Pakaliktar ed “Agew nen Jehova”

“Say agew nen Jehova sikato so baleg tan makapataktakot a tuloy; et siopa so makakpel?”​—JOEL 2:11.

1. Akin a say “makapataktakot a tuloy ya agew nen Jehova” et okasyon parad gayaga?

“MAKAPATAKTAKOT a tuloy”! Ontan so impaneskribe na propeta na Dios a Joel ed baleg ya “agew nen Jehova.” Balet, sikatayoran mangaaro ed si Jehova tan angidedika la’d sikato diad basiyan na dondon bagat nen Jesus so kaukolan ya agsukotsukot legan a manasingger lay agew nen Jehova. Talagan makapakebbiew itan ya agew, balet ta agew met itan na engranden kilalaban, agew a kibulos manlapud marelmeng a sistema na bengabengatla a manedetdet ed katooan ed minilenyo lan panaon. Diad panatalaran ed satan ya agew, kinerew nen Joel ed totoo na Dios a ‘manliket tan manggayaga; ta manggawa si Jehova na angkakabaleg a bengatla,’ balet ta inyarum to so panamaseguron: “Et nagawa naani, ya anggan siopa ya ontawag ed ngaran nen Jehova; nilaban naani.” Ontan met diad uksoyan na Panariay Dios, “wala ra naani so saray makataynan, singa sinalita nen Jehova, et dia ed saray natilak, wala naani so saray tawagen nen Jehova.”​—Joel 2:11, 21, 22, 32.

2. Diad pakasusumpal na saray gagala na Dios, anto so nagawa (a) diad “agew na Katawan” (b) ed “agew nen Jehova”?

² Say makapataktakot a tuloy ya agew nen Jehova so agniwewetwet ed “agew na Katawan” na Apocalipsis 1:10. Sayan onsaginonor ya agew so mangilalaktip ed kasumpalan na 16 a pasingawey ya adeskribe’d Apocalipsis kapitulo 1 ya anggad 22. Lalaktipen toy panaon na kasumpalay amin ya ebenton impasakbay nen Jesus bilang ebat ed tepet na saray babangatan to: “Kapigan so kagawa na sarayan bengalta, tan anto so tanda na kiwawalam tan ed konklusyon na sistema na bengabengatla?” Say mangatatawen a kiwawala nen Jesus so nabidbiran ed dalin diad panamegley na makapakigtot a ‘bakabakal, era-eras, panbubusolan, saray salot, tan kaugsan.’ Anggaman ondarakel irayan panermenan, nitarok la nen Jesus so ligliwa parad matakot-ed-Dios a totoo diad impangibaki to na modernon-agew iran babangatan to pian ipulong so “sayan maong a balita na panarian . . . ed amin a panaayaman a dalin parad pantasi ed amin a nasyon.” Insan, diad kapanpantokan na agew na Katawan, “say anggaan” na kaplesan a sistema na bengabengatla, say makapataktakot a tuloy ya agew nen Jehova, so ombetag. (Mateo 24:3-14, NW; Lucas 21:11) Satan la so agew nen Jehova ed pangipaakseb to na maples a panangukom ed abulok a mundo nen Satanas. “Saray tawen tan say dalin onyegyeg ira naani; balet si Jehova sikato naani so apireng na baley to.”​—Joel 3:16.

Kinmiwas si Jehova ed Agew nen Noe

3. Panon a saray kipapasen natan et mipara ed saramay agew nen Noe?

³ Saray kipapasen ed mundo natan so mipara ed “saray agew nen Noe” a masulok lan 4,000 taon ed apalabas. (Lucas 17:26, 27) Diad Genesis 6:5, nabasa tayo: “Si Jehova anengneng to a say kabaglan na too ed dalin abalbaleg, tan mauges labat a lanang so amin a pimorekdek na nonot na puso to.” Agaylay kipara to ed mundo natan! Say karelmengan, agum, tan inkaandi aro so onkakasmak ed amin a pasen. No maminsan et naisip tayon asabi la na katooan so sankaabebaan na inkauges to. Balet say impropesiya nen apostol Pablo nipaakar ed “saray kaunoran ya agew” et tuloy nin nasusumpal: “Saray totoo a mauges tan saray managsaol onuges laran onuges, a managsaol ira, tan nasaol ira met a dili.”​—2 Timoteo 3:1, 13.

4. Anto so epekto na palson panagdayew ed akauna iran panaon?

⁴ Akapangiter ta na inawa ed katooan so relihyon ed panaon nen Noe? Diad kasunian to, say wala lan apostatan relihyon ed saman so seguradon amaloor a tuloy ed aderal lan kipapasen to. Say inmunan atateng tayo so sinmuko ed palson bangat na “say daan ya uleg, a manngaran na Diablo tan si Satanas.” Diad onkomaduan kailalakan manlapud si Adan, agawan “ginmapo so totoo ya ontawag ed ngaran nen Jehova,” mapatnag diad agmapagalang a paraan. (Apocalipsis 12:9; Genesis 3:3-6; 4:26) Saginonor, saray rebelyoson anghel, ya angitalirak ed nikabkabiig a debosyon ed Dios, so nankinon too ta pian nagawa ray nisesebel a seksual a pirelasyonan ed makaroyroyon mamarikit na totoo. Sarayan bibii so angiyanak na memestison alan, a tatawagen a Nephilim, ya amairap tan angabuso ed katooan. Diad silong na sayan demonikon impluensia, ya “amin a laman pinauges to so kagagawa to ed dalin.”​—Genesis 6:1-12.

5. Mitukoyan ed saray ebento ed agew nen Noe, anton manamasakbay a simbawa so iiter nen Jesus ed sikatayo?

⁵ Anggaman ontan, minantini na sakey a pamilya so integridad ed si Jehova. Kanian, “inlaban [na Dios] si Noe, a pati arum nin pitora, sakey a managpulong na katunongan, dia ed impangitarok na delap ed mundo na saray momoan.” (2 Pedro 2:5) Satan a Delubio so angiyanino ed makapataktakot a tuloy ya agew nen Jehova, a mananda ed anggaan na sayan sistema na bengabengatla tan nipaakar ed satan et impropesiya nen Jesus: “Balet satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat. Tan unong ed saray agew nen Noe, ontan naani so isabi na Anak na too. Ta singa diad saraman ya agew ed arapen na delap nankakakan ira tan naninum ira, angaasawa ra tan akiasawa ra anggad agew ya inloob nen Noe ed biong. Tan agda akabkabatan angga ed sinmabi’ delap, et inyanor tora ya amin; ontan naani so isabi Anak na too.” (Mateo 24:36-39) Mipadpara so situasyon tayo natan, kanian sisimbawaen itayo nen Jesus a ‘manlikas ed inkasikatayo, tan manbantay tayo ed amin a panaon, a mikasi tayo pian ontalona itayo a nilaban ed sarayan amin a bengatlan nagawa.’​—Lucas 21:34-36.

Say Hudisyal a Pananusa nen Jehova ed Sodoma tan Gomorra

6, 7. (a) Anto so iyaanino na saray ebento ed agew nen Lot? (b) Anton pihon pasakbay so itatarok na saya ed sikatayo?

⁶ Manga nilasus taon kayari na Delap, sanen dinmakel laray kapolian nen Noe ed dalin, atasian a mismo nen matoor ya Abraham tan kaanakan ton Lot so sakey nin makapataktakot a tuloy ya agew nen Jehova. Manaayam ed saman si Lot tan say pamilya to ed syudad na Sodoma. Singa met say kaabay ton Gomorra, sayan syudad so inakmon na makapadimdimlan seksual ya imoralidad. Say materyalismo met so manunaan a panpapagaan, a diad kaunoran et angapekta ni ingen ed asawa nen Lot. Oniay imbaga nen Jehova ed si Abraham: “Say akis na Sodoma tan Gomorra et abalbaleg, tan . . . saray kasalanan da et ambelat iran tuloy.” (Genesis 18:20) Akikasi’d Jehova si Abraham a sigpayen to la’raman a syudad nisesengeg ed saray matunong a wadman, balet ta inyabawag nen Jehova ya anggapoy naromog ton anggan samploran matunong diman. Tinulongan na angheles ya imbaki na Dios si Lot tan duaran mamarikit to ta pian makabatik ed asingger a syudad a Zoar.

⁷ Antoy resulta? Diad pangikompara na “saray kaunoran ya agew” tayo ed saramay agew nen Lot, irereport na Lucas 17:28-30: “Ontan met so agawa ed saray agew nen Lot; angan ira, naninum ira, nansaliw ira, nanlako ra, nantanem ira, nanabung ira. Ingen dia ed agew ya impaway nen Lot ed Sodoma inmuran na apuy tan asupre nanlapu ed tawen, et dineral tora ya amin. Singa saya, ontan met naani ed agew a kipatnag na Anak na too.” Say desyang a pinawayan na Sodoma tan Gomorra ed saman a makapakebbiew ya agew nen Jehova so mangipapasabi na pihon pasakbay ed sikatayo diad sayan panaon na kiwawala nen Jesus. Say modernon kailalakan na katooan met so ‘nanggawa na lawan tan tinmumbok ed sananey a laman [parad agkasiporan a panangusar, NW].’ (Judas 7) Niarum ni, say imoral ya awawey ed sekso ed panaon tayo so sengegay dakel a “salot” ya impasakbay nen Jesus ed sayan agew.​—Lucas 21:11.

Inani na Israel so “Alimbusabos”

8. Diad anton laknab so akisipanan na Israel ed si Jehova?

⁸ Diad dugan panaon, pinili nen Jehova so Israel bilang say ‘pabpablien a pinagka-kayamanan a manuna nen saray amin a totoo, sakey a panarian na saray saserdote, tan sakey a masimpit a nasyon.’ Balet ta mantegteen iya ed ‘itulok da ed bosis to a tuatua tan em-emay sipanan to.’ (Exodo 19:5, 6) Tinoor da kasi iyan engranden pribilihyo? Maseguron andi! Tua, walaray matoor ed satan a nasyon a sitotoor a nanlingkor ed sikato​—di Moises, Samuel, David, Josafat, Ezekias, Josias, ontan met iray madeboton propeta tan propetesa. Ingen say nasyon bilang intiraminti so agmatoor. Asabi panaon, nankadua so panarian​—Israel tan Juda. Diad intiraminti et namparan saratan a nasyon so akibabali ed paganon panagdayew tan arum niran agmamapagalang ed Dios a kustombre na kabangibang iran bansa.​—Ezequiel 23:49.

9. Panon ya inukom nen Jehova so rebelyoson samploran-tribun panarian?

⁹ Panon ya inukom nen Jehova iray pamaakaran? Singa dati, sikatoy angipasakbay, a mitunosan ed prinsipyon imbalikas nen Amos: “Anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.” Mismon si Amos so angiproklama na abagey parad mamaamianen a panarian na Israel: “Akin et panpilalekan yo so agew nen Jehova? Sikato so bilunget, et aliwan liwawa.” (Amos 3:7; 5:18) Niarum ni, inyabawag na kaparan propeta nen Amos ya Oseas: “Lapu ed nantanem ira na dagem manani ra naani na alimbusabos.” (Oseas 8:7) Nen 740 K.K.P., inusar nen Jehova so Asiryanon armada pian pankibalataren so mamaamianen a panarian na Israel ed amin a panaon.

Pikuekuentaan nen Jehova ed Apostatan Juda

10, 11. (a) Akin ya agnilabay nen Jehova a perdonaen so Juda? (b) Antoran mabanday a bengatla so amauges ed nasyon?

¹⁰ Angibaki met si Jehova na saray propeta to ed mamaabalaten a panarian na Juda. Siansia, saray arari na Juda a singa si Manases tan say kasublayan ton Amon, so nantultuloy a nanggawa na mauges ed imaton To, a nampaagos na ‘andi kasalanan a dala a sankarakelan tan nanlingkor ed saray talintao tan nampikasi ed sikara.’ Anggaman nanggawa na maptek ed imaton nen Jehova so ilalak nen Amon a si Josias, saray tinmumbok ya ari, pati met iray totoo, so nigalet lamet ed karelmengan, a sengegay ‘agpanlabay nen Jehova a mamerdona ed sikara.’​—2 Arari 21:16-21; 24:3, 4.

¹¹ Inyabawag nen Jehova ed panamegley na propeta ton Jeremias: “Sakey a makapakelaw tan makapakebbiew a bengatla so agawa dia ed dalin. Saray propeta manpropeta ra a sititila, tan saray saserdote manuley ira lapu ed saray gawa ra; et say baley ko sikato so aroen to ya ontan; et anto naani gawaen yo ed kasampotan to?” Say nasyon na Juda so pirmin nankasalanan ed dala, tan saray totoo to so mauges diad impantakew, impanpatey, impikalugoran, impansambay katilaan, impandayew ed arum a dirios, tan impanggawa na arum niran mabanday a bengatla. Say templo na Dios so nagmaliw ya “ayaman na saray matatakew.”​—Jeremias 2:34; 5:30, 31; 7:8-12.

12. Panon a dinusa nen Jehova so binmeneg a Jerusalem?

¹² Inyabawag nen Jehova: “Yakar ko naani so mauges a manlapu ed amianen [Caldea] tan sakey a baleg a pamagbag.” (Jeremias 4:6) Kanian, intarok to so Babilonian Pakayari na Mundo ed saman a panaon, “[say] babatla na amin a dalin,” pian deraley binmeneg a Jerusalem tan say templo to. (Jeremias 50:23) Nen 607 K.K.P., kayari pirmin impangubkob, naplag so syudad ed makapanyarin armada nen Nabucodonosor. “Diad saman say ari ed Babilonia pinatey to so saray anak a lalaki nen [Arin] Sedekias ed Ribla ed imaton na saray mata to; ontan met say ari ed Babilonia pinatey toray ankabli na Juda. Laut ni sinukit to so saray mata nen Sedekias, tan sikato so binalor to ed saray golonggolong, pian sikato so itarok to ed Babilonia. Et saray Caldeo pinoolan da so abung na ari, tan saray abung na baley, ed apuy, tan inggeba ra so saray bakor na Jerusalem. Diad saman si Nabuzardan a kapitan na bantay inyakar to a dinakep ed Babilonia so kera ed baley ya atilak ed syudad, saray binmatik met a pinmelag ed sikato, tan saray kera ed baley ya atilak.”​—Jeremias 39:6-9.

13. Sioparay nisalba ed agew nen Jehova nen 607 K.K.P., tan akin?

¹³ Talagan makapataktakot a tuloy ya agew! Ingen, pigaran kakamarerwa a tinmulok ed si Jehova so kabiangan na saramay niliktar ed satan a mangapuy-apoy a panangukom. Kaiba ed saraya iray aliwan-Israelitan Recabita, a midumaan ed saray taga-Judea et angipanengneng iray mapaabeba tan matulok ya awawey. Nisalba met so matoor ya eunokon Ebed-melec, ya angilegyas ed si Jeremias manlapud mapitek a bobun, tan say matoor ya eskriba nen Jeremias, si Baruc. (Jeremias 35:18, 19; 38:7-13; 39:15-18; 45:1-5) Ontan ira so angiyabawagan nen Jehova: “Amtak so saray nonot a nonoten ko a nipaakar ed sikayo, . . . nonot ira na kareenan, aliwa a mauges, a mangiter ed sikayo na ilalo ed kaunoran a kasampotan yo.” Satan a sipan so walaan na melag a kasumpalan nen 539 K.K.P. sanen saray matakot ed Dios a Judio so imbulos nen mananakop na Babilonia, si Arin Ciro, tan pinmawil ira pian ipaalagey lamet so syudad tan templo na Jerusalem. Saraman natan so pinmaway la ed Binababilonian relihyon tan nipawil la ed puron panagdayew nen Jehova so makapanilalo met ed maglorian arapen na magnayon a kareenan ed nipawil a Paraiso nen Jehova.​—Jeremias 29:11; Salmo 37:34; Apocalipsis 18:2, 4.

Say Inmunan-Siglon “Baleg ya Irap”

14. Akin a permanentin intalirak nen Jehova so Israel?

¹⁴ Ibaling tayo pay imano tayo ed inmunan siglo K.P. Diad satan a panaon et saray nipawil a Judio so naplag lamet ed apostasya. Imbaki nen Jehova so bogbogtong ya Anak to ed dalin pian magmaliw ton Alanaan a Sakey, odino Mesias. Diad baetan na saray taon 29 tan 33 K.P., nampulong si Jesus ed intiron dalin na Israel, a nankuan: “Mansibkel kayo; ta asingger la so panariay tawen.” (Mateo 4:17) Niarum ni, anugyop tan angipasal na saray babangatan a miiba’d sikato diad pangiproklama na maong a balita na Panarian. Antoy reaksion na saray manuley na Judios? Inayew day Jesus tan diad kaunoran et ginawa ray sankabandayan a krimen diad makapaot-ot ya impamatey da ed sikato ed panamairapan a kiew. Impulisay nen Jehova iray Judio bilang totoo to. Natan say inkitalirak na satan a nasyon so permanenti la.

15. Antoy pribilihyon sumpalen na saray magbabawin Judio?

¹⁵ Diad agew na Pentecostes 33 K.P., angikalbo na masanton espiritu so apaolin Jesus, tan saya so amakayari ed saray babangatan to a makapansalitay nambabangil a pansasalita ed saray Judio tan proselita a tampol a nantitipon diman. Diad pangipapaarap ed ulop, inyabawag nen apostol Pedro: “Sayan Jesus pinaoli Dios ed bilay, a sikato so natasian mi ya amin. . . . Amtaen a peteg sirin, na lapag ya abung na Israel, a sayan Jesus ya impasak yo ed krus, ginawa na Dios a sikato so Katawan tan Kristo.” Antoy reaksion na matua iran Judio? “Nanermen ira ed kapusoan da,” nagbabawi ed saray kasalanan da, tan nampabautismo. (Gawa 2:32-41) Pinmeles so panangipulong nipaakar ed Panarian, tan diad loob labat na 30 taon et nikayat la itan ed “amin a pinalsa ed leksab na tawen.”​—Colosas 1:23.

16. Panon ya inmaneobra nen Jehova iray ebenton angipaarap ed pangipaakseb to na panangukom ed natural ya Israel?

¹⁶ Asabi la natan so panaon ed pangipaakseb nen Jehova na panangukom ed nitalirak a totoo to, say natural ya Israel. Nilibolibo, a nanlalapud saray nasyon ed amin a parti ed saman a kabkabat a mundo, so dinmagsa ed Kristianon kongregasyon tan nilanaan bilang espiritual ya “Israel na Dios.” (Galacia 6:16) Balet, saray Judio ed saman so nigalet ed kurang na panamusol tan sektaryanon karawalan. Kasunian na insulat nen Pablo ed pagmaliw a ‘matulok ed saray atagtagey a pakauley,’ butar-butar iran nanrebeldi ed pakayari na Roma a manguuley ed sikara. (Roma 13:1) Mapatnag a si Jehova so angimaneobra ed saray tinmumbok ya agawa. Diad taon a 66 K.P., saray Romanon armada ed silong nen Heneral Gallus so inmabanti pian kubkobey Jerusalem. Say onlulusob a Roma so akaloob la ed syudad ya angga la’d paneral ed bakor na templo. Unong ed rekord nen Josephus ed awaran, talagan walay kairapan ed syudad tan ed totoo.a Balet ta bigbiglan saray onlulusob a sundalo so inmalis. Saya so angiyabuloy ed saray babangatan nen Jesus ya ‘ombatik ed saray palandey,’ a singa nisimbawa ed propesiya ton nirekord ed Mateo 24:15, 16.

17, 18. (a) Diad panamegley na anton kairapan a sinimbangan nen Jehova na inkahustisya iray Judio? (b) Anton laman so ‘nilaban,’ tan antoy iyaanino na saya?

¹⁷ Balet, say nagnap a kipaakseb na panangukom nen Jehova ed kapantokan na kairapan so diad arapen ni. Nen 70 K.P., saray Romanon armada, a natan et nisilong la ed si Heneral Tito, so pinmawil ta pian onataki. Diad sayan bekta et say panlalaban so piho! Saray Judio, so manbabakalan la, so agmakalaban ed saray Romano. Say syudad tan say templo to so sigpot ya inggeba. Masulok a sakey milyon a kakatakatat a Judio so nanirap tan inatey, manga 600,000 a bangkay so nibuntok ed paway na wangalay syudad. Kayari inkagba na syudad, 97,000 a Judio so kinautibo, dakel so apapatey diad saray gladyatoryal ya eksena. Talagan, say mogmon laman a nisalba ed saray taon na satan a kairapan et saramay matulok a Kristianon binmatik ed palandey ed labas na Jordan.​—Mateo 24:21, 22; Lucas 21:20-22.

¹⁸ Kanian, say baleg a propesiya nen Jesus nipaakar ed “say konklusyon na sistema na bengabengatla” so walaan na inmunan kasumpalan, a sinmabi ed agew nen Jehova ed kasimbangan ton inkahustisya ed rebeldin Judion nasyon nen 66-70 K.P. (Mateo 24:3-22) Ingen, satan labat so mangiyaanino ed “arapen na isabi na baleg tan makapataktakot ya agew nen Jehova,” say pinal a kairapan a ngalngali la mangakmon ed intiron mundo. (Joel 2:31) Panon kan “nilaban”? Ibaga na ontumbok ya artikulo.

[Paimano ed leksab]

Tepetepet Parad Panrepaso

◻ Panon a say “agew na Katawan” so mitukoyan ed “say agew nen Jehova”?

◻ Diad panrepaso ed agew nen Noe, anton pasakbay so nepeg tayon talinengen?

◻ Panon a say Sodoma tan Gomorra so mangiiter na mabiskeg a leksion?

◻ Sioparay nilaban nen inmunan-siglon “baleg ya irap”?

[Saray litrato ed pahina 15]

Angitarok si Jehova na kiliktar parad saray pamilya nen Noe tan Lot, pati diad 607 K.K.P. tan 70 K.P.