Ninonot na Sakey a Pangulo so Arapen To

SAY pangulo na Sagur ya Aprika so inad-aron tuloy tan dederlengen a lider diad komunidad to. Diad koma-78 agew-na-inkiyanak to, nandaragup iray kakaaro, kapamilya, tan arum niran managsuporta pian sikatoy pasamanoan. Diad talumpati to, pinili na pangulo so nikadkaduman tema parad satan ya okasyon. Sinaglawi toray ideya to nipaakar ed bilay kayari ipapatey.

Inkuanton diad labas ni ed lubok et “wadtan so sakey a balon mundo ya andian na panamalikdo, ibeg tan agum.” Deneskribe to itan bilang sakey a mundon “asakolobay misteryo,” sakey a panaayaman na saray matunong lambengat, a makapideneng ed Dios.

Saratan a sisiaen so kaslakan ed limog na totoo ed interon Aprika. Unong ed abangonan a relihyon ed Aprika, say ipapatey so aliwan anggaan na bilay noagta sakey a pananguman lambengat, ilalabas ed bilay diad pasen na saray espiritu. Diad patey et say too so nikuan ya onbaliksat manlapud nanengneng a mundo a mamaarap ed agnanengneng. Bilang sakey ya espiritu, say sakey so onloob la ed satan ed pasen a panayaman na inmuunan atateng to.

Dakel ed taga Sagur ya Aprika so manisia a saray inmuunan atateng, odino espiritu na inmuunan atateng, so mangiseseguro ed pankaabigan na kapamilya ra dia ed dalin. Oniay kuan na libron West African Traditional Religion: “Anggapo so baleg a pandumaan na impluensya ed baetan na saray membro na komunidad a wadia ni ed dalin, tan saramay walad labas ni na mundo. Sanen wadiad dalin, [saray inmuunan atateng] so mamatatken ed pamilya ra. Natan ta sikara lay agtayo nanengneng, sikaray siansian mamatatken ed mundo na saray espiritu. Ag-ontutunday interes da ed inkalapagan a pankaabigan na kapamilya ra.”

Kanian iilaloan na asaglawin maedad lan pangulo a nakaulop toray inmuunan atateng to tan mikimey ed sikara diad pasen na saray espiritu. Inkuanto: “Mabiskeg so panisiak ed bilay kayari ipapatey tan say posibilidad na pantultuloy kon manlingkor​—anggan kayari ipapatey.”

Anggaman ontan, lapud tinmumbok ya inkuan na pangulo, insuheri na peryodikon Sunday Times a sikato so “ompatnag ya agsigpot a kumbensido” nipaakar ed bilay a labas ni ed lubok. Imbaga to’d nantitipon ya ulop a walay nadngelan ton sakey a libron manisingbat ed bilay kayari ipapatey. Limaran taon lan aanapen na pangulo itan. Ontanlan magunaet a nabasa itan ya angiyopresi balor a kasimbang na ngalngali $1,500 (E.U.) ed siopaman a makapangitarok ed sikato na sakey a kopya.

Apaliisan komon na pangulo so inkaabala diad pangonsulta ed libron agmairap ya anapen. Sakey a libron mainomay a naala tan aliwan gawa na too noagta say Manamalsa na amin a too. (1 Tesalonica 2:13) Satan a libro et say Biblia. Anto ta so ibabaga to nipaakar ed bilay kayari ipapatey?