‘Kasin Importanti Ak ed Dios?’

“KASIN Importanti Ak? Kasin Mangiyaansakit so Dios?” Ontan so nabasan titulo na sakey ya artikulon pinmaway ed Christianity Today. “Baleg a kabiangan na karerak bilang sakey a managsulat so nipapaliber ed probleman ot-ot,” kuan nen Philip Yancey, autor na say artikulo. “Pawilpawilen ko iratan a parehon tepet, a singano tuturoken na gamet so abayag lan sugat ya agni atambal. Narerengelan ko manlapud saray managbasa na saray librok, tan saray makapasinagem ya istorya ra so mamaneknek ed saray panduaruwaan ko.”

Anganko sika met so manumameng nipaakar ed interes na Dios ed bilay mo. Oh, nayarin kabisadom la so Juan 3:16, a mangibabagan “ontan la so impangaro na Dios ed mundo ya inter to so bogbogtong ya Anak to.” Odino nayarin abasam la so Mateo 20:28, a nikuan ditan a si Jesus so linma dia “pian iter so kamarerwa to bilang dondon a kasalat parad amayamay.” Balet nitepet mo nin siansia, ‘Kasin naiimano ak na Dios? Kasin mangiyaansakit ed siak bilang sakey ya indibidual?’ Walay maong a rason pian panisiaan a mangiyaansakit, a singa nanengneng tayo.