tan naekal la naani so alabas a panliket na saray manuunat.” Nen 740 K.K.P., nanirap so Israel ed saray lima na Asiria. (Amos 6:1, 4, 6, 7) Tan sinmabi nigetar a panaon sanen say mamaabalaten a panarian na Juda so nagmaliw met a biktima lapud materyalismo.​—Jeremias 5:26-29.

Dugan Panangusar na Kaykayarian diad Kristianon Panaon

8. Anton maabig ya alimbawa so impanengneng nen Jose tan Maria no nipaakar ed panangusar na saray kaykayarian?

⁸ Miduma, say mairap a kipapasen na ariripen na Dios diad saginonor a panaon so ag-angamper ed panangipatnag da na seseg parad tuan panagdayew. Kunsideraen pay Maria tan Jose. Diad katutulok ed ganggan nen Caesar Agosto, nambaroy iran amaarap ed dilin baley na pamilya ra, say Bethlehem. (Lucas 2:4, 5) Diman niyanak si Jesus. Apataplon agew ed saginonor, binisita nen Jose tan Maria so templo diad asingger na Jerusalem pian iparungtal so nipakseb a panagdalisay a panangiyapay. Nipatnag so dukan kipapasen da diad impangiyapay nen Maria na duaran ankelag a manok. Agda imbaraan so inkaduka ra. Imbes, situtulok dan inusar so limitadon kaykayarian da.​—Levitico 12:8; Lucas 2:22-24.

9-11. (a) Saray salita nen Jesus ed Mateo 22:21 so mangitatarok na anton panangiwanwan no nipaakar ed panangusar na kuarta? (b) Akin a mabalor so melag a kontribusyon na samay balon bii?

⁹ Diad saginonor, sinali na saray Pariseo tan kakaiba na saray patumbok nen Herodes a palikdoen si Jesus, ya ibabagan: “Ibagam pa sirin ed sikami, Anto so isisip mo? Onkatonongan kasi panangiter na bwis ed kinen Cesar, ono andi?” Say ebat nen Jesus so angiparungtal ed pakatebek to. Tutukoyen so platan inter da ed sikato, intepet nen Jesus: “Siopay akanlupa tan akansulat ed saya?” Inyebat da: “Si Cesar.” Sikakabat ton sinampotan: “Bayaran yo sirin ed Cesar so kien nen Cesar; tan ed Dios so kien na Dios.” (Mateo 22:17-21) Kabat nen Jesus a say autoridad na panangipaway na plata et ilaloan a nepeg a bayaran iray buis. Balet tinulongan to diman met iray patumbok to ontan met iray kakabusol a moriaen a panbabanikelan na tuan Kristiano a bayaran “ed Dios so kien na Dios.” Lalaktipen na saya so dugan panangusar na materyal a kaykayarian na sakey.

¹⁰ Say sakey ya inkagawan atasian nen Jesus ed templo so mangiyiilustra ed saya. Kapkapankondena to lambengat ed saray maagum ya iskribas a “mangaakmon ed saray abung na saray bibii a balo.” “Et nen linmingaw, anengneng to so saray mamayaman ya ipepelag da so saray tokdol da dia ed panangyatolan na tokdol,” irereport nen Lucas. “Et anengneng [nen Jesus] so sakey a dukan balo a bii ya impelag tod man so duara’n maravilis. Et inkuan to, Tua kuan ko ed sikayo, Sayan duka a balo’n bii angipelag na dakdakel nen sikara ya amin: Ta amin so saraya dia ed masulok ed sikara so angalan da na ipelag da ed saray tokdol: ingen sikato dia ed kakulangan to inpelag to so amin a pantagano ya wala ed sikato.” (Lucas 20:46, 47; 21:1-4) Sinaglawi na arum a totoo a say templo so naarkosan na ankabli iran bato. Inmebat si Jesus: “Nipaakar ed saraya’n bengatla a nanengneng yo, onsabi so saray agew, ya angapo so natilak a sakey a bato ed tapew na sakey ya ag naani nageba.” (Lucas 21:5, 6) Kasin andian na balor so melag a kontribusyon na saman a balon bii? Maseguron andi. Sinuportaan to so oksuyan ya inletneg nen Jehova ed saman a panaon.

¹¹ Imbaga nen Jesus ed saray tuan patumbok to: “Angapo so aripen a makapanlingkor ed duara a katawan: ta balang la a gulaen to naani sakey, et aroen to so sananey; ono minonong ed sakey, et modmoraen to so sananey. Agyo nayarian so manlingkor ed Dios tan saray kayamanan.” (Lucas 16:13) Kanian, panon tayon nipanengneng so dugan inkasimbang ed panangusar na pinansyal a kaykayarian tayo?

Matoor Iran Mayordomo

12-14. (a) Saray Kristiano so mayordomo ed anton kaykayarian? (b) Diad antoran matalonggaring a paraan a saray totoo nen Jehova natan so sitotoor a manusumpal ed pagmaliw dan mayordomo? (c) Iner so panlalapuan na kuartan panuporta ed kimey na Dios natan?

¹² Sanen indedika tayoray bilay tayo ed si Jehova, diad katuaan et nibaga tayon amin a walad sikatayo, amin a kaykayarian tayo, et kien to. No ontan, panon so nepeg tayon pangusar ed no antoy wala’d sikatayo? Diad panisingbat ed Kristianon serbisyo diad kongregasyon, insulat nen Brother C. T. Russell, say inmunan presidenti na Watch Tower Society: “Ipapasen na balang sakey so inkasikato bilang tinuro na Katawan a magmaliw a mayordomo to ed dilin panaon to, impluensya, kuarta, tan arum nira, tan balang sakey so nepeg a mangusar ed sarayan talento ed sankaabigan to, diad kigloriaan na Katawan.”​—The New Creation, pahina 345.

¹³ “Et dia, nakaokolan ed saray mayordomo a sakey a toon naromog a matoor komon,” kuan na 1 Corinto 4:2. Bilang internasyonal ya organisasyon, panbabanikelan na Tastasi nen Jehova so manbilay unong ed satan a deskripsyon, ya uusaren so dakel a panaon da no nayari diad Kristianon ministeryo, a siaalwar a paaligwasen daray abilidad da ed panagbangat. Niarum ni, ingrupo iran boluntaryo diad silong na panangidirehi na Regional Building Committees so sibubulos a mangiiter na panaon, biskeg, tan abilidad da pian mangipaalagey na marakep iran panagmitingan parad panagdayew. Diad amin na saya, si Jehova so napapaliket.

¹⁴ Iner so panlalapuan na kuartan panuporta ed sayan malaknab a kampanyay panagbangat tan panangipaalagey a kimey? Manlalapud mabulos-impanpuson totoo, a singa met agawa ed saray agew na panangipaalagey ed tabernakulo. Bilang sinansakey, kasin sikatayo so mibibiang? Kasin say paraan na panangusar tayo na pinansyal a kaykayarian so mangidedemostra a say serbisyo nen Jehova so sankaimportantian ed sikatayo? Nipaakar ed saray pamaakaran na kuarta, kaukolan a magmaliw itayon matoor iran mayordomo to.

Sakey a Padron na Inkamabunlok

15, 16. (a) Panon a saray Kristiano ed agew nen Pablo so mangidedemostra na inkamabunlok? (b) Panon so nepeg a panmoria tayo ed kaplesan a diskusyon?

¹⁵ Nansulat si apostol Pablo nipaakar ed mabunlok ya espiritu na saray Kristiano ed Macedonia tan Acaya. (Roma 15:26) Anggaman sikaran mismo so maniirap, sikaray mabulos a nankontribusyon pian tulongan iray agagi ra. Pinaseseg nen Pablo iray Kristianon taga-Corinto met pian sibubunlok a mangiter, ya angidona na saray sobra ra pian sapotay kakulangay arum. Anggapo so siopaman a nayarin mangakusa’d Pablo na panagpatubo. Insulat to: “Say mantanem na daiset manani met na daiset; tan say mantanem na daakan, manani met na daakan. Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.”​—2 Corinto 8:1-3, 14; 9:5-7, 13.

¹⁶ Saray mabunlok a kontribusyon ya iiter na agagi tayo tan interesadon totoo parad sankamundoan a kimey parad Panarian natan so mamapaneknek no panon so panamabli ra ed sayan pribilihyo. Balet, unong ed impanonot nen Pablo ed saray taga Corinto, maabig parad sikatayo a kunsideraen iyan diskusyon bilang sakey a panonot.

17. Anton padron na panangiter so impaseseg nen Pablo, tan kasin saya so niyaplika natan?

¹⁷ Pinaseseg nen Pablo iray agagi a tumboken so sakey a padron ed panangiter da. “Dia ed balang ononan agew na sinimbasimba,” inkuanto, “balang sakey ed sikayo mangibiig na yatol to, onong ed yaaliguas to, pian ag gawaen so panipon no onsabi ak.” (1 Corinto 16:1, 2) Satan so onkana bilang alimbawa parad sikatayo tan parad ananak tayo no nipaakar ed panagkontribusyon, balanglan gagawaen tayo itan diad panamegley na kongregasyon odino direkta diad sankaasinggeran a sangan opisina na Watch Tower Society. Sakey a sanasawan misionero a naasain a manpulong ed sakey a baley ed East Africa so angimbita na saray interesadon miulop ed sikara ed panangiyaral na Biblia. Diad sampot na sayan inmunan miting, siaalwar ya angiyan iray misionero na pigaran barya ed sakey a kahon ya atatakan na “Contribution for the Kingdom work.” Ontan met so ginawa na arum ya inmatendi. Diad saginonor, kayarin sarayan balo ni et naorganisa ed sakey a Kristianon kongregasyon, binmisita so manangasikaso na sirkito tan kinomendaan to so inkaregular na panagkontribusyon da.​—Salmo 50:10, 14, 23.

18. Panon tayon natulongan so agagi tayon walad kairapan?

¹⁸ Walaan tayo met na pribilihyo ya usarey kaykayarian tayo pian tulongan iray biktima na natural iran desyang tan saramay manbibilay ed pasen na saray bakalan. Agaylay gayaga tayo’d pakabasa nipaakar ed tulong iran suplay a nipapawit ed Mamabukig ya Europa legan a wala so gulo ed ekonomya tan pulitika ed satan a lugar na mundo! Saray kontribusyon a produkto tan kuarta so angipanengneng na inkamabunlok na agagi tayo tan pananulong ed walad mairap a kipapasen iran Kristiano.b​—2 Corinto 8:13, 14.

19. Antoran praktikal a bengatla so nagawaan tayo diad itulong ed saramay walad sigpot-panaon a serbisyo?

¹⁹ Papablien tayon tuloy so kimey na agagi tayon mibibiang ed sigpot-panaon a serbisyo bilang payunir, managbaroy a manangasikaso, misionero, tan boluntaryo ed Bethel, agta ontan? Legan ya iyaabuloy na saray sirkumstansya tayo, nayarin direktan mangiter tayo na pigaran materyal a bengatla. Alimbawa, sano saray manangasikaso na sirkito so ombisita’d kongregasyon yo, nayarin tarokan yora na saray panpundoan, tagano, odino tulong ed saray gastos ed panagbiahe. Say ontan ya inkamabunlok so talagan naiimano na mangatatawen ya Ama tayo, a malabay ed ariripen ton naasikaso. (Salmo 37:25) Pigaran taon ed asasakbay et sakey ya agin laki a say sarag to lambengat et say pangiyopresi daiset a palamis so angimbita ed manangasikason managbaroy tan say asawa to ed ayaman to. Sanen onalis la so sanasawa parad panlabin lawak a serbisyo, inderew na agin laki ed saray bisita so sakey a sobre. Diad loob et sakey a bank note (a kasimbang na sakey ya E.U. dolyar) a katekep toy antikey a sulat: “Parad sanlusor a tsa, odino sangalon a gasolina.” Agaylay abig a panangibalikas na panamabli diad sayan mapaabeban paraan!

20. Anton pribilihyo tan responsabilidad so agtayo labay ya ibaliwala?

²⁰ Diad espiritual a paraan, nabebendisyonan iray totoo nen Jehova! Pangagayagaan tayoray espiritual a bankete tan saray asamblea tan kumbension tayo, a ditan et naaawat tayo iray balon palapagan, maabig a bangat, tan praktikal a simbawa. Tekep na saray puson napno na apresasyon parad espiritual iran bendisyon, agtayon balot nalingwanan so pribilihyo tan responsabilidad tayo a mangiter na saray pundo pian usaren ed kiyabante na intereses na Panarian na Dios ed sankamundoan.

‘Mikaaro ed Panamegley na Agmatunong Iran Kayamanan’

21, 22. Anto so asingger a nagawa ed ‘agmatunong iran kayamanan,’ a kakaukolanen to itayon manggawa na anto natan?

²¹ Peteg, walaray dakel a nambabangil a paraan a nipanengneng tayon manunaay panagdayew tayo ed si Jehova ed saray bilay tayo, tan say sakey a nagkalautlan importantin paraan et sasaglawien to so itulok ed simbawa nen Jesus: “Mikaaro kayo ed panamegley na saray kayamanan na ag inka tunong; pian sano onkulang, awaten da kayo ed saray ayaman ya andi angaan.”​—Lucas 16:9.

²² Imanoen a sinalita nen Jesus so insaew na agmatunong a kaykayamanan. On, onsabi agew sano say kuarta na sayan sistema so magmaliw ya andiay balor. “Ibantak da naani so pilak da ed saray polong, tan say balitok da singa naani marutak a bengatla,” impropesiya nen Ezequiel. “Say pilak da tan say balitok da agda naani nayarian ya ilaban ira ed agew na sanok nen Jehova.” (Ezequiel 7:19) Anggad pakagawa na saya, sikatayo so nepeg a mangagamil na kakabatan tan pakatebek diad panguusar tayo na materyal a kaykayamanan tayo. Diad ontan et agtayo onnengneng tekep na pagbabawi ed isaew tayon itulok ed pasakbay nen Jesus: “No bangta ed saray kayamanan na ag inkatunong agkayo apanmatalkan, siopa naani mangimatalek ed sikayo ed saray tua a kayamanan? . . . Agyo nayarian so manlingkor ed Dios tan saray kayamanan.”​—Lucas 16:11-13.

23. Anto so sikakabat tayon usaren, tan anto so magmaliw a tumang tayo?

²³ Sirin, komon ta sikatayon amin so nepeg a sitotoor ya ontumbok ed sarayan panonot ya iyuna so panagdayew ed si Jehova ed saray bilay tayo tan sikakabat ed panangusar na kaykayarian tayo. Diad ontan et napansiansia tayo so pikakaaro ed si Jehova tan si Jesus, ya angisipan a sano say kuarta so onsaew, sikaray mangawat ed sikatayo diad ilalon “ayaman ya andi angaan,” tekep na ilalon maandon bilay diad mangatatawen a Panarian odino ed paraison dalin.​—Lucas 16:9.

[Saray paimano ed leksab]

Kasin Natandaan Yo?

◻ Panon so inkiwas na Israel ed imbitasyon nen Jehova a mangitulong ed panangipaalagey na Templo?

◻ Akin a say kontribusyon na balon bii so mabalor?

◻ Anto so responsabilidad a sasakbaten na Kristiano ed paraan na panguusar da na kaykayarian da?

◻ Panon tayon naarawian so pagbabawi diad panangusar tayo na kuarta?

[Litrato ed pahina 15]

Say kontribusyon na balon bii, anggaman melag, so mabalor

[Saray litrato ed pahina 16, 17]

Saray kontribusyon tayo so manusuporta ed sankamundoan a kimey na Panarian