Report na Saray Manangiyabawag na Panarian

Ikakamang ed Teokratikon Organisasyon nen Jehova

APAKIWAS nensaman si propeta Isaias a mangiyabawag: ‘Kanian pagayagaen [igloria, NW] yo si Jehova . . . diad saray pulo na dayat.’ (Isaias 24:15) Momoriaen na Tastasi nen Jehova iray isla bilang kabiangan na “sankamundoan” ya angikuanan nen Jesus a “say ebanghelyo so kaukolan ya ipulong ya unona.”​—Mateo 24:14; Marcos 13:10.

Say Marquesas Islands so lugar a 1,400 kilometro ed amianen-bukig na Tahiti. Kabiangan iratan ed niarawin grupo na isla ed Abalaten a Pasipiko a tatawagen a French Polynesia. Tekep na mabuna, bulkanikon dalin tan ampetang, malinaew a klima, matubo-tubo iray tanaman ed sarayan isla. Anggaman ontan, say Marquesas so manbubungay sananey nin nengneng na bunga. Konsideraen pay kipapasen na pamilyan kinmiwas ed mensahe na Panarian diad isla na Hiva Oa.

Si Jean tan say akulaw to, si Nadine, so agmaliket ed nikuan a sibilisadon sosyedad ed Mamasagur a Europa a panaayaman da. Kanian dinisidi ran arawian itan ya okupadon estiloy-kabibilay diad inyalis da ed Marquesas Islands a kaibay anak da. Say balon abung da, a gawa’d kawayan, so niletneg ed nisulinek a lawak. Pian makasabi ra’d sankaasinggeran a komunidad, kaukolan dan akaren ed duaran oras so matibagkol a basbas ed palandey. Say sankaasinggeran a purok a walay doktor, eskuelaan, tan saliwan et taloran oras so kaarawi to no man-dyip.

Ag-interesado si Jean tan Nadine ed relihyon. Balet, napantongtongan da so nipaakar ed lapuan na bilay. Mabetbet a manitibukel ira na masuliwet iran teorya nipaakar ed ebolusyon. Balet ag-iratan amenek ed sikara.

Kayari na anem-taon a panbibilay dan niarawi, asurprisa ira‘d impanbisita na duaran Tastasi nen Jehova. Akabatan na Tastasi so kawalaan di Jean tan Nadine ed kabangibang iran taga-purok. Natural, nipaarap ed teorya na ebolusyon so tongtongan da. Diad liket na sanasawa, tarok-tarok na Tastasi so sakey a kopyay libron Life​—How Did It Get Here? By Evolution or by Creation?, ya impalapag na Tastasi nen Jehova. Aliketan si Jean tan Nadine ed impakawalaan day libron angipresinta’d maalwar a panangusisa no panon a niwalay bilay dia.

Agano ni’d saginonor, nigapo so panag-aral na Biblia. Diad loob na taloy taon, nantultuloy ya inmaligwas si Jean tan Nadine. Kombinsido ra a paganigani lan napagmaliw a paraiso iyay dalin. Sanen talora lay anak da, say panbiahi na apatiran oras pian makaatendi’d Kristiano iran miting ed Kingdom Hall so nagmaliw a peteg ya angat. Balet, ag-itan angamper ed iyaatendi ra. Diad kaunoran et insimbolo di Jean tan Nadine so didikasyon da ed si Jehova diad panamegley na bautismo ed danum. Sinumpal da iya ed kombension ya agawa’d sentron purok, no iner et walay pantok ya inmatendin 38 a totoo!

Pian natulongay melag a grupon manangipalapag na Panarian, dinisidi na pamilyan taynanan so niarawin ayaman da. Inmalis ira’d purok a walaay manaayam ya onliligada’d sanlibo, a panlilingkoran natan nen Jean bilang ministeryal ya aripen ed kongregasyon na Tastasi nen Jehova diman. Sayan pamilya, a datin sinmakda ed saray isla pian ibatikan so sibilisasyon et ipapasen dan pribilihyo so pakaromog ed mogmon tuan santuaryo, say teokratikon organisasyon nen Jehova.