Aromog Da so Kareenan Diad Mundon Nagugutgut

SAY ilustrasyon ed apis na sayan magasin so mangipapanengneng ed mangapuy-apoy a bakal ya eksenan nanlapud Bosnia tan Herzegovina. Niwala ta so kareenan ed ontan a lugar? Makapasurprisa, say ebat et on. Bangta saray komunidad na Romano Katoliko, Eastern Orthodox, tan Muslim ed satan a makapanangis a dalin so manlalaban parad teritorya, dakel so manpirawat parad kareenan, tan walaray akaromog ed satan.

Saray Djorem so residenti ed Sarajevo, tan sikaray Tastasi nen Jehova. Diad leet na amin a gutgutan ed satan a syudad, niyugali ra so onbisita ed kakaabay da pian ipanabang so maong a balita na Panariay Dios. (Mateo 24:14) Akin? Lapud kabat na pamilyan Djorem a sayan Panarian so peteg, a niletneg la ed katawenan, tan satan so sankaabigan tan mogmon ilalo parad kareenan. Sigpot so kompiyansa na Tastasi nen Jehova ed tatawagen nen apostol Pablo a “maong a balita na kareenan.” (Efeso 2:17) Maong ta walaray singa di Bozo tan Hena Djorem, naroromog na dakel so kareenan diad Bosnia tan Herzegovina.

Onsabi Peteg a Kareenan

Dakel ni naistorya nipaakar ed saray Djorem. Balet, ununa et pantongtongan tayo pa ni sananey a sanasawa ya akagamor na kompiyansa ed Panariay Dios. Say kangaranan da et Artur tan Arina. Sikara tan saray ugugaw nin anak dan lalaki so dati-ratin manayam ed sakey a republikan nasasakopan na datin Soviet Union. Sanen tinmerak so sibil a bakal, akilaban si Artur parad sakey ed saray ulop. Balet, ag-abayag et tinepetan toy inkasikato, ‘Akin a lalabanan ko irayan datin kakaabay ko?’ Tinaynan to so bansa tan, kayari na dakel a problema et sinmabi ed Estonia kaibay ankekelag ya anak to.

Diad imbisita ed St. Petersburg, akabat nen Artur so Tastasi nen Jehova tan nandinayewan toy naaralan to nipaakar ed Panariay Dios. Linawa nen Jehova ya agmanbayag et say Panariay Dios so magmaliw a mogmon pananguley ed interon katooan. (Daniel 2:44) Insan diad satan et say dalin so magmaliw a mareen a pasen, ya andian la na saray sibil a bakal odino internasyonal iran panlalaban. Impropesiya nen Isaias itan a panaon: “Ag-ira manggawa na antokaman a pakasakitan odino pansengegan na antokaman a pakaderalan ed amin a masanton palandey ko; lapud say dalin so petepeteg a napano na pikakabat ed si Jehova a singa sasakbongan na danudanum so mismon dayat.”​—Isaias 11:9.

Diad pangimano ed litrato na pintor ed satan ya arapen a mareen a dalin diad panamegley na katulongan ed panagaral ed Biblian impanengneng ed sikato na Tasi, inkuan nen Artur a sikatoy akapanayam ed lugar a nengneng toy ontan. Balet, natan, satan so dineral na sibil a bakal. Diad Estonia, si Artur tan say pamilya to so makakaaral na dakel ni nipaakar ed Panariay Dios diad panaaral na Biblia a kaibay Tastasi nen Jehova.

Kareenan Diad Utel na Gutgutan

Oniay kuan na Salmo 37:37: “Imanom so andiay-pamakasalanan a sakey tan asikasom so maptek a sakey ed panangimanom, ta say arapen na satan a too so magmaliw a mareen.” Diad tua, say kareenan na sakey ya andiay-pamakasalanan tan maptek ed imaton na Dios so aliwa lambengat ed arapen to. Panggagayagaan to la itan natan. Panon a posibli itan? Konsideraen pay eksperiensia na lakin manngaran na Paul.

Manaayam si Paul ed nisulinek a refugee camp diad abalaten-sagur ya Etiopa, anggaman diad aktual et sikatoy nanlapud kabangibang a bansa. Diad binalegan ton dalin, akapiabet ed sakey ed Tastasi nen Jehova a nantrabaho parad kompanyay petrolyo, tan satan a laki so angiter ed sikato na katulongan ed panagaral ed Biblia, Say Katuaan a Mangitonton ed Andi-anggaan a Bilay.a Agbalot apinengnengan lamet nen Paul so Tasi, balet ta siaalwar ton inaral so libro. Say sibil a bakal so anagdag ed sikato ed refugee camp diad Etiopa, tan diman to sinalita ed arum so nipaakar ed naaralan to. Asabin sakey a melag a grupo so angawat ed saya bilang say katuaan. Based naaralan da, ag-abayag et sikaray nampupulong ed arum diad kampo.

Nansulat si Paul ed saray hedkuarter na Watch Tower Society ya onkekerew na tulong. Say ministron imbakin nanlapud Addis Ababa so nikelawan ed impakaromog na 35 totoon manaalagar ed sikato, ya akaparaan a manaral na dakel ni nipaakar ed Panariay Dios. Niyuksoy so pananulong a kaukolan a regular a niiter.

Panon a nibagan panggagayagaan na totoon singa si Paul so kareenan? Anggaman mairap so panagbilay da, walaan ira na pananisia ed Dios. Sano naapektoay gutgutan na sayan mundo, iyaplika ra so konseho na Biblia: “Agyo panpapagaay antokaman a bengatla, noag dia ed ganagana diad pikakasi tan pikekerew ya atekepay pisasalamat et ipakabat yo ed Dios iray kerew yo.” Bilang nansumpalan, walaan iray inkakontento a mataltalag natan. Onaaplika ed sikara iray salita nen apostol Pablo ed kongregasyon na Filipos: “Say deen na Dios a talonaan ton amin a kanonotan bantayan [to] so kapusoan yo tan saray pakayari na nonot yo diad panamegley nen Kristo Jesus.” Peteg, walaan ira na maapit a relasyon ed si Jehova, “say Dios na kareenan.”​—Filipos 4:6, 7, 9.

Kaplesan a Kareenan

Si Jesu-Kristo so nitronon Ari na Panariay Dios, ya atawag ed Biblia a “Prinsipi na Kareenan.” (Isaias 9:6) Oniay inkuan na kadaanan a propeta nipaakar ed sikato: “Aktual a salitaen to so kareenan ed saray nasyon; tan say pananguley to so manlapu ed dayat ya anggad dayat tan manlapud Ilog ya anggad saray sampot na dalin.” (Zacarias 9:10) Saray impuyan a salitan singa saraya so walaan na baleg ya epekto ed bilay na lakin manngaran na José.

Aminsan et nipriso si José. Sikatoy sakey a terorista tan inaresto legan a manpaparaan pian pasabogen iray baraks na pulisya. Inisip ton say karawalan lambengat so mamaskar ed gobiernon mamaaligwas ed saray kipapasen na bansa to. Legan a walad prisoan, say asawa to so inyaralan na Tastasi nen Jehova na Biblia.

Kayari inkibulos nen José, sikato met so nanaral na Biblia, tan ag-abayag et inmaplika ed sikato iray salita na Salmo 85:8: “Dengelen ko no antoy salitaen na tuan Dios a Jehova, ta salitaen to so kareenan ed totoo to tan ed saray matoor to.” Anggaman ontan, sasampotan na satan a bersikulo na sakey a pasakbay ya: “Agmora papapawilen ed dilin-kompiyansa.” Kanian, say sakey a manaanap na kareenan nen Jehova so ag-onkiwas ya independenti odino onsumpa ed linawa To.

Natan, si José tan say asawa to so Kristianon ministros. Iwawanwan day arum ed Panarian nen Jehova bilang say solusyon ed saray probleman datin sasalien a resolbien nen José diad panamegley na ginawa’d-ayaman iran bomba. Sikaray mabulos a manmatalek ed Biblia, a kuanto: “Si Jehova, diad biang to, so mangiter ed no antoy maong.” (Salmo 85:12) On, diad agano ni et binisita nen José iray baraks a plinano ton pasabugen. Akin? Ta pian itongtong ed saray pamilya diman so nipaakar ed Panariay Dios.

Mareen a Totoo

Diad Salmo 37:10, 11, kuan na Biblia: “Wala ni so daiset, tan say marelmeng a sakey so naandi; tan sika so petepeteg a mangimano ed pasen to, tan sikato so anggapo [diman]. Balet saray mauyamo a mismo so mangayarian ed dalin, tan peteg a naromog da so pinilin pakasayaan diad inkadaakan na kareenan.” Agaylan maglorian iilaloan!

Balet, imanoen a say kareenan nen Jehova et para lambengat ed “saray mauyamo.” Kaukolan ya aralen na saramay manaanap na kareenan so pagmaliw a mareen. Onia so kaso ed si Keith, a manaayam diad New Zealand. Adeskribe si Keith bilang “maong ya impanlaman tan personalidad, agresibo, tan ma-argumento.” Sikatoy membro na sakey a pangkat tan nanayam ed sakey ya abung a talagan ilang, a walaan na saray hardin a papatrolan na taloran bantay ya aso pian naablog iray anggapoy permiso. Say asawa to, ya ina na anemiran ilalak to, so angidiborsyo ed sikato.

Sanen akabat nen Keith iray Tastasi nen Jehova, baleg so epekto na maong a balita ed sikato. Agnambayag et sikato tan saray ilalak to so onaatendi la ed saray miting na Tastasi. Kinatlian to so anggad-awak a buek to tan ginapoan ton salitaen ed dati iran kalimog to so nipaakar ed Panariay Dios. Pigara ed sikara so impaiyaralan na Biblia.

Singa ed minilyon a maptek-impanpuso ed interon mundo, ginapoan nen Keith ya iyaplika iray salita nen apostol Pedro: “Samay mangaro ed bilay tan nengnengen iray maong ya agew, . . . abuloyan ya arawian to no anto so mauges tan gawaen no anto so maong; abuloyan a sikato et anapen to so kareenan tan gegemtanen itan.” (1 Pedro 3:10, 11) Say datin asawa nen Keith so akiabobon a mikasal lamet ed sikato, tan naaaralan to natan no panon so ‘pananap ed kareenan tan gegemtanen itan.’

Say kareenan nen Jehova so manangisalbay bilay parad dakel, pati ed datin athlete a niyanak ed datin U.S.S.R. Apanaloan na sayan laki iray medalya diad panlalaslasan ed Olympic, balet ta sikato so naandiay-ilalo tan imbaling to ed panagdruga tan panag-inum. Kayari na napnoy ebenton 19 a taon a laktipen toy taloy-taon a sentensya ed labor camp diad Siberia, sakey ya impanlayag bilang sakey a takas a mamaarap ed Canada, tan duaran dawit-dawit ya impatey lapud inkailuam to ed druga, sikato so nampikasi ed Dios parad tulong pian naromog so tuan gagala ed bilay. Sakey a panagaral na Biblia ed mansasalitay-Ruson Tastasi nen Jehova so tinmulong ed sikato pian anapen so ebat ed tepetepet to. Natan sayan laki, singa met ed minilyon ed arum ni, so akaromog na kareenan ed Dios tan ed inkasikato.

Say Ilalon Kioli

Diad kaunoran, pawilen tayo pa si Bozo tan Hena Djorem diad Sarajevo. Sayan sanasawa so walaan na sakey a limay-taon ya anak a bii, si Magdalena. Nen imbeneg a Hulyo, sikaran talo so ombubuat pian manpulong lamet sanen sikaran amin so pinatey na sakey ya insabog na bomba. Komusta so nipaakar ed kareenan ya ipupulong da ed arum? Kasin say bomban angetel ed bilay da so mangipanengneng a saya so aliwan peteg a kareenan?

Andin balot! Diad sayan sistema na bengabengatla, nagagawa iray trahedya. Papateyen na saray bomba odino bala iray totoo. Arum so ompapatey lapud sakit odino lapud aksidenti. Dakel so ompapatey lapud itatatken. Saramay panggagayagaan da so kareenan ed Dios so agnipuera ed saratan a nagagawa, balet say posibilidad na saratan ya ebento so agmanaynan ed sikaran anggapoy ilalo.

Insipan nen Jesus ed kaaro ton Marta: “Siak so kiolian tan say bilay. Samay mangagamil na pananisia ed siak, anggano sikato so ompatey, so nabilay.” (Juan 11:25) Panisiaan na saray Djorem iya, a singa met ed amin a Tastasi nen Jehova. Tan walaan na pananisia iray Djorem a no sikara so ompatey, sikaray paolien diad dalin a diad satan a panaon et talagan mareen lan pasen. “Punasen [nen Jehova a Dios] so kada lua ed kamataan da, tan anggapo la so ipapatey, nisay nangis nisay dageyem nisay ot-ot. Saray datin bengatla so linmabas la.”​—Apocalipsis 21:4.

Sakbay a tuloy na impatey to, inkuan nen Jesus ed papatumbok to: “Iter ko ed sikayo so kareenan ko. . . . Agyo aabuloyan a nagonigon so kapusoan yo.” (Juan 14:27) Migayaga itayo ed saray Djorem a walaan na satan a kareenan tan maseguron panggayagaan nin sigpot itan diad kioli. Maliket tayo parad amin na saramay mandadayew ed si Jehova, say Dios na kareenan. Saratan so walaan na kareenan ed nonot. Panggagayagaan da so kareenan ed Dios. Babayuboan da so kareenan ed arum. Tan walaan ira na kompiyansa ed sakey a mareen ya arapen. On, aromog da so kareenan, anggaman sikaray manbibilay ed sakey a mundon nagugutgut. On, panggagayagaan na amin a mandadayew ed Dios diad espiritu tan katuaan so kareenan. Komon ta noromog mo met so ontan a kareenan.

[Paimano ed leksab]

[Saray litrato ed pahina 7]

Sikaray akaromog na kareenan anggaman manbibilay ed mundon nagugutgut