Mantultuloy a Manakar a Kaibay Dios
“Manakar kayo ya unong ed espiritu, tan agyo uunoren so saray kaalakan na laman.”—GALACIA 5:16.
1. (a) Diad utel na antoran kipapasen tan kaunongan kabayag a si Enoc et nanakar a kaibay Dios? (b) Kaunongan kabayag a nanakar si Noe a kaibay Dios, tan antoray ambelat a responsabilidad to?
IBABAGA ed sikatayo na Biblia a si Enoc so “akiulop-ulop ed [nanakar a kaibay tuan, NW] Dios.” Anggaman aliber na totoon makapakigtot so panagsalita tan agmaridios so kondukta ra, sikatoy nansiansian nanakar a kaibay Dios anggad kasampotay bilay to ed edad a 365 a taon. (Genesis 5:23, 24; Judas 14, 15) Si Noe met so “akiulop-ulop ed [nanakar a kaibay tuan, NW] Dios.” Ginawa to itan bangta papabalegen toy pamilya to, bangta pidedenengay mundon naimpluensiaan na rebelyoson angheles tan marawal ya ilalak da, tan bangta aasikasoey amin a detalyey kipaalagey na baleg a biong a babaleg nen say dinanman a luluganan a pan-dayat ed inmuunan panaon. Sikatoy nantultuloy a nanakar a kaibay Dios kayari Delubio, anggan sanen linmesa lamet so rebelyon ed si Jehova diad Babel. On, nantultuloy si Noe a nanakar a kaibay Dios anggad impatey to ed edad a 950 a taon.—Genesis 6:9; 9:29.
2. Anto so kabaliksan na ‘panakar a kaibay Dios’?
2 Sano nibabagan sarayan totoo na pananisia so “nanakar” a kaiba na Dios, uusaren na Biblia so termino diad piguratibon pantalos. Labay ton ibaga et si Enoc tan si Noe so kinmiwas ed paraan a pakapatnagay mabiskeg a pananisia ed Dios. Ginawa ra so ingganggan nen Jehova ed sikara tan intunos day bilay da unong ed pikabat da ed sikato diad saray impideneng to ed sankatooan. (Ikompara so 2 Awaran 7:17.) Agda labat basta imbalikas so walad kaisipan dan miabobon ed imbaga tan ginawa na Dios noagta sinumpal da met so amin a bengatlan kinaukolan to—aliwa lambengat a pigara’d satan noagta amin na satan diad laknab a posibli parad sikara bilang ag-ayadyarin totoo. Kanian si Noe, alimbawa et ginawa to so eksakton ingganggan na Dios ed sikato. (Genesis 6:22) Agpinalumbasan nen Noe iray nidirehi’d sikato, tan agmet mapaulyan a tayamtayam. Bilang sakey a nanggayagaan toy inkamaapit ed si Jehova, bulos ed panagpikasi ed Dios tan papablien toy madibinon panangidirehi, sikato so nanakar a kaiba na Dios. Ontan ta met so gagawaen mo?
Sakey ya Agmanguman a Kurso ed Bilay
3. Anto so importantin tuloy parad amin a dedikado tan bautismadon ariripen na Dios?
3 Makapaligsa so pakaimano’d totoo ya onggapon manakar a kaiba na Dios. Diad pangala ra na positibon kundang a mitunosan ed linawa nen Jehova, nipapatnag day pananisia, no andi itan et anggapoy makapampaliket ed Dios. (Hebreos 11:6) Agaylan gayaga tayo a kada taon, diad promedyo ed apalabas a limay taon et masulok a 320,000 totoo so angidedika lay inkasikara ed si Jehova tan angipresinta lay inkasikara’d bautismo ed danum! Balet ta importanti met parad sikara tan parad amin tayo so pantultuloy a manakar a kaibay Dios.—Mateo 24:13; Apocalipsis 2:10.
4. Anggaman angipanengneng ira na pananisia, akin a dakel ed Israelitas a tinmaynan ed Ehipto et ag-akaloob ed Insipan a Dalin?
4 Diad agew nen Moises, kaukolan so pananisia parad Israelitan pamilya pian selebraan so Paskua ed Ehipto tan pangiwalsik na dala ed saray pasindeg tan panoksolan na puerta na abung da. (Exodo 12:1-28) Balet ta say pananisia na dakel so nipalir-palir sanen anengneng day armada nen Faraon a manasingger la’d sikara ed Ambalangan Dayat. (Exodo 14:9-12) Ipapanengneng na Salmo 106:12 a nen maligen dan dinalan so amagan pinagkadatal na dayat tan atasian so impanigway na saray daluyon ed armada na Ehipto, ‘sinisia da lamet iray salita’ nen Jehova. Balet, ag-abayag kayari na satan diad kalawakan et ginapoan na Israelitas ya ireklamoy iinumen a danum, tagano, tan kipapakurang da. Say negatibon imbalita na 10 ed 12 espiya a pinmawil a nanlapud Insipan a Dalin so angebbiew ed sikara. Diad onman iran sirkumstansia, a singa kuan na Salmo 106:24, ya “ag-ira anisia ed salita [na Dios].” Labay da so ompawil la’d Ehipto. (Numeros 14:1-4) Antokamay walan pananisia ra et pinmatnag labat sano makakanengneng ira na ekstraordinaryon panangipatnag na madibinon pakayari. Ag-ira nantultuloy a nanakar a kaibay Dios. Bilang resulta, saraman ya Israelitas so ag-akaloob ed Insipan a Dalin.—Salmo 95:10, 11.
5. Panon a say 2 Corinto 13:5 tan Uliran 3:5, 6 so mitukoyan ed panakar a kaibay Dios?
5 Sisimbawaen itayo na Biblia: “Dalepdep yo ed sikayon dili, no wala kayo ed pananisia; sali yo so sikayon dili.” (2 Corinto 13:5) Diad pagmaliw a ‘wala ed pananisia’ et kabaliksan toy itumbok ed tugyop na Kristianon sisisiaen. Makana iya no labay tayoy ontalona diad panakar a kaibay Dios ed amin ya agew na bilay tayo. Pian manakar a kaibay Dios, nepeg tayon agamilen met so kualidad na pananisia, sigpot a manmatalek ed si Jehova. (Uliran 3:5, 6) Dakel iray pakakulabotan tan patit a mangalot ed saramay onsaew a manggawa ed satan. Antoray pigara ed saraya?
Paliisay Kalot na Dilin-Kompiyansa
6. Anto so amta na amin a Kristiano nipaakar ed pilalawanan tan pikakalugoran, tan antoy liknaan da nipaakar ed sarayan kasalanan?
6 Amta na balang sakey a nanaral na Biblia, ya angidedikay bilay to ed si Jehova, tan nampabautismo a kokondenaen na Salitay Dios so pilalawanan tan pikakalugoran. (1 Tesalonica 4:1-3; Hebreos 13:4) Saratan so miabobon a saya so maptek. Getma ra so manbilay a mitunosan ed satan. Ingen, siansian say seksual ya imoralidad so sakey ed sankaepektiboan a kalot nen Satanas. Akin?
7. Diad saray Patar na Moab, panon ya alanor iray Israelitan lalaki ed konduktan amta ran makapuy?
7 Diad gapo et saramay alanor ed ontan ya imoral a kondukta et agda pa plaplanoen a gawaen itan. Anganko ta tua met itan ed saray Israelita ed saray Patar na Moab. Parad Israelitan lalaki a sinmawa la’d kabibilay ed kalawakan, saray Moabita tan Midianitan bibii ya anangguyor ed sikara et diad inmuna so singano makaaro tan maparawes ira. Balet antoy agawa sanen inawat na Israelitas so imbitasyon a pituyaw ed totoon manseserbi ed Baal ya aliwan si Jehova, totoon papaulyanan daray mamarikit da (anggano ed saray prominentin pamilya) a mi-sekso’d lalakin agda asawa? Sanen saray lalaki ed kampo na Israel et ginapoan dan moriaen so ontan iran pililimog bilang panpilpilalekan, sikaray atangguyor a manggawa na bengabengatlan amta ran makapuy, tan saya so sengegay impatey da.—Numeros 22:1; 25:1-15; 31:16; Apocalipsis 2:14.
8. Diad agew tayo, anto so nayarin mangitonton ed sakey a Kristiano ed seksual ya imoralidad?
8 Anto kasi rason a napelag so sakey a too ed mipadparan kalot ed panaon tayo? Anggaman amta to so graben pansumpalan na seksual ya imoralidad, no agto met bidbiren so kapeligroan na dilin-kompiyansa, anganko ta naabuloyan toy inkasikaton niiyan ed situasyon a say katangguyor ed gawan-mauges et nadaeg toy kaisipan to.—Uliran 7:6-9, 21, 22; 14:16.
9. Antoran Makasulatan a pasakbay so makasalimbeng ed sikatayo sumpad imoralidad?
9 Diretsaan a papasakbayan itayo na Salitay Dios ya agpalilingon manisip a sikatayoy mabisbiskeg ya agtayo naapektoay mauges a panlilimog. Laktipen na satan so panagbantay ed saray programay telebisyon a mangipaparungtal ed saray bilay na imoral a totoo tan inengneng ed saray magasin a sagyaten toy imoral a pilpilalek. (1 Corinto 10:11, 12; 15:33) Anggan say pilimog ed saray kapananisiaan diad silong na makapuy iran sirkumstansia et makapangipaarap ed grabe iran problema. Mabiskeg so tangguyor na mansunian a sekso. Tekep na maaron panangiyansakit a say organisasyon nen Jehova sirin so mamapasakbay sumpad pambukbukor tan andi’d pakaimanon piiba ed agkasekson ag-asawa odino agkapamilyaan. Ta pian makapantultuloy a manakar a kaibay Dios, kaukolan tayon paliisan so kalot na dilin-kompiyansa tan talinengen so manamasakbay a konseho to’d sikatayo.—Salmo 85:8.
Agka Pakokontrol ed Takot ed Too
10. Panon a say “takot ed too” et sakey a pakakalotan?
10 Sakey nin kaatapan so ipapaamta na Uliran 29:25, a kuanto: ‘Say takot ed too mantarok na kalot.’ Mabetbet a say kalot na sakey ya umaanop et sasaglawien to so pangalot a mamikkel ed tenger odino lubir a mamalor ed saray sali na sakey ya ayep. (Job 18:8-11) Say takot ed too so mipadparan mamuger ed abilidad na toon bulos a mansalita tan onkiwas komon ed paraan a mamaliket ed Dios. Say pilalek a paliketey arum so normal, tan say inmawet a pangibaliwala’d isipen na arum a totoo so agmaka-Kristiano. Balet nakaukolan so inkabalansi. Sano say panpaga ed posiblin reaksion na arum a totoo et pansengegay pakagawa na sakey ed isesebel na Dios odino agpanggawa ed igaganggan na Salitay Dios, satan ya indibidual so nakakalotan la.
11. (a) Anto so proteksion sumpad pangiyabuloy ed takot ed too a mangontrol ed sakey? (b) Panon a natutulongan nen Jehova so ariripen ton mipupuligesgesan ed takot ed totoo?
11 Say proteksion manlapud ontan a kalot so onsasaral, aliwan diad kasiporan a disposisyon na sakey, noagta diad ‘pangipasen toy ilalo to ed Jehova.’ (Uliran 29:25b) Diad panagmatalek ed Dios et anggan say toon mabaing so makapagmaliw a makpel tan agnagiing. Anggad napapaliberan itayo na saray desdes na sayan satanikon sistema na bengabengatla, kaukolan tayo so manbantay sumpad pakakalot ed takot ed too. Anggaman si propetan Elias et walaan na maabig a rekord na makpel a serbisyo, sanen pinagyaw nen Jezebel ya ipapatey, diad takot et tinmaynan. (1 Arari 19:2-18) Lapud desdes, diad takot et imburi nen apostol Pedro ya agto kuno kabat si Jesu-Kristo, tan pigaran taon ed saginonor et inabuloyan toy takot a sengegay inkiwas ton sumlang ed pananisia. (Marcos 14:66-71; Galacia 2:11, 12) Balet, namparan di Elias tan Pedro so angawat ed espiritual a tulong tan, tekep na kompiyansa ed si Jehova, nantultuloy a nanlingkor ed Dios tekep na panangabobon.
12. Antoran modernon-agew ya alimbawa so mangipapanengneng no panon a natutulongan iray indibidual a naarawiay agpakapamaliket ed Dios lapud takot ed too?
12 Dakel ed ariripen nen Jehova ed agew tayo so makakaaral met no panon a talonaay pakakalot ed takot. Oniay inaksobi na sakey a tin-edyer a Tasi diad Guyana: “Diad eskuelaan et say panresisti’d desdes na kalimoglimog so mabiskeg.” Balet ta inyarum to: “Ontan met so pananisiak ed si Jehova.” Sanen sikatoy niludlurey na maestro to ed arap na intiron klase nisengeg ed pananisia to, kalmadon nampikasi ed si Jehova. Saginonor diad pribada et mataktikan pinulongan toy maestro to. Legan na imbisita’d baley to diad Benin, sakey a balolakin aaralen to niray kakaukolanen nen Jehova so determinadon maneral ed idolon inukit na mismon ama to parad sikato. Amta na balolaki a say idolo et andiay bilay, tan agto itan tinakotan, balet kabat to met ya ompan sikatoy pateyen na mansyodot iran kabaryoan. Sikatoy nampikasi ed si Jehova, insan diad labi et inawit toy idolo ed kasupokan tan imbantak itan. (Ikompara so Uko-ukom 6:27-31.) Sanen ginapoan na sakey a bii ed Dominican Republic so manlingkor ed si Jehova, sikatoy impanpili na masiken to—sikato odino si Jehova. Pinagyaw ni ingen na laki a sikatoy idiborsyo to. Kasin say takot so sengegay pangikaindan to’d pananisia to? Inyebat to: “No nan-laki ak, ombaing ak, balet ta agak ombaing a manlingkor ed Jehova a Dios!” Nantultuloy a nanakar a kaibay Dios, tan asabi panaon et akiulop la’d sikato so masiken to ed panggawa na linawa nen Jehova. Tekep na sigpot a panagmatalek ed mangatatawen ya Ama tayo, napaliisan tayo met so pangiyabuloy ed takot ed too a pansengegay agtayo panggawa ed amta tayon mamaliket ed si Jehova.
Arawian so Panleglemew ed Konseho
13. Anton kalot so nipapasakbay ed sikatayo ed 1 Timoteo 6:9?
13 Anggaman arum ed saray kalot ya uusaren na saray umaanop et adesinyon maningkat ed dinanman ya ayep a nibanan ondalan ed sakey a lugar, arum a kalot so maningganyo ed ayayep diad panamegley na makapalikdo tan makapaayat a tapang. Parad dakel a totoo et ontan iray kayamanan. (Mateo 13:22) Diad 1 Timoteo 6:8, 9, papasesegen itayo na Biblia a pankontentoay tagano tan kawesen. Insan ipapasakbay to: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.”
14. (a) Anto so nayarin mamuger ed sakey a too ed pangipapuso ed konsehon pankontentoay pantagano tan kawesen? (b) Panon a say lingon pananguker ed kaykayamanan et sengeg na panleglemew na sakey ed pasakbay a nirekord ed 1 Timoteo 6:9? (c) Diad anton dalan a say “kilalawan na mata” so mamulag ed pigara ed pakakalotan a manatalaran ed sikara?
14 Anggaman ed sayan pasakbay, dakel so nakakalotan lapud agda iyaaplika so konseho ed sikaran dili. Akin? Agta kasin say kinon so manadagdag ed sikaran panpilitay itumbok ed istiloy-bilay a mankakaukolan na nagkalalo ni nen say “pantagano tan kawesen” ya ipapaseseg ed sikatayo na Biblian pankontentoan? Kasin leleglemewen day pasakbay na Biblia lapud parad say sikara et say kayamanan et unong ed kakayarianen na mayamyaman a totoo? Idadatak labat na Biblia so determinasyon a manpayaman a misunian ed pagmaliw a pankontento ed pantagano tan kawesen. (Ikompara so Hebreos 13:5.) Kasin say “kilalawan na mata”—say panpilalek ed bengabengatlan nanenengneng da, ya anggan diad pangisakripisyo ni ingen ed espiritual iran gegemtan—so sengegay panggawa ra’d tuan panagdayew ya onkomadua labat? (1 Juan 2:15-17; Aggeo 1:2-8) Agaylan mas maliket iramay mangipapapuso ed konseho na Biblia tan manakar a kaibay Dios diad pangiyuuna ra ed serbisyo ed si Jehova ed bilay da!
Pananalona ed Saray Kapagaan ed Bilay
15. Antoran situasyon so pansengegay kapagaan ed dakel a totoo nen Jehova, tan ed anton kalot so nepeg a panalistoan tayo sano nisilong ed ontan a pakadesdesan?
15 Mas kaslakan ni nen say determinasyon a manpayaman et say kapagaan ed pangamor na saray nakakaukolan ed bilay. Dakel ed ariripen nen Jehova so manbibilay a dagdaiset labat so kayarian da. Mamapasya ran mantrabaho ed loob na dakel ya oras pian nawalaan labat na kawesen, lugar a napanugipan na pamilya ra ed labi, tan anggan panon et walay tagano parad sakey ya agew. Pipupuligesgesan na arum iray problema lapud sakit odino itatatken dan mismo odino saray kapamilyaan da. Agaylay inomay na pangiyabuloy ed saratan a sirkumstansia a mamuger ed espiritual ya intereses ed bilay da!—Mateo 13:22.
16. Panon itayon tulongan nen Jehova a natalonaan iray pakadesdesan ed bilay?
16 Tekep na aro, ibabaga ed sikatayo nen Jehova so nipaakar ed pakainawaan a naeksperiensia ed silong na Mesianikon Panarian. (Salmo 72:1-4, 16; Isaias 25:7, 8) Tutulongan to itayo met a talonaay pakadesdesan ed bilay natan diad pangokonseho to ed sikatayo no panon a pansiansiaen a duga iray prayuridad tayo. (Mateo 4:4; 6:25-34) Diad panamegley na rekord no panon ton tinulongan iray ariripen to ed apalabas a panaon, napapaseguroan itayo nen Jehova. (Jeremias 37:21; Santiago 5:11) Napapabiskeg to itayo ed pakaamtan, antokamay kairapan ya onsabi ed sikatayo et lawas wadtan so panangaro to parad matoor ya ariripen to. (Roma 8:35-39) Diad saramay manmamatalek ed si Jehova, iyaabawag to: “Ag taka naani taynan, tan ag taka naani ikaindan.”—Hebreos 13:5.
17. Mangiter na saray alimbawa no panon a saray indibidual a manasagmak na pirmin kairapan et akasarag ed pantultuloy a panakar a kaibay Dios.
17 Apabiskeg ed sayan pikakabat, tuloy-tuloy iray Kristiano a manaakar a kaibay Dios imbes ya ombaling ed minumundo iran dalan. Sakey a kaslakan a minumundon pilosopiya na saray pobri ed dakel a daldalin et aliwan panagtakew kuno so pangala’d kayarian na mas dakel to ni ta pian taganoey pamilyam. Balet saramay manaakar diad panamegley na pananisia so mangitatalirak ed ontan a panmoria. Importanti ed sikaray abobon na Dios a manuna ed amin tan maniilalo’d sikaton tumangan toy matuan kondukta ra. (Uliran 30:8, 9; 1 Corinto 10:13; Hebreos 13:18) Nalmoan na sakey a balo ed India a say mabulos a pantrabahon atekepay inkaabilidar so amatalona’d sikato. Imbes a pansyodotan toy kipapasey panagbilay to, amta to a no iyuna toy Panarian na Dios tan say inkatunong to ed bilay to et bendisionan nen Jehova iray sagpot to ed pangamor na saray nakakaukolan to tan ed anak to. (Mateo 6:33, 34) Nilibulibo diad intiron dalin so mangidedemostra ya, antokaman so kairapan a nasagmak da, si Jehova so salimbeng tan kiagelan da. (Salmo 91:2) Tua ta met itan ed sika?
18. Anto so tombok ed pakaarawi’d saray kalot na mundo nen Satanas?
18 Basta manbibilay tayo ed kaplesan na sistema na bengabengatla, wadtan iray kalot ya arawian. (1 Juan 5:19) Ipapaamta na Biblia iraya tan ipapanengneng to’d sikatayo no panon ya arawian iratan. Saramay talagan aaroen day Jehova tan walaan na mabunigas a takot a sikatoy napaermen so makayarin manalona ed ontan iran kalot. No sikaray “manakar ya unong ed espiritu,” ag-ira onsuko ed minumundon dalan. (Galacia 5:16-25) Parad saramay talagan itutukoy day bilay da unong ed relasyon da ed si Jehova et wadtan so engranden ilalon panakar a kaibay Dios, a panggayagaay inkamaapit ed sikato a maando.—Salmo 25:14.
Anto so Komento Yo?
◻ Panon a say dilin-kompiyansa et sakey a kalot?
◻ Anto so makasalimbeng ed sikatayo sumpad pangontrol ed sikatayo na takot ed too?
◻ Anto so nayarin pansengegan na agtayo pakapangiyaplika ed konseho ed kapeligroay panpayaman?
◻ Anto so mamasarag ed sikatayon naarawian so pakakalot ed saray kapagaan ed bilay?
[Litrato ed pahina 16, 17]
Dakel so mantutultuloy a manaakar a kaibay Dios legay bilay