Report na Saray Manangiyabawag na Panarian

“Amin Iray Ganggan Mo so Katuaan”

SAKBAY na magano lan ipapatey to, pinaseseg nen Moises so totoo na Israel ya amin da so ontulok ed saray ganggan nen Jehova. Inkuanto: “Iyaplika so puso yo ed amin a salita ya isasalitak ed sikayo bilang pasakbay ed sikayo natan, pian satan so niganggan yo ed ananak yo pian naasikaso a gawaen so amin a salita na sayan ganggan. Ta saya so aliwan andiay-kablian a salitan parad sikayo, ingen mankabaliksan itan na bilay yo.”​—Deuteronomio 32:46, 47.

Nilasus taon ed saginonor, impabitar na salmista so kaimportantian na amin iray bangat na Dios sanen inkuanto: “Sika so asingger, O Jehova, tan amin iray ganggan mo so katuaan.” (Salmo 119:151) Diad inmunan siglo, si Jesus mismo so nanggawa na reperensya ed say kablian na “kada ombesngaw a manlalapud sangi nen Jehova.” (Mateo 4:4) Tan diad silong na panangiwanwan na Dios insulat nen apostol Pablo ya “amin a Kasulatan so pinuyanan na Dios tan makagungguna.”​—2 Timoteo 3:16.

Mabitabitar, iilaloan nen Jehova a Dios ed saray managdayew to a mangiter na seryoson konsiderasyon ed interon mensahe a nipasabi ed sikatayo diad saray pahina na Salita to. Anggapo so anggan sakey a bersikulo na Biblia ya andian na kablian. Ontan so pangipapasen na Tastasi nen Jehova nipaakar ed Salita na Dios, a singa iyiilustra na say ontumbok ya eksperiensian manlapud Mauritius.

Manaayam si Mr. D—— ed nisulinek a purok, a ditan et sikato so managbantay ed labi. Diad abayag lan panaon, sikato so sisisimoon a mansusukimat ed suston paraan na panagdayew ed Dios. Diad labi legan na panagbantay to, ginapoan ton basaen so Biblia. Asabin abasa to itan manlapud gapo anggad sampot. Naaralan to a say ngaran na Dios et Jehova​—satan a ngaran so aminpigapigan pinmatnag ed Hindi a Biblia to. Nalmoan to a say libro na Apocalipsis so nagkalalo lan makapasagyat.

Insan tinepetan toy inkasikato no kasin wala so relihyon a manutumbok ya interamenti ed Biblia. Naimano to a saray relihyon ya akapiulopan to, anggad sankaabigan iran sirkumstansya, so manutumbok lambengat ed saray kabiangan na Biblia. Inawat na arum a relihyon so Hebreo a Kasulatan tan impulisay so Kristianon Griegon Kasulatan. Arum a relihyon so mangibabaliwala ed Hebreon Kasulatan, ya ontutupleg labat ed praktikal a kablian na Kristianon Griegon Kasulatan.

Sakey ya agew akanengneng na sanasawa si Mr. D—— a nauuranan tan inimbitaan to ira ya onsirum ed abung to. Sikaray Tastasi nen Jehova. Sankabenbenan na asawan bii so libron Revelation​—Its Grand Climax At Hand!a Tamtampol a tinmepet si Mr. D—— parad libro. Alikna na Tastasi a say materyal ed propesiya na Apocalipsis so mairap a tuloy parad sikaton tebeken, kanian imbes et inyopresi ra ed sikato so sananey a publikasyon. Balet impilit nen Mr. D—— so pakawalaan na libron Revelation.

Sanen akala na kopya to, tampol ton binasa so libro. Insan to inawat so panagaral na Biblia ed saray Tastasi nen Jehova. Agnambayag et sikato so nandinayew ed bengatlan katuaan a saray Tastasi so mangipapasen ed interon Biblia ed atagey a galang. Ginapoan to so onatendi a regular ed saray miting ed Kingdom Hall na Tastasi nen Jehova, a ditan aaralen a maalalwar iray Hebreon Kasulatan tan Kristianon Griegon Kasulatan. Sikato la natan so manangiproklama na Panarian tan sakey a bautismadon membro na Kristianon kongregasyon.

[Paimano ed leksab]