Manisia Ka Kasi’d Reinkarnasyon?
“NANONOTAN mo ta ni imay biin kaabay tayon nainarom sanen manbalbalolaki ka ni diad India?” insulat nen Mukundbhai ed anak ton manaaral ed unibersidad diad Estados Unidos. “Pigara nin simba et sikato lay miasawa. Inisip kon nepeg mon nakabatan.”
Akin ya imbalita iya na ama ed anak to? Tutal, abayag lan pinakset nen Mukundbhai iyan paniinarowan bilang tinedyer. Sakey ni, say anak to so anem-taon lan walad States a mangaalay atagey ya edukasyon. Anggapo lay komunikasyon to’d bii legan na satan a panaon, tan amta pa itan nen Mukundbhai.
Sirin, akin a panpagaan ni itan? Lapud panisiaan nen Mukundbhai so reinkarnasyon, odino kianak-lamet.a No nibanbanan say paniinarowan da bilang tinedyer et lapud san-asawa ra ed linmalabas a bilay, karuksaan a pansianen ira, natan ta wala-lara’d-edad a man-asawa. Labay lambengat ya ipaamta nen Mukundbhai ed anak to so situasyon sakbay a sayan bii et naasaway sananey ni ed sayan bilay.
Isipen pa so sakey nin agawa. Nanirapan na apat-taon a bii so aminpigapigan impaka-ospital to diad Mumbai, India. Walay deperensiay balbulay puso to. Agla natepelan na mayaman ya atateng to so paniirap to. Balet oniay inrason da: “Kaukolan min awaten iya. Anganko ta walay bengatlan ginawa to ed linmabas a bilay a mankanepegan na ontan.”
Baleg so impluensya na panisia ed reinkarnasyon diad bilay na minilyon ed Hinduismo, Budhismo, Jainismo, Sikhismo, tan arum nin relihyon a nanlalapud India. Saray eksperiensia’d bilay—manlapud pangaro anggad pirmin panirap—so ipapasen iran nansumpalan na saray gawa ed linmabas a bilay odino bilabilay.
Dakel ed Mamasagur a daldalin so asagyat met ed doktrinan reinkarnasyon. Impatua na Amerikanan artista a si Shirley MacLaine so panisia to’d satan. Say managsulat a si Laurel Phelan na Vancouver, British Columbia, Canada, so angikuan a walaan na saray pakanodnonot ed 50 ya apalabas a bilay. Diad 1994 Gallup poll a ginawa na CNN/USA Today, masulok a 270 ed 1,016 a wala-la’d-edad so manisia ed reinkarnasyon. Say panisia ed reinkarnasyon so kabiangan met ed pakurang a New Age. Balet anton ebidensya so manusuporta’d saya?
“Saray pakanodnonot ed linmalabas a bilay!” so ebat na saray mananisia ed reinkarnasyon. Kanian, sanen ginmapon nawalaan so taloy-taon a si Ratana ed Bangkok na “saray pakanodnonot ed apalabas a bilay to bilang relihyoson akulaw ya inatey diad masulok lan 60 to,” maslak ed saray mangiimaton so anisia’d kipapasen to bilang paneknek na reinkarnasyon.
Balet, dinmaak so panduaruwa. Tan arum ed saray panangisalaysay ed pakanodnonot ya ontutukoy ed linmalabas a bilay so posibli.b Diad libro ton Hinduism: Its Meaning for the Liberation of the Spirit, oniay inkuan na Hindun pilosopo a si Nikhilananda a ‘saray eksperiensia kayari na patey so agnidemostra ed pakayari panag-isip.’ Ingen ipipilit ton “say doktrinan kianak-lamet so mas posiblin nagawa nen say agnagawa.”
Balet susuportaan ta na Biblia iyan bangat? Tan anton ilalo so iyoopresi na apuyanan a Salitay Dios parad inaatey?
[Saray paimano ed leksab]
a Ibabaga na The New Encyclopædia Britannica, a say “reinkarnasyon” et mankabaliksay “kianak-lamet na kamarerwa ed sakey odino onsulok nin mantutumbokan a kiwawala, nayarin diad too, ayep, odino, no arum, diad tanaman.” Say terminon “kianak-lamet” so nausar met pian diskribien iyan ekstra-ordinaryon bengatla, balet ta say salitan “reinkarnasyon” so maslak lan nauusar. Pansasalatan na pigaran diksyonaryo ed lenguahe na India so usar na sarayan salita.
b Nengnengen so pahina 5-7 na Hunyo 8, 1994, paway na Awake!
[Saray litrato ed pahina 4]
Kasin pandudusaan toray agawa ton kasalanan ed linmabas lan bilay to?