Sakey a Matalonan Kampanya ed Kingdom News
“AKIN a Say Bilay so Ontanlan Napno na Saray Problema?—Kasin Posibli so Paraison Andiay Problema?” Saya so tema na Kingdom News No. 34, sakey ya apatiran pahina a tract a nibunog ed sankamundoan diad 139 lenguahe legan na Abril tan Mayo nen imbeneg a taon. “Sakey ed saray pabitar ed taon,” so impaneskribe ed satan na Tastasi ed Jamaica ed sayan panaglingkor a kampanya. “Sakey a baleg a lapuan na gayaga parad saray agagi,” so impanawag ed satan na Tastasi ed Belgium. Diad Republika na Czech, saya so inmunan niwalan pankanawnawa na Tastasi nen Jehova pian mibiang ed say panangibunog na Kingdom News. Inreport na sanga: “Say kampanya so angitarok na sakey ya espiritu na seseg tan entusiasmo.” Nadngelan met iray mipadparan liknaan manlapud arum a daldalin.
Walaan na nikabiig a mensahe so Kingdom News No. 34 parad saramay mansibek tan managugol lapud saray makapadimlan agawaan ed ngaran na relihyon. (Ezequiel 9:4) Satan so nanligliwa parad saramay say bilay da so nagugulo lapud “maatap iran panaon a mairap a pidenengan” a ditan et andian iray panangontrol. (2 Timoteo 3:1) Ituturo ed Biblia, ipapanengneng na tract a saray problema ed bilay so nasolbar ed agla manbayag. Say paraison andiay problema so petepeteg. (Lucas 23:43) Dakel a nanbasa na Kingdom News so asagyat ed mensahe to. Sakey a laki a taga Togo so angikuan ed sakey a Tasi: “Say imbagam so agbalot nasuppiat.”
Agniburi, say inkibunog na sayan Kingdom News so anagyat na nikaduman imano. Sakey a lakin unabong diad Denmark so inmebat ed sakey a Tasi a mangiyoopresi na tract: “Kapkapawil ko manlapud Estados Unidos. Sakbay a siak so inmalis, walay sakey ya angiyopresi na tract yo ed siak. Natan kasabik dia, tamtampol say parehon tract so nibubunog ed Danes!”
Entusiastikon Pananuporta Parad Kampanya
Entusiastikon nankakasakey so Tastasi nen Jehova ed interon mundo ed kimey na panangibunog na tract. Austria, El Salvador, Haiti, Hungary, Italia, New Caledonia, so pigara lambengat ed saray dakel a bansan nanreport na sankatageyan iran pantok na manangipalapag legan na saray bulan sanen nibubunog so Kingdom News.
Sakey a manangasikaso na sirkito ed Zambia so angipasal ed taloy taon ya anak ton bii, si Deborah, pian mangiyopresi na literatura ed kabkaabungan. Legan na kampanya na Kingdom News No. 34, akapangipalima si Deborah na masulok a 45 a kopya na tract. Akapangigapo na panangiyaral na Biblia si ina to ed arum ya angawat na Kingdom News manlapud si Deborah.
Sakey a tin-edyer ed South Africa so angiyopresi na tract ed kaklase ton manngaran na Cashia. Binasa nen Cashia so tract tan inkuanto: “Saya so makapakelkelaw—panbilay ya ando lan ando ed paraison dalin! Akin ya agmo imbaga ed siak lan asakbay?” Nigapo so panangiyaral na Biblia. Diad loob na sakey simba akaawat na sananey nin tract si Cashia. Say komadua so nanlapud kasulatan ton Romano Katoliko a taga Cyprus. Insalaysay na kasulatan to ed si Cashia no akin a saray bangat na Romano Katoliko so palso tan imbaga to ed sikato a pirawat to so manaral na Biblia a kaiba iray Tastasi nen Jehova. Siempre, satan so pirmin amabiskeg na determinasyon nen Cashia a mantultuloy ed panagaral to.
Sakey a samploy taon a laki ed Switzerland so akibiang ed si ina to ed panangibunog na tract. Angipalima na sakey a kopya ed sakey a marikit tan pinaseseg ton basaen itan a siaalwar. Tinepetan na marikit so ugaw a laki no talagan sisiaen to so nilitrato ed say apis—agmangangga a bilay ed dalin. Inmebat so ugaw? “Ah, on, siak so maseguro.” Insan imparungtal lamlamang na bii a sikato so manaanap ed tuan pananisia lapud dakel iray pansusumlangan ed mismon relihyon to. Diad panagpawil, nigapoy panangiyaral ed Biblia.
Tampol Iran Inkiwas
No maminsan say Kingdom News so mamakiwas a tampol ed saraman so akabasa. Kayari impakabasa ed tract, impatua na sakey a 11 taon a bii ed Belgium ed sakey ed Tastasi nen Jehova a sikato so abayag lan managtakew ed lakoan. Labay na ina na bii a mandeen la ed satan a pamaakaran, balet say konsiensia na bii so pinakiwas na abasa to, tan impilit ton minengnengan ed manager na shopping center. Kaunoran et inmabobon so ina pian ompawil so anak ton bii ed shopping center kaiba so Tasi. Asurprisa so manager ed panangipatua to. Sanen naamtaan ton say Kingdom News so amakiwas ed sikato ed satan a dalan, angala met na kopya parad sikato ya imanoen no anto so mabisbiskeg a karga na satan. Say bii so walaan na maaligwas a panagaral ed Biblia.
Isasalaysay na sakey a Tasi ed Cameroon ya akapangitilak na kopya na Kingdom News ed sakey a laki: “Sanen pinmawil kami, naimano min ginulisan to la itan tan walaan na pigaran tepet. Kayari impakaawat na makapnek iran ebat, inkuanto: ‘Absoluton tua a say relihyon so sakey a sengegan na agpanliket na katooan. Tinulongan ak na tract yo a natalosan a maong, ingen labay ko nin naamtaay dakel.’” Awalaan la natan na regular a panagaral ed Biblia.
Sakey a Tasin ombibisita ed kabkaabungan ed Uruguay so akapangipalima na tract ed sakey a laki. Intultuloy na Tasi so panagpulong ed kabkaabungan tan nankimey ed kaliberliber na bloke anggad akasabi ed beneg a puerta na ayaman na laki. Sikatoy asurprisa ed impakaimano to ed laki a manaalagar ed sikato, a sankaegnaay tract. Abasa to la itan tan kaliktan toy malaglaem ya impormasyon. Nigapon tampol so panagaral.
Ontutulong so Publiko ed Panangibunog
Sakey a Tasi ed Hapon so inmasingger ed sakey a laki a masulok lan 50 años tan imparungtal toy tract ed sikato. Intepet na laki: “Anto so gagawaen yo ed pulyeto sano makaabet kayo na toon agmakanengneng?” Inadmiti na Tasi ya agto amta. Inkuan na laki a manalagar a magano tan pinmawil ed abung to. Pinmawil ya awit so kopya na Kingdom News tan kuanto: “Naawat ko la itan a pulyeto. Inisip kon karga to so makapainteres a tuloy tan importantin impormasyon, kanian inkopyak itan ed Braille. Ipangasin usaren iya parad totoon bulag.” Angusar na dakel ya oras so laki ed pankopya na Kingdom News ed Braille ta pian agnasaew na bulag no anto so karga to.
Diad Slovakia sakey a laki so labalabay toy tract a nanggawa na 20 a kopya, tan imbubunog to iratan a kopyan mismo. Sakey a manangipalapag ed Switzerland so angitilak na Kingdom News ed sakey a pamilya tan intuloy toy kimey to ed atagtagey iran grado na bilding a ditan manaayam so sakey a pamilya. Legan a manpapaleksab lamet, inabet na ugaw ed saman a pamilya, a kinmerew na 19 nin kaaruman a kopya na tract. Diad eskuelaan na ugaw, saray estudyante so inasain a mansulat na nipaakar ed saray problema tan say pananap na saray solusyon. Kaliktan toy kopya na Kingdom News parad balang sakey a kaeskuela to.
Anggapoy Anggan Sakey ya Alagsanan
Saramay akibiang ed kampanya so nanggunaet a maong pian naseguro ya anggapoy anggan sakey ya alagsanan. Duaran Tastasi ed New Caledonia so manbiabiahe ed teritoryan nisulinek a tribu pian diad ontan et nibunog so Kingdom News. Legan a walad dalan, naimano ra so sakey a basbas ya ompatnag ya agni nadadalan, anggaman kuan deneside ran nengnengen no walay manaayam ed sampot to. Linmeksab ed kotse, tinonton day basbas, binmeltang ed kulos anggad aromog da so sakey ya abung. Sakey a sanasawa so agnin balot akadngel a manaayam diman so Tastasi nen Jehova, tan inawat da so kopya na Kingdom News. Saginonor pinawil na saray manangipalapag tan diad impakasurprisa ra et aromog dan say sanasawa so angapiger ed dalan tan nanggawa na pigaran ankelag a taytay ta pian makasabi so kotse na Tastasi ya anggad abung da. Nigapo so regular a panagaral ed Biblia.
Sakey a Tasi ed Poland so kaukolan ya ondalan ed pasen na konstruksyon pian makapangiyopresi na kopya na Kingdom News ed saray unabong. Babantayan na trabahador legan ya ondadalan ed pasen na bilding. Kaunoran, sakey ed saray trabahador so anawag ed sikato, a kinerew ton agto ira lalabsanan. Sanen inasinggeran tora, tinmunda tan tinmalineng iran maong ed panangipresenta ed tract. Inawat da iray kopya na Kingdom News ontan met ed saray magasin tan diad saginonor, diad ipapawil et saray libro.
Nilasus minilyon na Kingdom News No. 34 so nibunog ed dakel a lenguahe. Say mensahe to sa walaan la na mabiskeg ya epekto. Dakel so akaaral a posibli so paraison andiay problema. Ipikasi tayo a saratan a maptek-impanpuso so mantultuloy ya onkiwas tan diad kaunoran et nibilang ed “saray mauyamo” a “mangayarian ed dalin, tan . . . naromog da so nagnap a liket diad inkadaakan na kareenan.”—Salmo 37:11.
[Kahon ed pahina 31]
Mantultuloy ya Ibunog Iray Magasin!
Anengneng ed Abril tan Mayo 1995 so ontanlan intalona na kampanya diad inkibunog na Kingdom News No. 34. Legan na saratan a duaran bulan, niwala met so matalonggaring ya inkibunog na Panag-Bantayan tan Awake! iran magasin. Alimbawa, sakey ya agi ed Republika na Czech so mangirereport a diad Abril et akapangipalima na 250 kopya na Kingdom News tan 750 iran magasin. Diad Guadeloupe, apili so Sabado, Abril 15 bilang espisyal ya agew na panagmagasin. Amin lawarin manangipalapag ed bansa so akibiang ed ministeryo ed satan ya agew! Walaan na balon pantok so Slovakia ed panangibunog na magasin nen Abril. Mipadparan balita so nanlapu met ed arum iran bansa.
Kanian akin ya aggawaen a matalonggaring iran bulan so Abril tan Mayo 1996 parad panangibunog na magasin? Makapangiorganisa iray kongregasyon na espisyal iran agew na panagmagasin. Nayarin makapibiang iray sinansakey ed panag-auxiliary payunir. Diad saraya tan arum nin paraan, say panangibunog na magasin so nipaseseg, say makanan mensahen niproklama ed Kingdom News No. 34 so mantultuloy a nikayat. Sirin, a singa agawa nen imbeneg a taon, maseguron bendisyonan nen Jehova so maseseg ya espiritun ipanengneng tayo.—2 Timoteo 4:22.