Agnarep so Liwawa Ra
DIAD panaon na Biblia, walaray matoor a Tastasi nen Jehova ya akaeksperiensiay problema tan irirap. Nidunget ira ed isusumpa tan mapatnag iran ag-itatalona. Siansia, ag-ira tinmunda lapud kadismayaan. Diad epekto, agnarep so liwawa ra.
Alimbawa, si propetan Jeremias so naikday kimey a magmaliw a propeta na Dios ed apostatan nasyon na Juda. Inyabawag to so pasakbay nipaakar ed onsasabin kadederal na Jerusalem. (Jeremias 1:11-19) Bilang resulta, awalaan si Jeremias na dakel a komprontasyon ed kabaleyan to, a nanmoria ed sikato bilang manangiyabawag na kalamidad.
Si saserdoten Pashhur, say manunan mayordomo ed abung na Dios, so aminsan kinabil to si Jeremias lapud impropesiya to tan sikatoy impangaw to. Lapud sayan mapatnag a problema, inkuan nen Jeremias: “Siak so nagmaliw a panelekan ed interon agew; balang sakey so manluludlurey ed siak. Ta no panon kabetbet a mansalita ak, onkekelyaw ak. Karawalan tan panamagbag so ikekelyaw ko. Ta say salita nen Jehova so nagmaliw parad siak a sengegan parad kabalawan tan parad kaludlureyan ed amin ya agew.” Say propeta so adismaya anggad punton inkuanto: “Agko la salambiten so nipaakar ed sikato [Jehova], tan siak so aglan balot mansalita ed ngaran to.”—Jeremias 20:1, 2, 7-9.
Anggaman ontan, agsinmuko si Jeremias ed kadismayaan. Diad panasalita ed “say salita nen Jehova,” inyabawag to: “Diad pusok et apaneknekan itan a singa mandarlang ya apuy ya apukok ed saray pukel ko; tan siak so naksawan a mamupukok ed satan, tan agko itan nasungdoan.” (Jeremias 20:8, 9) Lapud mabisbiskeg ya apakiwas a salitaen iray balikas na Dios, si Jeremias so pinabiskeg na masanton espiritu tan sinumpal toy kimey to.
Awalaan met si apostol Pablo na dakel a rason ed pagmaliw a dismayado, no sikatoy sinmuko ed saratan. Sinungdoan toy natural iran desyang, inkakneb, panamasegsegang, tan panamekpek. Niyarum ni, ‘say nanaburidoan to ed inagew-agew et say kapagaan parad amin a kongregasyon.’ (2 Corinto 11:23-28) On, inagew-agew a kinaukolan ya arapen nen Pablo iray problema, a panpapagay nipaakar ed balo niran kongregasyon a tinulongan ton iletneg. Nagkalalo ni, sikato so ag-ayadyari tan kaukolan toy mipuligesgesan ed “sakey a sabit ed laman,” a nayarin say makapuy a pakanengneng. (2 Corinto 12:7; Roma 7:15; Galacia 4:15) Arum so nansalita ed si Pablo diad benegan to, tan saya so akasabi ed sikato.—2 Corinto 10:10.
Anggaman ontan, ag-inabuloyan nen Pablo so kadismayaan ya ontalona ed sikato. Andi, sikatoy aliwan sakey a superman. (2 Corinto 11:29, 30) Anto so amasiansia ed ‘apuy ed dalem to’ a mandarlang? Ununa, sikatoy walaan na masuportan kakaiba, ya arum ni ingen so angantabay ed sikato ed Roma a diman nipukok ed sakey ya abung. (Gawa 28:14-16) Komadua, minoria na apostol so situasyon to ed asimbang a paraan. Saray managpasegsegang tan sumusumpa to so walad lingo, aliwan si Pablo. Diad pansampot na mangaraldalin a bilay to, minorekdek to so ministeryo to ed positibon paraan tan inkuanto: “Manlapud natan a manpatuloy wala so nigana parad siak a balanget na inkatunong, a say Katawan, say matunong ya ukom, et iter to ed siak bilang tumang.”—2 Timoteo 4:8.
Labas na amin, si Pablo so maparanay ya inmasingger ed si Jehova a Dios ed pikakasi, tan ‘say Katawan so nantanyareg ya asingger ed sikato tan angitarok na pakayari ed sikato.’ (2 Timoteo 4:17) “Ta diad amin a bengatla,” inkuan nen Pablo, “walaan ak na biskeg nisesengeg ed sikato a mangiiter na pakayari ed siak.” (Filipos 4:13) Say pitatalosan ed Dios tan kaparan Kristianos, tekep na positibon panmorekdek ed ministeryo to, so tinmulong ed si Pablo a mantultuloy ed serbisyo ed si Jehova.
Pinuyanan na Dios si Pablo a mangisulat: “Ag-itayo ontutunda ed panggawa no anto so maabig, ta diad nigeter a panaon et manani tayo no ag-itayo onkesaw.” (Galacia 6:7-9) Anien so anto? Andi-anggaan a bilay. Kanian, sirin, magmaliw a singa si Jeremias, Pablo, tan say dakel ya arum a matoor a tastasi nen Jehova ya asaglawi ed Kasulatan. On, magmaliw a singa sikara, tan ag-onsusuko ed kadismayaan. Agyo aabuloyan a naerep so liwawa yo.—Ipareng so Mateo 5:14-16.
[Saray litrato ed pahina 25]
Ag-inabuloyan di Pablo tan Jeremias a naerep so liwawa ra