Tepetepet Manlapud Managbasa

Diad Filipos 2:9, inkuan nen Pablo nipaakar ed si Jesus: “Sikatoy intandoro na Dios ed superyor a posisyon tan mapangasin inter ed sikato so ngaran ya atagey nen kada arum nin ngaran.” Anto iyan balon ngaran? Tan no si Jesus so abebbeba ed si Jehova, panon a say ngaran nen Jesus so atagey nen kada arum nin ngaran?

Nabasa ed Filipos 2:8, 9: “Nagkalalo nen satan, sanen nalmoan to [nen Jesus] so inkasikato ed ereng na sakey a too, sikaton mismo so nampaabeba tan nagmaliw a matulok anggad patey, on, patey ed panamairapan a palitek. Lapud sayan rason a mismo met sikatoy intandoro na Dios ed superyor a posisyon tan mapangasin inter ed sikato so ngaran ya atagey nen kada arum nin ngaran.”

Agkabaliksan na sayan kasulatan a bangta si Jehova lambengat so walaan na ngaran ya absoluton atagey nen amin a ngaran, nepeg a si Jesus so parehon persona a singa si Jehova. Unong ya ipapanengneng na konteksto ed Filipos kapitulo 2, inawat nen Jesus so nipaatagey a ngaran to kayari na inkioli to. Sakbay na satan, anggapo’d sikato itan. Diad biek a dapag, lawas a si Jehova so supremo, tan agbalot nauman so posisyon to. Say katuaan a naawat nen Jesus so sakey a ngaran ya atagtagey nen say niwala’d sikato sakbay na mangaraldalin a serbisyo to so mamapaneknek a sikato so aliwan pareho a singa si Jehova. Sanen inkuan nen Pablo a si Jesus so inikdan na ngaran ya atagtagey nen kada arum a ngaran, labay ton ibaga a si Jesus natan so walaan na sankatageyan a ngaran ed amin a pinalsa na Dios.

Anto so atagey a ngaran nen Jesus? Tulongan itayo na Isaias 9:6 ya ebatan. Diad pangipropesiya nipaakar ed onsasabin Mesias, si Jesus, ibabaga na satan a bersikulo: “Say maprinsipen uley so onsabi ed tapew na takeb to. Tan say ngaran to so natawag a Makapakelaw a Mananimbawa, Makapanyarin Dios, Maandon Ama, Prinsipe na Kareenan.” Dia say “ngaran” nen Jesus so walaay kipaakaran ed atagey a posisyon tan autoridad to, a sikato met so pakatalos tayo ed “say ngaran ya atagey nen kada arum nin ngaran” ya asaglawi ed Filipos 2:9. Kada pueg so niganggan ya ontalimukor ed si Jesus diad panamidbir ed atagey a posisyon na autoridad ya inter nen Jehova ed sikato​—sakey a posisyon na autoridad ya atagtagey nen samay inter ed dinanman nin arum iran pinalsa. Say salitan “arum” ed sayan patalos so aliwan direktan niprepresenta ed manunan Griegon teksto, balet ta impatnag itan ed belas na bersikulo. Say “ngaran” nen Jesus so ag-atagey ed dilin ngaran to noagta atagey ed kada arum a ngaran na pinalsa.

Agaylay liket tayo a miulop ed amin nin matoor ya angheles tan totoo ed itatalimukor diad pamidbir ed ngaran nen Jesus! Gagawaen tayo iya ed panamegley na panpasakup na inkasikatayo ed si Jesus ed nipaatagey tan makapanyarin posisyon ya inter ed sikato nen Jehova​—“diad kidayewan na Dios Ama.”​—Filipos 2:11; Mateo 28:18.